Leksyon 12

Ang Gasa sa Espiritu Santo

Katuyoan

Aron sa pagtabang sa mga bata sa pagdayeg sa kahigayunan sa pagdawat sa gasa sa Espiritu Santo sa panahon nga sila kumpirmahan nga mga sakop sa Ang Simbahan ni Jesukristo sa mga Santos sa Ulahing Adlaw.

Pagpangandam

1. Pagtuon sa Juan 14:16–17, 26.

2. Andama ang tsart gikan sa leksyon 7, “Pagpasakop sa Simbahan ni Jesukristo.” Sa wala pa ang klase, ibutang ang mga gilis sa pulong “Hugot nga pagtuo diha ni Jesukristo,” “Paghinulsol,” ug “Bunyag” diha sa tukma nga mga paagi diha sa tsart. Andama ang gilis sa pulong “Gasa sa Espiritu Santo” alang sa paggamit sulod sa leksyon.

3. Ibutang ang hulagway 3-14, Bata nga Babaye Gikumpirmahan (62020) sa usa ka kahon. Kon mahimo, pusta ang kahon aron ingnon nga usa ka gasa.

4. Pangandam sa pagtabang sa mga bata sa pag-awit o pagsulti sa mga pulong sa awit “Ang Espiritu Santo [The Holy Ghost]” (Children’s Songbook, p. 105); ang mga pulong gilakip diha sa luyo niining tamdanan nga basahon.

5. Mga kagamitan nga gikinahanglan:

   1. Usa ka Biblia.

   2. Hulagway 3-14, Bata nga Babaye Gikumpirmahan (62020); hulagway 3-22, Ang Katapusan nga Panihapon (62174; Sudlanan sa Hulagway sa Ebanghelyo 225); ug hulagway 3-10, Ang Unang Panan-awon (62470; Sudlanan sa Hulagway sa Ebanghelyo 403).

6. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Makadawat sa Gasa sa Espiritu Santo

Pang-atensyon nga kalihokan

Ipakita ang kahon sa “gasa” ug pangutana sa mosunod nga mga pangutana:

Pang-atensyon nga kalihokan

• Ngano nga kita maghinatagay og mga gasa?

• Unsay inyong bation kon adunay usa ka tawo nga naghatag kaninyo og usa ka gasa?

Pagtudlo sa magtutudlo

Ipasabut nga sa adlaw nga kita nahimo nga mga sakop sa Ang Simbahan ni Jesukristo sa mga Santos sa Ulahing Adlaw mao ang usa sa labing mahinungdanon nga mga adlaw sa atong mga kinabuhi. Nianang matahum nga higayon, ang Langitnong Amahan ug si Jesus naghatag kanato og usa ka bililhon nga gasa.

Mga tultulanan

Sultihi ang mga bata nga ikaw mohatag kanila og pipila ka mga tultulanan nga motabang kanila sa pagkaplag unsa ang gasa. Dapita sila sa pagpaminaw sa hilom hangtud ikaw makahatag kanila sa tanan nga mga tultulanan.

Mga tultulanan

1. Ang gasa nga gihatag sa Langitnong Amahan ug ni Jesukristo kanato dili mapalit og salapi.

2. Kita dili makagunit niini nga gasa sa atong mga kamot ug makatan-aw niini ingon sa atong mahimo sa usa ka basahon o sa usa ka dulaan.

3. Kini nga gasa nagbili og labaw pa kay sa bisan unsa nga gasa nga madawat sa usa ka tawo.

4. Takus nga mga sakop sa Simbahan gitabangan ug gihupay pinaagi niini sa ilang tibuok nga mga kinabuhi.

5. Kita makadawat niini kon ang mga lalaki kinsa naghupot sa Melchizedek nga Pagkapari mopandong sa ilang mga kamot diha sa atong mga ulo ug mokumpirma kanato nga mga sakop sa Ang Simbahan ni Jesukristo sa mga Santos Sa Ulahing Adlaw.

Hangyoa ang tanan kinsa nakahibalo unsa ang gasa sa pagpataas sa ilang mga kamot.

Mga tultulanan

• Unsa kini nga gasa? (ang gasa sa Espiritu Santo.)

Hulagway ug panaghisgutan

Ipaabli sa usa ka bata ang gasa aron sa pagkaplag sa hulagway. Unya ipakita ang hulagway sa usa ka bata nga gikumpirmahan. Ipasabut sa unsa nga paagi ang gasa sa Espiritu Santo gihatag. Sunod sa bunyag sa usa ka tawo, mga lalaki kinsa naghupot sa Melchizedek nga Pagkapari mobutang sa ilang mga kamot diha sa ulo sa tawo ingon nga gipakita diha sa hulagway. Usa sa mga lalaki (sa kasagaran ang amahan, ang obispo, usa ka misyonaryo, o usa ka higala sa tawo nga gikumpirmahan) mohatag sa pag-ampo. Sulod sa pagampo, ang tawo gikumpirmahan nga usa ka sakop sa Simbahan ug nagdawat sa gasa sa Espiritu Santo.

