Aralin 4

Ako ay Maaaring Manalangin sa Ama sa Langit

Layunin

Upang tulungan ang bawat bata na matutuhan kung paano manalangin sa Ama sa Langit at malaman na siya ay makikinig.

Paghahanda

1. Pag-aralan nang may panalangin ang Daniel 6. Tingnan din sa Mga Alituntunin ng Ebanghelyo (31110), kabanata 8.)

2. Mga kailangang kagamitan:

   1. Isang Biblia.

   2. Larawan 1–9, Panalangin sa Umaga (62310); larawan 1–10, Panalangin ng Mag-anak (62275); larawan 1–14, Si Daniel sa Kulungan ng mga Leon (Pakete ng Larawan ng Sining ng Ebanghelyo 117; 62096); larawan 1–15, Pagbabasbas ng Pagkain.

3. Gawin ang mga kinakailangang paghahanda para sa anumang Mga Gawaing Nagpapayaman sa Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Panatilihing nakatayo sa harapan ng klase ang batang nagbigay ng pambungad na panalangin. Paalalahanan ang mga bata na sa huling aralin ay natutuhan nila na tayo ay namuhay na kasama ng Ama sa Langit bago pa tayo isinilang. Ipinadala tayo ng Ama sa Langit sa daigdig.

Gawaing Pantawag Pansin

• Paano tayo makikipag-usap sa Ama sa Langit habang narito tayo sa daigdig?

• Sino ang kinakausap ni (pangalan ng bata na nagbigay ng panalangin) nang siya ay nanalangin?

Tulungan ang mga bata na maunawaan na kapag tayo ay nananalangin tayo ay tuwirang nakikipag-usap sa Ama sa Langit.

Maaari tayong manalangin sa Ama sa Langit

Ibigay ang iyong patotoo na kahit hindi natin siya nakikita, maaari tayong manalangin sa Ama sa Langit at pakikinggan niya ang mga panalangin.

Ipakita ang larawan 1–9, Panalangin sa Umaga.

• Ano ang ginagawa ng batang babaeng ito?

• Sino ang kinakausap niya?

• Ano sa palagay ninyo ang sinasabi ng batang babaeng ito sa Ama sa Langit?

Gamitin ang larawan 1–9, Panalangin sa Umaga, larawan 1–10, Panalangin ng Mag-anak; at larawan 1–15, Pagbabasbas sa Pagkain, habang iyong tinatalakay sa mga bata ang mga pagkakataon na tayo ay nananalangin. Ipaliwanag na maaari tayong manalangin sa Ama sa Langit kailanman natin naisin; ang pinaka-karaniwang pagkakataon ay kapag nagigising at kapag matutulog na tayo, sa hapag kainan, kasama ng ating mga mag-anak, at kapag kailangan natin ang natatanging tulong. Hayaang hawakan ng mga bata ang mga naaangkop na larawan habang tinatalakay mo ang mga ito.

Tinuruan tayo ni Jesucristo na manalangin sa Ama sa Langit

Ipaliwanag na tinuruan tayo ni Jesus na gawin ang ilang tiyak na bagay kapag tayo ay nananalangin. Habang naghahanda tayong manalangin, iniisip natin ang tungkol sa Ama sa Langit.

• Ano ang ginagawa natin sa ating mga kamay kapag tayo ay nananalangin?

• Ano ang ginagawa natin sa ating mga ulo at sa ating mga mata kapag tayo ay nananalangin?

Gawain

Ipagaya sa mga bata ang iyong mga galaw habang ipinakikita mo kung paano maging handang manalangin sa pamamagitan ng paghahalukipkip ng iyong mga kamay, pagyuyuko ng iyong ulo at pagpipikit ng iyong mga mata. Pagkatapos ay hilingin mo sa isang bata na tumayo sa harapan ng klase, at pasundan sa ibang bata ang kanyang mga galaw habang ipinakikita niya kung paano maghahandang manalangin.

