Aralin 26

Ang mga Mag-anak ay Maaaring Magkasama-sama Magpakailanman

Layunin

Upang tulungan ang bawat bata na maunawaan na ang mga templo ay mga banal na lugar kung saan maaaring sama-samang ibuklod ang mga mag-anak hanggang sa walang-hanggan, at upang himukin ang bawat bata na maghanda upang makapasok sa templo.

Paghahanda

1. May panalanging pag-aralan ang Doktrina at mga Tipan 97:15–17 at 124:37–41. Tingnan din sa Mga Alituntunin ng Ebanghelyo (31110), kabanata 36, at “Temple” sa Bible Dictionary.

2. Mga kailangang kagamitan:

   1. Isang kopya ng Doktrina at mga Tipan.

   2. Larawan 1–5, Mag-anak na May Sanggol (62307); larawan 1–7, Isang Mapagmahal na Mag-anak; larawan 1–54, ang Templo sa Salt Lake (Pakete ng Larawan ng Sining ng Ebanghelyo 502, 62433); mga larawan ng iba pang mga templo na makukuha (Pakete ng Larawan ng Sining ng Ebanghelyo 505; 62434–62448, 62566–62569, 62583–62601, 62613–62619); ang pahina ng mga drowing sa hulihan ng aralin.

3. Gawin ang mga kinakailangang paghahanda para sa anumang mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Ipakita ang larawan 1–54, ang Templo sa Salt Lake, at ang mga larawan ng iba pang mga templo, kasama na ang templo sa inyong pook, kung may makukuha. Pahintulutan ang mga bata na sabihin ang nalalaman nila tungkol sa mga templo.

Gawaing Pantawag Pansin

• Nakakita na ba kayo ng isang templo?

• Ano ang naiisip ninyo kapag nakakakita kayo ng isang templo?

Talakayin ang kagandahan ng mga templo, na itinuturo ang mga tulis ng tore ng templo, mga bintana, at mga pintuan. Ipaliwanag na sa labas na dingding ng bawat templo ay ang mga salitang Ang Tahanan ng Panginoon. Ang mga kasapi ng Simbahan ay nagpupunta sa templo upang matutuhan ang tungkol sa Ama sa Langit at kay Jesus at ang kanilang pagmamahal sa atin.

Gawain

Ipalagay sa mga bata ang mga kamay nila sa itaas ng kanilang mga ulo upang gumawa ng tulis ng templo. Hilingan silang tumayo nang matuwid at mataas at magkunwaring sila ay isang magandang templo. Pagkatapos ay hilingan silang maupo nang tahimik.

Ang templo ay isang banal na pook

Ipaliwanag na ang templo ay isang banal na pook (tingnan sa Doktrina at mga Tipan 97:15–17). Hilingin sa mga bata na ulitin ang salitang banal. Nangangahulugan ito na ang templo ay isang natatanging pook kung saan ang lahat ng bagay ay nagpapaalaala sa atin sa Ama sa Langit at kay Jesus.

Sabihin sa mga bata na kung susundin nila ang mga kautusan ng Ama sa Langit, makapapasok sila sa templo kapag mas matanda na. Ipaliwanag na sa templo ay gumagawa tayo ng mga natatanging pangako sa Ama sa Langit na susundin ang kanyang mga kautusan. Maaari din tayong maikasal sa templo, at maaari din tayong mabinyagan para sa mga taong hindi nabinyagan habang nabubuhay sila sa mundo.

Ipataas sa mga bata ang tatlong mga daliri at ulitin ang tatlong bagay na magagawa nila sa templo kapag sila ay mas matanda na:

“Sa templo ay makagagawa ako ng mga natatanging pangako sa Ama sa Langit.”

“Sa templo ay maikakasal ako.”

“Sa templo ay maaari akong binyagan para sa iba.”

Awit

Patayuin ang mga bata at awitin o bigkasin ang mga salita sa unang bahagi ng “Templo’y Minamasdan Ko”(I Love to See the Temple, Children’s Songbook, p. 95), na ginagamit ang mga sumusunod na galaw:

Templo’y kaygandang masdan (pagsalabirin [interlock] ang mga daliri at ilitaw ang mga hintuturo ng bawat kamay upang gumawa ng tulis ng tore ng templo).

Doon ay pupunta (lumakad sa kinatatayuan)

Espiritu’y dadamhin (ilagay ang kamay sa tapat ng puso),

At mananalangin (ilagay ang kamay sa may likuran ng tainga, pagkatapos ay ihalukipkip ang mga kamay).

(© 1980 ni Janice Kapp Perry. Ginamit nang may pahintulot.)

Ipaliwanag na dahil ang templo ay isang banal na pook, tayo ay nagsusuot ng puting damit kapag nasa loob tayo. Ipinapaalaala sa atin ng damit na nais ng Ama sa Langit at ni Jesus na maging malinis tayo at dalisay at palaging piliin ang tama.

Awit

• Anong kulay ng damit ang suot ninyo ngayon?

