Aralin 38

Maaari Akong Maging Magalang

Layunin

Upang himukin ang bawat bata na ipakita ang pagmamahal sa Ama sa Langit at kay Jesus sa pamamagitan ng pagiging magalang.

Paghahanda

1. May panalanging pag-aralan ang Exodo 3:1–10.

2. Mga kailangang kagamitan:

   1. Isang Biblia.

   2. Larawan 1–19, Si Cristo at ang mga Bata (Pakete ng Larawan ng Sining ng Ebanghelyo 216; 62467); larawan 1–66, Si Moises at ang Natutupok na Kahoy (Pakete ng Larawan ng Sining ng Ebanghelyo 107; 62239); larawan 1–67, Isang Magalang na Klase.

3. Gawin ang mga kinakailangang paghahanda para sa anumang Mga Gawaing Nagpapayaman ng Kaalaman na nais mong gamitin.

Mga Gawain sa Pagkatuto

Anyayahan ang isang bata na magbigay ng pambungad na panalangin.

Gawaing Pantawag Pansin

Hilingan ang mga bata na ihalukipkip ang kanilang mga kamay at tahimik na maupo habang inaawit o binibigkas mo ang mga salita sa “Magalang, Tahimik” (Reverently, Quietly, Children’s Songbook, p. 26) mahinang tinig. Kung alam ng mga bata ang awit, maaari silang sumabay sa pag-awit.

Magalang, tahimik, kayo po‘y iisipin;

Magalang, tahimik, ‘to‘y aming aawitin.

Magalang, tahimik, mananalangin,

Espiritu’y isugo sa aming puso.

Kapag tapos na kayo, pasalamatan ang mga bata sa pag-upo nang tahimik.

Maaari tayong maging magalang sa simbahan

Ipakita ang larawan 1–67, Isang Magalang na Klase.

• Nasaan ang mga batang ito?

• Ano ang ginagawa nila?

• Ano sa palagay ninyo ang iniisip nila?

• Paano kayong kumilos kapag dumarating kayo sa Primarya?

Ipaliwanag na kapag dumarating tayo sa simbahan ay dapat tayong kumilos sa isang tiyak na paraan. Ito ay tinatawag na pagiging magalang.

Ipaulit sa mga bata ang salitang magalang nang ilang beses.

• Ano sa palagay ninyo ang ibig sabihin ng pagiging magalang?

Ipaliwanag na ang ibig sabihin ng pagiging magalang ay ang paggawa ng mga bagay na nagpapakita ng pagmamahal at pagpipitagan sa Ama sa Langit at kay Jesus. Naipapakita natin ang ating pagmamahal sa kanila sa pamamagitan ng mga sumusunod na paraan (hayaang ipakita ng mga bata ang ilan sa mga ito habang pinag-uusapan ninyo ang mga ito):

• Paglalakad nang tahimik at pagsasalita nang mahina.

• Tahimik na pag-upo at pakikinig sa mga panalangin at mga aralin.

• Pagtataas ng ating mga kamay kapag may nais tayong sabihin.

• Paghahalukipkip ng mga kamay.

• Pagpapanatiling malinis ng bahay-pulungan.

Ipaliwanag na kapag ginagawa natin ang mga bagay na ito, alam ng Ama sa Langit at ni Jesus na mahal natin sila at na maligaya tayo sa pagpunta sa simbahan.

Gawain

Kasama ang mga bata, bigkasin ang mga salita sa “Nais Kong Maging Magalang” (I Want to Be Reverent, Children’s Songbook, p. 28). Ulitin kung nais.

Pag-ibig ko

Sa inyo’y ipakikita.

Ako ay makikinig,

Dahil ako’y magalang.

Gawain

• Bakit tayo dapat na maging magalang sa Primarya?

Paalalahanan ang mga bata na kapag tayo ay magalang, nagagawa nating makinig sa ating mga guro at natututuhan ang tungkol sa Ama sa Langit at kay Jesus. Kapag magalang tayo, tinutulungan natin ang iba na maging magalang din.

Gawain

• Sa anong gusali tayo naroroon sa ngayon?

• Kaninong tahanan ito?

Ipaliwanag na ang ating bahay-pulungan ay pag-aari ng Ama sa Langit at ni Jesus. Ito ay isang pook na ating pinupuntahan upang matutuhan ang tungkol sa kanila at kung ano ang nais nilang gawin natin.