Awit

Kasabay ng mga bata, bigkasin ang mga salita sa “Isang Awit ng Panalangin” (A Prayer Song, Children’s Songbook, p. 22) nang ilang ulit. Gawin ang mga galaw na isinasaad ng mga salita.

Iyuko ang ating ulo,

Kapag nananalangin,

Ipikit ang mga mata,

At Ama’y kausapin.

Awit

• Ano pa ang maaari nating gawin upang makapaghandang manalangin?

Ipaliwanag na sa tahanan, kapag binibigkas natin ang ating pansarili o pangmag-anak na mga panalangin, hindi lamang natin inihahalukipkip ang ating mga kamay, iniyuyuko ang ating mga ulo at ipinipikit ang ating mga mata, kundi kadalasan ay lumuluhod tayo.

Awit

Ipaliwanag na may mga natatanging bagay tayong binibigkas kapag tayo ay nananalangin. Bigkasin ang mga salita sa talatang “May Pananampalataya Akong Nananalangin” (Children’s Songbook, p. 14) nang ilang ulit. Ipataas sa mga bata ang isang daliri para sa bawat isa sa apat na natatanging bagay na binabanggit natin kapag tayo ay nananalangin.

Simula ko’y, “Mahal na Ama sa Langit”;

Salamat sa pagpapala;

At hihingin sa kanya ang kailangan,

Sa pangalan ni Jesus, Amen.

(© 1987 ni Janice Kapp Perry. Ginamit nang may pahintulot.)

Awit

• Paano natin sinisimulan ang ating mga panalangin?

• Ano ang maaari nating pasalamatan sa Ama sa Langit?

• Ano ang maaari nating hilingin sa Ama sa Langit?

• Paano natin winawakasan ang ating mga panalangin?

Nakikinig ang Ama sa Langit sa atin kapag tayo ay nananalangin

Kuwento

Ipakita ang larawan 1–14, si Daniel sa Kulungan ng mga Leon. Isalaysay ang kuwento mula sa Daniel 6. Basahin nang malakas ang unang bahagi ng talata 22 upang maipaliwanag kung bakit hindi nasaktan si Daniel habang siya ay nasa kulungan ng mga leon.

Ipaliwanag na nais ni Daniel na manalangin dahil ito ay isang kautusan mula sa Ama sa Langit at dahil din sa nais niyang pasalamatan ang Ama sa Langit sa kanyang mga biyaya.

Kuwento

• Ano ang ginawa ng hari dahil sa nanalangin si Daniel? (Tingnan sa Daniel 6:16.)

• Ano ang nangyari kay Daniel sa kulungan ng mga leon? (Tingnan sa Daniel 6:22.)

• Paano ninyong nalaman na nakinig ang Ama sa Langit sa panalangin ni Daniel? (Tingnan sa Daniel 6:23.)

Patotoo

Magsabi ng isang pagkakataon kung kailan nakinig ang Ama sa Langit sa iyong mga panalangin. Hilingin sa mga bata na magbahagi ng anumang karanasan nila sa panalangin.

Sabihin sa mga bata kung gaano ang iyong pasasalamat na maaari tayong manalangin sa Ama sa Langit, at tiyakin sa kanila na nakikinig ang Ama sa Langit sa atin kapag tayo ay nananalangin.

Kapag hinilingan mo ang isang bata na bigkasin ang pangwakas na panalangin, pagbalik-aralan kung paano maghahandang manalangin.

Patotoo

• Ano ang dapat nating gawin upang maging handang manalangin? (Ihalukipkip ang ating mga kamay, iyuko ang ating mga ulo at ipikit ang ating mga mata.)

• Ano ang unang bagay na dapat banggitin ni (pangalan ng bata) sa panalangin?

• Ano ang maaaring pasalamatan ni (pangalan ng bata) sa Ama sa Langit?

• Ano ang maaaring hilingin ni (pangalan ng bata) sa Ama sa Langit?

• Paano dapat wakasan ni (pangalan ng bata) ang panalangin?

