Leksyon 19

Ang Langitnong Amahan Motabang Kanato Kon Kita Mag-ampo

Katuyoan

Aron sa pagtabang sa mga bata nga makaamgo nga sila makadawat og tabang gikan sa Langitnong Amahan kon sila mag-ampo.

Pagpangandam

1. Sa mainampuon nga paagi pagtuon sa 1 Nephi 18:5–23 ug 3 Nephi 18:20.

2. Mga kagamitan nga gikinahanglan:

   1. Pisara, tisas, ug papas.

   2. Hulagway 3-45, Lehi ug ang Iyang mga Katawhan Miabut sa Gisaad nga Yuta (62045; Sudlanan sa Hulagway sa Ebanghelyo 304); hulagway 3-46, Jesus Nag-ampo sa Tanaman sa Gethsemane (62175; Sudlanan sa Hulagway sa Ebanghelyo 227).

3. Paghimo sa tanan nga gikinahanglan nga mga pagpangandam sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Si Nephi Nag-ampo ug Nakadawat og Panabang

Pang-atensyon nga kalihokan

Idibuho ang mosunod nga hulagway diha sa pisara samtang ikaw nagsulti ngadto sa mga bata:

Sultihi ang mga bata nga usa ka amahan ug ang iyang minyo nga anak nga lalaki nagpuyo nga nag-atbangay diha sa usa ka dako kaayo nga bukid.

Pang-atensyon nga kalihokan

• Unsaon niining amahan ug anak sa pagsinultihanay nga dili moadto sa pikas bukid?

Idibuho ang mga hulagway ingon sa mosunod aron sa pagpakita sa mga sugyot sa mga bata:

Telepono

Radyo

Pati nga tigdala og sulat

Mga sulat

Pang-atensyon nga kalihokan

• Ngano nga mahinungdanon alang sa amahan ug sa anak nga magkasinultihanay sa usag usa? (Aron dili mingawon, aron sa pagpakita og gugma, aron sa pagdawat ug paghatag og panabang aron sa pagpakigbahin og mga ideya.)

• Unsa ang mahitabo kon sila dili magkasinultihanay sa usag usa? (Sila dili mobati og ka suod sa usag usa ug ang ilang gugma mahimo nga magkakunhod. Sila dili makatabang sa usag usa.)

Ipasabut nga sama lamang nga kita magkasinultihanay sa usag usa dinhi sa yuta kon magkabulag pinaagi sa lagyo nga dapit, kita makasinultihanay usab uban sa atong Langitnong Amahan.

Pang-atensyon nga kalihokan

• Sa unsa nga paagi kita magkasinultihanay uban sa atong Langitnong Amahan? (Pinaagi sa pag-ampo.)

• Ngano nga mahinungdanon ang pagpakigsinultihanay uban sa Langitnong Amahan? (Aron sa pagpasalamat kaniya alang sa atong mga panalangin, aron sa pagpakita og hugot nga pagtuo diha kaniya, aron sa paghangyo ug pagdawat sa iyang panabang ug mga panalangin, aron sa pagdugang sa atong gugma alang kaniya.)

Hulagway, sugilanon diha sa balaan nga kasulatan, ug panaghisgutan

Pahinumdumi ang mga bata sa leksyon nga ilang nakat-unan mahitungod ni Nephi nga nagtukod og usa ka barko. Papaminawa ang mga bata aron makakat-on sa unsa nga paagi nga ang pag-ampo nakatabang ni Nephi.

Sa diha nga nahuman na ang barko ni Nephi, ang amahan ni Nephi, nga si Lehi, gisugo nga ang iyang banay pakargahon og mga liso, mga pagkaon, ug uban pa nga mga butang diha sa barko. Unya sila misakay sa barko ug milayag padulong sa gisaad nga yuta.

Ipakita ang hulagway 3-45, Lehi ug Iyang mga Katawhan Miabut sa Gisaad nga Yuta, ug itudlo ang Liahona diha sa kamot ni Lehi.

Ipasabut nga ang Liahona usa ka matang sa kompas. Kini mipakita kanila asa nga direksyon mopanaw diha sa kamingawan ug asa mangulin sa barko. Kini molihok lamang kon sila mga matarung.

