Aralin 28

Tinutulungan Tayong Matuto ng Ating mga Magulang

Layunin

Tulungan ang mga bata na maunawaan kung paano sila matutulungan ng kanilang mga magulang o tagapangalaga na matutuhang sundin ang mga kautusan.

Paghahanda

1. Pag-aralan nang may panalangin ang Alma 53:10–22; 56:3–10, 46–48, 55–56; 57:24–25; Doktrina at mga Tipan 93:40; at Moises 6:58.

2. Maghandang awitin o bigkasin ang mga titik sa “Turuang Lumakad sa Liwanag” (Mga Himno at Awit Pambata). Maaari mong hilingan ang isang bata na awitin ang unang talata kung naaangkop sa iyong klase.

3. Anyayahan ang isang ina na dalhin ang kanyang sanggol sa unang bahagi ng klase. (Kung hindi ito maaari, maaari mong naising gumamit ng isang larawan ng ina at sanggol.)

4. Sa buong araling ito, maging madaling makaramdam sa mga batang hindi nakatira sa kapwa magulang o mga magulang na hindi nagtuturo sa kanilang sundin ang mga kautusan.

5. Mga kailangang kagamitan:

   1. Mga pamantayang banal na kasulatan.

   2. Isang supot ng bins, maliit na bola, o ibang malambot na bagay.

   3. Larawan 3-38, Dalawang Libong Kabataang Mandirigma (62050; Pakete ng Larawan ng Sining ng Ebanghelyo 313); larawan 3–5, Tinuturuan nina Adan at Eva ang Kanilang mga Anak.

6. Gawin ang mga kinakailangang paghahanda para sa anumang gawaing nagpapayaman sa kaalaman na gagamitin mo.

Mungkahing Pagbubuo ng Aralin

Anyayahan ang isang bata na magbigay ng pambungad na panalangin.

Kumustahin sa mga bata kung nagawa nila ang anumang bagay na hinimok mong gawin nila sa loob ng linggong ito.

May mga Magulang Tayo upang Tulungan Tayong Matuto

Gawaing pantawag pansin

Ipakilala ang ina at sanggol sa mga bata. Patingnan sa mga bata nang sandali ang sanggol at pagkatapos ay magtanong:

Gawaing pantawag pansin

• Ano ang magagawa ng sanggol para sa kanyang sarili?

• Ano ang ginagawa ng ina para sa sanggol?

• Paano natututong magsalita ang sanggol?

• Paano matututong maglakad ang sanggol?

Ipaliwanag na kailangang may mag-alaga sa sanggol. Siya ay umaasa sa kanyang mga magulang para sa lahat ng bagay. Mahal nila ang sanggol, at ginugugol nila ang kanilang mga araw at kung minsan ang kanilang mga gabi sa pagbabantay sa kanya.

Gawaing pantawag pansin

• Ano ang ilang bagay na inyong natutuhan magmula ng kayo ay sanggol?

• Sino ang nagturo at nag-alaga sa inyo?

Pasalamatan ang ina sa pagpunta sa klase na kasama ang kanyang sanggol, at sabihan siyang maaari na niyang iwanan ang klase.

Tinutulungan Tayo ng Ating mga Magulang na Matutong Sundin ang mga Kautusan

Larawan at kuwento

Ipakita ang larawan 3–5, Tinuturuan nina Adan at Eva ang Kanilang mga Anak

Sina Adan at Eva, ang unang lalaki at babae sa mundo, ay tinuruan ng ebanghelyo ni Jesucristo at sinabihang ituro ito sa kanilang mga anak. Basahin nang malakas ang Moises 6:58, na nilalaktawan ang huling salita.

Larawan at kuwento

• Anong kautusan ang ibinibigay ni Jesucristo sa mga magulang? (Turuan ang kanilang mga anak. Ang mga bagay na dapat ituro ng mga magulang ay ang mga katotohanan ng ebanghelyo; tingnan sa Doktrina at mga Tipan 93:40.)

Awit

Awitin o bigkasin ang mga salita sa “Turuang Lumakad sa Liwanag.” Hayaang makinig ang mga bata upang malaman kung mauunawaan nila ang ibig sabihin ng “lumakad sa liwanag.”

Turuang lumakad sa liwanag;

Turuang manalangin sa Ama;

Turuan na malaman ang tama;

Turuan mo ako ng tama.

Anak, halika’t tayo’y mag-aral

Ng mga kautusan N’yang banal.

Makapanahanang kapiling N’ya.

T’wina, t’wina, sa tamang daan.

Ama sa Langit salamat sa ‘Nyo,

Sa patnubay at pagmamahal N’yo.

Papuri sa Inyo’y aawitin!

Maligayang tama’y susundin.

Awit

• Ano ang ibig sabihin ng “lumakad sa liwanag”? (Sundin ang ating Ama sa Langit.)

