Mahal Ko ang Aking mga Kapatid

Layunin

Upang himukin ang bawat bata na magpakita ng pagmamahal sa kanyang mga kapatid.

Paghahanda

Pag-aralan nang may panalangin ang Exodo 1:22–2:10.
Sa pagsang-ayon ng pangulo ng inyong Primarya, anyayahan ang isang ina na dalhin niya ang kanyang sanggol sa klase. Hilingan siyang magsalita tungkol sa kung paano niya inaalagaan ang sanggol, kabilang na ang mga bagay na ginagawa niya at ng kanyang mag-anak upang mapanatiling ligtas ang sanggol. Himukin siya na sabihin ang tungkol sa pagmamahal na kanyang nadarama para sa kanyang sanggol. Kung walang ina na mayroong sanggol, maaari mong anyayahan ang isang ina na magpunta at magdala ng mga larawan ng kanyang anak noong sanggol pa.
Mga kailangang kagamitan:
1. Isang Biblia.
2. Isang manikang sanggol.
3. Larawan 1–2, Si Moises sa mga Takbang Yantok (Pakete ng Larawan ng Sining ng Ebanghelyo 106; 62063); larawan 1–13, Joseph Smith (Pakete ng Larawan ng Sining ng Ebanghelyo 400; 62449).
Gawin ang mga kinakailangang paghahanda para sa anumang mga Gawaing Nagpapayaman sa Kaalaman na nais mong gamitin.

Paalala sa guro: Sa pagbibigay mo ng araling ito, maging madaling makadama sa mga damdamin ng mga bata sa iyong klase na walang mga kapatid.

Mga Gawain sa Pagkatuto Gawaing

Anyayahan ang isang bata na magbigay ng pambungad na panalangin.

Gawaing Pantawag Pansin

Ipakilala ang ina sa klase at hayaang magsabi siya sa mga bata ng tungkol sa kanyang sanggol. Hayaang magtanong ang mga bata sa ina tungkol sa sanggol. Ipapaliwanag sa ina kung gaano kasabik ang mag-anak na magkaroon ng bagong sanggol sa kanilang tahanan.

Maaari nating mahalin ang ating mga kapatid

Mayroon ba sa inyong may nakababatang kapatid na lalaki o babae?

Hilingan ang mga bata na may nakababatang kapatid na lalaki o babae na magsalita tungkol sa sanggol at sabihin kung paanong naghanda ang kanilang mag-anak para sa isang bagong sanggol.

Mayroon ba sa inyong may nakatatandang mga kapatid na lalaki o babae?

Hayaang mag-usap nang ilang sandali ang mga bata tungkol sa kanilang mga kapatid. Paalalahanan ang mga bata na pinag-usapan ninyo sa nakaraang aralin kung paanong ang mga mag-anak ay magkakaiba. Ang ilang mga tao ay may maraming kapatid, at ang ilang tao ay may kakaunti o ni walang kapatid. Kahit na gaano pa kadami ang ating mga kapatid, dapat nating ipakita ang ating pagmamahal sa kanila at maging mabait sa kanila.

Kuwento

Ipakita ang larawan 1–13, Joseph Smith, at ipaliwanag na si Propetang Joseph Smith, ang unang Pangulo ng Simbahan, ay may kapatid na lalaki na nagngangalang Hyrum na mahal na mahal niya. Sina Hyrum at Joseph ay mabuting magkaibigan at nagtulungan ang bawat isa sa buong buhay nila. Sa sarili mong mga salita, isalaysay ang sumusunod na kuwento tungkol sa isang pagkakataon nang tinulungan ni Hyrum si Joseph:

Noong bata pa si Joseph Smith, siya ay nagkaroon ng mabigat na karamdaman. Nagkaroon siya ng napakasakit na impeksiyon sa kanyang binti. Nagkasakit ang kanyang ina sa pag-aalaga sa kanya sa gabi at araw at kinailangang magpahinga. Itinanong ng nakatatandang kapatid na lalaki ni Joseph na si Hyrum kung maaari siyang pumalit sa kanyang ina. Halos patuloy na nanatili nang ilang araw si Hyrum sa tabi ng kanyang naghihirap na kapatid. Hinawakan niya ng kanyang magkabilang kamay ang binti ni Joseph, na siyang tanging paraan upang maibsan niya nang kaunti ang matinding sakit (tingnan sa Lucy Mack Smith, History of Joseph Smith, isinaayos para sa paglilimbag ni Preston Nibley, [Lungsod ng Salt Lake: Bookcraft, 1954], p. 55).

