Nagpapasalamat Ako Para sa mga Puno, Halaman at Bulaklak

Layunin

Upang tulungan ang bawat bata na makadama ng pasasalamat sa Ama sa Langit at kay Jesucristo para sa mga puno, halaman at bulaklak.

Paghahanda

Pag-aralan nang may panalangin ang Genesis 1:11–13.
Maglagay ng prutas, gulay o maliit na sanga sa isang tela o bag na papel.
Maghanda ng maliliit na patikim na prutas, gulay o tinapay. Makipag-alam sa mga magulang ng mga bata upang makatiyak na walang sinuman sa mga bata ang may alerdyi sa pagkain.
Mga kailangang kagamitan:
1. Isang Biblia.
2. Kung maaari, kumuha ng mga larawan ng mga lokal na puno, halaman, at mga bulaklak, at magdala ng ilang bagay na gawa sa kahoy, katulad ng lapis, kutsara at mangkok mula sa iyong tahanan.
3. Ginupit na larawan 1–4, mga bulaklak (ang katulad na ginupit na larawan ay matatagpuan sa pangkat 3 ng Mga Ginupit na Larawang Pantulong sa Primarya).
4. Larawan 1–22, Namumulaklak na Puno; larawan 1–23, Isang Pugad na May Maliliit na Ibon.
Gawin ang mga kinakailangang paghahanda para sa anumang Mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Ipasa ang bag na may prutas, gulay o sanga sa loob nito nang nakasara upang hindi makita ng mga bata kung ano ang nasa loob. Ipasalat sa mga bata ang bag at pahulaan kung ano ang nasa loob nito. Sabihan sila na huwag hulaan nang malakas hangga’t hindi nagkakaroon ng pagkakataon ang lahat na masalat ang bag. Kapag nasalat na ng lahat ang bag, hayaang sabihin ng mga bata sa iyo kung ano ang nasa loob ng bag. Kunin ang bagay mula sa bag at pag-usapan ang anyo nito at ang gamit nito.

Ginagawang magandang lugar ng mga puno, halaman at bulaklak ang daigdig upang tirahan

Paalalahanan ang mga bata na ang lahat ng bagay sa daigdig ay nilikha alinsunod sa plano ng Ama sa Langit. Sa ikatlong araw ng paglikha, nilikha ni Jesus ang mga puno, halaman at bulaklak (tingnan sa Genesis 1:11–13). Ipaliwanag na nais ng Ama sa Langit at ni Jesus na gawing maganda ang daigdig sa pamamagitan ng mga puno, halaman at bulaklak.

Ipakita ang ginupit na larawan ng mga bulaklak at anumang larawan ng mga puno, halaman o bulaklak na iyong nakuha. Hayaang pag-usapan ng mga bata ang tungkol sa anumang karanasan nila sa mga puno, halaman o bulaklak.

Kuwento

Isalaysay ang isang kuwento na nagtuturo sa mga bata na ginagawang magandang tirahan ng mga puno, halaman at bulaklak ang daigdig. Pagusapan ang magagandang halaman na tumutubo sa inyong tinitirhan. Kung angkop sa inyong lugar, maaari mong naising gamitin ang larawan 1–22, Namumulaklak na Puno, at ang mga sumusunod na ideya:

Si Kelly ay may paboritong puno at sa tabi nito siya naglalaro. Isang umaga ay ginising siya ng kanyang nanay at sinabing may isa siyang sorpresang ipakikita kay Kelly. Ang paboritong puno ni Kelly ay hitik na hitik sa magagandang puting bulaklak na tila papkorn. Tinanong niKelly kung paanong napunta sa kanyang paboritong puno ang papkorn, at ipinaliwanag ng kanyang nanay ang kahalagahan ng mga bulaklak.

Awit

Patayuin ang mga bata at awitin ang “Papkorn,” na gumagamit ng mga galaw ng kamay na isinasaad ng mga salita. Sabihin na may isang bulaklak na kamukha ng papkorn, ang sampaguita.”

