Tudei na Yalododonu e na iSolisoli ni Yalo Tabu

A dau vakasaqara o Brigham Young e na nona se cauravou voli ga, na lotu ka tu taucoko kina na isolisoli ni kosipeli, me vaka e volai tu e na Veiyalayalati Vou. Ni se bera ni qai papitaiso, a qai vakadinadinataki vua na dina ni Lotu e na kena cilavi na nona vakasama mai vua na Yalo Tabu (raica na DNW, 9 Fev. 1854, 4). E na imatai ni gauna e rau sota kina kei Josefa Simici e Kirtland, a qai soli vei Brigham Young na isolisoli ni veivosa tani (raica na MHBY-1, 4–5). E dina ni a dua na gauna bibi vua oqori, a dau vakaliuci ga na isolisoli e so ka sovaraki vua, kei ira na Yalododonu e na Gauna Oqo. “Ke da sa lewena na nona lotu na iVakabula, eda sa na votai tale ga ki na isolisoli e so ka a dau laurai tu e liu. E sega beka ni ra raivotu taucoko, e sega beka ni ra tadra taucoko, e sega beka ni ra vakaivotavota taucoko e na isolisoli ni veivosa tani, se na kena vakadewa, ia e na soli vakayadua vei ira me nodra ivotavota, ka veivakalougatataki kina o Koya ka solia mai (DNW, 27 Fev. 1856, 3).

iVakavuvuli i Brigham Young

E solia na Turaga na Yalo Tabu me vakadeitaki keda, ka da vakalougatataki kina, kei ira na noda vuvale, kei na Lotu.

E soli na isolisoli ni Kosipeli me vaqaqacotaka na nodra vakabauta o ira era sa lotu (DBY, 161).

Sa tarogi vei keda ke dau vakavatukanataki vei ira na vakabauta na ivakatakilakila e so e na gauna oqo, me vaka sa dau yaco mai liu. Me da kaya kina ni sa yaco tiko vakakina. Era sa rai na mataboko, ra cici tale na lokiloki, era rogo rawa tale na didivara, sa vakavatukanataki tiko na isolisoli me parofisai, na veivakabulai tale ga, na isolisoli ni raivotu, na isolisoli ni veivosa tani kei na kena vakadewa. A kaya o Jisu ni na laurai vei ira na vakabauta na ivakatakilakila e so oqo [raica na Marika 16:17]. Sa dau laurai e na Nona Lotu kei na Matanitu na ivakatakilakila e so oqo, e na veitabagauna taucoko sara e tauyavu kina na Lotu dina (DNSW, 19 Me 1868, 1).

Au sa vakamacalataka ni a lesia o Karisito e na Nona Lotu na i Apositolo kei na Parofita; a lesi ira tale ga na dauvunau, na ivakatawa, kei ira na ivakavuvuli; ka vakatikora tale ga na isolisoli ni Yalo Tabu, me vaka na duivosavosa, nodra vakabulai na tauvimate, ka me ra dau kila na veiyalo tani e so; ka vakakina na isolisoli vakayalo tale e so. Ia, me taroga mada e na gauna oqo i vuravura raraba, se o cei beka sa vakatakilai mai vua e na raivotu ni sa mai veisautaka na Turaga na itutu taucoko sara oqo, kei na isolisoli vakayalo e na nona Lotu? Au sega ni raica mai. Sa vakatakilai ga mai vei au e na raivotu ni dodonu me tiko e na Lotu, ka sega ni dua na lotu e lotu dina, ke sega kina na veika oqori (DBY, 136).

Mo vakasamataka mada ke o dau vakamuria na cakacaka tabu ni Kosipeli, ka sega ni dau vosataka na veivosa tani e so edaidai, veitalia mada oqori. Mo vakasamataka mada ni sega vei iko na yalo ni parofisai, veitalia ga. Mo vakasamataka mada ni o sega ni ciqoma na isolisoli ka sala vata mai na cagi kaukaua, me vaka na siga ni Penitiko, e sega ni bibi sara mo rawata oqori. Sa tu na kena inaki dina e na siga ni Penitiko, a dua na gauna dredre oqori. A nakiti me vakavatukanataki vei ira na tamata na kaukaua cecere nei koya Sa Kaukaua Sara, me dolava na matadra na tamata, me ra kila rawa kina ni sa sauma na dinau o Jisu, ka ra sa mai vakoti koya, e na nona mate, ka yaco kina me iVakabula kei vuravura. A lavaki e na gauna oqori na ka e a yaco me vagolea kina na nodra vakasama na tamata (DBY, 161–62).

