Leksyon 5

Si Jesukristo Mao ang Anak sa Langitnong Amahan

Katuyoan

Aron sa pagtabang sa matag bata nga makasabut nga si Jesukristo anak sa Langitnong Amahan.

Pagpangandam

1. Tun-i sa mainampoong paagi ang Mateo 3:13-17 ug Lucas 1:26-35; 2:1-7, 41-52. Tan-awa usab sa Mga Baruganan sa Ebanghelyo (31110), kapitulo 3.

2. Sa pagtugot sa imong presidente sa Primary, Pag-imbitar og amahan sa usa sa mga bata nga maghisgot mahitungod sa iyang anak sa dihang bata pa kining masuso. Hangyoa siya sa pagdala og mga litrato ug paborito nga dulaan, kon mahimo. Awhaga siya sa pagpadayag sa iyang gugma alang sa iyang anak.

3. Mga materyal nga gikinahanglan:

   1. Usa ka Biblia.

   2. Hulagway 1-16, Ang Pagkatawo (Pakete sa mga Hulagway sa Ebanghelyo 201; 62495); hulagway 1-17, Ang Batang si Jesus didto saTemplo (Pakete sa mga Hulagway sa Ebanghelyo 205; 62500); hulagway 1-18, Juan ang Bautista Nagbunyag ni Jesus (Pakete sa mga Hulagway sa Ebanghelyo 208; 62133).

4. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahibalo ngadto sa titser: Samtang maghisgot kamo sa mga amahan dinhi niini nga leksyon, pagmatngon sa mga bata sa inyong klase nga walay amahan sa ilang mga panimalay. Ipasabut nga kitang tanan adunay Langitnong Amahan nga nagmahal nato. Kon ang mga bata sa inyong klase adunay ama-ama, ipasabut nga ang mga ama-ama nagmahal usab nato ug moatiman nato.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Pangutan-a ang mga bata nga kon nakaila ba sila sa bisita. Hangyoa ang anak sa bisita sa pagpaila kaniya ngadto sa klase. Hangyoa ang amahan sa pagsulti sa mga bata mahitungod sa iyang anak. Imbitara ang bata sa pagsulti og usa ka butang mahitungod sa iyang amahan, sama sa kolor sa iyang buhok o sa iyang trabaho.

Si Jesukristo Mao ang Anak sa Langitnong Amahan

Sultihi ang mga bata nga matag usa kanila adunay duha ka mga amahan: ang yutan-ong amahan ug Langitnong Amahan. Ang atong yutan-ong amahan mao ang amahan sa atong pisikal nga mga lawas. Ang Langitnong Amahan mao ang amahan sa mga espiritu sulod sa atong mga lawas. Si Jesus adunay usa lang ka amahan, tungod kay ang Langitnong Amahan mao ang amahan sa espiritu ni Jesus ug sa iyang pisikal nga lawas. Mao kana nganong si Jesus gitawag nga Anak sa Dios.

Istorya

Ipakita ang hulagway 1-16, Ang Pagkatawo, ug isaysay ang istorya sa pagkatawo ni Jesus, nga makita diha sa Lucas 1:26-35 ug 2:1-7. Ipasabut nga ang anghel misulti ni Maria nga ang iyang anak mao ang Anak sa Dios. Gamita ang hulagway samtang ipangutana ang mosunod nga mga pangutana:

Istorya

• Kinsa nila ang inahan ni Jesus?

• Kinsa ang iyang pangalan? (Tan-awa sa Lucas 1:27.)

• Kinsa ang lalaki sa hulagway? (Tan-awa sa Lucas 1:27.)

• Kinsa ang amahan ni Jesus? (Ang Langitnong Amahan. Si Jose usa ka buotan nga tawo nga gipili sa Langitnong Amahan nga moatiman ni Maria ug ni Jesus.)

Kanta

Pabaruga ang mga bata ug ipakanta o ipasulti ang mga pulong sa “Didto sa Pasungan” [Away in a Manger] (Songbook sa mga Bata, p. 26). Paghimo og angay nga mga lihok sa kamot ug bukton sumala sa gisugyot sa mga pulong.

Didto’s pasungan, way higdaanang kuna,

Sa batang si Jesus, walay katulgan;

Kabitoonan sa langit nagbantay,

Sa batang Jesus, natulog sa kumpay.

Si Jesus Nahigugma sa Langitnong Amahan ug Misunod Kaniya

Istorya

Ipakita ang hulagway 1-17, Ang Batang Jesus diha sa Templo, ug isaysay ang istorya ni Jesus diha sa templo, nga makita diha sa Lucas 2:41-52. Ipasabut nga si Jesus miadto sa templo tungod kay nahigugma siya sa Langitnong Amahan ug gustong motudlo sa mga tawo kabahin kaniya.