Hulagway ug panaghisgutan

• Unsa ang inyong nahibaloan mahitungod sa Espiritu Santo?

Sa lakbit ipasulti sa mga bata unsa ang ilang nahibaloan mahitungod sa Espiritu Santo. Ipagula ang mosunod nga mga punto:

Hulagway ug panaghisgutan

1. Ang Espiritu Santo walay lawas nga unod ug bukog ingon kanato. Siya adunay usa ka espiritu nga lawas nga porma sa usa tawo.

2. Ang Espiritu Santo nagtudlo kanato mahitungod sa Langitnong Amahan ug ni Jesukristo ug nagpamatuod niadtong mga butang nga gitudlo kanato mahitungod kanila.

3. Ang Espiritu Santo nagpamatuod ngari kanato sa panahon nga kita tudloan sa kamatuoran nga unsay atong nadunggan tinuod.

4. Ang Espiritu Santo gipadala gikan sa Langitnong Amahan ug ni Jesukristo aron sa pagtabang kanato sa pagpili sa matarung.

Tsart

Ipakita ang tsart “Pagpasakop sa Simbahan ni Jesukristo.”

Ibutang ang gilis sa pulong “Gasa sa Espiritu Santo” diha sa ikaupat nga angang sa tsart. Ipabasa sa labaw ka hingkod nga bata o basahon nimo sa imong kaugalingon; dayon himoa nga ang tanan nga mga bata mosulti pag-usab sa mga pulong uban kanimo.

Ipasabut nga dili tanan nga mga katawhan kinsa nagpuyo sa yuta adunay kahigayunan sa pagdawat sa gasa sa Espiritu Santo. Kadto lamang kinsa gibunyagan ug gikumpirmahan nga mga sakop sa Ang Simbahan ni Jesukristo sa mga Santos sa Ulahing Adlaw ang makabaton niana nga panalangin. Hatagi og gibug-aton nga kon kita makadawat sa gasa sa Espiritu Santo diha sa kumpirma, kita mahimo nga opisyal nga mga sakop sa Simbahan. Balika pagtuon uban sa mga bata ang mga paagi diha sa tsart, magsugod sa hugot nga pagtuo diha ni Jesukrito.

Balik-pagtuon sa artikulo sa hugot nga pagtuo

Isulat ang mga pulong sa ikaupat nga artikulo sa hugot nga pagtuo diha sa pisara. Balika pagsulti og kusog uban sa mga bata. Unya pagpapas og daghan sa mga pulong ug balika pagsulti kini og kusog uban kanila pag-usab. Padayon sa pagpapas og diyutay nga mga pulong matag panahon nga kamo mobalik pagsulti niini samtang ang pagbansay naghatag og kaayohan.

Si Jesukristo Misaad sa Pagpadala sa Espiritu Santo

Hulagway

Ipakita ang hulagway 3-22, Ang Katapusan nga Panihapon. Ipasabut nga sa miagi nga gabii sa wala pa ilansang sa krus si Jesukristo, siya nanihapon sa katapusan nga panihapon uban sa Napulong Duha ka mga Apostoles. Niana nga panahon, siya usab mitudlo kanila og usa ka butang nga mahinungdanon kaayo. Siya nahibalo nga sa panahon nga siya mawala ang mga Apostoles magmagul-anon kaayo. Siya nakahibalo nga sila manginahanglan sa iyang tabang. Si Jesus misaad sa mga Apostoles nga siya dili mobiya kanila apan mopadala og usa nga motabang ug mohupay kanila.

Balaan nga kasulatan

Hangyoa ang usa nga labaw ka hingkod nga bata sa pagbasa unsay gisulti ni Jesus sa iyang mga Apostoles gikan sa Juan 14:16 o basaha kini sa inyong kaugalingon.

Balaan nga kasulatan

• Unsa ang lain nga ngalan alang sa Maghuhupay kinsa gisaad ni Jesus nga ipadala ngadto sa mga Apostoles? (Ang Espiritu Santo.)

Basaha ang Juan 14:26 ngadto sa mga bata.

Hatagi og gibug-aton nga si Jesukristo mipadala sa Espiritu Santo aron sa pagtabang ug paghupay sa iyang mga Apostoles. Bisan og ang mga Apostoles dili makakita sa Espiritu Santo, sila nakaamgo kaniya nga nagtabang ug naghupay kanila. Kana mao ang katarungan nga siya gitawag og ang Maghuhupay.

