Kgaolo 35
Kgaolo 35: Mokapoteini Moroni le Phahorane
Mme Hilamene le batlhabani ba gagwe ba ne ba tlhoka thuso. Ba ne ba sena masole a a lekaneng go sireletsa ditoropo tse dintsi.
Mokapoteini Moroni a kwalela lekwalo go Phahorane, moatlhodi mogolo le molaodi. A kopa Phahorane go romelela masole a mangwe go thusa batlhabani ba ga Hilamene.
Balamane ba tlhasela toropo kgolo ya Banefi eo Hilamene a neng a e gapile. Ba bolaya Banefi ba bantsi mme ba leleka ba bangwe mo toropo kgolo.
A galefetse baeteledi pele ba goromente gonne ba ne ba sa romele thuso, Moroni o kwaletse Phahorane lekwalo le lengwe.
Mokapoteini Moroni o kwadile gore batho ba bantsi ba bolailwe gonne Phahorane o ne a sa romela masole a mantsi.
Fa Phahorane a ne a sa romela banna le dijo ka bofefo, Moroni o ka bo a tsere batlhabani ba gagwe go Sarahemola mme a tsaya se batlhabani ba gagwe ba se tlhokang.
Moroni a tloga a amogela lekwalo go tswa go Phahorane. O ne a hutsafetse gore Moroni le batlhabani ba gagwe ba ne ba boga.
Phahorane o boleletse Moroni gore setlhopha sa baikepi sa Banefi ba ba bidiwang banna ba kgosi ga ba batle a nna moatlhodi mogolo. Ba ne ba mo pateleditse le ba ba mo setseng morago go tswa mo Sarahemola.
Phahorane o ne a tlaleletsa gore o ne a phutha batlhabani go leka go gapa Sarahemola.
Banna ba kgosi ba ne ba itshenketse kgosi go ba etelela pele mme ba ikopatse le Balamane.
Phahorane o ne a sa galefela se Moroni a neng a se kwadile. O ne a batla Banefi ba gololesega le bone.
O ne a kopa Moroni go tlisa banna ba se kae go mo thusa mme a re fa Moroni a phutile banna ba bangwe mo tseleng, batlhabani ba ba tshwaraganeng ba ka gapa Sarahemola.
Mokapoteini Moroni o ne a itumelela gore Phahorane o ne a santse a ikanyega mo lefatsheng la gagwe e bile a santse a batlela batho ba gagwe kgololesego.
Ka ba se kae ba banna ba gagwe, Moroni a ya go kopana le Phahorane. A fofisa sekano sa kgololesego, mme dikete tsa banna tsa ikopanya le bo ne mo tseleng.
Batlhabani ba ba tshwaraganyeng le ba ga Moroni le Phahorane ba gwanta kgatlhanong le Sarahemola. Ba bolaya kgosi ya baikepi ba Banefi mme ba tshwara banna ba gagwe.
Moroni ke gone a romela dijo le masole a le 12,000 go thusa batlhabani ba Banefi. Batlhabani ba kgweeletsa Balamane kwa ntle, mme go ne ga nna le kagiso gape mo lefatsheng.