Leksyon 42

Nahisakop Ko sa Ang Simbahan ni Jesukristo sa mga Santos sa Ulahing mga Adlaw

Katuyoan

Aron sa pagtabang sa kada bata nga makasabut nga siya nahisakop sa Ang Simbahan ni Jesukristo sa mga Santos sa Ulahing mga Adlaw.

Pagpangandam

1. Tun-i sa mainampoong paagi ang Marcos 1:9-11; Doktrina ug mga Pakigsaad 115:4; ug Joseph Smith—Kasaysayan 1:5,10-19. Tan-awa usab sa Mga Baruganan sa Ebanghelyo (31110), kapitulo 17.

2. Paggunting og usa ka dakong piraso nga papel o posterboard ngadto sa daghang dagko nga klase sa jigsaw puzzle sama sa sagidaghanon sa mga tawo sa klase (mga bata ug titser). Isulat ang ngalan sa kada sakop sa klase diha sa usa ka piraso sa puzzle.

3. Mga materyal nga gikinahanglan:

   1. Usa ka hugpong sa mga kasulatan.

   2. Hulagway 1-4, Ang Unang Panan-awon (Pakete sa mga Hulagway sa Ebanghelyo 403; 62470); hulagway 1-8, Pagpaambit sa Sakrament (62021); hulagway 1-12, Batang Babaye nga Gikumpirmahan (62020); hulagway 1-18, Si Juan Bautista nga Nagbunyag ni Jesus (Pakete sa mga Hulagway sa Ebanghelyo 208; 62133); hulagway 1-39, Pagpanalangin sa usa ka Batang Masuso; hulagway 1-40, Pagpangalagad ngadto sa Masakiton (62342); usa ka hulagway sa buhi nga propeta.

4. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Iisa ang usa ka piraso sa puzzle nga naa ang imong ngalan diha niini. Sultihi ang mga bata nga nalakip kini sa usa ka puzzle. Ipasa ang ubang mga piraso ug tabangi ang mga bata sa paghan-ay sa puzzle. Tudlo sa kada ngalan diha sa puzzle ug basaha kini ngadto sa mga bata. Ipasabut nga maingon nga ang kada usa ka piraso sa puzzle nalakip niini nga puzzle, ang kada usa nila nahisakop niini nga klase. Ipasabut nga ang mahisakop sa usa ka butang nangahulugan nga mahimong kabahin niini.

Pang-atensyon nga Kalihokan

• Sa unsa pa man kamo nahisakop?

Ipasabut nga nahisakop kita sa ubang mga grupo, sama sa mga pamilya o mga kasilinganan. Nahisakop usab kita sa simbahan ni Jesus.

Ipakita ang hulagway 1-39, Pagpanalangin sa usa ka Batang Masuso.

Pang-atensyon nga Kalihokan

• Unsa man ang nahitabo niini nga hulagway?

Ipasabut ngadto sa mga bata nga ang kasagaran nila nakadawat og usa ka ngalan ug usa ka panalangin sa dihang mga masuso pa sila. Tungod niining pagpangalan ug pagpanalangin, ang ilang mga ngalan naa na sa mga rekord sa Simbahan ug makaingon sila nga, “Nahisakop ko sa Ang Simbahan ni Jesukristo sa mga Santos sa Ulahing mga Adlaw.”

Tabangi ang mga bata sa pagsulti og “Nahisakop ko sa Ang Simbahan ni Jesukristo sa mga Santos sa Ulahing mga Adlaw” sa pipila ka mga higayon.

Kalihokan

Buhata ang kalihokan ginamit ang bersikulo sa “I’m Glad I Came to Church Today” uban sa mga bata:

Malipayon ako nga mianhi sa Simbahan karon (itak-op ang mga kamot ug paghimo og mga tore sa simbahan pinaagi sa tumoy sa duha ka tudlo nga mag-abut.).

Ganahan kong maminaw (pinasawod nga kamot libot sa dunggan)

Ug sa pag-ampo (ikyugpos ang mga bukton ug iduko ang ulo).