Vakabauta. Ni o sa vakadinata na ivakavuvuli ni Kosipeli, ka rawata kina na vakabauta, ka isolisoli ni Kalou, sa na qai vakuria vei iko o koya na nomu vakabauta, me vakuri na vakabauta e na vakabauta. E solia o Koya na vakabauta me nona iloloma vei ira na nona ibulibuli; ia sa tu ga vei ira na ibulibuli ni ligana na lewa me ra vakabauta ni dina na kosipeli, se lasu (DBY, 154).

Na iSolisoli na Veivakabulai. Au sa tu oqo meu vakadinadinataka na veigauna e vuqa era vakabulai kina e na kaukaua ni Kalou na tagane, yalewa, kei ira na gone, mai na veitabaki, kau raica kina na nodra laki laveti mai na matamata ni mate e vuqa, era vueti kina mai na iyalayala ni vuravura tawamudu; ka so vei ira era sa lecaiyalodra tu, ni sa vakanadaku na yalodra mai na yagodra, ka qai lesu tale mai. Au vakadinadinataka niu sa raica na nodra vakabulai na tauvimate mai na veitabaki, me vaka na nona yalayala na iVakabula (DBY, 162).

Niu veitabaki vei ira na tauvimate, au namaka me drodro mai vei au na kaukaua veivakabulai ni Kalou, me laki vakabulai kina na tauvimate, me soro kina na mate. Au sega ni kaya ni ra bula taucoko sara o ira au veitabaki kina e na veimasulaki; ia sa vuqa sara era sa vakabulai mai na noqu veiqaravi (DBY, 162).

Ke da vakarautaki keda vinaka, ni da liganicakacaka savasava ni Turaga, e na drodrova kina na yago i koya ka veimasulaki na kaukaua vakayalo nei Koya Sa Kaukaua Sara, me tarai koya yani na tauvimate, me vakabulai sara kina na tauvimate; sa dro vakadua na mosi ni ulu, na fiva, se na mate tale e so (DBY, 162).

Au sa dau lakovi vakawasoma, kau lako e na so ga na gauna, ni sa isolisoli ni tama yadudua, ka iTalatala Qase e Isireli, me tu vua na vakabauta me vakabula rawa kina na nona vuvale, me vaka ga e noqu isolisoli meu vakabauta niu na veivakabulai rawa ki na noqu vuvale; ia ke sega ni dau qarava, sa sega ni vakayacora tiko na nona isolisoli. Me vakatauvatani ga ni mai kerei au meu kolata na nona buka me ratou vakayagataka vakavuvale, ni kevaka e tu vua na vakabauta, e na sega ni vinakata meu biuta tu na veicakacaka au qarava tiko, ka laki vakayacora na nona kerekere (DBY, 163).

Ke da tauvimate, kerea ga vua na Turaga me vakabulai keda, ka me qai qarava na veika kece sara e kilikili me vakayacora, me vaka au sa kila tu e na ivakavuvuli ni Kosipeli ni veivakabulai, e vaka ga niu kerea tale ga vua na Turaga me vukea na kena bula na noqu witi kei na sila, kau sega ni se siviyarataka na qele ka teivaka na itei. Au vakabauta, ni dodonu ga meu vakayacora na veika kece sara e dodonu me caka, kau sa kila rawa tu, kau qai kerea ga vua na Tamada mai Lomalagi, e na yaca i Jisu Karisito, me vakadeitaka na vakabulai ni yagoqu (DBY, 163).

Ia, mo vakasamataka mada ni da lakova tiko na veiulunivanua, … ka dua se rua vei keda e tauvimate, ka sega ni tu vei keda na wainimate me rau vakabulai kina, na cava beka me da vakayacora? Mai na noqu vakabauta, me da kerea ga vua na Turaga sa Cecere Sara me … veivakabulai ki na tauvimate. Sa noda isolisoli oqori, ni da donuya na gauna eda sega ni da vakayacora rawa na ka e dodonu me da cakava. Ni sa na qai qarava rawa na Turaga na nona itavi, kei ira na nona italai. Sa noqu itavi ga meu qarava, ni rawa niu vakayacora vakakina (DBY, 163).

