Ang Pagkakabig ni Saulo

Katuyoan

Aron sa pag-awhag sa matag bata nga mahimong labaw ka tinud-anay nga makabig ngadto kang Jesukristo.

Pagpangandam

Sa mainampoon nga paagi pagtuon sa Mga Buhat 7:57–60, 8:1–3, 9:1–30, 26:9–23, ug Mosiah 5:2. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon, ” p. vii, ug “Pagtudlo gikan sa mga Kasulatan,” p. viii.
Dugang basahonon: Mga Buhat 22:3–21.
Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang kanila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Usa ka baso nga puno sa tubig.
3. Hulagway 7-42, Si Pablo diha sa Dalan padulong sa Damasco.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Pagpakita og usa ka baso nga tubig ngadto sa mga bata.

Pang-atensyon nga Kalihokan

Unsa ang mahitabo kon ang tubig mobukal? (Kini mausab ngadto sa inalisngaw.)
Unsa ang mahitabo kon ang tubig mobugnaw? (Kini mahimong ice.)

Ipasabut nga kon ang tubig mahimong ice o inalisngaw, kita mag-ingon nga kini “nakabig.” Kini lahi kaysa orihinal nga tubig.

Pang-atensyon nga Kalihokan

Sa unsang paagi nga ang mga tawo makabig ngadto sa ebanghelyo ni Jesukristo? Sa unsang paagi nga ang ilang mga kinabuhi mausab sa dihang sila nakabig?

Isulat ang pulong nakabig diha sa pisara. Ipasabut nga kini nga leksyon mahitungod sa usa ka milagroso nga pagkakabig sa usa ka lalaki ngadto sa ebanghelyo ni Jesukristo.

Asoy sa Kasulatan

Itudlo sa mga bata ang asoy sa pagkakabig ni Saulo ngadto sa Simbahan ni Jesukristo ingon nga makita sa Mga Buhat 9:1–20. (Alang sa gisugyot nga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Tabangi ang mga bata nga makasabut nga kini nga Saulo dili ang lalaki kinsa maoy unang hari sa Israel apan ang lalaki kinsa nahimong maayong misyonaryo nga si Pablo.