Awit

Awita o isulti ang mga pulong sa awit “Ang Espiritu Santo.”

Ang Espiritu Santo Makatabang Kanato

Pagtudllo sa magtutudlo

Ipasabut nga ingon nga mga sakop sa Simbahan ni Jesukristo, kita adunay sama nga kahigayunan sama sa mga Apostoles diha sa pagbaton sa Espiritu Santo sa pagtabang ug paghupay kanato. Hatagi og gibug-aton nga ang pagpakig-uban sa Espiritu Santo mao ang usa sa labing mahinungdanon sa mga gasa nga kita makapahimulos niini nga kinabuhi. Kita sa kanunay makabaton sa iyang pagpakig-uban kon kita takus ug nagpuyo sa matarung nga paagi.

Sultihi ang mga bata nga ang Espiritu Santo makatabang kanato nga makahibalo unsa ang buhaton kon kita adunay malisud nga mga pagpili nga himoon. Awhaga ang mga bata sa pagsunod sa ilang mga pagbati gikan sa Espiritu Santo kon sila nahadlok o nasakitan. Siya motabang kanila nga makahibalo unsay ilang kinahanglan nga buhaton, ingon sa pag-aghat kanila sa pagsulti sa usa ka tawo kinsa makatabang.

Sugilanon

Isaysay ang mosunod nga sugilanon sa imong kaugalingon nga mga pulong. Hangyoa ang mga bata sa pagpaminaw aron sa pagsusi giunsa sa Espiritu Santo sa pagtabang ug paghupay sa usa ka bata nga babaye nga ginganlan og Jan:

Si Jan nagpuyo hapit sa tibuok niya nga kinabuhi diha sa usa ka gamay nga umahan sa lungsod. Siya nahigugma sa lungsod ug sa mga tawo kinsa nagpuyo didto. Sa kasagaran si Jan naghunahuna unsa kaanindot kini nga magpuyo sa usa ka lungsod nga puno kaayo sa daghan nga manggihigalaon nga mga tawo.

Usa ka adlaw, ang amahan ni Jan miabut gikan sa trabaho ug misulti sa banay nga siya mobalhin og lain nga trabaho ug nga sila mobalhin og puyo ngadto sa usa ka dako-dako nga dakbayan.

Sugilanon

• Sa inyong hunahuna unsay gibati ni Jan?

Si Jan mibati og kaguol ug kabalaka sa matag higayon nga siya maghunahuna sa pagbalhin og puyo. Kini malisud alang kaniya sa paghunahuna nga sa dili madugay siya mobiya na sa iyang mga higala, panimalay, eskwelahan ug purok.

Si Jan naguol. Siya naghunahuna kon siya maglisud ba sa paghimo og bag-o nga mga higala. Sama sa unsa kaha ang iyang bag-o nga panimalay ug purok? Ang buluhaton sa eskwela malisud ba kaayo alang kaniya?

Walay usa nga nakatabang kaniya sa pagwagtag sa iyang magul-anon nga mga pagbati. Si Jan mihukom sa pag-ampo ug nangayo sa Langitnong Amahan og tabang.

Si Jan nag-ampo ngadto sa Langitnong Amahan sa tibuok niyang kasingkasing. Samtang siya nag-ampo, usa ka butang nga maanindot nagsugod sa paghitabo. Ang tanan nga kaguol ug kahadlok nga mga pagbati misugod sa pagkawala.

Si Jan mibati nga adunay usa nga naghupay kaniya.

Sugilanon

• Kinsa sa inyong hunahuna ang naghupay ni Jan? (Ang Espiritu Santo.)

Ang banay ni Jan mibalhin, ug ang tanan nahimo nga maayo ra. Siya sa kanunay naghinumdom sa mahigugmaon nga tabang nga iyang nadawat gikan sa Langitnong Amahan pinaagi sa Espiritu Santo.

Kasinatian ug pagpamatuod sa magtutudlo

Ikaw mahimo nga buot nga mosaysay mahitungod sa usa ka panahon nga ikaw gihupay pinaagi sa Espiritu Santo, ingon sa panahon nga ikaw nahadlok o sa panahon nga ikaw nawad-an og usa ka hinigugma. Pagpamatuod nga ang Espiritu Santo makahupay ug makagiya kanato. Ang gasa sa Espiritu Santo nga atong madawat human sa bunyag mao ang usa sa labing bililhon nga mga gasa nga ang Langitnong Amahan makahatag kanato aron sa pagtabang kanato sa pagpili sa matarung sa tibuok natong mga kinabuhi.