Gawain

Gawin ang sumusunod na laro sa daliri na kasama ang mga bata. Kumatha ng mga galaw na nagpapakita ng mga bahagi ng bahay-pulungan.

Ang Bahay-pulungan

Ito ang mga dingding ng napakagandang bahay;

Ito ang mga matataas na tore.

Ito ang mga bintana na nagpapasok sa liwanag

At ang mga pintuang nakabukas para sa lahat.

Ang bahay na ito’y itinayo ng mga mapagmahal na kamay

Bilang isang lugar upang umawit at magdasal.

Ihalukipkip natin ang ating mga kamay, at iyuko ang ating mga ulo (ihalukipkip ang mga kamay at iyuko ang mga ulo),

At sa bahay na ito ngayo’y magbigay pasalamat.

Gawain

• Ano ang ilan sa mga bagay na dapat ninyong gawin sa loob ng bahay-pulungan?

• Ano ang ilan sa mga bagay na hindi ninyo dapat gawin sa loob ng bahay-pulungan?

Tulungan ang mga bata na maunawaan na may mga lugar at pagkakataon upang magtakbuhan at maglaro sa bahay-pulungan, ngunit sa malaking bahagi ng mga gusali at kapag Linggo tayo ay dapat na maging magalang. Ituro na maliban sa pag-upo nang tahimik sa Primarya at sa kapilya, tayo ay naglalakad at nag-uusap nang mahina sa mga pasilyo.

Kuwento

Isalaysay ang isang kuwento tungkol sa mga bata sa iyong klase na dumadalo sa Primarya. Isama ang kung gaano sila kasabik habang sila ay tumatakbo at lumuluksu-lukso sa kanilang pagpunta sa gusali, kung gaano katahimik silang lumakad kapag pumasok na sa loob, at kung ano ang ginagawa nila sa kasalukuyan ng pulong sakramento at Primarya at pagkatapos ay sa pasilyo. Bigyang-diin kung gaano kagalang ang mga bata kapag sila ay nagpupunta sa simbahan.

Awit

Awitin o bigkasin ang mga salita sa “Dalawang Paang Masaya” (Two Happy Feet, Children’s Songbook, p. 270), habang tahimik at maingat na naglalakad ang mga bata sa paligid ng silid upang hindi makalikha ng ingay ang kanilang mga sapatos.

Dalawang paang masaya

Sa ‘ki’y nagdadala.

Sila’y nakalulundag,

At nag-iingay pa.

Ngunit sa bahay ng Ama,

Dahan-dahan sila.

Kaya’t kahit naglalakad,

Paa ko’y tahimik.

Awit

• Ano ang ginagawa ninyo sa inyong mga paa sa mga pasilyo ng simbahan? sa kapilya? sa klase?

• Ano ang ginagawa ninyo sa inyong mga kamay?

• Ano ang ginagawa ninyo sa inyong tinig?

Maaari tayong magkaroon ng magalang na pakiramdam

Ipakita ang larawan 1–19, Si Cristo at ang mga Bata, at ipahiwatig ang iyong nadarama kapag naiisip mo si Jesucristo at kung gaano niya tayo kamahal. Ipaliwanag na ang mga ito ay mga damdamin ng paggalang. Anyayahan ang mga bata na ipahiwatig ang kanilang mga damdamin tungkol kay Jesus.

Kuwento

Ipakita ang larawan 1–66, si Moises at ang Natutupok na Kahoy, at isalaysay ang kuwento na matatagpuan sa Exodo 3:1–10. Bigyang-diin ang mga damdamin ng paggalang ni Moises nang makipag-usap sa kanya ang Panginoon mula sa natutupok na kahoy at tinawag siya upang pamunuan ang mga anak ni Israel papalabas sa Ehipto. Basahin nang malakas mula sa Biblia at ipaliwanag ang bahagi ng talata 5: “”Hubarin mo ang iyong panyapak sa iyong mga paa, sapagkat ang dakong iyong kinatatayuan ay banal na lupa.”

Kuwento

• Bakit hinubad ni Moises ang kanyang mga panyapak sa paa?

Ipaliwanag na ito ay isang paraan ng pagiging magalang. Tiyakin na nauunawaan ng mga bata na hindi natin kailangang hubarin ang ating mga sapatos upang maging magalang. Marami pa tayong paraan upang maging magalang.