Nakat-on ko ni Jesus nga atua sa taas (tudlo ngadto sa taas);

Naghunahuna ko ni Jesus ug sa iyang gugma (gaksa ang kaugalingon).

Ipasabut ngadto sa mga bata nga moanha kita sa atong mga miting sa Simbahan aron makat-on og dugang pa kabahin ni Jesus ug sa unsay gusto niya nga atong buhaton. Sultihi ang mga bata nga niining leksyona makat-on sila kabahin sa pipila ka importante nga mga butang nga kabahin sa simbahan ni Jesus.

Ang Simbahan ni Jesus Adunay Priesthood

Ipakita ang hulagway 1-8, Pagpaambit sa Sakrament; hulagway 1-12, Batang Babaye nga Gikumpirmahan; ug hulagway 1-40, Pagpangalagad ngadto sa Masakiton. Pasultiha ang mga bata kon unsay ilang nahibaloan kabahin sa nahitabo sa kada hulagway. Ipasabut nga ang priesthood gikinahanglan aron sa pagbuhat sa kada usa niining mga butanga. Ang priesthood mao ang gahum nga anaa sa Langitnong Amahan ug ni Jesus. Ilang gihatag kini nga gahum ngadto sa matarung nga maga tawo aron nga ang mga tawo makatabang sa paghimo sa buhat sa Langitnong Amahan ug ni Jesus dinhi sa yuta. Tudlo ngadto sa mga naghupot sa priesthood sa kada hulagway. Ipasulti sa mga bata ang pulong nga priesthood sa pipila ka mga higayon.

• Kinsa man ang inyong nahibaloan nga naghupot sa priesthood?

Tabangi ang mga bata nga makasabut nga ang mga tawo nga naghupot sa priesthood makapanalangin ug makapaambit sa sakrament, makabunyag, makahatag og mga panalangin ngadto sa mga tawo, ug makabuhat og uban pang importante nga mga butang. Ipakita og usab ang hulagway 1-39, Pagpanalangin sa usa ka Batang Masuso, ug sultihi ang mga bata nga ang mga batang masuso mapanalanginan sa mga tawo nga naghupot sa priesthood.

Istorya

Iplastar ang hulagway 1-18, Si Juan Bautista nga Nagbunyag ni Jesus. Pasultiha ang mga bata kon unsay ilang mahinumduman kabahin sa hulagway. Ribyuha sa daklit ang istorya, ingon nga makita diha sa Marcos 1:9-11.

Istorya

• Kinsa man ang nagbunyag ni Jesus? (Tan-awa sa Marcos 1:9.)

• Unsa nga gahum ang gikinahanglan nga maangkon ni Juan aron makabunyag ni Jesus? (Ang priesthood.)

Ipasabut nga ang mabunyagan pinaagi sa tawo nga naghupot sa priesthood usa ka importante nga bahin sa pagkasakop sa simbahan ni Jesus. Sultihi ang mga bata nga kon mag-otso anyos na sila, mahimo na silang bunyagan nga miyembro sa simbahan ni Jesus.

Ang Simbahan ni Jesus Dunay usa ka Propeta

Istorya

Ipakita ang hulagway 1-4, Ang Unang Panan-awon, ug isaysay ang istorya ni Joseph Smith ug ang Unang Panan-awon, ingon nga makita diha sa Joseph Smith—Kasaysayan 1:5, 10-19.

Istorya

• Kinsa man ang mitungha aron makigsulti ngadto ni Joseph Smith didto sa kakahoyan? (Tan-awa sa Joseph Smith—Kasaysayan 1:17.)

Ipasabut nga tungod kay ang Langitnong Amahan ug si Jesus nakigsulti kang Joseph Smith, atong gitawag si Joseph Smith nga usa ka propeta. Ang usa ka propeta mosulti kanato kon unsay gusto sa Langitnong Amahan ug ni Jesus nga atong masayran.

Istorya

• Unsa man ang usa ka propeta? (Usa ka tawo nga dunay espesyal nga tawag sa pagpakigsulti sa Langitnong Amahan ug ni Jesus ug sa pagsulti kanato kon unsay ilang gusto nga atong masayran.)