Mga Pangutana sa Panaghisgutan ug Paggamit

Tun-i ang mosunod nga mga pangutana ug ang mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug makagamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Giunsa ni Saulo pagdaugdaug ang mga sakop sa Simbahan? (Mga Buhat 7:57–60; 8:1–3; 9:1–2.) Unsa kaha ang gibati sa mga sakop sa Simbahan ngadto kaniya? Unsa ang inyong bation kon adunay magdaugdaug kaninyo tungod sa inyong mga pagtuo? Unsa ang angay nato nga tubag kon adunay mobuhat niini? Awhaga ang mga bata sa pagpakigabahin og bisan unsa nga mga kasinatian nga ilang naangkon sa dihang adunay nagbiaybiay nila o nagmalupigon nila tungod sa ilang mga pagtuo.
Unsa ang nahitabo diha sa karsada paingon sa Damasco nga nakatabang ni Saulo sa pagkaamgo nga siya kinahanglan nga maghinulsol sa iyang mga sala? (Mga Buhat 9:3–6.) Kinsa ang gikasulti ni Saulo sa iyang panan-awon? (Mga Buhat 9:5.) Sa unsang paagi nga ang Langitnong Amahan ug si Jesukristo makatabang nato nga masayud kon kita kinahanglan nga maghinulsol? (Mga pagbati gikan sa Espiritu Santo ug giya gikan sa atong mga ginikanan, sa mga propeta, ug sa mga kasulatan.)
Unsa ang buot ipasabut sa “pagpatid batok sa tunok”? (Mga Buhat 9:5.) (Ang tunok usa ka mahait nga bangkaw nga gigamit sa mga tawo sa pagpalihok sa mga hayop. Kasagaran ang mga hayop mopatid sa luyo kon matugsokan, diin ang bangkaw makapasakit og samot nila. Si Jesukristo nagsulti kang Saulo nga ang iyang mga lihok naghatag og kadaut sa iyang kaugalingon labaw kay sa laing tawo. Kon kita makig-away batok kon unsa ang husto, kita nagpasakit pag-ayo sa atong kaugalingon.) Sa unsang paagi nga ang usa ka tawo masakitan pinaagi sa pagpakig-away batok sa kamatuoran? Paghatag og usa ka tukma nga ehemplo gikan sa imong kaugalingong kasinatian, kon mahimo.
Unsa ang gibuhat ni Saulo aron maghinusol ug makabalik ngadto kang Jesukristo? Unsa ang kinahanglan natong buhaton aron sa paghinulsol sa atong mga sala? Hisguti ang mosunod nga mga punto (ikaw mahimong molista niini diha sa pisara):
- Siya miila sa iyang mga sala. (Mga Buhat 9:6.)
- Siya nagpuasa ug nag-ampo alang sa kapasayloan. (Mga Buhat 9:9, 11.)
- Siya nagpabunyag. (Mga Buhat 9:18.)
- Siya misulay sa pagtul-id sa mga butang nga sayop nga iyang nahimo. (Mga Buhat 9:20.)
- Siya nagbag-o ug wala na modaugdaog sa mga katawhan pag-usab.
Ipasabut nga si Saulo dili dautan sa iyang kasingkasing; siya nalingla. Siya nagkinahanglan nga maghinulsol ug magpabunyag.
Ngano nga mahinungdanon nga maghinulsol kon kita nagbuhat og usa ka butang nga sayop? Sa unsa nga paagi nga ang paghinulsol makapabati kanato?
Unsa ang gihangyo sa Ginoo nga buhaton ni Ananias? Ngano? (Mga Buhat 9:10–12.) (Ipasabut nga kini lahi nga Ananias kay sa diha sa usa kinsa namatay tungod sa pagkadili matinuoron.) Ngano nga si Ananias nahadlok sa pagbuhat sa kon unsa ang gihangyo sa Ginoo? (Mga Buhat 9:13–14.)
Ngano nga gitawag sa Ginoo si Saulo nga usa ka “pinili nga sudlanan”? (Mga Buhat 9:15–16.) Unsa nga mahinungdanon nga mga butang ang buot sa Langitnong Amahan nga buhaton ni Saulo? (Mga Buhat 26:16, 18.) Unsa nga mahinungdanong mga butang ang mahimong ipabuhat sa Langitnong Amahan kaninyo? Unsaon ninyo pagkat-on niining mga butanga?
Sa unsang paagi nga nawala ang iyang panan-aw ni Saulo? (Mga Buhat 9:8; 22:11.) Unsa ang nahitabo sa dihang si Ananias mipanalangin kang Saulo? (Mga Buhat 9:17–18.)
Pagkahuman sa pagkakabig ni Saulo, ngano nga ang mga tawo ni ang mga tinun-an wala motuo kaniya sa dihang siya nagsangyaw? (Mga Buhat 9:21, 26.) Ngano nga si Saulo kinahanglan nga mobiya sa nasud? (Mga Buhat 9:23, 29–30.)
Unsa ang buhaton sa Langitnong Amahan kon kita maghinulsol sa atong mga sala? (D&P 58:42.) Unsaon nato pagtabang sa uban kinsa naningkmaot sa paghinulsol ug pagsunod ni Jesus?
Unsa ang pagpamatuod ni Saulo kang Jesukristo? (Mga Buhat 9:20; 26:22–23.) Unsaon kanato sa pagkasayud kon kita tinuoray nga nakabig ngadto sa ebanghelyo ni Jesukristo? (Mosiah 5:2.)

Hisguti ang mosunod nga kinutlo gikan ni Presidente Ezra Taft Benson, ikanapulo ug tulo nga Presidente sa Simbahan: “Kon kita makaagi niini nga dakong kausaban, diin gipahinabo lamang pinaagi sa hugot nga pagtuo kang Jesukristo ug pinaagi sa [paglihok] sa Espiritu ngari kanato, kini sama nga kita nahimong usa ka bag-ong tawo…. Ikaw nagsalikway og mga kinabuhi sa kasal-anan…ug nahimong limpyo. Ikaw wala nay [tinguha] sa pagbalik ngadto sa imong karaan nga mga pamaagi. Ikaw sa pagkatinuod usa ka bag-ong tawo” (The Teachings of Ezra Taft Benson, p. 470). (Ikaw mahimong mogamit sa kalihokan sa pagpalambo nga aron sa paghagit sa mga bata kon unsay gihulagway ni Presidente Benson.)