Istorya

• Unsay gibuhat ni Jesus sa templo? (Tan-awa sa Lucas 2:46.)

Kalihokan

Pabaruga ang mga bata ug buhata ang mosunod nga kalihokan ginamit ang bersikulo sa makadaghan:

Ang Batan-ong Jesus miadto sa templo (alsaha ang mga tiil nga morag naglakaw)

Sa wala pa siya makusgan ug motaas (ituy-od ang mga bukton)

Sa pagbuhat sa buhat sa iyang Amahan (bukhara ang mga kamot)

Tungod kay iyang gihigugma kitang tanan (gaksa ang kaugalingon).

Istorya

Ipakita ang hulagway 1-18, si Juan Bautista Nagbunyag ni Jesus, ug isaysay ang istorya sa bunyag ni Jesus, nga makita sa Mateo 3:13-17. Ipasabut nga si Jesus nagpabunyag tungod kay iyang gihigugma ang Langitnong Amahan ug gustong mosunod kaniya. Si Jesus gusto usab nga mopakita og maayo nga ehemplo kanato. Basaha pagkusog ang bersikulo 17 (sugod sa Kini mao ang akong Anak nga pinalangga), ug ipasabut nga kini ang mga pulong sa Langitnong Amahan. Ang Langitnong Amahan nalipay nga si Jesus nagpabunyag.

Istorya

• Nakakita na ba kamo og tawo nga gibunyagan?

Ipasabut nga ang usa ka paagi nga ang mga bata magmasulundon ngadto sa Langitnong Amahan ug magpakita kaniya nga sila nahigugma kaniya mao ang pinaagi sa pagpabunyag kon sila mag-edad na og otso anyos.

Pagpamatuod

Ipamatuod nga si Jesus mao ang anak sa Langitnong Amahan. Ipadayag ang imong gugma alang ni Jesus ug ang pagpasalamat nga imong gibati alang kaniya.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Ikulob ang tulo ka mga hulagway nga gikan sa leksyon diha sa imong paa o sa lamesa. Imbitara ang usa ka bata sa pagpili og usa sa mga hulagway, ipakita kini sa klase, ug isaysay ang istorya nga gipakita sa hulagway. Buhata usab sa laing duha ka mga hulagway.

2. Ipakanta o ipasulti sa mga bata ang mga pulong sa unang bersikulo sa “Sultihi Ko sa mga Istorya ni Jesus” [Tell me the Stories of Jesus] (Songbook sa mga Bata, p. 36).

3. Ipadrama sa mga bata ang istorya sa pagkatawo ni Jesus, gamita ang simpol nga kagamitan sama sa monyeka, bandana, ug mga purong.

Dugang nga mga Kalihokan para sa Gagmayng mga Bata

1. Ipakita ang hulagway 1-16, Ang Pagkatawo, ug pangutan-a ang mga bata kinsa ang batang masuso diha sa hulagway. Sultihi sila mahitungod sa pagkahimugso ni Jesus.

   Ipasabut nga si Jesus dili na bata. Dako na siya karon, ug siya ang pinakaimportante nga tigtabang sa Langitnong Amahan. Ipakita ang hulagway 1-3, si Jesus ang Kristo, ug sultihi ang mga bata nga si Jesus nahigugma kanato ug nagtabang kanato sa daghang mga paagi.

2. Pabaruga ang mga bata ug pakantaha sa mosunod nga mga pulong sa tuno sa “Dihay Usa ka Snowman” [Once There Was a Snowman] (Songbook sa mga Bata, p. 121). Gamita ang nagtikubo nga mga lihok alang sa unang bersikulo ug tuyhad nga mga aksyon alang sa ikaduhang bersikulo.

   Sa bata, bata, bata, pa ako,

   Gamay, gamay, gamay pa ko.

   Karon dako, dako, dako na ko,

   Karon dako, taas, taas, taas taas!

3. Pakigsulti sa mga ginikanan sa mga sakop sa imong klase pag-una aron makakuha og mga litrato sa mga sakop sa klase sa diha nga batang masuso pa sila, o gagmay nga mga dulaan nga ilang giduladulaan. Ipakita kini ngadto sa klase. liha ang batang masuso sa kada litrato o ang tag-iya sa kada dulaan. Ipasabut nga sa dihang batang masuso pa sila, ang mga bata parehog hitsura diha sa litrato ug nagdula sa mga dulaan.