Aralin 6

Mahal Ako ng Ama sa Langit at ni Jesus

Layunin

Upang tulungan ang bawat bata na madama na ang bawat isa sa atin ay mahal ng Ama sa Langit at ni Jesucristo.

Paghahanda

1. Pag-aralan nang may panalangin ang Marcos 10:13–16; Juan 3:16; at 3 Nephi 17:11—12, 21–24.

2. Mga kailangang kagamitan:

   1. Isang Biblia at Aklat ni Mormon.

   2. Isang maliit na salamin.

   3. Larawan 1–1, Ang Daigdig (62196); larawan 1–3, Si Jesus ang Cristo (Pakete ng Larawan ng Sining ng Ebanghelyo 240; 62572); larawan 1–4, Ang Unang Pangitain (Pakete ng Larawan ng Sining ng Ebanghelyo 403; 62470); larawan 1–19, Si Cristo at ang mga Bata (Pakete ng Larawan ng Sining ng Ebanghelyo 216; 62467); larawan 1—20, Binabasbasan ni Jesus ang mga Batang Nephita.

3. Gawin ang mga kinakailangang paghahanda para sa anumang Mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Kamayan ang bawat bata. Bigkasin ang pangalan ng bawat bata at sabihin sa bawat isa ang isang bagay na nais mo sa kanya.

Hilingin sa bawat bata na magbanggit ng isang taong nagmamahal sa kanya at sabihin kung ano ang ginagawa ng taong iyon na nakapagpapadama sa kanya na siya ay minamahal.

Ipaliwanag na ang araling ito ay tungkol sa dalawang taong nagmamahal sa ating lahat. Ibinigay nila sa atin ang magandang daigdig na ito at ang ebanghelyo at ang Simbahan.

Gawaing Pantawag Pansin

• Sino ang dalawang taong ito na nagmamahal sa lahat? (Ang Ama sa Langit at si Jesucristo.)

Kuwento

Ipakita ang larawan 1–4, Ang Unang Pangitain. Magpatulong ka sa mga bata na isalaysay ang kuwentong nangyayari sa larawan.

Kuwento

• Naaalaala ba ninyo kung sino ang mga taong nasa larawang ito?

• Ano ang kanilang ginagawa?

Ang Ama sa Langit at si Jesucristo ay nagbibigay sa atin ng mga biyaya

Paalalahanan ang mga bata na bago tayo pumunta sa daigdig, tayo ay namuhay na kasama ng Ama sa Langit at ni Jesucristo. Nagplano sila upang makapunta tayo sa mundo upang tayo ay matuto at umunlad. Kilala at mahal nila tayo.

Ipakita ang larawan 1–1, Ang Daigdig.

• Ano ang hiniling ng Ama sa Langit kay Jesucristo na likhain para sa atin?

Ipaliwanag na ipinalikha ng Ama sa Langit kay Jesus ang daigdig at ang lahat ng bagay na narito. Tulungan ang mga bata na maunawaan na ang lahat ng bagay na kailangan natin upang mabuhay at maging maligaya ay binalak ng Ama sa Langit at ni Jesus. Ang mga bagay na ito ay nagpapaalala sa atin ng kanilang pagmamahal sa atin.

• Anong mga bagay ang nagpapaalala sa inyo sa pagmamahal sa inyo ng Ama sa Langit at ni Jesus? (Maaaring kasali sa mga sagot ang mga bagay na tulad ng mag-anak, mga kaibigan, ang Simbahan, mga halaman, at hayop.)

Awit

Awitin o bigkasin ang mga salita ng “Ako ay Mahal ng Aking Amang nasa Langit” (Babaeng Banal sa Huling-araw A), na ginagamit ang mga galaw na isinasaad sa ibaba. Pagkatapos ay hilingin sa mga bata na tumayo at awitin ang awit na kasabay mo.

T’wing maririnig (ilagay ang mga kamay sa tainga) huni ng ibon (ibukas at isara ang mga daliri na katulad ng tuka ng ibon)

O susulyap (tumingala) sa langit (itaas ang mga kamay at gawing parang arko)

T’wing madarama, ulan sa mukha (gumawa ng tila ulan na galaw sa pamamagitan ng mga daliri)

O ang pag-ihip ng hangin (pabalik-balik na iindayog ang mga kamay),

T’wing hahawakan ang bulaklak (magkunwaring hinahawakan o inaamoy ang bulaklak)

O daraan sa puno (lumakad sa kinatatayuan),

Ako’y masaya’t buhay sa mundong ‘to

Na likha ng Ama sa Langit (iunat ang mga kamay at bisig).