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa pagribyu, katingbanan, o hagit.

Hangyoa ang mga bata sa paghingalan og mga butang nga mahimong kinahanglan nga hinulsulan sa mga bata nga sama kanila og edad, sama sa pagsulti og mga bakak, pagpanglimbong, pagkamasuk-anon, paggamit og dautang mga pulong, ug pagsupak sa ilang mga ginakanan. Isulat kini diha sa pisara samtang kini gihisgutan. Sultihi ang mga bata nga ikaw mohatag og usa ka pasulit. Samtang ikaw nagtudlo sa matag butang diha sa lista, tuguti ang mga bata sa pagpangutana sa ilang kaugalingon, “Ako nagkinahanglan ba nga maghinulsol niini?” Tuguti ang mga bata sa pagtubag og “oo” o “dili” sa hilom sa matag pangutana. Ribyuha ang mga lakang nga gihinulsulan ni Saulo.
Isulat ang matag letra sa hugpong sa mga pulong “Paghinulsol ug balik ngadto sa Dios” (Mga Buhat 26:20) diha sa lahi nga piraso sa papel o karton nga mga kwadro. Ibutang ang mga papel nga gakulob nga naghan-ay diha sa lamesa. Hangyoa ang mga bata sa pagpulipuli sa pagtag-an og usa ka letra sa alpabeto. Kon ang usa ka letra nga nahisakop ngadto sa hugpong sa mga pulong natag-anan, baliha kini. Ipasabut nga kon kita maghinulsol ug mobalik ngadto sa Dios, kita makabig.
Hisguti ug sag-uloha ang ikaupat nga artikulo sa hugot nga pagtuo.
Ubos sa pagtugot sa kapangulohan sa Primarya, dapita ang usa ka bag-o nga kinabig o nauli na nga misyonaryo nga moanha sa klase ug mosulti og kasinatian diin ang kinabuhi sa usa ka tawo nausab sa dihang siya mituo kang Kristo, naghinulsol, ug nagpabunyag. Ipakigbahin niana nga tawo ang iyang mga pagbati mahitungod sa hingpit nga kalipay ug sa kalipay nga midangat gikan sa pagtuman sa mga pagtulun-an sa ebanghelyo.
Hangyoa ang usa ka bata sa pagdibuho og usa ka huiagway sa usa ka nagsanga nga dalan diha sa pisara. Ipasulat sa laing bata ang ngalan sa usa ka dakbayan diin siya buot nga moduaw diha sa ibabaw sa usa ka dalan.
- Unsa ang imong buhaton kon ikaw nasayop sa pagliko ug nakabantay sa imong kaugalingon nga anaa sa sayop nga dalan?
- Ikaw ba makaabut sa siyudad gikan sa imong nahimutangan?
- Unsa ang imong angay nga buhaton karon aron makaabut sa dakbayan nga buot nimo adtoan?
- Sa unsang paagi nga ang paghinulsol sama sa pagbalik diha sa matarung nga dalan?
Awita o basaha ang mga pulong sa “Pangahas sa Pagbuhat sa Matarung”, (Mga Baruganan sa Ebanghelyo 31110).

Panapos

Pagpamatuod

Ipamatuod kon unsa kamahinungdanon ang paghinulsol diha sa atong mga kinabuhi ug unsa kini kamahinungdanon nga tinud-anay nga makabig ngadto sa ebanghelyo ni Jesukristo. Ipakigbahin ang imong gugma sa ebanghelyo.

Gisugyot nga Basahonon sa Panimalay

Isugyot nga ang mga bata magtuon sa Mga Buhat 9:1–20 sa panimalay ingon pagribyu niini nga leksyon.

Pagdapit og usa ka bata nga mohatag sa panapos nga pag-ampo.