Kuwento

• Paano kayo magiging magalang?

Maaari tayong maging magalang sa tahanan

Sabihin sa mga bata na hindi lamang ang bahay-pulungan ang lugar na tayo ay dapat na maging magalang.

• Ano ang ginagawa ninyo sa bahay kapag mayroong nananalangin?

• Ano ang ginagawa ninyo sa bahay kapag nagdaraos ng gabing pantahanan ng mag-anak?

Ipaliwanag na kapag tahimik tayong nakikinig sa mga panalangin at mga aralin sa tahanan, tayo ay nagiging magalang din. Ipinapakita nito sa Ama sa Langit at kay Jesus na mahal natin sila.

Patotoo

Ipahiwatig ang iyong pagmamahal sa Ama sa Langit at kay Jesucristo at ang iyong pasasalamat na maaari mong ipakita ang pagmamahal na ito sa pamamagitan ng pagiging magalang. Himukin ang mga bata na ipakita ang kanilang pagmamahal sa Ama sa Langit at kay Jesus sa pamamagitan ng pagiging magalang sa Primarya, sa pulong sakramento at sa mga panalangin at gabing pantahanan ng mag-anak sa tahanan.

Mga Gawaing Nagpapayaman sa Kaalaman

Pumili ng ilan sa mga gawaing ito upang gamitin sa aralin.

1. Pangunahan ang mga bata sa paglalakad nang magalang sa mga pasilyo ng bahay-pulungan. Kung maaari, magpunta sa kapilya. Kapag nakabalik na kayo sa silid-aralan, purihin ang mga bata sa kanilang magalang na kilos at talakayin kung paanong nakatulong ang kanilang pagiging magalang sa ibang tao sa gusali upang maging magalang sa kanilang mga klase.

2. Awitin o bigkasin ang mga salita sa “I Will Try to Be Reverent” (Children’s Songbook, p. 28) o kaya sa “Father, I’ll Reverent Be” (Children’s Songbook, p. 29).

3. Bakasin ang mga paa ng bawat bata sa isang pirasong papel na nasusulatan ng talatang “Dalawang Paa na Masaya.” Hayaang kulayan ng bawat bata ang kanyang bakas at iuwi ito.

4. Hayaang maghalinhinan ang mga bata sa pagpapakita ng paraang maaari siyang maging magalang sa klase, katulad ng pag-upo nang tahimik, paghalukipkip ng mga kamay, o pagtataas ng kamay kapag may sasabihin. Pag-usapan kung bakit dapat tayong maging magalang sa bahay ng Ama sa Langit.

5. Tulungan ang mga bata na bigkasin ang mga salita sa isa o kapwa sumusunod na talata. Kumatha ng mga galaw na isinasaad ng mga salita.

   Ibukas, Isara [Mga Kamay]

   Ibukas, isara;

   Ibukas, isara;

   Magbigay ng palakpak.

   Ibukas, isara;

   Ibukas, isara;

   Sa kandungan ilapag.

   Ikinakaway Ko ang Aking Kamay

   Ikinakaway ko ang aking kamay.

   Ipinaiikot ko ang aking kamay.

   At ito’y aking ipinapalakpak.

   Ang aking kamay ay itinataas ko,

   Pagkatapos ay ibinababa ito

   At sa aking kandungan inilalapag.

   Tahimik ang aking mga paa.

   Ang mga paa ko’y ipinapahinga.

   Matuwid na nakaupo sa aking silya.

   Iyuyuko ko ang aking ulo.

   Ipipikit ko ang mga mata ko.

   Sa panalangin ako’y handa na.

Mga Karagdagang Gawain para sa mas Maliliit na Bata

1. Ipapikit sa mga bata ang kanilang mga mata. Hilingin sa kanilang itaas ang kanilang mga kamay kung naririnig ka nila na naghuhulog ng isang barya o butones. Ihulog ang barya o butones sa sahig o sa mesa.

2. Pagkatapos ay ibalot ang butones o barya sa isang panyo o maliit na piraso ng tela. Hilingin sa mga bata na panatilihing nakapikit ang mga mata nila, makinig na mabuti, at itaas ang mga kamay nila kung maririnig nila ang barya o butones sa pagkakataong ito. Ihulog ang nakabalot na butones o barya sa sahig o sa mesa. Tulungan ang mga bata na maunawaan na maraming maririnig kung tayo ay makikinig.