Ipakita ang hulagway sa buhing propeta. Sultihi ang mga bata bahin kaniya. Ipasabut nga ang simbahan ni Jesus kanunay gayud nga dunay usa ka buhing propeta aron sa pagtudlo kanato kon unsay gusto sa Langitnong Amahan ug ni Jesus nga atong masayran ug buhaton.

Awit

Tabangi ang mga bata sa pagkanta o sa pagsulti sa mga pulong sa koro sa “Sunda ang Propeta” [Follow the Prophet] (Songbook sa mga Bata, p. 58). Ipasabut nga ang mahisalaag nangahulugan og pagbuhat og sayop nga mga butang. Ipaisa sa usa ka bata ang hulagway sa buhing propeta samtang nanganta kamo.

Sunda’ng propeta, sunda’ng propeta, sunda’ng propeta; di ka masaag.

Sunda’ng propeta, sunda’ng propeta, sunda’ng propeta; nasayud s’ya.

Ang Simbahan ni Jesus Dunay mga Kasulatan

Iisa ang mga kasulatan.

• Unsa man ang akong gikuptan?

Pasultiha ang mga bata kon unsay ilang nahibaloan kabahin sa mga kasulatan. Pahinumdumi ang mga bata nga ang mga kasulatan naglangkob sa mga pagtulun-an sa Langitnong Amahan ug ni Jesus. Ang mga kasulatan naglangkob sa daghang tinuod nga mga istorya kabahin ni Jesus, mga propeta, ug ubang mga tawo. Ang mga kasulatan mga importanting bahin sa simbahan ni Jesus.

Nahisakop Kita sa Ang Simbahan ni Jesukristo sa mga Santos sa Ulahing mga Adlaw

• Kang kinsang simbahan kita nahisakop?

• Unsa man ang ngalan sa simbahan diin kita nahisakop?

Basaha ang Doktrina ug mga Pakigsaad 115:4 ngadto sa mga bata. Ipasabut nga kini nga ngalan nangahulugan nga kini ang simbahan ni Jesus sa panahon nga atong gipuy-an karon. Tabangi ang mga bata nga makasabut nga dunay daghang mga tawo sa tibuok kalibutan kinsa nahisakop sa Ang Simbahan ni Jesukristo sa mga Santos sa Ulahing mga Adlaw.

Mahimo nimong ipasabut nga dunay laing mga simbahan sa yuta karon nga nagtudlo kabahin ni Jesus ug nagtudlo sa mga tawo nga magpuyo og matarung nga mga kinabuhi, pero wala silay priesthood, usa ka buhing propeta, o sa tanang mga kasulatan.

Kalihokan

Hangyoa ang tanan nga nahisakop sa simbahan ni Jesus sa pagbarug. Pahinumdumi ang mga bata nga ang tanan nila kinahanglan nga mobarug. Ipasubli sa mga bata ang, “Nahisakop ako sa Ang Simbahan ni Jesukristo sa mga Santos sa Ulahing mga Adlaw.”

Ribyuha sa daklit, nga ginamit ang mga hulagway ug ang mga kasulatan, nga ang priesthood, usa ka buhing propeta, ug ang mga kasulatan maoy importanting mga bahin sa simbahan ni Jesus.

Pagpamatuod

Hatag sa imong pagpamatuod bahin sa katinuod sa ebanghelyo. Tabangi ang mga bata nga mobati kon unsa ka importante ug kaanindot nga mahisakop sa tinuod nga simbahan ni Jesus.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Paghimo og usa ka badge nga nag-ingon og Nahisakop ako sa Ang Simbahan ni Jesukristo sa mga Santos sa Ulahing mga Adlaw para masul-ob sa kada bata sa pagpauli sa balay. Pakolori sa mga bata ang ilang mga badge.

2. Buhata ang mosunod nga dula ginamit ang mga tudlo uban sa mga bata:

   Ania ang Simbahan

   Ania ang simbahan (iakub og maayo ang mga kamot nga ang mga tudlo magsayloay sa sulod),

   Ug ania ang taluktuk (iisa ang unang mga tudlo ug isikit ang mga tumoy).