Ipaliwanag na tayo ay ipinanganak sa mundong ito upang matuto, at inilagay tayo rito ng pami-pamilya upang matuto tayo mula sa ating mga magulang. Inutusan ang mga magulang na ihanda tayo upang isang araw ay makabalik sa piling ng ating Ama sa Langit.

Kuwento sa banal na kasulatan at larawan

Ipaliwanag na ang Aklat ni Mormon ay naglalahad ng isang kuwento tungkol sa ilang kabataang lalaki na ang mga magulang ay nagturo sa kanilang sundin ang mga kautusan. Sabihin ang sumusunod sa iyong sariling mga salita:

Ipaalala sa mga bata na ang mga Lamanita na sumapi sa Simbahan ay tinawag ang sarili nilang mga Anti-Nefias-Lehias, upang hindi sila maipagkamali sa iba pang Lamanita, Nang ang mga Anti-Nefias-Lehias ay nagbalik-ioob, nangako sila o nakipagtipan sa Ama sa Langit na hindi na nila gagamitin ang kanilang mga sandata upang makipaglaban. Ibinaon nila ang kanilang mga sandata upang ipakita na tutuparin nila ang kanilang tipan.

Nagbigay ng lupang matitirahan ang mga Nefita para sa mga Anti-Nefias-Lehias at ipinagtanggol sila mula sa mga Lamanita. Ang mga Anti-Nefias-Lehias ay nakilala sa kanilang pagkamatwid at katapatan. Sila ay nagbigay ng pagkain at damit upang tulungan ang mga hukbo ng mga Nefita.

Nagdaan ang maraming taon. Ang masasamang Lamanita ay muling nagsimulang sumugod sa mga lupain ng mga Nefita at inagaw ang ilan sa mga lungsod ng mga Nefita. Nagkaroon ng problema ang mga Nefita sa pagtatanggol ng kanilang mga lungsod. Nang makita ng mga Anti-Nefias-Lehias kung gaano kahirap na nakikipaglaban ang mga Nefita upang ipagtanggol ang mga lungsod at ang mga Anti-Nefias-Lehias, sila ay masyadong nag-alala. Inisip ng mga Anti-Nefias-Lehias kung dapat silang sumira sa kanilang tipan at tulungan ang mga Nefitang makipaglaban.

Isang matapang na pinunong Nefita na si Helaman ang nagsabi sa kanilang huwag sirain ang kanilang tipan. Alam niyang mahalagang tuparin ang mga tipan. Alam din niya na ang matutwid na taong ito ay maraming anak na lalaki na napakabata pa nang panahong iyon nang gawin ang tipan. Ang mga batang lalaking ito ay hindi gumawa ng tipan sa Ama sa Langit, kaya sila ay makatutulong sa mga Nefitang makipaglaban upang ipagtanggol ang mga lungsod at kanilang mga magulang. Dalawang libo sa mga malakas na kabataang lalaking ito ang nagkusang-loob na lumabang kasama ni Helaman.

Ipakita ang larawan 3-38, Dalawang Libong Kabataang Mandirigma. Pagkatapos ay ipagpatuloy ang kuwento.

Ipaliwanag na ang mga kabataang lalaking ito ay matatapat at maaaring pagkatiwalaan. Tinuruan sila ng kanilang mga ina na magtiwala sa Ama sa Langit at sundin ang kanyang mga kautusan. Alam ng mga kabataang mandirigmang ito na kung gagawin niia ito, ipagtatanggol sila ng Ama sa Langit. Dahil naniwala at sinunod nila ang mga turo ng kanilang mga magulang, sila ay hindi natakot na sumunod kay Helaman. Nakipaglaban sila sa maraming pakikipaglaban para sa mga Nefita. Sila ay matapang na nakipaglaban at naging malaking tulong sa hukbo ng mga Nefita.

Basahin nang malakas sa mga bata ang Alma 56:47, nagsisimula sa “sila ay tinuruan ng kanilang mga ina” at ipagpatuloy hanggang talata 48.

Ipaliwanag na minahal ni Helaman ang mga kabataang lalaking ito na tulad ng pagmamahal ng mga magulang sa kanilang mga anak. Pagkatapos ng isang malaking digmaan, maraming tao ang napatay. Si Helaman ay nag-alala na maaaring ang ilan sa mga kabataang lalaking ito ay napatay. Nang sila ay bilangin, natuwa siya nang malaman na wala kahit isa sa kanila ang namatay. Dahil nagtiwala sa Ama sa Langit ang mga kabataang lalaking ito at sinunod ang mga turo ng kanilang mga ina, ipinagtanggol sila ng Ama sa Langit sa mga Lamanita.

