Ang Pagsilang ni Jesucristo (Pasko)

Layunin

Upang tulungan ang bawat bata na makadama ng pasasalamat para sa pagkapanganak ni Jesucristo.

Paghahanda

May panalanging pag-aralan ang Mateo 2:1–12 at Lucas 1:26–35; 2:1–20.
Alamin ang ilang simpleng detalye tungkol sa pagsilang ng mga bata sa iyong klase, katulad ng saan sila isinilang, ano ang kulay ng kanilang buhok, at saan sila tumira sa unang linggo ng kanilang buhay. Maging madaling makadama sa mga damdamin ng mga batang inampon.
Gumupit ng mga pirasong papel (mga 8” ang haba at 1 1/2” ang lapad) para gawing mga tanikala ng Pasko. Gumupit ng sapat na dami ng mga pirasong papel para sa bawat bata upang makagawa ng ilang dugtong ng tanikala.
Gumawa ng maikling tala na ipinapaliwanag ang tanikala ng Pasko (tingnan ang aralin) sa mga magulang, upang mahimok nila ang kanilang anak na gumawa ng mabubuting gawa.
Mga kailangang kagamitan:
1. Isang Biblia.
2. Isang maliit na belen. Maaari mong naisin na gumamit ng isang manikang sanggol na ibinalot sa isang kumot, na nakahiga sa isang maliit na kahon. Gumupit ng isang bituin mula sa papel upang ilagay sa itaas ng belen. Kung walang makuhang belen, gamitin ang larawan 1–75, Ang Pagsilang ni Jesus (Pakete ng Larawan ng Sining ng Ebanghelyo 200; 62116).
3. Mga krayola at pandikit.
4. Larawan 1–75, Ang Pasilang ni Jesus (Pakete ng Larawan ng Sining ng Ebangheloyo 200; 62116); larawan 1–76, Walang Silid sa Bahay Panuluyan (62115); larawan 1–77, Ang Paghahayag ng Pagsilang ni Jesus sa mga Pastol (Pakete ng Larawan ng Sining ng Ebanghelyo 202; 62117); larawan 1–78, Ang mga Pantas na Lalaki (Pakete ng Larawan ng Sining ng Ebanghelyo 203; 62120).
Gawin ang mga kinakailangang paghahanda para sa anumang mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Patayuin ang isang bata sa tabi mo habang isinasalaysay ang mga detalyeng tungkol sa kanyang pagsilang. Ulitin para sa bawat bata sa klase.

Ipinagdiriwang natin ang pagsilang ni Jesus sa Kapaskuhan

Ipaliwanag na yamang ito ang panahon ng Pasko, ipinagdiriwang natin ang pagsilang ng isang taong mahal nating lahat.

Kaninong kapanganakan ang ipinagdiriwang natin?

Kuwento

Isalaysay ang kuwento ng pagdalaw ng anghel kay Maria, na matatagpuan sa Lucas 1:26–35. Ipaliwanag na sinabi ng anghel kay Maria na siya ang magiging ina ng Anak ng Diyos, si Jesus.

Kuwento

Ano ang pangalan ng ina ni Jesus? (Tingnan sa Lucas 1:27.)
Sino ang ama ni Jesus? (Ang Ama sa Langit. Tingnan sa Lucas 1:35.)

Ipaliwanag na hindi si Jose ang ama ni Jesus. Siya ay isang mabuting tao na pinili upang pangalagaan si Jesus. Nagpakita ang anghel kay Jose sa isang panaginip at sinabi sa kanya ang tungkol sa mahalagang sanggol na magiging anak ni Maria. Sinabi ng anghel kay Jose na si Maria ang dapat na maging asawa niya.

Kuwento

Ipakita ang larawan 1–76, Walang Silid sa Bahay Panuluyan, at isalaysay ang tungkol sa paglalakbay nina Jose at Maria mula sa Nasaret hanggang sa Betlehem, na matatagpuan sa Lucas 2:1–7. Basahin nang malakas ang Lucas 2:7, na ipinapaliwanag ang anumang salita na maaaring hindi alam ng mga bata.

