Kgaolo 38
Polao ya Moatlhodi Mogolo
Baikepi ba ne ba nna baatlhodi godimo ga Banefi. Ba otlhaya batho ba basiami mme e seng batho ba ba boikepo.
Nefi o ne a hutsafetse go bona boikepo jo bo kalo mogare ga batho.
Letsatsi lengwe o ne a rapela mo kagong e e godileng mo tshimong ya gagwe. Tshimo ya gagwe e ne e le mo tseleng ya mheru e e neng e ya mmarakeng mo Sarahemola.
Bafiti ka tsela ya mheru ba ne ba utlwa Nefi a rapela. Setlhopha se segolo sa phuthagana, ba gakgamaletse gore ka ntlha yang a ne a hutsafetse mo go kalo.
Fa Nefi a bona batho, o ne ba bolelela fa a hutsafaditswe ke boikepo jwa bone. A ba bolelela gore ba ikwatlhaye.
A ba tlhagisa gore fa ba sa ikwatlhaye, baba ba bone ba tlaa tsaya magae a bone le ditoropo tsa bone mme Morena ga a kitla a ba thusa go tlhabana le baba ba bone.
Nefi o rile Banefi ba ne ba le boikepo thata go feta Balamane gonne Banefi ba ne ba rutilwe ditaelo mme ba sa di obamele.
O rile fa Banefi ba sa ikwatlhaye, ba tlaa nyelediwa.
Bangwe ba baatlhodi ba ba boikepo ba ne ba le koo. Ba ne ba batla batho ba otlhaya Nefi go bua kgatlhanong le bone le molao wa bone.
Bangwe ba batho ba ne ba dumalana le baatlhodi ba ba boikepo. Bangwe ba dumela Nefi; ba ne ba itse fa e ne e le moperofeti mme a bua boammaaruri.
Nefi a bolelela batho gore ba tsuololetse Modimo mme ba tloga ba otlhaiwa fa ba sa ikwatlhae.
Nefi a bolelela batho go ya go batla moatlhodi mogolo. O tlaa bo a rapaletse mo mading a gagwe, a bolailwe ke morwarraagwe yo a neng a batla maemo a gagwe.
Banna ba le batlhano go tswa mo bontsing ba taboga go ya go bona moatlhodi mogolo. Ba ne ba sa dumele fa Nefi e le moperofeti wa Modimo.
Fa ba bona Sisoramo, moatlhodi mogolo, a rapaletse mo mading a gagwe, ba wela fa fatshe mo letshogong. Jaanong ba itse fa Nefi e le moperofeti.
Batlhanka ba ga Sisoramo ba ne ba setse ba bone moatlhodi mogolo mme ba ne tabogela go bolelela batho. Ba fitlhela banna ba le batlhano ba rapaletse foo.
Batho ba ne ba akanya fa banna ba batlhano ba bolaile Sisoramo.
Ba latlhela banna ba batlhano mo kgolegelong mme ba romela lefoko kwa toropo kgolo yotlhe gore moatlhodi mogolo o bolailwe le gore babolai ba gagwe ba mo kgolegelong.
Letsatsi le le latelang batho ba ya kwa go moatlhodi mogolo a tlaa fitlhelwang teng. Baatlhodi ba ba neng ba le kwa tshimong ya ga Nefi ba botsa gore banna ba batlhano ba kae.
Baatlhodi ba kopa go bona babolai ba ba beilweng molato.
Balatofadiwa e ne e le banna ba ba neng ba tabogela go tswa mo tshimong ya ga Nefi go moatlhodi mogolo.
Banna ba batlhano ba buile fa ba fitlhetse moatlhodi mogolo a rapaletse mo mading a gagwe, fela jaaka Nefi a boletse. Ke gone baatlhodi ba ne ba latofaletsa Nefi go romela mongwe go bolaya Sisoramo.
Ba itse fa Nefi e le moperofeti, banna ba batlhano ba nganga le baatlhodi, mme ba se ka ba reetsa. Ba ne ba bofile Nefi.
Baatlhodi ba ntshetsa Nefi madi le botshelo jwa gagwe fa a ka re o rerile go bolaya moatlhodi mogolo.
Nefi o boleletse baatlhodi go ikwatlhaela boikepo jwa bone. Jalo a ba bolelela go ya kwa go Sianthamo, morwarraagwe wa Sisoramo.
Nefi o ba boleletse go botsa Sianthamo fa a rerile le Nefi go bolaya Sisoramo. Nefi a re Sianthamo o tlaa re “nnyaa.”
Ke gone baatlhodi ba ne ba tshwanetse go botsa Sianthamo fa a bolaile morwarraagwe. Sianthamo o tlaa re “nnyaa,” mme baatlhodi ba tlaa fitlhela madi mo kobong ya gagwe.
Nefi a re Sianthamo jalo o tlaa roroma le go setlhefala mme pheletsong a ipolele fa a bolaile morwarraagwe.
Baatlhodi baya kwa ntlong ya ga Sianthamo mme sengwe le sengwe sa diragala jaaka Nefi a bua se se tlaa diragala. Nefi le banna ba batlhano ba gololwa.
Jaaka fa batho ba katoga Nefi, bangwe ba rile ke moperofeti, ba bangwe ba re ke modimo. Nefi a ya gae, a ntse a hutsafetse ka ga boikepo jwa bone.