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

1. Maghagis ng isang malambot na bagay, katulad ng isang bag ng mga bins, o bola, sa mga bata. Pagkatapos masalo ng bawat bata ang bagay, hilingan siya na buuin ang pangungusap “Kapag ako ay nananalangin, maaari kong pasalamatan ang Ama sa Langit para sa_____.” Maaaring sumagot ang bata na, “Aking mag-anak.” Pagkatapos na magkaroon ng pagkakataon ang bawat bata, ulitin ang gawain at hayaang banggitin ng mga bata ang pangalan ng mga bagay na maaari nilang hilingin sa Ama sa Langit kapag sila ay nananalangin. Maaari kang magpakita ng mga larawan upang matulungan silang mag-isip ng mga ideya.

2. Bigkasin ang mga salita sa “Isang Awit ng Pasasalamat” (A Song of Thanks, Children’s Songbook, p. 20), na ginagawa ang mga galaw na nasasaad sa ibaba:

   Salamat sa daigdig (ihugis na pabilog ang mga kamay upang sumagisag sa daigdig);

   Salamat sa pagkain (magkunwaring naglalagay ng pagkain sa bibig);

   Sa ibong umaawit (pagdikitin ang mga daliri at hinlalaki upang gayahin ang tuka ng ibon);

   Salamat, O Dios namin (ipakabukas ang mga kamay)!

   (Mula sa First Year Music nina Hollis at Dann. © 1957 ng D.C. Heath and Company. Inilimbag muli nang may pahintulot.)

3. Bigkasin ang talata “Ako’y Nagpapasalamat Para sa Aking mga Mata,” na itinuturo ang mga bahagi ng katawan habang binabanggit ang mga ito:

   Ako’y nagpapasalamat para sa aking mga mata,

   Sa aking tainga, bibig at ilong;

   Nagpapasalamat sa aking kamay at bisig,

   Sa aking binti, paa at daliri.

   (Hinango mula sa isang talata ni Lucy Picco.)

4. Ipasadula sa mga bata ang kuwento ni Daniel sa kulungan ng mga leon. Maaari kang magdala ng mga simpleng kasuotan. Kung ayaw mong isadula ang buong kuwento, hayaan ang mga bata na magkunwaring umuungol na mga leon at pagkatapos ay ipasara ang kanilang mga bibig na tila ba isinara ng anghel ang mga ito.

5. Awitin o bigkasin ang mga salita sa “Thanks to Our Father” (Children’s Songbook, p. 20) o “We Bow Our Heads” (Children’s Songbook, p. 25).

6. Paguhitin ang mga bata ng mga larawan ng mga bagay na maaari nilang pasalamatan sa Ama sa Langit kapag sila ay nananalangin. Isulat ang, Kapag Ako ay nananalangin, maaari kong pasalamatan ang Ama sa Langit para sa: sa bawat larawan.

Mga Karagdagang Gawain para sa mas Maliliit na Bata

1. Paalalahanan ang mga bata na kapag tayo ay nananalangin nakikipag-usap tayo sa Ama sa Langit na nagmamahal at nakikinig sa atin. Tulungan ang mga bata na bigkasin ang sumusunod na talata:

   Mahal ko ang aking Ama sa Langit;

   Pinasasalamatan siya sa panalangin.

   Mahal ako ng aking Ama sa Langit;

   Aking sinasabi’y Kanyang naririnig.

2. Tulungan ang mga bata na bigkasin ang isa o magkasunod na mga talata, na ipinakikita ang angkop na mga galaw:

   Ating kamay ay itiklop, ating ulo ay iyuko,

   Ipikit ang ating mga mata, tayo ngayon ay handa na.

   Itiklop natin ating kamay at ating ulo’y iyuko,

   At tayo’y makinig habang ang dasal ay sinasabi.

3. Bakasin ang kamay ng bawat bata sa isang pirasong papel. Pag-usapan ang dapat nating gawin sa ating mga kamay habang tayo ay nananalangin. Hayaang kulayan ng mga bata ang mga bakas ng kanilang kamay. Lagyan ng pangalan ng bata ang bawat larawan.