Eda veitabaki vei ira na tauvimate, ka vakanuinui ni ra na vakabulai, ka masulaka vua na Turaga ni na vakabulai ira, ia eda na sega ga ni tukuna sara ni na vakabulai ira o koya (DBY, 162).

Parfisai, Raivotu, kei na Vuku. E rawa ni ra dauvakatakila na tagane se yalewa, ka ra na vakadinadinataki Jisu, ka okati me yalo ni parofisai, me ra raica rawa na vakasama kei na loma ni Kalou me baleti ira, mo vorata na veika ca, ka dau vakayacora ga na veika vinaka (DBY, 131).

Au sa kila vinaka tu ga, ni kevaka o na vakamuria na ivakavuvuli i Jisu Karisito kei ira na nona i Apositolo, me vaka e volai tu e na Veiyalayalati Vou, era na vakaivotavota kece sara e na Yalo Tabu na tagane se yalewa kece ga. … Era na kila kina na veika sa yaco tu oqo, na veika mai muri, kei na veika e so sa yaco oti mai. Era na kila kina na veika mai lomalagi, na veika e dela i vuravura, kei na veika e loma i vuravura, na veika vagauna, na veika tawamudu, me vakatau ki na nodra ilesilesi kei na nodra dui isolisoli [raica na V&V 88:78–79] (DBY, 161).

Mo saga vagumatua mo dau kila na loma ni Kalou. Mo kila rawa beka vakacava? E na veika ni nomuni bula yadua, e rawa ni o ni kerea vakadodonu sara ga vua na Turaga; ia e na veika ni bula raraba [ni Lotu], sa na vakataudeitaki mai na lomana e na kena sala sa virikotori tu, me kilai kina e na itukutuku raraba oqori ni sa vakavurei mai na kena sala dodonu (DBY, 136).

Ke vakatakila na Turaga Sa Kaukaua Sara vua e dua na Bete Levu, se vua e dua tale ka sega ni iliuliu levu, na veika dina e so, se na veika sa oti yani, kei na kena ka se bera mai, ka vakaraitaka kina vua na veika me baleti ira na nona lewenilotu e na ruasagavulu-kalima na yabaki mai muri, se na ivakavuvuli vou, ka na qai oka e na lima na yabaki mai muri, se tini, se ruasagavulu, me ivunau ni Lotu kei na Matanitu, ia e se sega ga ni vakatakilai mai vei ira na lewenilotu, ka me vakatakila vua e na veivakauqeti ni duavata ga na Yalo Tabu, e dua vata ga na italai, e dua vata ga na domo, ka dua vata ga na kena kaukaua, ka solia kina vei Josefa na raivotu, e na nona se bula voli mai, sa na okati oqori me isolisoli vua na Bete Levu oqori, se o koya na lewenilotu oqori, ia me kakua sara ni vakaraitaka vua e dua tale e vuravura, me yacova ni sa qai vakatakila na Kalou e na kena sala dodonu ga, me ra qai vakalougatataki kina na lewenilotu raraba. O koya gona oqori, ni o rogoca ni ra kaya na iTalatala Qase ni sega ni dau vakatakila mai na Kalou vua na Peresitedi ni Lotu na veika era sa kila tu, ka qai tukuna na veika talei e vuqa, mo kila vinaka sara, ni ka dina vakalou, ni ivakatakila e tiko vua e vu mai vua na Tevoro, ka sega ni vu mai vua na Kalou. Ke ra dau vakavukui mai na kena sala dodonu, na kaukaua ga ka vakatakila vei ira na veika e so oqo, e na dau tukuna tale ga vei ira me ra dau taqomaka vinaka na veika sa tukuni mai vei ira, era sega kina ni vinakata tale me ra vakatakila tale vua e dua (DBY, 338).

