Gihigugma Nako ang Akong mga Igsoon

Katuyoan

Aron sa pag-awhag sa kada bata sa pagpakita og gugma alang sa iyang mga igsoong lalaki ug babaye.

Pagpangandam

Tun-i sa mainampoong paagi ang Exodo 1:22-2:10.
Inubanan sa pagtugot sa inyong presidente sa Primary, Imbitara ang usa ka inahan sa pagdala sa iyang batang masuso ngadto sa klase. Hangyoa siya sa pagsulti kabahin kon giunsa niya sa pag-atiman ang batang masuso, lakip na ang mga butang nga gibuhat niya ug sa iyang pamilya aron magpabiling luwas ang batang masuso. Awhaga siya sa pagsulti kabahin sa gugma nga iyang gibati alang sa iyang batang masuso. Kon walay inahan nga dunay batang masuso, mahimo kang modapit og usa ka inahan nga motunga nga magdala og mga hulagway sa iyang anak isip usa pa ka batang masuso.
Mga materyal nga gikinahanglan:
1. Usa ka Biblia.
2. Usa ka monyeka nga batang masuso.
3. Hulagway 1-2, Si Moises diha sa Kabugangan (Pakete sa mga Hulagway sa Ebanghelyo 106; 62063); hulagway 1-13, Si Joseph Smith (Pakete sa mga Hulagway sa Ebanghelyo 400; 62449).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Samtang maghatag ka niini nga leksyon, magmabination sa mga pagbati sa mga bata diha sa imong klase kinsa walay mga igsoong lalaki o babaye.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipailaila ang inahan ngadto sa klase ug ipasulti niya ngadto sa mga bata ang kabahin sa iyang batang masuso. Papangutan-a ang mga bata ngadto sa inahan og mga pangutana kabahin sa batang masuso. Himoa nga ang inahan mopasabut kon unsa ka mahinamon ang pamilya nga makabaton og usa ka bag-ong batang masuso nga moabut sa ilang panimalay.

Makahigugma Kita sa Atong mga Igsoong Lalaki ug Babaye

Kamo ba dunay usa ka igsoon nga lalaki o babaye nga batang masuso?

Pasultiha ang mga bata nga dunay igsoong lalaki o babaye nga batang masuso kabahin sa maong bata ug pasultiha kon giunsa sa ilang mga pamilya pagpangandam alang sa bag-ong batang masuso.

Kamo ba dunay mga magulang nga lalaki o babaye?

Pasultiha ang mga bata og makadiyot kabahin sa ilang mga igsoong lalaki ug babaye. Pahinumdumi ang mga bata nga imong nahisgutan sa miaging leksyon ang kabahin kon sa unsa nga paagi nga ang tanang mga pamilya managlahi. Ang pipila ka mga tawo dunay daghan kaayong mga igsoong lalaki ug babaye, ug ang uban dunay gamay lang o gani wala gyud. Bisan pila pa man ka mga igsoong lalaki o babaye nga aduna kita, kinahanglan nato silang higugmaon ug magmabination ngadto kanila.

Istorya

Ipakita ang hulagway 1-13, Si Joseph Smith, ug ipasabut nga si Propeta Joseph Smith, ang unang Presidente sa Simbahan, dunay igsoong lalaki nga ginganlan og Hyrum kinsa gihigugma gyud niya pag-ayo. Sila si Hyrum ug Joseph suod kaayo nga mga amigo ug nagtinabangay sa usag usa sa tibuok nilang kinabuhi. Sa imong kaugalingong mga pulong, isaysay ang mosunod nga istorya kabahin sa usa ka higayon sa dihang si Hyrum mitabang ni Joseph:

Sa dihang si Joseph Smith usa pa ka bata, nasakit siya og grabe. Nataptan siya og hilabihan ka sakit nga impeksyon sa bitiis. Ang iyang mama nasakit tungod sa pag-atiman kaniya sa adlaw ug gabii ug gikinahanglan nga mopahulay. Ang magulang nga lalaki ni Joseph nga si Hyrum mihangyo kon pwede ba niyang pulihan ang iyang mama. Ang mga ginikanan ni Hyrum nasayud nga makasalig sila kaniya sa pag-atiman pag-ayo kang Joseph, mao nga miuyon sila. Si Hyrum nagpabilin sa kiliran sa nag-antus niya nga igsoon hapit sa tanang higayon sulod sa pipila ka mga adlaw. lyang gikuptan ang bitiis ni Joseph sa iyang mga kamot, nga mao ray bugtong paagi nga iyang mapakalma ang hilabihan nga ka sakit.

Istorya

Giunsa ninyo pagkahibalo nga si Hyrum naghigugma sa iyang igsoon nga si Joseph?