Ako’y dumungaw at aking nakita,
Isang mamang may papkorn na tinda!
O kayganda nitong umaga
Dulot ng papkorn na nakita.
Ito’y katulad ng sampaguita,
Mabuti ito at maganda.
Masarap kainin, papkorn na tinda
Nitong mama sa tuwing umaga.

Ipaliwanag na ang ilang bulaklak ay umuusbong sa mga puno, ang ilan ay umuusbong sa mga palumpong at baging at ang ilan ay umuusbong mula sa lupa mismo. Anyayahan ang mga bata na pag-usapan ang tungkol sa mga bulaklak na kanilang nakita.

Awit

Paano natin ginagamit ang mga bulaklak upang pagandahin ang ating daigdig? (Itinatanim natin ang mga ito sa mga halamanan ng mga bulaklak, gumagawa ng mga pumpon ng mga bulaklak at inilalagay ang mga ito sa ating mga buhok o sa ating mga damit.)
Bakit natin binibigyan ng bulaklak ang isang tao? (Para sa mga natatanging pagkakataon at upang paligayahin ang mga tao.)

Kailangan natin ang mga halaman at puno upang mabuhay

Kuwento

Ipaliwanag na kailangan natin ang mga halaman at puno upang mabuhay. Ipakita ang larawan 1–22, Namumulaklak na Puno, at magkuwento tungkol sa maraming gamit ng isang puno. Gamitin ang mga sumusunod na ideya o pag-usapan ang ibang paraan ng paggamit ng mga tao sa mga puno sa inyong lugar:

Una ay ginagamit ng mga ibon ang mga puno bilang kanilang tahanan. Maingat silang gumagawa ng salay at ang inang ibon ay nangingitlog dito. (Ipakita ang larawan 1–23, Isang Salay na May Maliliit na Ibon.) Kapag ang maliliit na ibon ay napipisa mula sa mga itlog, ang puno ay nagbibigay ng magandang tahanan para sa kanila. Pinangangalagaan sila nito mula sa mainit na araw, mula sa ulan at mula sa mga hayop na makapipinsala sa kanila. Ang puno ay nagbibigay rin ng prutas para sa mag-anak na nakatira sa malapit. Ang mga bata ay naglalaro sa lilim ng puno at naglalagay ng duyan sa isang malaking sanga. Kapag namatay ang isang bahagi ng puno, pinuputol ito ng mag-anak at ginagawa itong panggatong upang makapagluto at panatilihing mainit ang loob ng bahay.

Kuwento

Bakit mahalaga sa atin ang mga puno? (Ang mga ito ay nagbibigay ng pagkain, kahoy, lilim at lugar upang mapaglaruan.)

Magpakita ng ilang bagay na mula sa iyong tahanan o sa silid-aralan na gawa sa kahoy at pag-usapan ang maraming gamit ng kahoy.

Kuwento

Anong iba pang mga bagay ang alam ninyong gawa sa kahoy?

Ipaliwanag na ginagamit din natin ang mga halaman sa maraming paraan. Ang isa sa mga pinakamahalagang bagay na ibinibigay sa atin ng halaman ay pagkain.

Kuwento

Anong uri ng mga halaman ang ating kinakain?

Kung mayroon man sa mga lokal na larawan na nakuha ang nagpapakita ng mga halaman na ginagamit na pagkain, ipakita ang mga ito ngayon.

Gawain

Makipag-usap sa mga bata tungkol sa mga butil, prutas at mga gulay na itinatanim sa inyong lugar. Ipaliwanag na ang mga butil ay kadalasang ginagawang mga tinapay at cereal. Hilingin sa bawat bata na banggitin ang kanyang paboritong pagkain na nagmumula sa halaman. Hayaang tikman ng mga bata ang mga patikim na prutas, gulay o tinapay na iyong dinala. Sabihin sa kanila ang tungkol sa halaman o puno na pinagmulan nito.

Ipaliwanag na ipinalikha ng Ama sa Langit kay Jesus ang maraming iba’t ibang halaman at puno upang magkaroon tayo ng mabuting pagkain.

Gawain

Paano natin mapasasalamatan ang Ama sa Langit para sa ating pagkain? (Sa pag-aalalang humiling ng pagbabasbas sa pagkain bago tayo kumain.)

