Aralin 8

Nagpapasalamat Ako Para sa Araw at Gabi

Layunin

Upang tulungan ang bawat bata na maunawaan na sa pagsunod sa plano ng Ama sa Langit, nilikha ni Jesus ang araw upang tayo ay makagawa at makapaglaro at ang gabi upang tayo ay makapagpahinga.

Paghahanda

1. May panalanging pag-aralan ang Genesis 1:1, 3–5, 14–18; Helaman 14:1–13; at 3 Nephi 1:15–23.

2. Mga kailangang kagamitan:

   1. Isang Biblia at isang Aklat ni Mormon.

   2. Ginupit na larawan 1–1, araw; ginupit na larawan 1–2, buwan; ginupit na larawan 1–3, mga bituin (ang mga katulad na ginupit na larawan ay matatagpuan din sa pangkat 3 ng Mga Ginupit na Larawang Pantulong sa Primarya).

   3. Larawan 1–21, Si Samuel, ang Lamanita, sa Bakod (Pakete ng Larawan ng Sining ng Ebanghelyo 314; 62370).

3. Gawin ang mga kinakailangang paghahanda para sa anumang Mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Sabihin sa mga bata na iniisip mo ang isang bagay na naiplano ng Ama sa Langit at nilikha ni Jesucristo. Hilingin sa mga bata na hulaan kung ano ang iniisip mo. Ibigay ang mga sumusunod na ideya nang isa-isa:

Gawaing Pantawag Pansin

1. Pinaiinit tayo nito.

2. Ito ay bilog at dilaw.

3. Ito ay nasa langit.

4. Minsan ito ay tila nagtatago sa ulap o isang bundok.

Matapos na mahulaan ng mga bata “ang araw,” ipakita ang ginupit na larawan ng araw.

Gawaing Pantawag Pansin

• Sino ang gumawa ng araw?

Tayo ay gumagawa at naglalaro kapag araw

Kuwento

Ikuwento sa mga bata ang pagkalikha ng araw at gabi mula sa Genesis 1:1, 3–5 at ang pagkalikha ng araw, buwan at mga bituin mula sa Genesis 1:14–18.

Kuwento

• Sino ang lumikha ng araw at gabi?

• Ano ang ipinalagay ng Ama sa Langit kay Jesus sa langit upang sabihin sa atin na umaga na?

Sabihin sa mga bata na nagbibigay sa atin ng liwanag ang araw upang tayo ay makakita. Pinaiinitan tayo ng araw at tumutulong na palaguin ang mga halaman. Hindi natin magagawang mamuhay sa mundo kung walang araw.

Kuwento

• Ano ang tawag natin sa panahon kapag ang araw ay nakasikat? (Araw.)

Ipaliwanag na maraming bagay tayong nagagawa kapag may araw na. Maaari tayong gumawa, maglaro at tumulong sa iba.

Gawain

Pabanggitin ang mga bata ng mga bagay na ginagawa nila kapag araw, katulad ng pagkain, paglalaro o pagwawalis ng sahig. Patayuin sila at ipagawa ang ilan sa kanilang mga ideya. Maaari mong naising gawin ang mga galaw na kasama nila.

Gawain

• Ano ang maaari ninyong gawin upang matulungan ang isang tao kapag araw? (Maaaring kasama sa mga sagot ang pagdampot ng mga laruan, paghuhugas ng mga pinagkainan, o pakikipaglaro sa batang kapatid.)

Nagpapahinga tayo kapag gabi

• Nakikita ba natin palagi ang araw?

Ipaliwanag na tuwing gabi ay lumulubog ang araw at ang kalangitan ay nagdidilim. Hindi natin nakikita ang araw kapag gabi.

• Ano ang tawag natin sa panahon na madilim? (Gabi.)

• Ano ang ipinalagay ng Ama sa Langit kay Jesus sa langit upang tanglawan ang gabi? (Ang buwan at mga bituin.)

Ipalagay sa mga bata ang mga ginupit na larawan ng buwan at mga bituin sa tabi ng ginupit na larawan ng araw.

Gawain

Ipakuwento o ipagawa sa mga bata ang ilan sa mga bagay na ginagawa nila sa gabi, katulad ng pananalangin bago matulog, pakikinig sa mga kuwento, pagsesepilyo ng kanilang mga ngipin o pagtulog.