Kuwento

Paano ninyong nalaman na mahal ni Hyrum ang kanyang kapatid na si Joseph?

Ipaliwanag na ang isang paraan na maipakikita natin ang pagmamahal para sa ating mga kapatid ay sa pamamagitan ng pagtulong sa kanila.

Matutulungan natin ang ating mga kapatid

Paano ninyo matutulungan ang inyong mga kapatid?
Paano kayong tinutulungan ng inyong mga kapatid?

Gawain

Ilarawan ang ilang gawa na nagpapakita kung paano maaaring tumugon ang mga bata sa kanilang mga kapatid. Ipataas sa mga bata ang kanilang hinlalaki kung ang gawa ay isang paraan ng pagtulong sa isang kapatid. Maaaring naisin mong gamitin ang ilan sa mga sumusunod na ideya:

Gawain

Ipahiram ang inyong bagong laruan sa inyong kapatid [na babae].
Hiramin ang bola ng inyong kapatid [na lalaki] nang hindi hinihingi ang kanyang pahintulot.
Tulungan ang inyong kapatid [na babae] na damputin ang kanyang mga laruan.
Humingi ng pahintulot sa inyong kapatid [na lalaki] na laruin ang kanyang bola.
Tumangging makipaglaro sa inyong kapatid [na babae].
Maging mabait kapag malungkot ang inyong kapatid [na lalaki].
Makipaglaro sa inyong kapatid [na babae] kapag nalulungkot siya.

Makatutulong tayo sa ating mga nakababatang kapatid

Ipaliwanag na kung minsan ay mahirap kapag ang isang sanggol ay isinilang sa isang mag-anak dahil nakukuha ng sanggol ang marami sa panahon at pagtingin ng mga magulang. Tulungan ang mga bata na maunawaan na kahit na maging abala ang mga magulang sa bagong sanggol, mahal pa rin nila ang lahat ng iba nilang anak. Paalalahanan ang mga bata na kailangan ng tulong ng isang sanggol sa halos lahat ng mga bagay, samantalang ang mga nakatatandang anak (katulad ng nasa klase mo) ay makagagawa ng maraming bagay para sa kanilang sarili at para sa isang nakababatang kapatid.

Paano ninyong matutulungan ang inyong mga magulang sa isang nakababatang kapatid?

Gawain

Ipakita sa mga bata kung paano hawakan nang maingat ang manikang sanggol. Turuan sila ng simpleng awit na panghele o awitin ang “Ako ay Anak ng Dios” (Mga Himno at Awit Pambata) habang halinhinan nilang hinahawakan ang manika.

Ako ay anak ng Dios,
Dito’y isinilang.
Handog ay ‘sang tahanang may
Mahal na magulang.

Akayin at patnubayan,
Sa tamang daan.
Turuan ng gagawin
Nang S’ya’y makapiling.

Kuwento

Ipaliwanag na si Moises ay may nakatatandang kapatid [na babae] na nagmamahal sa kanya at tumutulong sa kanya nang siya ay isang sanggol pa. Ginagamit ang larawan 1—2, Si Moises sa mga Takbang Yantok, pagbalik-aralan ang kuwento ng sanggol na si Moises, na matatagpuan sa Exodo 1:22–2:10. Bigyang-diin kung paano binantayan ni Miriam ang kanyang nakababatang kapatid [na lalaki].

Kuwento

Paano tinulungan ni Miriam ang sanggol na si Moises?

Patotoo

Ibahagi ang iyong damdamin tungkol sa kahalagahan ng pagtutulungan at pagmamahalan ng magkakapatid sa bawat isa. Kung maaari, ibahagi ang isang pansariling karanasan sa pagkabata noong ikaw at ang iyong kapatid ay nagtulungan. Paalalahanan ang mga bata na ipinapakita natin ang ating pagmamahal sa ating mga kapatid kapag tinutulungan natin sila. Ipahiwatig kung gaano ang iyong pasasalamat sa Ama sa Langit sa paglalagay sa atin sa mga mag-anak.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

