Mahal Ko ang Aking Buong Mag-anak

Layunin

Upang tulungan ang bawat bata na makadama ng pagmamahal para sa lahat ng mga kasapi ng mag-anak.

Paghahanda

Pag-aralan nang may panalangin ang Lucas 1:36–44, 56.
Mga kailangang kagamitan:
1. Isang Biblia.
2. Larawan 1–7, Isang Mapagmahal na Mag-anak; larawan 1–18, Binibinyagan ni Juan Bautista si Jesus (Pakete ng Larawan ng Sining ng Ebanghelyo 208; 62133); larawan 1–54, ang Templo sa Salt Lake (Pakete ng Larawan ng Sining ng Ebanghelyo 502; 62433), o isang larawan ng templo sa inyong pook.
Gawin ang mga kinakailangang paghahanda para sa anumang mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Awitin ang “Mag-anak na Kaysaya” (A Happy Family, Children’s Songbook, p. 198), na kasabay ang mga bata.

Mahal ko ang nanay ko.
Mahal namin, tatay ko.
Kami’y mahal n’ya kaya,
Mag-anak nami’y kaysaya.

Mahal ko ang ate ko.
Mahal ko ang kuya ko.
Kami’y mahal n’ya kaya,
Mag-anak nami’y kaysaya.

Hayaang mag-usap ang mga bata kung ano ang ginawa nila na kasama ang kanilang mga mag-anak noong nakaraang linggo. Ipabanggit sa bawat bata ang isang tao sa kanyang mag-anak, katulad ng ama, ina, kapatid na lalaki o kapatid na babae.

Gawaing Pantawag Pansin

Sino pa ang bahagi ng inyong mag-anak?

Ang mga lolo at lola, mga tiya, mga tiyo, at mga pinsan ay mahahalagang bahagi ng ating mga mag-anak

Ipakita ang larawan 1–7, Isang Mapagmahal na Mag-anak.

Paanong katulad ng inyong mag-anak ang mag-anak na ito?
Paanong kakaiba ang mag-anak na ito sa inyong mag-anak?
Aling mga tao ang lola at lolo sa larawang ito?

Ipaliwanag na ang mga lolo at lola ay ang mga magulang ng ating mga ina at ama. Lahat tayo ay may mga lolo at lola, kahit na kung minsan ay hindi natin sila gaanong kakilala dahil sila ay namatay na o sa malayo sila nakatira.

Ilan sa inyo ang nakakikilala sa inyong mga lolo at lola?
Ang mga lolo at lola ba ninyo ay nakatira sa malapit sa inyo o sa malayo?
Ano ang nais ninyong gawin na kasama sila?

Awit

Bigkasin ang mga salita sa unang dalawang mga talata ng “Lola” (Grandmother), na ginagamit ang sumusunod na mga galaw. Ulitin kung nais, na ginagamit ang lolo na kapalit ng lola sa huling linya ng bawat talata.

Hinahagkan n’yo (ilagay ang mga daliri sa labi, pagkatapos ay ilayo ang mga ito).
Niyayakap n’yo (iyakap ang mga kamay sa sarili).
Nginingitian din ako (ngumiti).
Sana’y bawat bata sa mundong ‘to (iunat ang mga kamay)
Ay may ‘sang lolang tulad n’yo (ituro).

Binabasahan (magkunwaring hawak ang isang aklat).
Inaawitan (ibukas ang bibig na tila umaawit)
Bulong n’yo’y mahal n’yo ako (ilagay ang bahagyang nakatikom na kamay sa may bibig).
Sana’y bawat bata sa mundong ‘to (iunat ang mga kamay)
Ay may ‘sang lolang tulad n’yo (ituro).

Awit

Sino pa ang nasa inyong mag-anak? (Mga tiya, mga tiyo, at mga pinsan.)

Maikling ipaliwanag kung paanong ang mga tiya, mga tiyo at mga pinsan ay magkakamag-anak (halimbawa, ang inyong tiyo ay ang kapatid na lalaki ng inyong ina o ama). Hilingang magsabi ang mga bata ng tungkol sa kanilang mga tiya, mga tiyo, at mga pinsan.

Kuwento

Ipakita ang Biblia at paalalahanan ang mga bata na mababasa natin ang tungkol sa buhay ni Jesus sa aklat na ito. Buksan sa Lucas 1:36–44, 56 at ipaliwanag na bago isinilang si Jesus, si Maria ay dumalaw sa kanyang pinsan na si Elisabet, na nagdadalantao din. Ang sanggol ni Elisabet ay pinangalanang Juan, at siya ay pinsan at kaibigan ni Jesus. Nang sina Juan at Jesus ay malaki na, bininyagan ni Juan si Jesus. Ipakita ang larawan 1–18, Binibinyagan ni Juan Bautista si Jesus, at ipaturo sa mga bata sina Jesus at Juan.

Ang mga kasapi ng mag-anak ay ating mabubuting mga kaibigan

Ipaliwanag na ang lahat ng mga kasapi ng ating mag-anak ay maaaring maging mabubuting kaibigan natin. Kung ikaw ay may kamag-anak na malapit sa iyo, sabihin sa mga bata kung ano ang nadarama mo para sa taong ito.

Bakit gusto ninyong kasama ang inyong mag-anak?