Ipakita ang larawan 1–3, Si Jesus ang Cristo.

Awit

• Sino ito?

• Sino ang ama ni Jesus?

Basahin ang unang bahagi ng Juan 3:16 (hanggang sa Anak) at ipaliwanag na pinakadakilang handog na ibinigay ng Ama sa Langit sa atin ang pagpapadala kay Jesucristo sa daigdig.)

Ipinakita ni Jesus ang kanyang pagmamahal sa mga bata

Kuwento

Ipakita ang larawan 1–19, Si Cristo at ang mga Bata. Isalaysay ang kuwento tungkol sa pagbabasbas ni Jesus sa mga bata, na matatagpuan sa Marcos 10:13–16.

Ituro na nag-ukol ng panahon si Jesus upang mahalin at basbasan ang mga bata kahit iniisip ng ilan sa kanyang mga tagasunod na siya ay hindi dapat gambalain ng mga bata.

Kuwento

• Ano ang ginawa ni Jesus nang dumating ang mga bata? (Tingnan sa Marcos 10:16.)

• Ano sa palagay ninyo ang naramdaman ng mga bata tungkol kay Jesus?

Awit

Kasabay ng mga bata, bigkasin ang mga salita ng “Mahal ni Jesus ang Munting Bata” (Jesus Loved the Little Children, Children’s Songbook p. 59).

Mahal ni Jesus ang munting batang,

Tulad ko.

Sila’y tutulungan N’ya

At babasbasan.

Kuwento

Ipakita ang larawan 1–20, Binabasbasan ni Jesus ang mga Batang Nefita. Ipaliwanag na pagkatapos mamatay ni Jesus, dinalaw niya ang mga tao sa Amerika. Ang Amerika ay malayo sa lugar na tinirahan ni Jesus sa mundo.

Isalaysay ang kuwento tungkol sa pagbabasbas ni Jesus sa mga batang Nefita, na matatagpuan sa 3 Nephi 17:11–12, 21–24. Ipaliwanag na isa-isang binasbasan ni Jesus ang bawat bata.

Kuwento

• Paano ipinakita ni Jesus ang kanyang pagmamahal sa mga bata?

• Paano ninyo nalalaman na mahal kayo ni Jesus?

Gawain

Bigkasin nang ilang ulit ang sumusunod na talata na kasabay ang mga bata, na ginagawa ang mga galaw na isinasaad:

Mahal ni Jesus ang Lahat ng Bata

Mahal ni Jesus ang lahat ng bata (iunat ang mga bisig)

Ang mga batang maliliit (gamitin ang kamay upang ipahiwatig ang batang hanggang tuhod lamang ang taas),

Ang sanggol na nasa duyan (gumawa ng duyan sa pamamagitan ng mga bisig),

Ang malalaki at matatangkad (itaas ang mga kamay sa may uluhan).

(Mula sa Finger Fun for Little Folk ni Thea Cannon. Karapatang sipi © 1949 sa pamamagitan ng Standard Publishing Company, Cincinnati, Ohio. Ginamit nang may pahintulot.)

Mahal ng Ama sa Langit at ni Jesus ang bawat isa sa atin

Tulungan ang mga bata na maunawaan kung gaano kahalaga ang bawat isa sa kanila sa Ama sa Langit at kay Jesus. Ipaliwanag na ang bawat isa sa atin ay mahal ng Ama sa Langit at ni Jesus at kilala tayo sa pangalan.

Gawain

Hawakan ang isang salamin at isa-isang palapitin ang mga bata. Habang lumalapit ang bawat bata at tumitingin sa salamin, sabihing, “Ito ay si (pangalan ng bata), at mahal na mahal ng Ama sa Langit at ni Jesus si (pangalan ng bata).”

Patotoo

Ibigay ang iyong patotoo na buhay ang Ama sa Langit at si Jesus at na mahal nila ang bawat isa sa atin. Sabihin sa mga bata kung gaano ang iyong nadaramang pagpapasalamat sa maraming biyayang ibinigay sa iyo ng Ama sa Langit at ni Jesus.

Mga Gawaing Nagpapayaman sa Kaalaman

Pumili ng ilan sa mga gawaing ito upang magamit sa aralin.

1. Awitin o bigkasin ang mga salita sa “Jesus Is Our Loving Friend” (Children’s Songbook, p. 58). Bigyan ang bawat bata ng bigay-siping “ Si Jesus ang Ating Mapagmahal na Kaibigan” (na nasa hulihan ng aralin), at hayaang kulayan ng mga bata ang kanilang mga bigay-sipi.

