Kapitulli 43
Jezu Krishti u Shfaqet Nefitëve
Shumë nefitë u mblodhën në tempull në Begati. Ata u çuditën nga ndryshimet e mëdha në tokë.
Njerëzit po flisnin rreth Jezu Krishtit dhe shenjës së vdekjes së Tij.
Ndërsa po flisnin, ata dëgjuan një zë të qetë nga qielli. Ai i bëri zemrat e tyre të digjeshin.
Në fillim ata nuk e kuptuan zërin, por, kur foli herën e tretë, ata e kuptuan atë.
Zëri ishte zëri i Atit Qiellor. Ai paraqiti Jezu Krishtin dhe u tha njerëzve ta dëgjonin Atë.
Jezu Krishti zbriti nga qielli dhe qëndroi mes njerëzve. Ata kishin frikë të flisnin sepse nuk po e kuptonin se çfarë po ndodhte. Ata menduan se Jezusi ishte një engjëll.
Ai u tha atyre se ishte Jezu Krishti, pikërisht Ai që profetët kishin thënë se do të vinte.
Jezusi u tha njerëzve të vinin dhe t’i ndienin shenjat në anën e Tij dhe në duart e këmbët e Tij, ku Ai ishte gozhduar në kryq.
Jezusi donte që njerëzit ta dinin se Ai ishte Perëndia i tyre dhe se Ai vdiq për mëkatet e tyre.
Një nga një njerëzit prekën shenjat në anën, duart dhe këmbët e Jezusit. Njerëzit e dinin se Ai ishte Shpëtimtari.
Atëherë njerëzit e lavdëruan Jezusin dhe ranë te këmbët e Tij, dhe e adhuruan Atë.
Jezusi thirri Nefin dhe 11 burra të tjerë. Ai u dha atyre fuqinë e priftërisë dhe u mësoi mënyrën e drejtë për të pagëzuar.
Ai u tha nefitëve të besonin në Të, të pendoheshin dhe t’i zbatonin urdhërimet. Nëse nuk i bënin këto, ata nuk mund të hynin në mbretërinë e Tij.
Ai u mësoi nefitëve se si t’i luteshin Ati Qiellor. Ai gjithashtu u mësoi atyre rreth agjërimit dhe u tha se ata do të merrnin falje në qoftë se do ta falnin njëri‑tjetrin.
Pasi u mësoi njerëzve shumë gjëra, Jezusi u tha atyre të shkonin në shtëpi dhe të mendonin e të luteshin rreth gjërave që u kishte thënë.
Nefitët filluan të qanin. Ata nuk donin që Jezusi të largohej ende.
Jezusi i donte nefitët. Ai u tha atyre t’i sillnin tek Ai njerëzit që ishin të sëmurë ose të plagosur, që Ai të mund t’i shëronte.
Jezusi i shëroi këta njerëz. Çdo njeri u përul dhe e adhuroi Atë.