Human ang banay maanaa sa dagat sulod sa daghan nga mga adlaw, pipila sa igsoon nga mga lalaki ni Nephi misugod sa paglihok og dili matarung. Sila misulti sa walay pagtahud ngadto sa ilang mga ginikanan ug ngadto sa ubang mga tawo diha barko. Sila nakalimot giunsa sa Langitnong Amahan pagtabang ug pagpanalangin kanila. Si Nephi nahadlok nga ang ilang kadautan makapasuko sa Ginoo, busa siya misulti ngadto kanila mahitungod sa ilang panglihok. Si Laman ug si Lemuel nasuko. Sila dili buot nga ang ilang manghud nga lalaki mosulti kanila unsay ilang buhaton. Ilang gigapos si Nephi ug mipadayon sa ilang dili matarung nga mga kalihokan.

Human dayon magapos si Nephi, ang Liahona mihunong og lihok. Si Laman ug si Lemuel wala masayud asa nga direksyon ipangulin ang barko. Usa ka kusog nga bagyo miabut. Sulod sa tulo ka mga adlaw ang barko gikuso-kuso diha sa dagat sa hilabihan nga kabangis nga ang mga tawo naghunahuna nga sila malumos. Apan si Laman ug si Lemuel sa gihapon dili mobuhi ni Nephi.

Ang bagyo misamot og ka kusog. Sa katapusan si Laman ug si Lemuel nakaamgo nga sila anaa sa kakuyaw agi og sangputanan sa ilang kadautan. Sila nakahibalo nga sila mamatay diha sa bagyo kon sila dili maghinulsol, busa ilang gibuhian si Nephi.

Bisan tuod og ang mga buol-buol ug ang mga pulso namurot ug sakit kaayo, siya wala mobagulbol ngadto sa Langitnong Amahan.

Human buhii si Nephi, ang Liahona diha-diha dayon misugod sa paglihok. Karon si Nephi makapangulin na sa barko sa husto nga direksyon.

Si Nephi nag-ampo ngadto sa Langitnong Amahan. Ang hangin mihunong ug ang dagat nagmalinawon.

Uban sa paghunong sa bagyo ug sa Liahona nga milihok na usab, si Nephi nangulin sa barko sa walay kakuyaw ngadto sa gisaad nga yuta.

Hulagway, sugilanon diha sa balaan nga kasulatan, ug panaghisgutan

• Ngano nga ang Liahona dili molihok samtang si Nephi gigapos?

• Ngano sa inyong hunahuna si Nephi wala mobagulbol ngadto sa Langitnong Amahan samtang siya gigapos?

• Unsa ang atong makat-unan gikan sa panig-ingnan ni Nephi?

• Unsa ang gibuhat ni Nephi aron maluwas ang barko gikan sa pagkalunod sa bagyo?

• Unsa ang gibuhat sa Langitnong Amahan aron sa pagtabang ni Nephi?

Ang Langitnong Amahan Motabang Kanato Kon Kita Mag-ampo

Hulagway ug balaan nga kasulatan nga sugilanon

Ipakita ang hulagway 3-46, Jesus Nag-ampo sa Gethsemane.

Hulagway ug balaan nga kasulatan nga sugilanon

• Unsa ang gibuhat ni Jesus dinhi niini nga hulagway? (Nag-ampo ngadto sa Langitnong Amahan.)

• Ngano nga nag-ampo si Jesus? (Siya nanginahanglan sa tabang sa Langitnong Amahan aron sa paggiya kaniya.)

Ipasabut nga samtang si Jesus dinhi pa sa yuta siya nag-ampo sa kanunay ngadto sa Langitnong Amahan. Kita usab makaampo ngadto sa Langitnong Amahan kon kita nanginahanglan og panabang.

Sugilanon

Iasoy ang mosunod nga tinuod nga sugilanon sa usa ka batan-on nga babaye kinsa nag-ampo alang sa panginahanglan sa lain nga tawo:

Si Mary diha sa higdaanan natulog usa ka gabii niana sa diha nga siya nahigmata sa usa ka saba. Samtang siya naminaw, iyang nahibaloan nga kini iyang upat ka tuig ang panuigon nga igsoong lalaki ang naghilak nagmulo nga ang iyang tiyan nagsakit. Siya nakadungog sa iyang inahan nga sa mapinanggaon mihupay kaniya, naningkamot sa pagtabang kaniya nga mobati og kaarang-arang; apan ang iyang igsoon nga lalaki nagsigi og hilak. Siya naghigda nga mibati og kalooy kaniya. Siya nakahibalo nga ang iyang inahan naghimo sa tanan kutob sa iyang mahimo alang kaniya, apan sa gihapon kini nakahasol kaniya nga nakahibalo nga ang iyang igsoon nga lalaki nagdaot. Sa katapusan siya mihukom nga adunay usa ka butang nga iyang mahimo.