Gawain

Paupuin o paluhurin ang mga bata sa sahig sa harapan ng belen. Maaari mong naisin na maglaan ng isang kumot upang maipansapin nila. Ipasa-pasa ang larawan 1–75, Ang Pagsilang ni Jesus, at hayaang magsabi ang bawat bata ng tungkol sa isang bagay na kanyang nakikita sa larawan.

Gawain

Bakit hindi natulog sa bahay panuluyan sina Maria at Jose? (Tingnan sa Lucas 2:7.)
Saan ipinanganak si Jesus? (Sa isang sabsaban.)
Anong uring higaan ang nailaan ni Maria para sa sanggol na si Jesus? (Tingnan sa Lucas 2:7.)

Awit

Tulungan ang mga bata na awitin o bigkasin ang mga salita sa “Sa Malayong Sabsaban” (Away in a Manger, Children’s Songbook, p. 42). Kumatha ng mga galaw sa kamay at bisig upang umangkop sa mga salita.

Sa malayong sabsaban na higaan,
Panginoong Jesus do’n isinilang.
Manga bituin sa langit nagmasid,
Sa pagtulog ng Panginoong Jesus.

Kuwento

Ipakita ang larawan 1–77, Ang Pagpapahayag ng Pagkapanganak ni Jesus sa mga Pastol, at sabihin ang tungkol sa pagdalaw ng mga pastol, na matatagpuan sa Lucas 2:8—20.

Kuwento

Bakit natakot ang mga pastol? (Tingnan sa Lucas 2:9.)
Ano ang sinabi ng anghel sa mga pastol? (Tingnan sa Lucas 2:10–12.)
Ano ang ginawa ng mga pastol pagkatapos nilang dalawin ang sanggol na si Jesus? (Tingnan sa Lucas 2:17–20.)

Kuwento

Ipakita ang larawan 1–78, Ang Mga Pantas na Lalaki, at sabihin sa kanila ang tungkol sa pagdalaw ng mga pantas na lalaki, na inilalarawan sa Mateo 2:1–12.

Gawain

Patayuin ang mga bata at magkunwaring nakasakay sa mga kamelyo na lumilibot sa paligid ng silid at magbalik sa belen, na sinusundan ang bituin na aakay sa kanila patungo sa sanggol na si Jesus.

Pagkatapos ng ilang ikot sa paligid ng silid, pababain ang mga bata sa kanilang mga kamelyo at magbalik sa belen. Ipaliwanag na noong panahong natagpuan ng mga pantas na lalaki ang sanggol na si Jesus, nakakita na si Jose ng mas mainam na lugar para pamalagian ng mag-anak at wala na sila sa sabsaban. Paalalahanan ang mga bata na ang mga pantas na lalaki ay nagdala ng mga handog na ginto, kamangyan at mira. Hayaang sabihin ng bawat bata kung ang kanyang pakunwaring handog ay ginto, kamangyan o mira at pagkatapos ay ipabigay ito sa sanggol na si Jesus.

Ang ating handog kay Jesus ay ang maging katulad niya

Ipaliwanag na sa bawat Pasko, habang ipinagdiriwang natin ang pagsilang ni Jesus, maaari tayong magbigay ng mga handog sa kanya. Hindi tayo makapagbibigay ng mga handog na ginto, kamangyan o mira na katulad ng ginawa ng mga pantas na lalaki, ngunit makapagbibigay tayo ng ibang uri ng handog. Tayo ay may handog kay Jesus kapag sinisikap nating maging katulad niya. Nagiging katulad tayo ni Jesus kapag tayo ay mabait sa ating mag-anak at mga kaibigan.

Gawain

Tulungan ang bawat bata na gumawa ng isang tanikala ng Pasko na may ilang dugtong. Pakulayan sa mga bata ang kanilang mga tanikala at pagkatapos ay pagdikit-dikitin ang mga tanikala (tingnan ang paglalarawan sa hulihan ng aralin). Sabihin sa mga bata na ilagay ang kanilang mga tanikala sa isang lugar sa kanilang mga tahanan kung saan ay mapapaalalahanan sila ng mga ito na gumawa ng mabubuting gawa para sa iba bilang mga handog kay Jesus. Hamunin ang mga bata na gumawa ng kahit isa man lamang na mabuting gawa sa bawat araw hanggang sa sumapit ang Pasko.