E so Tale na iSolisoli. Na kena soli vei keda me da raica na veika e so e matada, e isolisoli tale ga me vaka na isolisoli ni veivosa tani. A solia mai na Turaga na isolisoli oqori, me da qai lewa kina na kena vakayagataki ki na raivotu; e rawa ni da vakayagataka na veika e raici e mata me vakalagilagi kina na Kalou, se me da vakarusai kina.

Na kena soli vei keda me da dauveitaratara e isolisoli ni Kalou, me vaka tale ga na isolisoli ni parofisai, e na kilai na veiyalo e so, na veivosa tani, veivakabulai, se isolisoli cava tale, ia sa soli vakararaba tu vei keda me da rai, me da kila na ikanakana ni kakana, kei na vosa, ka sega ni okati me veivakurabuitaki tale ga me vakataka na isolisoli ni Kosipeli, ka dau soli vakararaba ga vei keda.

E rawa ni da taurivaka na isolisoli e so oqo, kei na isolisoli taucoko sara sa solia mai vei keda na Kalou, me vakacaucautaki ka vakalagilagi ga kina na Kalou, me da qaravi koya kina, ka rawa tale ga ni da taurivaka me da vakayacora kina na veika beci me baleti Koya, kei na Nona cakacaka. … E dodonu vinaka na ivakavuvuli e so oqo me baleta na isolisoli ka soli vei keda me vakayagataki ga, ki na me da dau vosota tiko ga ka qai rawata e muri na veivakacerecerei, ka na sega sara ni na tini koso na isoqosoqo eda sa lewena oqo, e na tudei tu ga me yacova yani na vuravura tawamudu.

Ni da vakayagataka vakavinaka sara na isolisoli sa soli mai vei keda, eda na vakaivotavota kina e na tucake tale vakayago, e na yago ka da taukena tu oqo, ka tawana tu na yaloda, ia ni sa vakaturicake tale, e na savasava sara ka talei; me qai bula tiko me yacova yani na vuravura tawamudu (DNW, 27 Oks. 1856, 2).

E veivakadeitaki na cakacaka mana vei ira era dau lomana ka qarava dina na Kalou.

Na cakacaka mana, se na veika vakurabuitaki ka vakavatukanataki e na kaukaua ni Kalou, e sega ni baleti ira na tawa vakabauta; me baleta ga na nodra vakayalovinakataki na Yalododonu, me vaqaqacotaka na nodra vakabauta o ira ka daulomana, rokova, ka dau qarava na Kalou, ka sega ni baleti ira e tautuba ni Lotu (DBY, 341).

O ni sa rairai vakasamataka beka na veika au sa tukuna oqo, ni sega ni veika mana ka vakaraitaki e matana e dua, ka na vakadinadinataka kina ni vu mai vua na Kalou, se mai vua na Tevoro; ia, ke sa lewa na Turaga me vakabula na tauvimate e dua ka masulaka, e na vakayacora rawa o koya oqori; ia, e yaco beka oqori me vakaraitaki kina vei ira na tamata ca ni talai mai vua na Kalou o koya ka veiqaravi oqori? Sega, sa vakalougatataki ga kina o koya na Yalododonu, e sega ni baleti ira na tawalotu, e sega ni dua na vuna me ra rogoca; e nodra ga na Yalododonu, ka virikotori me yaga vei ira, o ira duadua ga (DBY, 340).

E virikotori tu na yavu ni Kosipeli, ni veika veivakurabuitaki ka dau vakayacori, e na vakavureleqa ga vei ira. Ni o rogoca ni ra vakamacalataka e so na veika era sa raica—ni ra sa raica mai na cakacaka mana lelevu ka veivakurabuitaki e so, ka ra sa vakabauta sara ga, mo nanuma tiko ni “ra vakabauta na tevoro ka sautaninini,” ni ra sega ni nakita [raica na Jemesa 2:19]. Ni sa rogo mai na voqa ni domona na iVakatawa Vinaka, era na vakabauta ka katona sara o ira na yalodina. E ka vinaka sara ni da sa kila mai na kilakila ni lomada, ka raica e na matada vakayalo, me da vakila kina na taleitaki ni bula ni yalo. E sega sara ni dua na tamata, me vakavo ga ke dauyalewa se dautagane [raica na Maciu 12:39], o koya na dauveidauci, se o koya ka qaravi kaloulasulasu, e na dau vinakata [lavaka] na cakacaka mana, se dua tale na kena itukutukuni, ni sega ni na lavaka e dua na tamata yalodina, ka yalododonu (DBY, 340).