Ipasabut nga usa ka paagi nga mapakita nato ang gugma alang sa atong mga igsoong lalaki ug babaye mao ang pagtabang kanila.

Makatabang Kita sa Atong mga Igsoong Lalaki ug Babaye

Sa unsang paagiha man ninyo matabangan ang inyong mga igsoong lalaki ug babaye?
Sa unsang paagiha man kamo matabangan sa inyong mga igsoong lalaki ug babaye?

Kalihokan

Paghulagway og pipila ka mga aksyon nga nagpakita kon unsa kaha ang buhaton sa mga bata ngadto sa ilang mga igsoong lalaki ug babaye. Ipataas sa mga bata ang ilang kumagko kon ang aksyon maoy usa ka paagi sa pagtabang sa usa ka igsoong lalaki o babaye, ipaubos ang ilang kumagko kon ang aksyon wala magtabang sa usa ka igsoong lalaki o babaye. Mahimo nimong gamiton ang pipila sa mosunod nga mga ideya:

Kalihokan

Mopahulam sa inyong bag-ong dulaan ngadto sa inyong igsoong babaye.
Mohulam sa bola sa inyong igsoong lalaki nga dili mananghid kaniya.
Motabang sa inyong igsoong babaye sa pagpunit sa iyang mga dulaan.
Mananghid sa inyong igsoong lalaki nga modula sa iyang bola.
Mobalibad sa pagpakigdula sa inyong igsoong babaye.
Magmabination kon ang inyong igsoong lalaki magul-anon.
Makigdula sa inyong igsoong babaye kon masulub-on siya.

Makatabang kita sa atong mga igsoong lalaki ug babaye nga batang masuso

Ipasabut nga usahay lisud kon ang usa ka bag-ong batang masuso natawo ngadto sa usa ka pamilya tungod kay ang batang masuso makakuha og dakong panahon ug atensyon sa mga ginikanan. Tabangi ang mga bata nga makasabut nga bisan tuod kon ang mga ginikanan mahimong bisi sa bag-ong batang masuso, ila gihapong gihigugma ang uban pa nilang mga anak. Pahinumdumi ang mga bata nga ang usa ka batang masuso nagkinahanglan og tabang hapit sa tanang butang, samtang ang mas dagko na nga mga anak (sama nianang naa sa imong klase) makahimo na og daghang mga butang alang sa ilang kaugalingon ug alang sa usa ka igsoong lalaki ug babaye nga batang masuso.

Unsaon man ninyo sa pagtabang ang inyong mga ginikanan nga dunay giatiman nga igsoon ninyong lalaki ug babaye nga mga masuso?

Kalihokan

Ipakita sa mga bata kon unsaon sa pagkugos sa monyeka nga batang masuso sa mainampingong paagi. Tudloi sila og usa ka simpol nga kanta nga pangkatulog o kantaha ang “Ako Anak sa Dios” [Songbook sa mga Bata, p. 2) samtang nagpulipuli sila sa pagkugos sa monyeka.

Ako anak sa Dios,
Gipadala dinhi,
Panimalay, ginikanan,
Ako gihatagan.

Agaka ‘ko, tudloi ‘ko,
Unsay buhaton.
Nga makabalik ‘ko sa
Amahang Langitnon.

Istorya

Ipasabut nga si Moises adunay usa ka magulang nga igsoong babaye nga naghigugma kaniya ug mitabang kaniya sa dihang batang masuso pa siya. Ginamit ang hulagway 1-2, Si Moises diha sa Kabugangan, ribyuha ang istorya sa batang si Moises, ingon nga makita diha sa Exodo 1:22-2:10. Ipasabut og maayo kon giunsa ni Miriam pagbantay ang iyang igsoong lalaki nga batang masuso.

Istorya

Giunsa man pagtabang ni Miriam ang batang masuso nga si Moises?

