Aoga Sa: Aoaoga Faavae o le Talalelei
Lesona 2: ‘Ua Vivii Atu Lo’u Loto i le Alii’

Lesona 2

“Ua Vivii Atu Lo’u Loto i le Alii”

Luka 1; Mataio 1

Faamoemoega

Ina ia fesoasoani i tagata o le vasega ia atiina ae se faatuatua tele ia Iesu Keriso e ala lea i le suesueina o olaga o Elisapeta, Sakaria, Ioane le Papatiso, Maria ma Iosefa.

Sauniuniga

  1. Faitau, mafaufau loloto, ma tatalo e uiga i mau nei:

    1. Luka 1:5–25, 57–80. Sa faaali le agelu o Kaperielu ia Sakaria ma faapea atu, i le tali atu i talosaga, o le a fanau mai e le toalua o Sakaria o Elisapeta, se tama tama. O lenei atalii e faaigoa ia Ioane, o le a saunia tagata mo le Alii. Ua fesiligia e Sakaria upu a Kaperielu ma ua gugu o ia. Ua to Elisapeta a ua matua o ia, ma ua fanau mai ai Ioane. Sa faaalia e Sakaria le toe faafouina o lona faatuatua a o ia valoia le misiona a Ioane.

    2. Luka 1:26–56; Mataio 1:18–25. Sa tau atu e le agelu o Kaperielu ia Maria o le a avea o ia ma tina o le Alo o le Atua. Sa olioli Maria ma le tama a le uso o lona tina o Elisapeta i le talafou e uiga i le afio mai o le Faaola. Sa iloa e Iosefa, o le a fanau mai e Maria le Faaola.

  2. Afai e maua ata nei, ona faaaoga lea i le taimi o le lesona: O Le Talaiga a Ioane i le Vao (62132; Taga o Ata o le Talalelei 207) ma le O Le Folafolaga: O Le Agelu o Kaperielu o Loo Faaali ia Maria (Taga o Ata o le Talalelei 241).

  3. Fautuaga mo le aoaoina atu: Afai e aoao atu se tagata i le mana o le Agaga Paia, “e moliooina ai i le mana o le Agaga Paia i loto o le fanauga a tagata” (2 Nifae 33:1). O le lagonaina o le faatosinaga a le Agaga o le a faamalosia ai molimau a tagata o le vasega, o lo latou alofa mo le Alii ma isi, ma a latou tautinoga ina ia ola amiotonu. Ia manatunatu ma le agaga tatalo i mea e mafai ona e faia e valaaulia ai le Agaga i le taimi o lesona taitasi. (Tagai itulau v–vi o lenei tusi lesona ma le O Le Aoao Atu—E Leai Se Isi Valaauga E Sili Ai [36123 890] itulau 47–48.)

Faalautelega Fautuaina o le Lesona

Gaoioiga e Faatosina Mai Ai

Afai e talafeagai, ia faaaoga le gaoioiga lenei po o sau lava gaoioiga e amata ai le lesona.

Ia tuuina atu i tagata o le vasega fesili nei:

Gaoioiga e Faatosina Mai Ai

  • Afai e mafai ona e feiloai atu i soo se tasi lava i le Feagaiga Fou e ese mai ia Iesu, o ai e te fia feiloai i ai? Aisea e te fia feiloai ai i lena tagata?

Pe a maea ona tali mai ni nai tagata o le vasega i fesili, ona faamatala atu lea faapea e masani lava ona tosina atu i tatou i tagata amiotonu aua latou te mulimuli i le Faaola ma molimau ia te ia. A o faapea ona tatou masani lelei i nei tagata, o le a sili atu foi ona tatou masani ia Iesu Keriso. O le a talanoaina i lenei lesona nisi o tagata e mafai ona fesoasoani a latou faataitaiga amiotonu ia i tatou ina ia tatou latalata atu ai ia te ia.

Mau Talanoaina ma le Faaaogaina

A o e aoaoina atu mau nei o loo i lalo, ia talanoaina pe faapefea ona latou faaaogaina i le olaga i aso taitasi. Uunai le vasega e faasoa atu ni aafiaga e faatatau i mataupu faavae faatusi paia. Talu ai ona e faigata ona tuuina atu fesili taitasi pe talanoaina foi vaega taitasi o loo taua i le lesona, ia filifili ma le agaga tatalo vaega e sili atu ona fetaui ma manaoga o tagata o le vasega.

1. Ua fanau mai Ioane le Papatiso ia Elisapeta ma Sakaria.

Ia talanoaina le Luka 1:5–25, 57–80. Ia valaaulia le vasega e faitau leotele ia fuaiupu filifilia.

  • O faapefea ona faamatalaina Elisapeta ma Sakaria i tusitusiga paia? (Tagai Luka 1:6–9.)