Bigyan ng papel at mga krayola o mga lapis ang mga bata, at ipaguhit sa kanila ang mga larawan ng kanilang mga kapatid. Hayaang maghalinhinan ang mga bata sa pagpapakita ng kanilang mga larawan at pag-uusap tungkol sa kanilang mga kapatid. Himukin ang mga bata na sabihin ang mga bagay na gusto nilang gawin na kasama ang kanilang mga kapatid.
Kumuha ng isang larawan ng bawat bata noong sila ay mga sanggol pa at pahulaan sa mga bata kung sino ang sanggol. (Tiyaking isauli nang walang sira ang mga larawan sa mga magulang.) Paalalahanan ang mga bata na may nakatatandang mga kapatid na ang kanilang mga kapatid ay tumulong sa pag-aalaga sa kanila noong sila ay mga sanggol pa.
Awitin o bigkasin ang mga salita sa “Masayang Gawain” (Fun to Do, Children’s Songbook, p. 253) na ginagamit ang mga parirala na katulad ng “Ang paghehele ng isang sanggol ay masayang gawain” o “Ang pagtulong sa aking kapatid [na babae] ay masayang gawain.” Kumatha ng mga galaw na isinasaad ng mga salita.
Awitin o bigkasin ang mga salita sa unang talata ng “When We’re Helping” (Children’s Songbook, p. 198) na inihahalili ang kapatid [na babae] o kapatid [na lalaki] sa ina, o awitin ang ikalawang talata ng “Mag-anak na Kaysaya” (A Happy Family, Children’s Songbook, p. 198).
Magdala ng larawan ng iyong sariling mag-anak at sabihin sa mga bata ang tungkol sa iyong mga kapatid. Maaari mong naisin na magbahagi ng ilang masasayang karanasan ninyo nang kayo ay magkakasama.
Tulungan ang mga bata na isadula ang kuwento ni Miriam at ng sanggol na si Moises sa mga takbang yantok, na ginagamit ang mga kagamitan na katulad ng isang manikang sanggol, isang maliit na basket o kahon, isang kumot, at isang bandana.

Mga Karagdagang Gawain para sa mas Maliliit na Bata

Maglagay ng maliit ngunit madaling makilalang gamit ng sanggol sa isang supot o malaking medyas. Padukutin ang mga bata sa loob nang hindi tumitingin at subukang hulaan kung ano ang bagay sa pamamagitan ng paghipo nito.
Awitin o bigkasin ang mga salita sa kapwa mga talata ng “Mag-anak na Kaysaya” (A Happy Family). Habang umaawit ka, maghawakan ng mga kamay at gumalaw nang pabilog na kasama ang mga bata, o gumawa ng mga simpleng galaw na lalapat sa awit.
Tulungan ang mga bata na gawin ang mga galaw sa sumusunod na laro sa daliri habang binibigkas mo ang mga salita:

Ganito ang ginagawa ng sanggol:

Klap - klap - klap - klap (ipalakpak ang mga kamay)!

Ganito ang ginagawa ng sanggol:

It, bulaga, nakita kita (maglaro ng it, bulaga, sa pamamagitan ng mga kamay)!

Ganito ang ginagawa ng sanggol:

Gapang - gapang - gapang - gapang (palakarin ang mga daliri sa hangin).

Ganito ang ginagawa ng isang sanggol:

Tulog - tulog - tulog - tulog (ihilig ang pisngi sa mga magkadaop-palad na mga kamay).
Tulungan ang mga bata na gawin ang mga galaw sa sumusunod na talatang gawain habang binibigkas mo ang mga salita:

Ang Munting Sanggol na si Moises

Ang munting sanggol na si Moises ay may bangkang higaan (itikom nang bahagya ang isang kamay at ilagay ang hintuturo ng kabilang kamay dito).

Binantayan ng kanyang mapagmahal na kapatid sa damuhang pinagtaguan (sumilip sa pamamagitan ng paglalagay ng mga daliri ng kamay sa may mata).

Isang araw ay natagpuan siya ng prinsesa (yumuko nang kaunti na nakatingin sa ibaba) at siya ay kanyang kinuha (magkunwaring iniaangat ang sanggol);

Ang sabi niya’y, “Kukunin ko ang sanggol na ito at siya ay aking pangangalagaan” (magkunwaring iniuugoy ang sanggol sa kamay).

(Mula sa Fascinating Finger Fun ni Eleanor Doan. © 1951. Ginamit nang may pahintulot.)