Awit

Awitin muli ang “Mag-anak na Kaysaya” na kasabay ang mga bata. Sa pagkakataong ito ay magsama ng mga talata para sa tiya, tiyo, pinsan, at mga lolo at lola.

Awit

Ano ang ginagawa ninyo na kasama ang inyong mga tiya, mga tiyo, mga pinsan, at mga lolo at lola?

Sabihin sa mga bata ang tungkol sa isang muling pagtitipon ng mag-anak o ibang pagkakataon nang ang inyong mag-anak ay nagtipun-tipon para sa isang natatanging pagdiriwang. Ipasalaysay sa mga bata ang tungkol sa mga pagsasalu-salo o pagdalaw ng mag-anak na naaalaala nila.

Ipaliwanag na nagplano ang Ama sa Langit at si Jesus upang makapiling natin magpasawalang-hanggan ang ating mga mag-anak. Ipakita ang larawan 1–54, ang Templo sa Salt Lake, o ang larawan ng isang templo sa inyong pook. Maikling ipaliwanag na kung sa templo tayo magpapakasal at mamumuhay nang matwid, maaari nating makapiling ang ating mag-anak magpasawalang-hanggan.

Patotoo

Sabihin sa mga bata ang iyong pagmamahal para sa mga kasapi ng iyong mag-anak. Bigyang-diin na ang ating mga mag-anak ay isang pagpapala sa atin. Himukin ang mga bata na maging mapagmahal at mabait sa mga kasapi ng kanilang mag-anak.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

Sa pahintulot ng pangulo ng inyong Primarya, hilingan ang isang lolo o lola ng isa sa mga bata, o ang isang tao sa purok na lolo o lola na, na dumalaw sa klase. Hilingang sabihin ng panauhin sa mga bata ang tungkol sa kanyang pagmamahal sa kanyang mga apo. (O maaari mong anyayahan ang isang tiya, tiyo, o pinsan ng isa sa mga bata na magsalita tungkol sa pagmamahal para sa lahat ng mga kasapi ng mag-anak.)
Magdala ng isa o higit pang mga larawan ng inyong mag-anak, lalo na ang may kasamang lolo at lola, mga tiya, mga tiyo, o mga pinsan. Ipahanap ang iyong sarili sa mga bata at sa sinumang maaaring kakilala nila (katulad ng iyong asawa o mga anak) sa mga larawan. Sabihin sa mga bata ang tungkol sa iba pang mga tao na nasa mga larawan.
Bigyan ang bawat bata ng etiketa na may nakasulat na pangalan ng isang kasapi ng mag-anak, katulad ng “Ina,” “Ama,” “Kapatid [na lalaki],” “Kapatid [na babae],” “Lola,” “Lolo,” “Tiyo,” “Tiya,” o “Pinsan.” (Kung kakaunti lamang ang mga bata sa iyong klase, gamitin ang ilan lamang sa mga pangalang ito; kung marami ang mga bata sa iyong klase, maaaring maging magkatulad ang pangalan ng mahigit sa isang bata.) Papuntahin sa harapan ng klase ang bawat bata habang sinasabi mo ang pangalan na nasa kanyang etiketa. Ipaliwanag na ang mga mag-anak ay mahalaga at nakatakdang magkasama sama. Magpagawa ng bilog sa mga bata at maghawakan ng mga kamay. Hilingan silang gumawa ng ilang mga galaw habang magkakahawak ang mga kamay, katulad ng pag-uugoy ng kanilang mga kamay, paglalakad sa bilog, at pag-awit ng “Mag-anak na Kaysaya.”
Ipaguhit sa bawat bata ang isang larawan ng kanyang mga lolo at lola o ng ibang mga kamag-anak. Pamagatan ang larawan na Ang Aking mga Lolo at Lola o kung anuman ang naaangkop.

Mga Karagdagang Gawain Para Sa Mas Maliliit Na Bata

Gumawa ng isang kahon o supot na may isang puso sa ibabaw nito upang sumagisag sa pagmamahal. Gumupit ng mga simpleng larawan o mga guhit na sumasagisag sa mga kasapi ng sariling mag-anak o kamag-anak. Tanungin ang mga bata, “Sino ang nagmamahal sa inyo?” Habang sumasagot ang mga bata, isa-isang ilagay ang mga angkop na larawan sa kahon o supot. Kapag ang lahat ng mga larawan ay nasa loob na ng kahon o supot, itaas ito at sabihin sa mga bata, “Ang lahat ng mga taong ito ay lubos na nagmamahal sa inyo.”
Ilagay ang mga ginupit na larawan ng mga kasapi ng mag-anak (tingnan ang gawain 1, sa itaas) sa ibabaw ng mesa o sahig. Patalikurin ang mga bata at ipasara ang kanilang mga mata habang inaalis mo ang isang ginupit na larawan. Ipahula sa mga bata kung sino ang nawawala. Ulitin nang maraming ulit hanggang nais mo. Pagsama-samahing muli ang mga ginupit na larawan at sabihin sa mga bata na nais ng Ama sa Langit na makasama niyang muli ang mga mag-anak, na wala ni isang mawawala.
Awitin ang “When We’re Helping” (Children’s Songbook, p. 198), na ginagamit ang mga pangalan ng mga kasapi ng kamag-anak na kapalit ng ina. Ipasadula sa mga bata ang mga bagay na magagawa nila upang makatulong sa mga kasapi ng mga mag-anak na ito.