Kgaolo 15

Alema wa Ruta le go Kolobetsa

Alema o ne a falola go tswa go batlhanka ba ga Kgosi Noa mme a iphitlha malatsi a mantsi. Fa a santse a iphitlhile, a kwala se moperofeti Abinadi a se rutileng.

Mosia 17:3–4

Alema a ikwatlhaela dibe tsa gagwe mme a ya go Banefi ka sephiri, a ba ruta molaetsa wa ga Abinadi. Alema a bolelela batho go nna le tumelo mo go Jeso Keresete le go ikwatlhaya.

Mosia 18:1, 7

Ka nako ya motshegare Alema o ne a iphitlha mo tshutlhankgeng ya ditlhare go bapa le motswedi o o bidiwang Metsi a ga Momone.

Mosia 18:5

Bao ba dumetseng dithuto tsa ga Alema ba ya kwa Metsi a ga Momone mme ba kolobediwa. Alema a kolobetsa batho ba le 204 mo Kerekeng ya ga Keresete.

Mosia 18:8–10, 16–17

Alema a tlhoma baperesiti go ruta batho. O ne a bolelela baperesiti go ruta boikwatlhao le tumelo mo go Jeso Keresete. Le gone o ne a re ga ba tshwanela go ganetsanya mme ba lomagane.

Mosia 18:18, 20–21

Batho ba ga Alema ba ne ba ratana le go direlana. Ba ne ba abelana sengwe le sengwe se ba nang naso e bile ba ne ba lebogela go bo ba ithutile ka ga Jeso Keresete, Morekolodi wa bone.

Mosia 18:29–30

Batlhanka ba ga Kgosi Noa ba bona Alema a ruta batho. Kgosi a re Alema o ne a fetola Banefi go nna kgatlhanong le ene, jalo a romela batlhabani go ba bolaya.

Mosia 18:32–33

Modimo a tlhagisa Alema gore batlhabani ba ga Kgosi Noa ba e tla. Batho ba phutha malwapa a bone, diphologolo, le dithoto tse dingwe tsa bone mme ba siela mo nageng.

Mosia 18:34; 23:1

Modimo a thatafatsa batho ba ga Alema gore ba ka falola mo batlhabani ba ga Kgosi Noa, Batlhabani ba batla mme ba se ka ba ba bona.

Mosia 19:1; 23:2

Morago ga go tsamaya mo nageng malatsi a ferangbobedi, batho ba ga Alema ba tla kwa lefelong le le ntle leo le nang le metsi a itshekileng a a elelang mo go lone. Fano ba tlhoma dijwalo le go aga dikago.

Mosia 23:3–5

Batho ba ne ba batla Alema go nna kgosi ya bone, mme Alema a re Modimo ga a batle ba ka nna le kgosi. Modimo o batla ba gololesega.

Mosia 23:6–7, 13