O ira era tukuna ni ra sa raica mai na veika e vuqa, era kila ka vakavukui kina vakalevu e na Lotu, ka ra sa vakatusa e matadra na ivavakoso lelevu, e na yaca ni nodra Kalou na kawa i Isireli, ni ra sa raici Jisu, se na veika tale e so, era sa dau biuta na Matanitu oqo, ni bera ni ra vakayavalati kina o ira ka ra dau bula e na vakabauta [raica na Alama 32:21] (DBY, 342).

E veivakurabuitaki ki na tamata na veika sa vakarautaka mai na Turaga, me yacova sara ni ra sa qai kila vakavinaka. E sega na cakacaka veivakurabuitaki, vei ira ga era lecaika kina. Ni okati na cakacaka veivakurabuitaki ni ka e yaco, ka sega ni kilai na vuna, ia e sega ni vakakina. E tu na vu ni veika kece sara eda raica; ia keda raica e dua na ka e yaco ka sega ni kila na vuna, eda sa dau vakatoka me cakacaka veivakurabuitaki (DBY, 339).

E ka rawarawa sara vei au meu vakabauta ni kevaka au na siviyarataka na noqu qele ka tea kina na witi, e na kena gauna dodonu, au na tatamusuki e na witi; e yaco oqo me vaka sa kena ivakarau ga. Sa vakakina na veika mana ka vakaraitaka o Jisu e na nona tiko voli e vuravura. E na vakamau mai Kena e Kaleli [raica na Joni 2:1–11], ni ra sa laki vakamacara na waini, era a qai laki taroga vua na iVakabula e na ka me ra cakava. A qai vakaroti ira o koya me ra tawana na saqa e na wai, ni ra sa vakasinaita, era a qai taloca vakalailai, ka raica sara ni sa vuki me waini. Au vakabauta ni a waini dina oya; au sega ga ni vakabauta ni a caka e na vakasama ni ra sa vakayacora tiko e na gauna oqo o ira na ivalavala ca, ka ra kitaka e na vakasama ni saikoloji, na baioloji vakalivaliva, se na veika vakainaki tale e so, me veivagolei kina vei ira na tamata ni sa waini na wai, se na veika, ka vaqori na kena ivakarau. A vukica na iVakabula na wai me waini. Sa kila vinaka tu na sala me taurivaka kina na veivunika, me laki curu kina ki na wai, e na veivunika ni waini. Sa vakavolivoliti keda tu oqo na veivunika e vuqa; eda dau kania, gunuva, ka sa kila vinaka tu o Jisu na kena vakayagataki, ka sega ni cakacaka mana kece na veika e vakayacora oqori, vei ira ga era lecava tu, ka sega ni kila dina na veika e yaco oqori. E vaka tale ga kina na marama ka a vakabulai mai na nona tara na bele ni nona isulu [raica na Maciu 9:20–22]; a vakabulai koya na nona vakabauta, ia e sega ni cakacaka mana vei Jisu. Ni kila vinaka tu na kena ivakarau, e dina ni ra a drigiti koya yani o ira na lewe vuqa, e matana kei ira mai muri, kei ira mai yasana ruarua, ka dredre sara vua me lako rawa i liu, a kila vinaka sara na gauna ka tarai koya kina, a vakila ni a biuti koya na nona kaukaua, me vakataroga kina se o cei a tarai koya. E sega ni cakacaka mana vua oqori. A nona ga na kaukaua ni bula kei na mate; ni tu vua na kaukaua me solia kina na nona bula, ka tu tale ga vua na kaukaua me bula tale mai na mate [raica na Joni 10:17–18]. Oqo na ka e kaya, ka dodonu me da vakabauta na veika oqo ke da kila vinaka tiko na itukutuku ni nona bula na iVakabula, kei na veika era a kaya na i Apositolo me vaka sa volai tu e na Veiyalayalati Vou. A tu ga vei Jisu na kaukaua oqo, ka taukena tale ga. A solia vua na Tamana; sa nona iyau, ka soli tu vua na kaukaua me solia kina na nona bula, ka me vakabulai koya ga mai na mate. Sa tu ga vua na sala kei na ivurevure ni wai bula, ni kaya vei ira na tamata, “Mo ni bula,” era na rawata dina sara na bula (DBY, 340–41).