Katingbanan

Hatagi og gibug-aton nga ingon nga mga sakop sa Simbahan kita nagtuo sa Espiritu Santo. Kita nakahibalo nga siya mohatag kanato sa tabang ug paghupay nga atong gikinahanglan kon kita mosunod sa mga sugo.

Artikulo sa hugot nga pagtuo

Ipasabut nga ang unang artikulo sa hugot nga pagtuo nagsulti mahitungod sa Espiritu Santo. Balika-pagsulti uban sa mga bata ang unang artikulo sa hugot nga pagtuo. Ipakita ang hulagway 3-10, Ang Unang Panan-awon, ug hulagway 3-14, Bata nga Babaye Gikumpirmahan, diha sa angay nga mga bahin samtang kamo nagsulti sa artikulo sa hugot nga pagtuo.

Pagdapit og usa ka bata sa paghatag sa panapos nga pag-ampo; pahinumdumi siya sa pagpasalamat sa Langitnong Amahan alang sa paghimo niini nga mahimo alang kanato sa pagdawat sa gasa sa Espiritu Santo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Pagdapit og usa ka halangdon nga dinapit nganha sa imong klase. Hangyoa ang imong dinapit sa pagpakigbahin og usa ka kasinatian sa diha nga siya gihupay pinaagi sa Espiritu Santo. (Pangayo og pagtugot gikan sa obispo o presidente sa sanga kon ang dinapit dili gikan sa inyong purok o sanga.)

2. Pangutana sa mga bata kon aduna bay usa ka tawo kinsa naghimo kanila nga mobati og kaharuhay, kalipay, ug walay ka kuyaw, ilabi na kon usa ka butang nahitabo nga sila mibati og kaguol. Hatagi og gibug-aton nga ang mao nga mga tawo usahay makahatag kanato og kahupay sa panahon nga kita magul-anon o mibati og pag-inusara. Ipasabut nga ang Espiritu Santo usahay gitawag og ang Maghuhupay. Siya makahatag kanato og dako nga kahupay sa tibuok nato nga mga kinabuhi. Si Jesukristo mipadala kaniya aron makig-uban kanato kon kita mobati og kaguol o kasamok.

3. Awita o isulti ang katapusang duha ka mga linya sa “Ang Ligdong nga Hinagawhaw nga Tingog [The Still Small Voice]” (Children’s Songbook, p. 106):

   Dungga, (kamot luyo sa dunggan)

   Ang Espiritu pamatia. (ibutang ang igtutudlo nga tudlo sa mga ngabil)

   Dungga, dungga (kamot luyo sa dunggan)

   Pamatia. (ibutang ang kamot ibabaw sa kasingkasing)

4. Idula ang mosunod nga hilom nga dula uban sa mga bata aron sa pagpakita kanila nga sila mahimo nga magiyahan pinaagi sa ligdong, hinagawhaw nga tingog:

   Pagpakita sa mga bata og usa ka gamay nga butang nga imong tagoan alang niini nga dula. Pagdapit og usa ka bata sa pagbiya sa pundok sa makadiyut samtang imong tagoan ang butang. Pabalika ang bata nganha sa pundok, ug sultihi siya nga kinahanglan gayud nga maminaw aron madumduman ang agianan sa gitago nga butang. Paghimo og hinay nga saba, ingon sa hinay nga pagpikpik sa usa ka lapis, hinay nga pagpakpak sa kamot, o paghagunghong sa usa ka awit, aron sa pagpakita sa bata hain nga agianan mopadulong sa pagpangita sa gitagoan nga butang. Siguroha nga ang mga saba nga imong gihimo hinay kaayo ug ligdong. Pikpika og hinay kon ang bata nagtan-aw sa husto nga direksyon. Pikpik pa og dali samtang ang bata nagkaduol sa gitagoan nga dapit, hangtud iyang makit-an ang butang.

   Hatag og gibug-aton ngadto sa mga bata nga sila magiyahan sa ilang mga kinabuhi pinaagi sa pagpamati ngadto sa ligdong, hinagawhaw nga tingog sa Espiritu Santo.

5. Hagawhaw ngadto sa mga bata ug sulti og usa ka butang ingon sa, “Kon kamo makadungog kanako, ibutang ang inyong tudlo sa inyong aping. Kon kamo makadungog kanako, ibutang ang inyong tudlo sa inyong suwang.” Unya ipasabut ngadto sa mga bata nga adunay lain kinsa nagsulti uban ang ligdong, hinagawhaw nga tingog, ug sila kinahanglan gayud mamati sa labing mabinantayon aron makadungog unsa ang gisulti sa tingog kanila. Kana nga tingog gikan sa Espiritu Santo.