Sugilanon

• Unsa sa inyong hunahuna ang iyang gihimo?

Siya sa hilom mibangon gikan sa higdaanan ug miluhod aron mag-ampo. Siya mihangyo sa Langitnong Amahan nga intawon ayohon ang iyang gamay nga igsoon nga lalaki aron siya makabalik og katulog. Sa mubo lamang nga higayon, ang iyang igsoon nga lalaki nakatulog. Sa sunod nga buntag siya nangutana sa iyang inahan kon naunsa na ang iyang manghud, ug siya mitubag “Maayo man. Siya nakatulog gabii ug ingon og maayo na siya karon.”

Dapita ang mga sakop sa klase sa pagsulti o pakigbahin og usa ka kasinatian sa diha nga sila o usa ka sakop sa banay nag-ampo alang sa panabang. Pahatagi kanila og gibug-aton giunsa sa Langitnong Amahan pagtubag ang ilang mga pag-ampo.

Sugilanon

Isaysay ang mosunod nga sugilanon mahitungod sa usa ka tawo kinsa nag-ampo alang sa panabang, o pagsaysay og usa ka sugilanon sa inyong kaugalingon:

Usa ka ting-init si Jamie gihatagan og usa ka nati. Iyang ginganlan ang nati og Boots ug mipakaon ug miamuma kaniya nga mahigugmaon. Si Jamie ug si Boots sa kanunay nagdula diha sa kinoral nga uma diin ang amahan ni Jamie mibutang sa iyang kabayo. Si Jamie ug si Boots nagdula dinhi niini nga uma usa ka hapon na kaayo, sa diha nga ang inahan ni Jamie mitawag kaniya og panihapon. Si Jamie midagan ngadto sa ganghaan ug sa dali gilamba kini pagsira.

Human sa panihapon si Jamie migula aron sa pakigdula ni Boots pag-usab. Apan sa diha nga siya miabut sa ganghaan, iyang nakita kini nga naglabyog nga abli. Si Boots ug ang kabayo wala na. Si Jamie misira sa ganghaan sa dinali nga kini wala matrangka.

Si Jamie wala masayud asa magsugod sa pagpangita. Siya nakahinumdum sa iyang amahan nga nagsulti kaniya nga sa diha nga siya usa pa ka gamay nga batang lalaki, siya nawala diha sa daplin sa bukid. Ang iyang amahan miluhod ug mihangyo sa Langitnong Amahan sa pagtabang kaniya. Sa wala madugay usa ka magbalantay sa karnero sa iyang pagpauli padulong ngadto sa kamalig sa mga karnero nakakita kaniya ug mitabang kaniya sa pagpauli.

Si Jamie miluhod diha sa sagbut, mipiyong sa iyang mga mata, ug nag-ampo: “Langitnong Amahan, ako nanginahanglang sa imong panabang. Ako nawadan sa kabayo ni Papa ug ni Boots tungod kay wala nako matrangkahi ang ganghaan. Intawon tabangi ako sa pagpangita kanila.”

Si Jamie nakakita og mga tunob sa hayop diha sa dalan. Siya misugod sa pagsubay sa mga tunob nga nagtungas, naggunit ngadto sa mga bugang aron dili maligid. Sa katapusan iyang nadungog ang pag-unga ni Boots. Si Jamie mikatkat sa bungtod ug sa wala madugay nakit-an ang nati nga nasabud sa bugang. Ang kabayo nagbarug sa duol. Gikuha ni Jamie ang tiil ni Boots nga nasabud sa kabugangan. Sa diha nga si Boots misulay sa pagtindog, siya natumba. Nakit-an ni Jamie nga usa ka mga tiil ni Boots napiang.

