Si Jesukristo sa Getsemani

Katuyoan

Aron sa pagtabang sa mga bata nga mobati og gugma alang sa ilang Manunubos, nga si Jesukristo, tungod sa iyang pag-antus ug pagtubos sa ilang mga sala.

Pagpangandam

Sa mainampoon nga paagi pagtuon sa Mateo 26:36–46, Lucas 22:40–46, Juan 3:16, 15:12–13, Mosiah 3:7, ug Doktrina ug mga Pakigsaad 19:15–18. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan. (Tan-awa sa “Pagpangandam sa Imong mga Leksyon,” p. vii,ug “Pagtudlo gikan sa mga Kasulatan,” p. viii.)
Dugang mga basahonon: 2 Nephi 9:21–22, Alma 34:9, Doktrina ug mga Pakigsaad 76:41–42, ug Baruganan sa Ebanghelyo, kapitulo 12.
Pilia ang mga pangutana sa panaghisgutan ug paggamit ug mga kalihokan sa pagpalambo nga makapaapil sa mga bata ug labing makatabang nila sa pagkab-ot sa katuyoan niini nga leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Ang mosunod nga mga ginunting nga mga pulong:
  - Unsa ang Pag-ula?
  - Nganong nagkinahanglan kita sa Pag-ula?
  - Kitang tanan mamatay.
  - Kitang tanan makasala.
  - Si Jesukristo mao ang atong Manluluwas ug Manunubos.
  - Siya walay sala.
  - Siya adunay gahum batok sa kamatayon.
3. Mga huiagway 7-1, Si Jesus ang Kristo (Mga Huiagway sa Ebanghelyo 240; 62572), ug 7-30, Si Jesus Nag-ampo sa Getsemani (Mga Huiagway sa Ebanghelyo 227; 62175).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pangutan-a ang mga bata kon adunay usa nila nga buot mopaambit uban sa klase sa unsa nga paagi nga ang leksyon sa miaging semana nakatabang nila nga mopauswag sa ilang pagsimba sa panahon sa sakramento.

Pang-atensyon nga Kalihokan

Hangyoa ang mga bata sa paghunahuna og usa ka kahimtang nga susama sa mosunod (pagmahulagwayon, mohimo sa kahimtang nga riyal kutob sa mahimo):

Pagpakaaron-ingnon nga ang imong pamilya moduaw sa usa ka kabanay. Ikaw misupak sa imong mga ginikanan ug miadto sa usa ka lawak nga ikaw gidid-an sa pag-adto. Wala tuyoa ikaw nakabuak og usa ka bililhong butang.

Pang-atensyon nga Kalihokan

Unsa ang imong bation?
Unsa ang imong isulti ngadto sa tag-iya?
Unsa ang imong mahimong buhaton aron sa pag-ilis sa nabuak nga butang?
Unsa ang imong buhaton kon ikaw walay igong kantidad sa salapi aron sa pagpalit og lain nga susama niini? Unsaon nimo sa pagbayad niini?

Ipasabut nga ang imong amahan motabang nimo tungod kay siya naghigugma nimo. Siya nag-ingon nimo nga kon ikaw tinud-anay nga nagbasol, nagmasulundon, ug magbayad sa imong mahimo, siya motabang nimo pinaagi sa pagbayad sa kulang.

Pang-atensyon nga Kalihokan

Unsa ang imong bation? Mahimo kaha nimo ang pagbayad sa kantidad sa imong kaugalingon? Unsa ang imong bation mahitungod sa imong amahan sa iyang pagtabang nimo?

Ipasabut nga pinaagi sa pagpili nga matawo sa yuta, ang matag usa nato nagkinahanglan og tabang aron makabalik ngadto sa Langitnong Amahan.