• Anong kulay ng damit ang isusuot ninyo sa loob ng templo?

Ipaliwanag na dahil ang templo ay isang banal na pook, tayo ay magalang kapag nasa loob tayo. Bumubulong tayo o mahinang nagsasalita. Ipabulong sa mga bata ang, “Mahal ko ang Ama sa Langit at si Jesus.” Ipaliwanag na maligaya at tahimik ang mararamdaman natin sa templo dahil nadarama nating malapit tayo sa Ama sa Langit at kay Jesus.

Kuwento

Isalaysay ang sumusunod na kuwento tungkol kay Pangulong Lorenzo Snow sa sarili mong mga salita:

Alam na ni Lorenzo Snow na hindi magtatagal at siya ang magiging propeta ng Simbahan. Nagpunta siya sa templo, isinuot ang kanyang puting damit, at lumuhod sa isang natatanging silid upang manalangin. Nais niyang sabihin sa kanya ng Ama sa Langit ang kanyang gagawin upang mapamunuan ang Simbahan. Nanalangin siya nang nanalangin ngunit hindi nakatanggap ng kasagutan. Nang papalabas na ng silid si Pangulong Snow kung saan siya nananalangin, nagpakita si Jesus sa kanya. Magagandang puting bata ang suot ni Jesus at napakaliwanag at nagniningning na halos hindi siya matingnan ni Pangulong Snow. Si Jesus ay tila nakatuntong sa solidong ginto. Sinabi ni Jesus kay Pangulong Snow ang mga bagay na ipinanalangin niya na malaman (tingnan sa LeRoi C. Snow, “An Experience of My Father’s,” Improvement Era, Set. 1933, p. 677).

Kuwento

• Bakit sa palagay ninyo nanalangin si Pangulong Snow sa templo sa halip na sa ibang pook? (Sapagkat nararamdaman niyang mas malapit siya sa Ama sa Langit at Jesus sa loob ng templo.)

Ang templo ay tumutulong sa mag-anak upang magkasama-sama hanggang sa walang-hanggan

Ipakita ang larawan 1–5, Mag-anak na May Sanggol, at larawan 1–7, Isang Mapagmahal na Mag-anak. Ipaliwanag na ang mga templo ay makatutulong sa mga mag-anak upang magkasama-sama hanggang sa walang-hanggan. Kapag ang isang lalaki at isang babae ay nagpakasal sa templo at sumunod sa mga kautusan, ipinapangako ng Ama sa Langit sa kanila na maaari silang magkasama at kasama ang lahat ng kanilang mga anak hanggang sa walanghanggan. Ito ay tinatawag nating pagbubuklod bilang isang mag-anak.

• Sino ang mga tao sa inyong mag-anak?

• Ano ang pakiramdam ninyo kapag kasama ninyo ang inyong mag-anak?

• Paanong magkakasama-sama ang isang mag-anak hanggang sa walang-hanggan?

Tiyakin sa mga bata na mahal ng Ama sa Langit at ni Jesus ang bawat maganak at nais na mabuklod hanggang sa walang-hanggan ang mga mag-anak. Ipaliwanag na maihahanda ng mga mag-anak na hindi naibuklod sa templo ang kanilang mga sarili sa pamamagitan ng pagiging masunurin sa mga kautusan ng Ama sa Langit. Pagkatapos ay makapupunta na sila sa templo upang maibuklod bilang isang mag-anak.

Awit

Kasabay ang mga bata, awitin o bigkasin ang mga salita sa koro ng “Mag-anak ay Magkakasama-sama sa Kawalang-hanggan” (Families Can Be Together Forever, Children’s Songbook, p. 188) nang ilang ulit.

Mag-anak ay ma’aring magsama

Sa kawalang-hanggan.

Nais ko’y kapiling ang aking mag-anak,

Itinuro ng Dios ang daan.

‘Tinuro ng Dios ang daan.

Makapaghahanda ako upang magpunta sa templo

Paalalahanan ang mga bata na ang lahat ng sumusunod sa mga kautusan ng Ama sa Langit ay makapupunta sa templo. Ipakita ang pahina ng mga drowing na kasama sa hulihan ng aralin at ipatalakay sa mga bata ang mga kautusang ipinakita. Ipaliwanag na ang pagsunod sa mga kautusang ito ay makatutulong sa mga bata na maging karapat-dapat na magpunta sa templo kapag sila ay mas matanda na.

• Manalangin.

• Sundin ang mga magulang.

• Mahalin ang bawat isa.

• Magpunta sa simbahan.

• Magbayad ng ikapu.

• Kumain ng mga mabubuting pagkain (sundin ang Salita ng Karunungan).

• Maging matapat.