Si Jamie mihangyo pag-usab sa Langitnong Amahan sa pagtabang kaniya. Iyang gigamit ang iyang jacket aron himoon og sinangay sa pagpas-an ni Boots ug misugod sa pagdulhog og balik sa bukid. Ang kabayo misunod, nagmatngon sa iyang paglakang ngadto sa ubos nga dangog nga agianan. Si Boots bug-at, ug si Jamie naligid ngadto sa ubos.

Samtang ang tulo nagkaduol sa panimalay, ang mga ginikanan ni Jamie midagan sa gawas aron sa pagtabang. Samtang ang amahan ni Jamie miamuma sa nasakitan nga nati, siya miingon, “Maayo gani imo siyang nadala dinhi sa wala pa siya mahutdi og daghan kaayo nga dugo. Siya mahimo nga mamatay sa pagkabungog.”

Ang inahan ni Jamie nangutana, “Giunsa nimo pagkahibalo asa sila pangitaa?”

“Ako mihimo lamang unsa ang himoon unta ni Papa,” mitubag si Jamie.

“Unsa kana, anak?” nangutana si Papa.

“Nahinumdum ka sa akong pagkawala?” Ikaw nag-ampo ngadto sa Langitnong Amahan alang sa panabang, ug kana mao gayud ang akong gihimo. Ako nag-ampo, ug ang Langitnong Amahan mitabang kanako (tan-awa “The Open Gate,” Friend, Abr. 1977, pp. 28–30).

Katingbanan

Pang-pisara nga kalihokan

Balika pagtuon ang leksyon pinaagi sa pagpangutana sa mosunod nga mga pangutana. Human ang usa ka bata motubag sa usa ka pangutana, pagduola siya sa pisara. Subaya og kopya ang usa sa iyang mga kamot ug isulat ang iyang ngalan sa sulod sa gikopya nga kamot.

Pang-pisara nga kalihokan

• Asa padulong si Lehi ug ang iyang banay? (Ngadto sa gisaad nga yuta.)

• Ang Liahona ba kanunay nga milihok? (Dili. Kini molihok lamang kon ang mga tawo mga matarung.)

• Unsa ang gipakita sa Liahona ni Nephi? (Asa nga direksyon ipangulin ang barko.)

• Unsa ang nahitabo human si Nephi gigapos? (Usa ka makalilisang nga bagyo ang miabut. Ang Liahona mihunong paglihok.)

• Unsa ang nahitabo human si Nephi gibadbaran sa gapos? (Ang bagyo mihunong. Ang Liahona milihok pag-usab.)

• Ngano nga si Nephi nag-ampo alang sa panabang sa Langitnong Amahan?

• Unsa ang kinahanglan natong buhaton kon kita nagkinahanglan sa panabang sa Langitnong Amahan? (Mag-ampo uban sa hugot nga pagtuo nga siya motabang kanato.)

Padayon sa pagpangutana mahitungod sa mga sugilanon diha sa leksyon hangtud ang matag kamot sa bata nasubay na og kopya. Pasalamati ang mga bata alang sa tanan nilang matinabangon nga mga kamot.

Pagpamatuod

Ipamatuod ang gugma sa Langitnong Amahan alang kanato ug sa iyang tinguha sa pagtabang kanato kon kita mag-ampo alang sa iyang panabang.

Pagdapit og usa ka bata sa paghatag og panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Tudloi ang mga bata og usa ka mubo nga garay mahitungod sa pag-ampo, ug ipakita ang mga aksyon.

   Atong mga bukton gikyugpos, atong mga ulo giduko,

   Atong mga mata gipiyong, andam ikaw og ako.

   o

   Kita mokyugpos sa atong mga bukton ug moduko sa atong mga ulo

   ug maminaw sa pag-ampo nga gihimo.

2. Paghatag og krayola o lapis ug usa ka kopya sa mosunod nga ighahatag nga basahonon ngadto sa matag bata. Ipasulat sa mga bata ang ilang mga ngalan diha sa ilang ighahatag nga mga basahonon. Sultihi sila sa pagkolor diha sa dapit nga may mga bitoon aron mahibaloan mahitungod sa unsa ang leksyon. Kon sila nahuman na, padungana sila sa pagsulti sa pulong. Kolektaha ang mga lapis ug ang ighahatag nga mga basahonon. Ibalik ang ighahatag nga mga basahon ngadto sa mga bata sa katapusan sa klase.

PBANGHAVMKPXO