Tabangi ang mga bata sa pagsabut nga tungod ang Langitnong Amahan ug si Jesukristo naghigugma nato, sila naghimo og laraw alang sa pagtabang nato sa pagbuhat og butang nga dili nato mahimo sa atong mga kaugalingon. Kini nga leksyon mahitungod sa bahin niana nga laraw; kini mahitungod sa talagsaon nga pagsakripisyo nga gihimo ni Jesukristo alang sa pagbayad sa atong mga sala ug sa pagbuntog sa kamatayon. Kini nga sakripisyo gitawag og Pag-ula. Ipakita ang hulagway ni Jesus ang Kristo.

Mubo nga pagribyu

Tuguti ang mga bata sa pagsabat sa ikatulo nga artikulo sa hugot nga pagtuo. Dayon hangyoa sila sa pagribyu sa katuyoan sa atong yutan-ong kinabuhi ug kon ngano nga ang Pag-ula mahinungdanon alang sa atong kaluwasan. Aron ikatabang niini nga pagribyu, gamita ang mga ginunting nga mga pulong nga nalista sa seksyon. sa “Pagpangandam”

“Unsa ang Pag-ula?”( Ang Pag-ula mao ang kang Jesukristo nga kinaugalingon nga buhat sa pag-antus alang sa atong mga sala ug pagtugyan sa iyang kinabuhi diha sa krus aron sa pagbuntog sa kamatayon.)

“Ngano nga kita nagkinahanglan sa Pag-ula?” (Pahinumdumi ang mga bata sa laraw sa Langitnong Amahan. Kita mipili sa pag-anhi sa yuta ug mahimong mortal. Ang atong pisikal nga mga lawas sa umaabot mamatay.)

“Kitang tanan mamatay.” (Kita nagkinahanglan og usa ka Manluluwas aron sa pagluwas nato gikan sa pisikal nga kamatayon ug mohimo sa pagkabanhaw nga mahinabo.)

“Kitang tanan makasala” (Ang sala naghimo nato nga dili takus nga mobalik ngadto sa atubangan sa Langitnong Amahan. Kita nagkinahanglan og usa ka Manunubos alang sa pagbayad sa atong mga sala kon kita maghinulsol.)

“Si Jesukristo mao ang atong Manluluwas ug Manunubos.” (Hatagi og gibugaton nga si Jesukristo miboluntaryo nga mahimong atong Manluluwas ug Manunubos, siya andam sa paghatag sa iyang kinabuhi alang kanato.)

“Siya walay sala.” (Tungod kay si Jesukristo hingpit, siya ang bugtong tawo kinsa mahimong atong Manluluwas ug Manunubos.)

“Siya adunay gahum batok sa kamatayon.” (Tungod kay si Jesukristo walay sala ug ang Bugtong nga Anak sa Dios, siya adunay gahum batok sa kamatayon.)

Basaha ang Juan 3:16 uban sa klase. Dapita ang mga bata sa pagpakigbahin kon unsa ang ilang gibati mahitungod sa paghatag sa Langitnong Amahan ug ni Jesukristo kanato niining halangdong laraw. Ipakigbahin ang imong mga pagbati og gugma sa Langitnong Amahan ug ni Jesus ug sultihi sila kon unsa kadako sa imong tinguha sa pagpuyo [pagbalik uban nila sa umaabot nga adlaw.

Asoy sa Kasulatan

Ipakita ang huiagway nga si Jesus Nag-ampo sa Getsemani. Itudlo sa mga bata ang asoy mahitungod ni Jesus sa Getsemani sama sa makita sa Mateo 26:36–46, Lucas 22:40–46, ug sa Doktrina ug mga Pakigsaad 19:16–18. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ipasabut nga si Jesus nakasabut sa iyang misyon ug nasayud nga ang takna miabut sa dihang siya kinahanglan nga mag-antus og hilabihan nga paghigwaos ug kasakit aron sa pagtubos alang sa mga sala sa kalibutan.