Ke tu vei keda na vakabauta me da vakila kina ni tu vei keda na ivurevure ni bula, e rawa ni da vakarota na mate veitauvi, “Mo lako tani e na yaca i Jisu, me drodrova tale na nona bula o koya oqo na bula kei na vakacegu mai vua na Kalou, me vorata kina na mate oqo”; e na rawata na veika oqo na noda vakabauta e na veitabaki, e na veiqaravi kina cakacaka vakalotu ni Kosipeli savasava (DBY, 342).

E tevuka vei keda na Yalo Tabu na veika vuni ni matanitu, vei ira era dau gadreva na isolisoli tale e vuqa, ka dau vakamuria na ivunau.

Na cava beka na veika vuni? Eda sega ni kila, ni sa tiko beka e na taudaku ni noda kila vakatamata. Ni da veivosaki e na veika e baleta na veika vuni, eda na veivosaki tiko e na veika ni vuravura tawamudu ka tabogo tu vei keda; ni veika kece ga e sa kilai tu, e sega ni okati me ka vuni; ia na veika kece sara sa kilai tu, e soli vei keda me da kila, ni da lakova tiko yani na ikabakaba ni noda kila ka. E ka vuni na kena ka tu tawamudu e na taudaku ni noda kila vakatamata (DBY, 338–39).

Ke da vakadikeva vakavoleka sara na iulutaga oqo, eda na qai raica ni somidi wale sara na veika ni Matanitu e sa vakatakila mai, vei ira tale ga na tisaipeli. Ke da sa vakarautaki me da irova yani na veika vuni ni Matanitu, me vaka sa dau lewa tu na Kalou, eda sa na qai kila ni kena meramera wale sara sa soli mai e na vanua oqo, kei na kena mai kea. Sa vakatakila mai na Kalou vei ira na nona tamata e vuqa na ka, e na cakacaka ni nona Yalo Tabu, ia sa dau sogota tale, e na vuqa sara na gauna, na veika sa vakaraitaka oqo ki na vakasama. E na solia vei ira na nona italai me ra raica vakalekaleka na veika ni vuravura tawamudu, ia sa dau sogota tale na raivotu oqo, ka me biu tu me vaka mai liu, me rawa ni ra dau bula ga e na vakabauta, me vaka sa kila tu o koya na i Apositolo, me kua ni ra dau bula mai na veika e laurai e matana votu, e na vakabauta ga [raica na 2 Korinica 5:7] (DBY, 339).

E na kena totolo ga ni nomu vakadinadinataka e matana na nomu Kalou, ni sa dodonu me soli vei iko na veika vuni, kevaka o na vakatoka oqori me yacana, mai na Matanitu vakalomalagi—ni o vakasinaiti tu e na veivakabauti vua na Kalou—o na sega tale ga ni o na vakatanitaka e dua na ka sa tukuna vei iko na Kalou—ni o na sega ni vakaraitaka vua na wekamu na veika ka sega ni dodonu me vakatakilai, e na kena totolo ga ni o vakarautaki me vakacolati vei ira na veika ni Kalou, ni sa tawayalani tu na veika oqo, me soli vei iko [raica na Alama 26:22] (DBY, 93).

Kemuni na taciqu, ni vunautaka ga na veika eda vakabauta, ni da veivosakitaka na yavu vakaivunau eda sega tiko ni kila, ke tu mada na vuna me da vakabauta kina [kevaka mada ga] eda sa vakavulici kina, ka kila tu na kena dina, mo ni vakatikitiki mai kina, me da vunautaka ga vei ira na noda lewenilotu na veika eda sa kila deivaki tu (DBY, 338).

Ke da bula vakavakarau kina, sa levu sara na tikina sa vunautaki mai vei ira na wekada vakalotu ka ra sa rogoca mai e na vica na yabaki, me vakarautaki ira yani ki na matamata qiqo ki na Jerusalemi Vou, me vakarautaki ira tale ga ki na isoqosoqo ni agilosi savasava (DBY, 339).