Talakayan

Banggitin na matututuhan natin ang mga kautusan mula sa ating mga magulang tulad ng ginawa ng mga kabataang lalaking ito. Pagkatapos ay dapat nating sundin kung ano ang itinuro sa atin. Sa pamamagitan ng pagtuturo sa atin ng tungkol sa mga kautusan ng Ama sa Langit, tinutulungan tayo ng ating mga magulang na malaman kung ano ang kailangan nating gawin upang matupad ang mga tipan na ginagawa natin kapag tayo ay binibinyagan.

Talakayan

• Ano ang ilan sa mga kautusan na itinuturo sa atin ng ating mga magulang at ibang tao? (Hayaang sumagot ang mga bata. Sa inyong talakayan, bigyang-diin ang mga kautusan na mahalin ang Ama sa Langit at si Jesucristo, mahalin ang isa’t isa, igalang ang ating mga magulang, patawarin ang iba, magpabinyag, manalangin, magbayad ng ikapu, mag-ayuno, sundin ang Salita ng Karunungan, maging matapat, panatilihing banal ang Sabbath, dumalo sa mga pulong ng Simbahan, at pag-aralan ang mga banal na kasulatan.)

Buod

Anyayahan ang mga bata na makinig kapag tinuturuan sila ng kanilang mga magulang at sundin ang mga kautusan. Hikayatin ang mga bata na pasalamatan ang kanilang mga magulang kapag sila ay nagtuturo ng tungkol sa mga kautusan.

Patotoo ng guro

Ibigay ang iyong patotoo na mahal ng Ama sa Langit ang bawat isa sa atin. Dahil sa pagmamahal na ito, inutusan niya ang ating mga magulang dito sa mundo na bantayan tayo, pangalagaan tayo, at turuan tayo ng tamang paraan ng pamumuhay. Habang sinisikap ng ating mga magulang na mamuhay sa paraang gusto ng Ama sa Langit na mamuhay sila, matututo tayo mula sa kanila na palaging piliin ang tamang daan.

Anyayahan ang isang bata na magbigay ng pangwakas na panalangin.

Mga Gawaing Nagpapayaman sa Kaalaman

Piliin mula sa mga sumusunod na gawain ang mga magiging pinakamainam para sa mga bata. Magagamit mo ang mga ito sa aralin mismo o bilang pagbabalik-aral o buod. Para sa karagdagang patnubay, tingnan ang “Oras ng Klase” sa “Mga Tulong Para sa Guro.”

1. Papag-isipin ang mga bata ng ilang bagay na itinuro sa kanila ng mga magulang nila na gawin. Pagkatapos ay gawin ang sumusunod na pakikipaglaro sa kanila:

   Sabihin, “Ang aking (ina, ama, o mga magulang) ay tinuruan akong (halimbawa: magluto ng cake).” Pagkatapos ay tawagin ang isang bata sa kanyang pangalan, ipasalo ang supot ng bins sa kanya, at itanong, “Ano ang itinuro sa iyo ng mga magulang mo na gawin?”

   Ang bata ay sasagot sa pamamagitan ng pagsasabing, “Ang aking (ina, ama, o mga magulang) ay tinuruan akong (halimbawa: isulat ang aking pangalan).” Pagkatapos ay ihahagis ng bata ang supot ng bins pabalik sa iyo.

   Ulitin ang laro hanggang sa ang bawat bata ay nagkaroon na ng isa o dalawang pagkakataon.

2. Basahin ang sumusunod na tula sa mga bata. Patayuin ang mga bata, at pagkatapos ay muling basahin ang tula sa kanila, na ipinalalagay ang mga kamay nila sa kanilang mga ulo sa tuwing maririnig nila ang salitang langit o tahanan.

   Ako’y May Tahanan sa Langit

   Ako’y may tahanan sa langit;

   Sinabi sa ‘kin ng nanay ko;

   Ama sa Langit ay nakapiling

   Bago ako isilang dito.

   Ako’y nanahanan sa langit;

   Totoo, ayon sa tatay ko

   Ama ako’y pinadala dito

   Upang gumawa at matuto.

   Tahanan sa langit ay gusto,

   Ngayo’y masayang naririto

   Na kasama ng aking pamilya,

   At mga kapwa na mahal ko.

3. Awitin o bigkasing kasama ng mga bata ang mga titik sa “Mag-anak Nami’y Kaysaya” (Aklat ng mga Awit Pambata); ang mga titik ay kasama sa likod ng manwal na ito.

   Pumili ng isang bata na siyang magpapanggap na ina at isa na magpapanggap na ama. Kapag inaawit mo o sinasabi mo ang “Nanay,” ang bata na kumakatawan sa ina ay tatayo. Kapag inaawit mo o sinasabi mo ang “ako,” ituturo ng bawat bata ang kanyang sarili. Kapag inaawit mo o sinasabi mo ang “Tatay,” ang bata na kumakatawan sa ama ay tatayo.