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang gisulti ni Jesus sa dihang siya nag-ampo sa Langitnong Amahan sa Tanaman sa Getsemani? (Mateo 26:39, 42, 44.) Ngano nga si Jesus andam sa pagtuman sa laraw sa Langitnong Amahan bisan og siya kinahanglan nga molahutay sa ingon nga terible nga pag-antus? (Siya naghigugma ug nagsalig sa iyang Amahan, ug naghigugma nato.)
Unsa ang nahitabo ni Jesus samtang siya nag-ampo sa Tanaman sa Getsemani? (Lucas 22:44; Mosiah 3:7.) Kinsa ang mipakita kang Jesus nga mihatag og kalig-on kaniya? (Lucas 22:43.)
Alang kang kinsa ang giantus ni Jesus didto sa Tanaman sa Getsemani? (D&P 19:16.) Tabangi ang mga bata sa pagsabut nga si Jesus nag-antus usab diha sa krus, apan ang iyang hilabihang pag-antus mao ang didto sa Tanaman sa Getsemani, diin miagas ang dugo sa matag lungag sa iyang panit.

Basaha ang mosunod nga mga kinutlo gikan ni Elder Marion G. Romney: “Ang Manluluwas… mibayad sa utang alang sa akong kaugalingong mga sala. Siya mibayad sa utang alang sa inyong kaugalingong mga sala ug sa kaugalingong mga sala sa matag buhing mga kalag nga nakapuyo gayud sa ibabaw sa yuta o nga mopuyo pa sa pagkamortal sa ibabaw sa yuta” (Improvement Era, Dec. 1953, pp. 942–43).

Mga Pangutana sa Panaghisgutan ug Paggamit

Unsa ka dako ang pag-antus ni Jesus? (D&P 19:18.)
Ngano nga si Jesus andam sa pag-antus niining mga butanga? (Juan 15:12–13.) Unsa ang inyong gibati nga nakahibalo nga si Jesus nag-antus ug nagtubos alang sa inyong mga sala? Unsaon nato sa pagpakita kang Jesus nga kita mapasalamaton alang sa Pag-ula?
Unsa ang kinahanglan nato nga buhaton aron nga ang pag-antus ni Kristo mahimong makabayad sa atong mga sala? (Maghinulsol, magpabunyag, ug mosunod sa atong saad sa bunyag.) Sa unsang paagi nga ang pag-ula ni Jesus makapabalik nato ngadto sa Langitnong Amahan? Unsa ang mahitabo kon kita dili maghinulsol? (D&P 19:15–17.)

Tabangi ang mga bata nga makasabut nga kita midawat sa pag-ula ni Kristo pinaagi sa paghinulsol sa atong mga sala, pagpabunyag ug pagdawat sa Espiritu Santo, ug pagtuman sa mga sugo ni Jesus. Kon kita nagbuhat niini nga mga butanga, kita mahimong mapasaylo ug malimpyo gikan sa sala aron kita mahimong mopuyo hangtud sa kahangturan uban sa Langitnong Amahan.

Artikulo sa Hugot nga Pagtuo

Ribyuha, hisguti ug tabangi ang mga bata sa pagsag-ulo sa ikatulo nga artikulo sa hugot nga pagtuo.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan bisan unsa nga higayon sa panahon sa leksyon o ingon nga usa pagribyu, katingbanan, o hagit.

Pag-andam og mga lista sa mga kasulatan sama sa mosunod (o ikaw mahimong mosulat niini diha sa pisara) ug usa ka lista, sa usa ka lahi nga kolum, sa matag mensahe sa kasulatan. Sagula ang mga pakisayran aron nga dili sila maatbang sa tukmang mensahe. Tuguti ang usa ka bata sa pagpangita sa usa ka kasulatan, mohukom kon unsa nga mensahe ang anaa niini, ug modibuho og usa ka badlis gikan sa kasulatan padulong sa tukmang mensahe niini. Hatagi ang matag bata og higayon.

Mateo 16:21 (Ang pagsakripisyo ni Jesus gikinahanglan.)

Juan 3:16 (Si Jesus mianhi sa yuta tungod kay siya ug ang Langitnong Amahan naghigugma kanato.)

Juan 10:17–18 (Si Jesus adunay gahum sa pagtugyan sa iyang kinabuhi ug sa pagbawi niini pag-usab.)