Oqo ga na veika vuni ni Matanitu ni Kalou e vuravura, me da kila kina na sala me vakasavasavataki ka vakavinakataki kina na gagano ni lomada, na vanua eda butuka tu, na cagi eda ceguva, na wai eda gunuva, na veivale eda tiko kina kei na veikorokoro eda tara, me ra kila kina o ira era mai sikova na noda vanua na talei ni noda bula, ka vakadinadinataka tale ga na kaukaua ka rui vou sara vei ira (DBY, 339).

Ke o kaya ni o vinakata na veika vuni, na ivunau, kei na ivakatakila, meu kaya ga ni sega ni dau laki dromu tale na Sigatabu, vei kemuni ka lako mai ki lotu, me sega ni sovaraki vei kemuni na ivakatakila nei Jisu Karisito, me vaka ga na uca ka dau tau ki na qele (DBY, 343).

Me iUlutaga ni Vuli

E solia na Turaga na Yalo Tabu me vakadeitaki keda, ka da vakalougatataki kina, kei ira na noda vuvale, kei na Lotu.

Na cava soti beka na isolisoli ni Yalo Tabu? Na cava beka na vuna e bibi kina me vakasukai tale mai e na Lotu dina i Jisu Karisito? (Raica tale ga na 1 Korinica 12:4–11; V&V 46:10–26.)
Me da kila beka vakaevei ni sa dau vakavatukanataki e na noda bula na isolisoli ni Yalo Tabu? Me da vakayagataka beka vakaevei me ra kune kalougata kina na wekada?
O cei beka e soli vua me kila na isolisoli vakayalo kei na veika e so e yaga kina e na Lotu? (Raica tale ga na V&V 46:27; 107:18.) E duidui beka vakaevei na kena taurivaki na isolisoli vakayalo e na ilesilesi vakalotu, mai na kena taurivaki na isolisoli oqori e na noda dui bula, se na noda dui vuvale?

E veivakadeitaki na cakacaka mana vei ira era lomana ka qarava dina na Kalou.

Na cava beka na cakacaka mana? Na cava beka na kena inaki?
Na cava beka na kena ibalebale me da rogoca “na voqa ni domona na iVakatawa Vinaka,” ka me da “vakila kina na taleitaki ni bula ni yalo”? Me vakadeitaka beka vakaevei na noda vakabauta kei na noda ivakadinadina na veicakacaka mana e dau yaco? E veivagolei beka vakaevei na vakasolokakana ni Yalo Tabu, mai na kena vakavatukanataki vakalevu na kaukaua e so? Me da galeleta cake beka vakacava na veika mana e so e yaco tu e na noda dui bula? (Raica tale ga na 2 Nifai 27:23; Ica 12:12.)

E tevuka vei keda na Yalo Tabu na veika vuni ni matanitu, vei ira era dau gadreva na isolisoli tale e vuqa, ka dau vakamuria na ivunau.

Me vaka e vakamacala kina o Peresitedi Young, na cava beka na vuna e vakatakila ga kina na Kalou ni “somidi wale sara na veika ni Matanitu e sa vakatakila mai”? (Raica tale ga na V&V 78:17–18.)
Me da vakadinadinataka beka vakaevei ni sa “dodonu me soli vei iko na veika vuni”? (Raica tale ga na V&V 76:5–10.)
Me vaka e vakamacala kina o Peresitedi Young, na cava soti beka na veika vuni me baleta na matanitu ni Kalou? (Raica tale ga na V&V 84:19–22.) E yaco beka vakacava, me dua na ka e okata e dua vei keda ni ka vuni, ka ivakavuvuli rawarawa sara vua e dua tale? Na cava beka na vuna eda dau temaki rawarawa kina me da dau soli vakasama wale ga e na veika e so eda sega ni kila vinaka?
A vakamacalataka o Peresitedi Young, “Ni sega ni dau laki dromu tale na Sigatabu, … me sega ni sovaraki vei kemuni na ivakatakila nei Jisu Karisito, me vaka ga na uca ka dau tau ki na qele.” Me da vakarautaki keda beka vakaevei ki na ivakatakila e so oqori, ni da dau vakayagataka tiko na sakaramede, ka vakatabuya tiko ga na siga ni Vakacecegu (Sabato)?