Patotoo

Ibahagi ang iyong patotoo sa pagmamahal ng Ama sa Langit at ni Jesus para sa bawat isa sa atin. Paalalahanan ang mga bata na tandaan ang pagmamahal na iyon sa araw-araw kapag nakakakita sila ng magagandang puno, halaman at bulaklak.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

Magdala ng ilang binhi (katulad ng mga binhi ng bulaklak, bins, o trigo) at isang maliit na supot na puno ng lupa para iuwi ng bawat bata. Ipakita sa mga bata kung paano itatanim ang mga buto at paalalahanan sila na kakailanganin nilang maglaan ng tubig at sikat ng araw upang lumaki ang binhi.
Pasunurin ang mga bata sa pagbigkas sa mga salita ng awit na “Little Seeds Lie Fast Asleep” (Children’s Songbook, p. 243). Pagkatapos ay papagkunwariing maliliit na binhi ang mga bata habang inaawit mo o binibigkas muli ang mga salita.
Gumupit ng mga talulot, dahon at tangkay mula sa papel na may kulay at ipadikit ang mga ito sa bawat bata upang ihubog na isang bulaklak sa isang pirasong papel. Pamagatan ang pahina na Nagpapasalamat ako para sa magagandang bulaklak.
Magdala ng prutas o gulay na may buto sa loob. Sabihin sa mga bata na may sorpresa sa loob. Buksan ang prutas o gulay upang makita ng mga bata ang mga buto. Ipaliwanag na kapag ang mga buto ay itinanim at pinaglaanan ng tubig at sikat ng araw, ang mga ito ay lalaki at lilikha ng maraming prutas o gulay.
Palakarin ang mga bata sa labas upang makita ang iba’t ibang uri ng mga halaman. Kung hindi maganda ang panahon sa labas, maaaring tumanaw mula sa bintana ang mga bata at maghalinhinan sa pagsasabi kung anuanong halaman ang kanilang nakikita. Kung naaangkop, ipaliwanag ang pana-panahong pagbabago na nakaaapekto sa mga halaman at puno.

Mga Karagdagang Gawain para sa mas Maliliit na Bata

Ipakita ang larawan 1–22, Namumulaklak na Puno. Sabihin sa mga bata na ipinalikha ng Ama sa Langit kay Jesucristo ang mga halaman at puno (tingnan sa Genesis 1:11–13). Ipaliwanag na binibigyan tayo ng kahoy at prutas ng mga puno. Binibigyan tayo ng prutas at mga gulay ng mga halaman.
Magdala ng isang halaman o isang bahagi ng isang halaman (katulad ng isang bulaklak o ilang dahon) para makita, mahipo at maamoy ng mga bata. Bigyan ng pagkakataon ang bawat bata na mahipo o mahawakan ang halaman. Ituro ang kulay, amoy, o ganda nito. Ipahiwatig ang iyong pasasalamat sa mga halaman, bulaklak at puno.
Bigkasin ang sumusunod na talata na isinasagawa ang mga galaw. Pagkatapos ay ipagawa sa mga bata ang mga galaw na kasabay ka habang binibigkas mong muli ang talata.

Ako’y patuloy na naghuhukay (gumawa ng mga galaw ng paghuhukay),

At nagtatanim ng ilang binhi (yumuko at magkunwaring nagtatanim ng ilang binhi).

Ako’y patuloy na nagkakalaykay (gumawa ng mga galaw ng pagkakalaykay),

At inaalis ang ilang damo (yumuko at magkunwaring nagbubunot ng damo).

Ang araw ay maliwanag at mainit (gumawa ng bilog sa pamamagitan ng mga kamay),

Ang ulan ay bumabagsak (ibaba ang mga kamay at iwagwag ang mga daliri)

Kaya’t nakikita ng dalawang mata ko,

Ang aking mga binhing nagsisimulang lumago (itulak paitaas ang mga daliri

ng kaliwang kamay na nasa pagitan ng mga daliri ng kanang kamay).
Awitin ang “In the Leafy Treetops” (Children’s Songbook, p. 240) na kasabay ng mga bata.