1 Pedro 1:19–20 (Si Jesus gipili na sa langit nga mahimong atong Manluluwas.)

1 Juan 1:7 (Ang pag-ula ni Jesukristo naglimpyo nato gikan sa sala kon kita maghinulsol.)

Doktrina ug mga Pakigsaad 20:29 (Kita mahimo lamang maluwas sa gingharian sa Dios kon kita maghinulsol sa atong mga sala, motuo kang Jesukristo, ug magpabunyag.)
Isaysay sa mga bata sa mosunod nga sugilanon, ginamit ang dyagramo sumala sa gitinguha:

Usa ka lalaki naglakaw subay sa usa ka karsada nahulog ngadto sa usa ka lungag nga hilabihan ka lawom nga siya dili makahimo sa pagkatkat niini. Bisan og unsa ang iyang gibuhat, siya dili gayud makagawas nga iyang kinaugalingon. Ang lalaki misinggit og tabang ug nalipay sa dihang usa ka buotan nga lumalabay ang nakadungog kaniya ug mipakanaog og usa ka hagdan ngadto sa lungag. Kini mitugot kaniya sa pagsaka gikan sa lungag ug nakaangkon pag-usab sa iyang kaluwasan.

Kita sama sa lalaki diha sa lungag. Ang pagpakasala susama sa pagkahulog ngadto sa usa ka lungag, ug kita dili makagawas nga atong kinaugalingon. Sama nga ang lumalabay nakadungog sa singgit sa lalaki nga nangayog panabang, ang Langitnong Amahan mipadala sa iyang Bugtong Anak aron sa paghatag og paagi sa paglingkawas. Ang pag-ula ni Jesukristo mahimong itandi ngadto sa pagpakanaog og usa ka hagdan ngadto sa iungag; kini naghatag nato og paagi sa pagsaka. Sama nga ang lalaki sa lungag kinahanglan nga mosaka sa hagdan, kita kinahanglan nga maghinulsol sa atong mga sala ug motuman sa mga baruganan sa ebanghelyo ug mga ordinansa aron sa pagsaka gikan sa atong lungag ug mohimo sa Pag-ula nga molihok sa atong mga kinabuhi. Busa, human sa tanan natong mabuhat, ang Pag-ula naghimo niini nga mahinabo alang kanato nga mahimong takus aron sa makabalik ngadto sa atubangan sa Langitnong Amahan.
Mosiah 14:3–5 ug Alma 7:11–12. Hisguti kon sa unsa nga paagi nga si Jesukristo, pinaagi sa Pag-ula, wala lamang mag-antus alang sa atong mga sala apan nag-antus usab sa atong mga kasakit, mga sakit, ug kagul-anan. Siya hingpit nga nakasabut sa tanan nga atong nasinati ug giantus sa ibabaw sayuta. Pinaagi sa iyang gugma ug kapuangod, siya motabang kanato sa atong mga suliran ug mga hagit.
Tabangi ang mga bata sa pagsag-ulo sa Juan 3:16.
Awita o basaha ang mga pulong sa “Ako Nagbarug nga Nahibulong” (Mga Baruganan sa Ebanghelyo, 31110).

Panapos

Pagpamatuod

Ipamatuod ang imong pagpamatuod nga si Jesukristo mao ang atong Manluluwas ug Manunubos. Ipadayag ang imong gugma alang kang Jesus ug sa Langitnong Amahan ug ang imong pasalamat nga sila nag-andam og usa ka paagi alang nato sa pagbuntog sa sala ug kamatayon ug pagpuyo uban kanila pag-usab.

Gisugyot nga Basahonon sa Panimalay

Isugyot nga ang mga bata magtuon sa Mateo 26:36–46 and Doktrina ug mga Pakigsaad 19:16–18 sa panimalay ingon nga usa ka pagribyu niini nga leksyon.

Pagdapit og usa ka bata nga mohatag sa panapos nga pag-ampo.