Ipaliwanag na ang ilan sa mga tao, katulad ng mga manggagamot, nars, at bumbero, ay nagtatrabaho sa gabi, ngunit karamihan sa atin ay ginagamit ang gabi sa pagtulog. Maraming hayop ang natutulog din sa gabi.

Gawain

• Bakit tayo natutulog?

Tulungan ang mga bata na maunawaan na ang pagtulog ay mabuti para sa ating katawan, at nais ng Ama sa Langit at ni Jesus na pangalagaan nating mabuti ang ating mga katawan. Kung sapat ang ating pagtulog, mas mainam ang ating pakiramdam at magiging higit na malusog. Kung hindi sapat ang ating pagtulog, tayo ay magiging pagod at madaling mainis.

Kung ang haba ng oras sa araw ay nagbabago nang malaki sa iba’t ibang panahon sa inyong lugar, ipaliwanag na ang gabi ay mas mahaba sa ibang panahon ng taon at mas maikli sa ibang panahon. Tinutulungan tayo ng ating mga magulang upang malaman kung oras nang matulog at kung oras nang gumising at maging abala.

Gawain

Patayuin ang mga bata at gawin ang sumusunod na paglalaro sa pamamagitan ng daliri:

Ang Munting Taong Ito

Matutulog na ang munting taong ito (itaas ang isang daliri).

Sa unan ihihiga ang kanyang ulo (ilagay ang daliri sa palad ng kabilang kamay).

Ibinabalot ng kumot ang kanyang katawan (itikom ang mga daliri upang takpan ang unang daliri),

Ang magdamag na pagtulog ay sa ganitong paraan.

Dumating ang umaga at iminulat ang kanyang mga mata.

Ang kumot ay inihagis niya (buksan ang kamay upang ipakita ang daliring nagpapahinga).

Kapagdaka’y nagbangon at siya’y nagbihis (itaas ang daliri),

Handang gumawa, maglaro at ngumiti.

Ginamit ng Ama sa Langit ang araw at ang gabi upang ipahayag ang pagsilang ni Jesus

Kuwento

Sabihin sa mga bata na ginamit ng Ama sa Langit ang araw at ang gabi upang makatulong sa pagsasabi ng tungkol sa pagsilang ni Jesus. Ipakita ang larawan 1–21, Si Samuel, ang Lamanita, na nasa Bakod, at ipaliwanag kung ano ang nangyayari sa larawan. Ipaliwanag na sinabi ng propetang Samuel sa mga Lamanita kung ano ang mangyayari kapag oras na ng pagsilang ni Jesus. Ang araw ay lulubog, ngunit hindi magdidilim ang kalangitan. Ipaliwanag na maraming tao ang hindi naniwala kay Samuel, ngunit ang kanyang sinabi ay tunay na nangyari (tingnan sa Helaman 14:1–13 at 3 Nephi 1:15–23).

Tulungan ang mga batang maunawaan na ang pagsilang ni Jesus ay napakahalaga kung kaya sa malayong Amerika, kung saan nanirahan ang mga Nephita at Lamanita, ay ginawang kasingliwanag ng araw ang gabi nang si Jesus ay isilang.

Kuwento

• Anong mahalagang pangyayari ang sinasabi ni Samuel, ang Lamanita, sa mga tao?

• Ano ang nakita ng mga Nephita na nangyari sa kalangitan nang gabing isilang si Jesus?

Patotoo

Ibigay ang iyong patotoo na ipinalikha ng Ama sa Langit kay Jesus ang araw at ang gabi upang tulungan tayo. Himukin ang mga bata na magpasalamat sa Ama sa Langit para sa araw at sa gabi.

Mga Gawaing Nagpapayaman sa Kaalaman

Pumili ng ilan sa mga gawaing ito upang magamit sa aralin.

1. Kumuha ng isang puting pirasong papel at kalahating pirasong itim o matingkad na asul na papel para sa bawat bata. Idikit ang kalahating pirasong may matingkad na kulay sa isang panig ng puting papel upang sumagisag sa araw at sa gabi. Gumupit ng maliliit na bilog ng mga papel upang sumagisag sa araw, sa buwan, at tulungan ang mga bata na idikit ang mga ito sa mga tamang lugar. Gumamit ng mga may pandikit o mga ginupit na bituin upang idagdag sa gabing tanawin. Isulat sa papel ng bawat bata ang Nagpapasalamat ako para sa araw at gabi.