2. Awitin o bigkasin ang mga salita sa “Aking Ama’y Buhay” (Mga Alituntunin ng Ebanghelyo) o “I Feel My Savior’s Love” (Children’s Songbook, p. 74).

3. Ipakita ang mga larawan ng mga bagay na ibinigay sa atin ng Ama sa Langit at ni Jesus, katulad ng templo, mga hayop, bulaklak, mag-anak, pagkain, kaibigan, tahanan, isang bahay-pulungan, o ang mga banal na kasulatan. (Ang mga larawan ay makukuha mula sa aklatan ng bahay-pulungan, sa Pakete ng Larawan ng Sining ng Ebanghelyo, o mga magasin ng Simbahan.) Tulungan ang mga bata na maunawaan na ibinigay ng Ama sa Langit at ni Jesus ang mga bagay na ito sapagkat mahal nila tayo.

4. Magdala ng isang bagay, katulad ng boteng walang laman, na maaaring paikutin na tulad ng panturo. Paupuin ang mga bata sa sahig nang pabilog at ilagay ang bote sa gitna ng bilog. Paikutin ang bote sa sahig. Kapag ito ay nakaturo na sa isang bata, ang batang iyon ay dapat magbigay ng isang bagay na ibinigay sa atin ng Ama sa Langit at ni Jesus na nagpapakita ng kanilang pagmamahal sa atin. Tulungan ang bawat bata na mag-isip ng sagot kapag pagkakataon na niya. Pagkatapos sumagot ng isang bata, hayaang paikutin niya ang bote nang sa gayon ay maituro nito ang ibang bata.

5. Maghanda ng isang kahon o bag na naglalaman ng ilang bagay na kailangan natin upang mabuhay sa daigdig, katulad ng pagkain, tubig, o mga damit. Ipaliwanag na ang daigdig na ito ay plano ng Ama sa Langit at ni Jesus upang ating matirahan. Ipaliwanag na ang kahon o bag ay naglalaman ng ilan sa mga bagay na kailangan natin upang mabuhay sa daigdig. Bigyan ng ideya ang mga bata tungkol sa isang bagay hanggang sa mahulaan nila kung ano ito. Kapag nahulaan nila ito, alisin ang bagay na ito mula sa kahon o bag. Ipagpatuloy ang laro hanggang sa mahulaan ng mga bata ang lahat ng bagay.

6. Gumawa ng etiketa na nagsasabing Mahal Ako ng Ama sa Langit at ni Jesus upang maisuot o maiuwi ng bawat bata. Maaari mong idikit ang etiketa sa damit ng bawat bata o lagyan ng sinulid ang etiketa at ipasuot ito na parang kuwintas sa bata. Maaari mong naisin na itago ang mga etiketa sa ilalim ng mga upuan ng mga bata bago magklase at hayaang hanapin ng mga bata ang mga ito.

Mga Karagdagang Gawain para sa mas Maliliit na Bata

1. Tulungan ang mga batang bigkasin ang sumusunod na mga salita at gawin ang mga galaw sa sumusunod na talata:

   Kung ikaw ay napakatangkad (iunat ang mga bisig nang paitaas),

   May lugar sa simbahan para sa iyo.

   Kung ikaw ay napakaliit (magyumukyok),

   May lugar sa simbahan para sa iyo.

   Matangkad (mag-inat)

   Maliit (magyumukyok)

   Matangkad (mag-inat)

   Maliit (magyumukyok)

   Tayong lahat ay mahal ni Jesus at ng Ama sa Langit.

2. Bigkasin ang sumusunod na talata at tulungan ang mga batang gawin ang mga galaw na nakasaad:

   Ako ay Kilala ng Ama sa Langit

   Ako ay kilala ng Ama sa Langit (ituro ang sarili)

   At ang nais kong gawin.

   Alam niya ang aking pangalan at ang aking tirahan (gumawa ng bubong sa pamamagitan ng pagdidikit ng dulo ng mga daliri ng dalawang kamay).

   Alam kong mahal niya rin ako (pag-ekisin ang mga kamay at ipatong ang mga kamay sa balikat nang payakap).

   Alam niya ang sa aki’y nagpapasaya (ilagay ang mga daliri sa nakangiting labi).

   Alam niya ang sa aki’y nagpapalungkot (ilagay ang mga daliri sa nakasimangot na labi).

   Alam kong nais niya akong tulungan (ituro ang sarili),

   At iyon ay aking ikinalulugod!

Jesus with children

Jesus with children