Pagpamatuod

Ipakigbahin ang imong mga pagbati kabahin sa kaimportante sa mga igsoong lalaki ug babaye nga magtinabangay ug maghigugmaay sa usag usa. Kon posible, pagpakigbahin og usa ka personal nga kasinatian sa pagkabata sa dihang ikaw ug ang imong igsoong lalaki o babaye nagtinabangay sa usag usa. Pahinumdumi ang mga bata nga kon kita motabang sa atong mga igsoong lalaki ug babaye kita nagpakita sa atong gugma alang kanila. Ipadayag kon unsa ikaw ka mapasalamaton ngadto sa Langitnong Amahan sa pagpahimutang nato diha sa mga pamilya.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Hatagi ang mga bata og papel ug mga krayola o mga lapis, ug padrowinga sila og mga hulagway sa ilang mga igsoong lalaki ug babaye. Papulipuliha ang mga bata sa pagpakita sa ilang mga hulagway ug sa pagsulti kabahin sa ilang mga igsoong lalaki ug babaye. Awhaga ang mga bata sa pagsulti og mga butang nga gusto nilang buhaton uban sa ilang mga igsoong lalaki ug babaye.
Pagbaton og usa ka litrato sa kada bata sa batang masuso pa sila ug ipatag-an sa mga bata kon si kinsa ang kada bata nga gipakita. (Siguroha sa pag-uli sa mga litrato ngadto sa mga ginikanan nga walay guba.) Pahinumdumi ang mga bata kinsa dunay magulang nga mga igsoong lalaki ug babaye nga ang ilang mga igsoong lalaki ug babaye mitabang sa pag-atiman kanila sa dihang mga batang masuso pa sila.
Kantaha o isulti ang mga pulong sa “Makalingaw nga Buhaton” [Fun to Do] (Songbook sa mga Bata, p. 129), nga maggamit sa mga hugpong sa mga pulong sama sa “Ang pagtabyog makalingaw” o “Ang pagtabang makalingaw.” Usba ang mga aksyon ingon nga gisugyot sa mga pulong.
Kantaha o isulti ang mga pulong sa unang bersikulo sa “Kon Kita Motabang” [When We’re Helping] (Songbook sa mga Bata, p. 108), mga moilis sa ate o kuya alang sa mama, o kantaha ang ikaduhang bersikulo sa “Malipayon ang Pamilya” [A Happy Family] (Songbook sa mga Bata, p. 104).
Pagdala og litrato sa imong kaugalingong pamilya ug sultihi ang mga bata kabahin sa imong mga igsoong lalaki ug babaye. Mahimong mopakigbahin ka og pipila ka malipayong mga kasinatian nga kauban sila.
Ginamit ang mga props sama sa monyeka nga batang masuso, usa ka gamayng basket o kahon, usa ka habol, ug usa ka scarf, tabangi ang mga bata sa pagdrama sa istorya ni Miriam ug sa batang si Moises diha sa kabugangan.

Dugang nga mga Kalihokan para sa mas Gagmayng mga Bata

Pagbutang og gamay pero dali rang mailhan nga aytem nga pangbata diha sa usa ka bag o dakong sako. Ipakuot sa mga bata ang sulod niini nga dili magtan-aw ug pasulaya sila sa pagtag-an kon unsa ang maong butang pinaagi sa paghikap niini.
Kantaha o isulti ang mga pulong sa duha ka mga bersikulo sa “Malipayon ang Pamilya” [A Happy Family] (Songbook sa mga Bata, p. 104). Samtang nanganta kamo, pagkuptanay sa mga kamot ug mag-alirong uban sa mga bata, o paghimo og simpol nga mga aksyon nga moangay sa kanta.
Tabangi ang mga bata sa paghimo sa mga aksyon sa mosunod nga dula ginamit ang mga tudlo samtang imong isulti ang mga pulong:

Mao kini ang ginabuhat sa batang masuso:

Pakpak - pakpak - pakpak - pakpak (ipakpak ang mga kamot)!

Mao kini ang ginabuhat sa batang masuso:

Peekaboo, kakita ko nimo (pagdula og peekaboo ginamit ang mga kamot)!

Mao kini ang ginabuhat sa batang masuso:

Kamang - kamang - kamang - kamang (“palakawa” ang mga tudlo diha sa hangin).

Mao kini ang ginabuhat sa batang masuso:

Tulog - tulog - tulog - tulog (idapat ang aping sa inakub nga mga kamot).
Tabangi ang mga bata sa paghimo sa mga aksyon sa mosunod nga kalihokan ginamit ang bersikulo samtang inyong isulti ang mga pulong:

Gamay nga Batang si Moises

Gamay nga Batang si Moises dunay higdaanan nga sakayan (isawod ang usa ka kamot ug ibutang ang unang tudlo sa laing kamot diha niini).

Ang iyang igsoong babaye nagtan-aw niya agi sa mga sagbut nga iyang gitagoan (li-li sa mga tudlo sa kamot nga nagsampong sa mga mata).

Usa ka adlaw usa ka prinsesa ang nakakita kaniya (tambo, nga magtan-aw sa ubos) ug mikugos kaniya (pakaaron-ingnon nga mag-alsa og batang masuso);

Siya miingon, “Dad-on ko kining bataa ug sa tanang kadaut manalipod kaniya” (pakaaron-ingnon nga nagpakatulog og bata sa mga bukton).

(Gikan sa Fascinating Finger Fun ni Eleanor Doan. © 1951. Gigamit nga may pagtugot.)