2. Kasabay ang mga bata, awitin o bigkasin ang mga salita sa “The World is So Lovely” (Children’s Songbook, p. 233), o ang “Ang Mundo’y Malaki” (The World is So Big, Children’s Songbook, p. 235). Gawin ang mga galaw sa “Ang Mundo’y Malaki” tulad ng nakasaad sa ibaba:

   Ang mundo’y malaki at bilog (gumawa ng malaking bilog sa pamamagitan ng mga bisig),

   Naririto ang likha ng Dios;

   Mga bit’wing kumukutitap (ituwid at iwisik ang mga daliri),

   Araw na napakaliwanag (gumawa ng malaking bilog sa pamamagitan ng mga bisig).

   Ang mundo’y malaki at bilog.

   Tayong lahat ay mahal ng Dios (hawakan ang mga bisig at yakapin ang sarili).

3. Awitin ang “Fun To Do” (Children’s Songbook, p. 253). na ginagamit ang mga mungkahi ng mga bata para sa mga talata. Bago awitin ang bawat talata, tanungin ang mga bata kung ang mga galaw na kanilang ginawa ay ginagawa sa araw o sa gabi. Kumatha ng mga galaw alinsunod sa isinasaad ng mga salita.

4. Gumawa ng kuwento tungkol sa magkapatid na babae at lalaki na naglalaro sa labas pagkalipas ng maghapon. Gumamit ng mga pangalan at mga pangyayari sa mga bata sa iyong klase. Ilarawan ang ginawa ng mga bata sa pagtatapos ng kanilang maghapon. Isali ang mga detalye na tulad ng pagsikat ng araw, ng pagtawag ng kanilang nanay upang pumasok sila, at ang paggawa ng mga bata ng mga kailangang gawain sa bahay, paglilinis, paghahanda sa pagtulog, pakikinig sa kuwentong pampatulog at pag-usal ng panalangin sa gabi. Ilarawan kung paanong ang magkapatid na lalaki at babae, ang ibang tao, at mga ibon, kulisap at mga hayop ay tumatahimik at natutulog.

   Tulungan ang mga bata na maunawaan na kapag gabi, dapat nating ipikit ang ating mga mata at matulog upang lumaking malusog at malakas ang ating mga katawan. Ito ay bahagi ng plano ng Ama sa Langit para sa atin.

   Ilarawan ang kuwento sa pamamagitan ng mga ginupit na larawan o italaga ang mga bahagi sa mga bata at ipasadula sa kanila ang kuwento.

Mga Karagdagang Gawain para sa mas Maliliit na Bata

1. Ipakita ang mga ginupit na larawan ng araw, buwan at mga bituin. Itanong ang mga sumusunod:

   • Saan natin nakikita ang mga bagay na ito?

   • Nakikita ba natin ang araw kapag gabi?

   • Nakikita ba natin ang mga bituin kapag araw?

   Ipaliwanag na ipinagawa ng Ama sa Langit kay Jesus ang araw upang magbigay liwanag sa atin at panatilihin tayong mainit sa araw at ang mga buwan at bituin upang magbigay liwanag sa atin sa gabi.

2. Tulungan ang mga bata na gawin ang mga galaw sa sumusunod na talata habang binibigkas mo ang mga salita:

   Ang Nilikha ng Diyos

   Ginawa ng Diyos ang buwan (gumawa ng bilog sa pamamagitan ng mga kamay)

   At mga bituing kumukutitap (ibukas at isara ang mga kamay)

   At inilagay sa kalangitan (umabot paitaas).

   Ginawa niya ang araw (gumawa ng bilog sa pamamagitan ng paglalagay ng mga kamay sa uluhan)

   At ang mga puno’t (matuwid na itaas ang mga bisig)

   Mga bulaklak (itikom nang kaunti ang mga kamay)

   At ibong maliliit na lumilipad (ikampay ang mga bisig).

   (Mula sa Fascinating Finger Fun ni Eleanor Doan. © 1951. Ginamit nang may pahintulot.)

3. Awitin o bigkasin ang mga salita sa “ I Am Like a Star” (Children’s Songbook, p. 163) o “Jesus Wants Me for a Sunbeam” (Children’s Songbook, p. 60).