Tulungan ang mga bata na mag-isip ng mabubuting gawa na maaari nilang gawin. Paalalahanan sila na kapag gumagawa sila ng mabubuting gawa, sila ay nagbibigay ng isang kahanga-hangang handog kay Jesus. Bigyan ang bawat bata ng maikling tala na nagpapaliwanag tungkol sa tanikala sa kanyang mga magulang.

Patotoo

Ipaliwanag na ang pagsilang ni Jesus ang isa sa mga pinakamahalagang bagay na nangyari na sa daigdig. Ipahiwatig ang iyong pagmamahal kay Jesus at ang iyong pagnanais na maging katulad niya, hindi lamang sa Kapaskuhan kundi sa buong taon.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

Isalaysay muli ang kuwento ng pagsilang ni Jesus habang isinasadula ng mga bata ang mga bahagi ni Jose, Maria, ng katiwala ng bahay panuluyan, ng mga pastol, at mga pantas na lalaki. Gumamit ng mga kagamitang katulad ng isang manikang sanggol, isang maliit na kumot, at isang balabal, kung mayroon ng mga ito. Bigyan ng pagkakataon ang bawat bata na makilahok. Maaari mong naising ulitin ang gawain, na pinahihintulutan ang mga bata na gampanan ang iba’t ibang bahagi.
Tulungan ang mga bata na gumupit o gumuhit ng simpleng mga palamuting bituin. Pakulayan sa mga bata ang kanilang mga palamuti, at maglagay ng tali sa bawat bituin upang maisabit ito ng bata kahit saan sa tahanan.
Talakayin ang ilan sa mga pangkalakal na paghahanda para sa Pasko na napapansin ng mga bata. Tulungan silang maunawaan na ang mga bagay na katulad ng mga handog at mga kasayahan ay nakatutuwa, subalit ang Pasko ay tunay na tungkol sa pagsilang ni Jesucristo at ang kahalagahan ng pagtutuon ng pansin sa kanya at sa kanyang buhay.
Talakayin ang mga Pamaskong kaugalian sa inyong pook na nakatuon kay Cristo na kinagigiliwan mo at alam mo. Anyayahan ang mga bata na pagusapan ang tungkol sa anumang mga kaugalian na nakatuon kay Cristo na kinagigiliwan ng kanilang mga mag-anak sa Kapaskuhan.

Mga Karagdagang Gawain para sa mas Maliliit na Bata

Papagkunwariin ang mga bata na mga pastol na nagpapahinga sa bukid. Tulungan silang maisadula ang takot na nadama ng mga pastol nang makakita sila ng anghel, pagkatapos ay ang kaligayahang kanilang nadama nang maunawaan nila ang balita. Tulungan silang mailarawan sa isip na nakaririnig ng mga anghel na umaawit at nakatingala sa magandang kalangitan sa gabi at nakikita ang bituin. Sama-samang lumakad sa paligid ng silid upang hanapin ang sanggol. Lumuhod sa harapan ng sanggol na si Jesus na nasa sabsaban, at umawit ng isang awit ng papuri.
Tulungan ang mga bata na gawin ang mga galaw na sumusunod na talata habang binibigkas mo ang mga salita:

Isang sanggol sa sabsaban (iugoy ang mga kamay na tila naghehele ng isang sanggol),

Katabi ang inang mapagmahal (iabot ang mga kamay),

Bituing nagniningning sa kalangitan (tumuro sa langit nang may paghanga),

Ang Anak ng Diyos ay narito (ipalakpak ang mga kamay sa tuwa)!
Awitin o bigkasin ang mga salita sa “Little Jesus” (Children’s Songbook, p. 39) o “Lahat ay Magmahalan, Sabi ni Jesus” (Jesus Said Love Everyone, Children’s Songbook, p. 61). Paalalahanan ang mga bata na ipinagdiriwang natin ang pagsilang ni Jesus sa Kapaskuhan.
Gumawa ng simpleng mga ginupit na papel ng nakalampin na sanggol na si Jesus. Magtipon ng pinatuyong damo, giniikan o dayami at dalhin ito upang idikit ng mga bata sa “sabsaban” (isang parisukat na papel). Ipadikit sa mga bata ang sanggol na si Jesus sa ibabaw ng higaan na gawa sa damo o dayami.