Patotoo

Ibahagi ang iyong damdamin tungkol sa kahalagahan ng pagsasama-sama ng mga mag-anak sa walang-hanggan at ang tungkol sa mga biyaya ng templo. Paalalahanan ang mga bata na ang pagsunod sa kanilang mga magulang at pagsunod sa mga kautusan ng Ama sa Langit ay mahahalagang paraan upang makapaghanda na magpunta sa templo.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

1. Tulungan ang mga bata na maunawaan na ang walang-hanggan ay mahabang panahon. Maaari mong sabihin sa kanila na ito ay higit na matagal kaysa sa panahon ng ipaghihintay nila sa kanilang kaarawan o sa susunod na pista opisyal; higit na mahaba ito kaysa sa panahon nang ang pinakamatandang taong kilala nila ay nabubuhay pa; higit na mahaba ito kaysa noong panahong sina Adan at Eva ay nabubuhay pa. Ipaliwanag na ang ibig sabihin ng walanghanggan ay na ang isang bagay ay walang katapusan.

   Tulungan ang mga bata na gawin ang mga galaw sa sumusunod na talata habang binibigkas mo ang mga salita:

   Gaano Katagal ang Walang-hanggan?

   Gaano katagal ang walang-hanggan (ituro ang ulo, na tila ba nag-iisip)?

   Ito’y higit na matagal kaysa isang taon (ilagay ang kamao sa ilalim ng baba, ipatong ang siko sa kabilang kamay).

   Ito’y higit na matagal kaysa sa panahon (ilagay ang kabilang kamao sa ilalim ng baba, ipatong ang siko sa kamay)

   Ng pagsapit ng Kapaskuhan.

   Gaano katagal ang walang-hanggan (ituro ang ulo, na tila ba nag-iisip)?

   Ito’y hindi gaanong matagal na gugulin (igalaw-galaw ang daliri)

   Na kasama ang mga mag-anak na inyong minamahal (yakapin ang sarili),

   Sapagkat hindi ito magwawakas kailanman!

2. Sa pahintulot ng pangulo ng inyong Primarya, anyayahan ang mga magulang ng isang bata sa iyong klase na magbahagi ng kanilang mga damdamin tungkol sa kahalagahan ng pagpapabuklod sa templo.

3. Gumawa ng kopya ng pahina ng mga drowing na nasa hulihan ng aralin para sa bawat bata. Pakulayan sa mga bata ang mga drowing.

4. Sa pahintulot ng pangulo ng inyong Primarya, anyayahan ang isang maganak sa inyong purok na kagagaling lamang sa templo upang magpabuklod na sabihin sa klase ang tungkol sa karanasang iyon.

Mga Karagdagang Gawain para sa mas Maliliit na Bata

1. Tulungan ang mga bata na gawin ang mga galaw sa sumusunod na talata habang binibigkas mo ang mga salita:

   Ako ay Tagatulong

   Ngayong ako’y matangkad at malaki (tumingkayad at iunat paitaas ang mga kamay),

   Ako’y magiging tagatulong na mabuti.

   Isang tagatulong kay ama (itaas ang unang daliri),

   Na mabait at mabuti;

   Gagawin ko para sa aking ina (itaas ang pangalawang daliri)

   Ang mga bagay na dapat kong gawin.

   Isang tagatulong sa kapatid na babae (itaas ang pangatlong daliri),

   At sa kapatid na lalaki rin (itaas ang pang-apat na daliri);

   Isang tagatulong sa lahat ng mga tapat kong kaibigan (itaas ang hinlalaki).

   At tagatulong ng Diyos ay sisikapin kong gawin

   Sa pamamagitan ng pagmamahal sa iba na tulad ng pagmamahal niya sa akin (ihalukipkip ang mga kamay).

   Nais kong maging tagatulong ng lahat (iunat pabukas ang mga kamay),

   Ngayong ako’y matangkad at malaki (tumingkayad at iunat paitaas ang mga kamay).

2. Tulungan ang mga bata na gawin ang mga galaw sa sumusunod na talatang gawain habang binibigkas mo ang mga salita. Ulitin hangga’t nais mo.

   Gumawa ng bilog na ang lahat ay nakatayo, na naghahawakan ng mga kamay. Maghawakan ng mga kamay sa kabuuan ng gawain.

   Tayong lahat ay magkakasamang namuhay na kapiling ang Ama sa Langit (maglalapitan ang bawat isa, na inilalagay ang mga kamay papunta sa gitna ng bilog).

   Ipinadala niya tayo sa mundo upang mabuhay (palakihin ang bilog).

   Binigyan niya tayo ng mga mag-anak na magmamahal at magtuturo sa atin (muling maglapit-lapit).

   Tutulungan tayo ng ating mga mag-anak na mamuhay na muli siyang kapiling (muling palakihin ang bilog).

3. Maglaan ng isang simpleng guhit ng isang templo sa papel upang kulayan ng mga bata.

Makapaghahanda Ako Upang Makapunta sa Templo

Manalangin

Magpunta sa Simbahan

Kumain ng Mabubuting Pagkain

Mahalin ang Bawat Isa

Sundin ang mga Magulang

Magbayad ng Ikapu

Maging Matapat