   Ablihi ang mga pultahan (ukba ang mga palad, nga magdikit sa mga tudlo)

   Ug tan-awa ang tanang mga tawo (ikituy-kituy ang mga tudlo).

   Isira ang mga pultahan ug paminawa silang mag-ampo (iakub ang mga kamot nga ang mga tudlo naa sa sulod; ikupot ang mga kamot sa usa ka dalunggan).

   Ablihi ang pultahan ug manggawas silang tanan (abliha ang mga kamot, “palakta” ang mga kamot).

3. Isaysay ang usa ka istorya kabahin sa usa ka bata kinsa nahisakop sa Ang Simbahan ni Jesukristo sa mga Santos sa Ulahing mga Adlaw nga misimba. Ilakip ang mga kalihokan nga mahimong apilan sa mga bata sa imong klase, sama sa paglingkod uban sa ilang mga pamilya diha sa sakrament miting, pag-ambit sa sakrament, paglingkod sa matinahurong paagi diha sa Primary, pag-ampo, ug pagkanta.

   Mahimo usab nimong pahunahunaon ang mga bata kabahin niining mga ideyaha pinaagi sa pagpangutana sa mga pangutana sama sa “Unsa man ang kinahanglang buhaton sa mga bata kon Dominggo kinsa nahisakop sa Simbahan?” “Unsa man ang kinahanglan nilang buhaton diha sa sakrament miting? diha sa Primary?” “Unsa man ang kinahanglan nilang buhaton sa balay kon Dominggo?” “Unsa man ang kinahanglan nilang buhaton atol sa family home evening?” “Sa unsang paagi man nila kinahanglang trataron ang ilang mga pamilya? ang ilang mga higala?” Tabangi ang mga bata nga makasabut kon unsay kinahanglang buhaton sa mga batang lalaki ug babaye kinsa nahisakop sa simbahan ni Jesus.

4. Pahunahunaa ang mga bata sa lainlaing mga grupo diin sila nahisakop, sama sa pamilya o klase sa Primary. Pasultiha ang mga bata kon un say ilang ganahan sa ilang pagkasakop sa kada grupo. Tapusa kini nga hisgutanan sa unsay ganahan nila (ug nimo) sa pagkasakop sa Ang Simbahan ni Jesukristo sa mga Santos sa Ulahing mga Adlaw.

5. Kantaha o isulti ang mga pulong sa “Ang Simbahan ni Jesukristo” [The Church of Jesus Christ] (Songbook sa mga Bata, p. 48).

Dugang nga mga Kalihokan para sa mas Gagmayng mga Bata

1. Sa dili pa ang klase, pagdrowing og upat ka simpol nga mga hulagway—usa ka mata, usa ka kamot, usa ka dunggan, ug ba-ba—sa magkalahing mga piraso nga papel.

   Sultihi ang mga bata nga dunay daghang mga butang nga atong mabuhat sa simbahan. (Ipapilit ang hulagway sa usa ka mata.) Makabasa kita og mga istorya sa kasulatan. (Ipapilit ang hulagway sa usa ka kamot.) Makadula kita sa mabinationg paagi uban 3a atong mga higala. (Ipapilit ang hulagway sa usa ka dalunggan.) Makapaminaw kita og maayo ngadto sa atong mga titser. (Ipapilit ang hulagway sa ba-ba.) Maka-istorya kita sa hinay nga paagi samtang naa kita sa simbahan. Pabaruga ang kada bata ug patudloa sa usa sa mga hulagway. Kon matudlo na ang usa ka hulagway, sultihi og usab ang mga bata kon unsay gipasabut niini.

2. Tabangi ang mga bata sa pagkanta sa “Mga Istorya sa Basahon ni Mormon” [Book of Mormon Stories] (Songbook sa mga Bata, p. 62), nga mag-usab sa mga aksyon sigun sa gisugyot sa mga pulong. O pamartsaha ang mga bata libut sa kwarto samtang nanganta sila.