  • O le a le faamanuiaga sa tatalo atu ai Sakaria ma Elisapeta? (Tagai Luka 1:7, 13.) Sa faapefea ona taliina mai lea talosaga? (Tagai Luka 1:11–13, 24–25. Ia faamanino atu o Sakaria ma Elisapeta sa tatalo mo le tele o tausaga ina ia faamanuiaina i laua i se tama. Ae peitai, e le i tuuina mai e le Tama Faalelagi lenei faamanuiaga ia i laua seiloga ua oo i le taimi e faataunuu ai ona faamoemoega.) E faapefea ona faatumauina lo tatou faatuatua ma aveese le loto vaivai pe a le talia a tatou talosaga i le auala o loo tatou mananao i ai?

  • O le a le mea na valoia e Kaperielu e uiga i le misiona a Ioane? (Tagai Luka 1:14–17. Ia faaali atu le ata o Ioane o loo lauga atu i le vao, ma tauaofai mai le valoaga a Kaperielu o loo i luga o le laupapa. Ia talanoaina le uiga o valoaga, le auala na faataunuu ai e Ioane, ma le auala tatou te mulimuli ai i faataitaiga a Ioane i na mea.)

    1. O le a “faaliliu e Ioane le [toatele o tagata] i le Alii lo latou Atua” (Luka 1:16).

    2. O le a ia “faaliliuina loto o matua i le fanau” (Luka 1:17).

    3. O le a ia “faaliliuina … e ua faalogogata i le poto o e amiotonu” (Luka 1:17).

    4. O le a ia “saunia le tagata mo le Alii” (Luka 1:17).

    Faaaliga: O Ioane le Papatiso o se “tagata maoae lea sa umia le Perisitua Arona i talafaasolopito uma” (Bible Dictionary, “John the Baptist,” 714). Atonu o le a e manao e talanoaina vaega uma o le faagasologa o le misiona a Ioane e mafai ona aoga i tagata o le vasega o lo o umia le Perisitua Arona.

  • O le a le mea na tupu ia Sakaria ina ua ia masalosalo i upu a le agelu? (Tagai Luka 1:18–20.) Sa faapefea ona faaalia i galuega a Sakaria le faafouina o lona faatuatua ina ua fanau mai Ioane? (Tagai Luka 1:59–63. Sa laua faaigoaina ma Elisapeta la laua tama tane ia Ioane, e faailoa ai lo laua usiusitai i le faatonuga a le Atua nai lo tu ma aga faalenuu.)

  • A o vavalo atu Sakaria e uiga i le misiona a lona atalii, sa ia lauga atu foi i le togiola, faaolataga, faamagaloga o agasala, alofa mutimutivale o le Atua, ma le malamalama (Luka 1:68–79). O ai o lo o ia faatatau i ai ina ua ia talanoa i ia mea? (Iesu Keriso.) Tofi se tagata o le vasega e faitau le Ioane 1:6–9. Molimau atu faapea e tatau ona taulai atu a tatou galuega i le fesoasoani atu i isi e o mai ia Keriso e faapei o Ioane le Papatiso.

  • Ina ua mavae le fanau mai Ioane, sa tupu o ia ma ua “malosi lona loto i le agaga” (Luka 1:80; i le fuaiupu lenei o le upu malosi o lona uiga o le tuputupuae po o le faateleina). Aisea e te manatu ai e manaomia e Ioane le faamalosia o lona loto i le agaga e faataunuu ai lana misiona? O le a se mea tatou te faia e faamalosia ai o tatou loto i le agaga?

2. Sa iloa e Maria ma Iosefa o le a avea Maria ma tina o le Alo o le Atua.

Ia faitau ma talanoaina fuaiupu filifilia mai le Luka 1:26–56 ma le Mataio 1:18–25. Ia faaali atu le ata o le Folafolaga.

  • O le a le mea na aoao mai e Maria mai le agelu o Kaperielu? (Tagai Luka 1:26–33.) Aisea na manaomia ai e le Faaola le avea ma se atalii o se tina faaletino ma se Tama tino ola pea?

    I le talanoaina o Iesu Keriso, sa aoao mai Elder Bruce R. McConkie e faapea:

    “O le Atua o lona tama, mai le Peresona o Agaga … sa ia maua ai le mana o le tino ola pea o le mana lea e ola ai e faavavau; pe a filifili e oti, o le mana lea e toetu ai i le tino ola pea, ma o le a ola ai e faavavau e aunoa ma se toe oti …

    “… O Maria lona tina, o se tina faaletino … lea na ia maua ai le mana e oti ai faaletino, o le mana lea e oti ai …

    “Ona o le tulaga lenei … o le tuufaatasi o le faaleatua ma le faaletino i le tagata e toatasi, lea na faataunuu ai e le Alii le togiola le mafaitaulia e faavavau. Talu ai ona o le Atua lona Tama a o Maria lona tina, ua ia maua ai le pule e ola ai po o le oti foi, i le tuuina atu o lona ola, ua ia te ia foi le pule e tuuina atu ai ma toe aumaia ai, ma i lena tulaga, e faafaigata tele ia i tatou le tuuina mai o vaega o lena toetu i tagata uma ina ia mafai ai ona toetutu mai le tuugamau” (The Promised Messiah [1978], 470–71).

  • O le a se mea ua tatou aoaoina mai ia Maria ia la talanoaga ma le agelu faapea ma Elisapeta? (Tagai Luka 1:26–38; 45–49; tagai foi i le Alema 7:10. Ia tusia tali a tagata o le vasega i luga o le laupapa. Afai o loo e aoaoina le autalavou laiti, atonu o le a e manao e fautuaina i latou e taula’i atu ia Maria o se faataitaiga o se tamaitai talavou amiotonu.)

    1. Ua alofaina Maria e le Atua (Luka 1:28, 30). O le a le uiga o le alofaina e le Atua? O a nisi mafuaaga e saili ai e isi tagata le alofa? E faamata e faigata faapefea ona sailia le alofa o le Atua pe a saili atu le alofa mai isi tulaga?

    2. Sa agavaa Maria e i ai ia te ia le Alii (Luka 1:28). O le a la tatou mea e fai ina ia tatou agavaa ai mo lenei faamanuiaga?

    3. Sa faamaualalo Maria ma sa ia usitai i le finagalo o le Alii (Luka 1:38, 48). Aisea e taua ai lo tatou usitai i le finagalo o le Alii? E mafai faapefea ona sili atu lo tatou faamaualalo ma le usiusitai?

    4. Sa fiafia Maria i lona Faaola (Luka 1:47). E mafai faapefea ona tatou fiafia i le Faaola?

  • Aisea na fiafia ai Elisapeta ma lana tama ae le i fanau ina ua asiasi atu Maria? (Tagai i le Luka 1:39–44; tagai foi i le Luka 1:15. Faamanino atu o le isi matafaioi a le Agaga Paia o le molimau atu lea e uiga ia Iesu Keriso). Pe afai e talafeagai, ia faamatala atu pe faapefea ona fesoasoani le Agaga Paia ia te oe ina ia maua se molimau e uiga ia Iesu Keriso, ma valaau atu i isi ina ia faia lea tulaga.

  • Sa faapefea ona tofotofoina le alofa o Iosefa ia Maria? (Tagai Mataio 1:18.) O le a se tala a Iosefa ina ua ia iloa ua to Maria? (Tagai Mataio 1:19. Ia faamanino atu e tusa ai ma le tulafono, sa tatau ona molia e Iosefa ia Maria ona ua solitulafono i feagaiga o le faaipoipoga ma tuuina atu i se faamasinoga faalemalo. O ia ituaiga o faamasinoga e mafai ona faaiu i le oti. Nai lo le faia o lea mea, sa ia filifili o le a aveese o ia i se tulaga e le faalaua’iteleina mai le maliliega o le faaipoipoga.)

  • Sa faapefea ona fesoasoani le Tama Faalelagi ia Iosefa e talia le tulaga ua oo ia Maria ma saunia mo ona lava tiutetauave? (Tagai Mataio 1:20–23.) O le a le mea sa faia e Iosefa e tali atu ai i lana miti? (Tagai Mataio 1:24–25.) O le a se mea na tau mai ai e le tali a Iosefa ona uiga?

Faaiuga

Ia tofi se tagata o le vasega e faitau mai le Luka 1:46. Faamatala atu faapea o lenei fuaiupu, o loo faatatau ai le upu vivii i taumafaiga a Maria e viia le Alii ma fesoasoani i isi ina ia latou iloa lona silisili ese.

Faaiuga

  • E faapefea ona fesoasoani faataitaiga a Elisapeta, Sakaria, Ioane le Papatiso, Maria ma Iosefa e te iloa ai le silisili ese o le Faaola ma faateleina ai lou faatuatua ia te ia? E mafai faapefea ona tatou fesoasoani atu i isi ina ia faateleina lo latou faatuatua ia Iesu Keriso?

Tuuina atu lau faafetai i faataitaiga tonu a Elisapeta, Sakaria, Ioane le Papatiso, ma Maria ma Iosefa. Molimau atu i le moni o mea sa e talanoaina.

Manatu Faaopoopo e Aoao Atu Ai

O mea nei e lagolago atu ai i le otootoga o le lesona ua fautuaina. Atonu e te manao e faaaoga le tasi po o le sili atu foi o nei manatu e avea o se vaega o le lesona.

1. “Ina ia e silafia le faamaoni o ia tala ua aoaoina ai oe” (Luka 1:4)

  • Sa tuuina atu le molimau a Luka i se tagata e igoa ia Teofilo (Luka 1:3). O le a le faamoemoega o Luka na tusia ai lana molimau? (Tagai Luka 1:3–4. E fesoasoani ina ia iloa e Teofilo le moni o mea ua uma ona aoaoina.) E faapefea ona faamalosia oe i lou faalogo i molimau a isi i ni mataupu e te iloa ma ni tala faatusi paia lauiloa?

Lolomi