Aralin 5

Ang Unang Pangitain

Layunin

Tulungan ang mga bata na malaman na nakita ni Joseph Smith ang Ama sa Langit at si Jesucristo.

Paghahanda

1. Pag-aralan nang may panalangin ang Santiago 1:5 at ang Joseph Smith—Kasaysayan 1:7–20.

2. Kung may makukuha, maghanda na ipalabas ang Ang Unang Pangitain (15 minuto), sa videocassette na Moments from Church History (53145).

3. Maghandang awitin o bigkasin ang mga titik sa “Ang Unang Panalangin ni Joseph Smith” (Mga Himno); ang mga titik ay kasama sa likod ng manwal na ito.

4. Mga kailangang kagamitan:

   1. Isang Biblia at Mahalagang Perlas.

   2. Mga krayola at papel.

   3. Larawan 3-8, Si Joseph Smith ay Naghahanap ng Karunungan sa Biblia (Pakete ng Larawan ng Sining ng Ebanghelyo 402); at larawan 3-10, Ang Unang Pangitain (62470; Pakete ng Larawan ng Sining ng Ebanghelyo 403).

5. Gawin ang mga kinakailangang paghahanda para sa anumang gawaing nagpapayaman sa kaalaman na gagamitin mo.

Mungkahing Pagbubuo ng Aralin

Nakita ni Joseph Smith ang Ama sa Langit at si Jesucristo

Anyayahan ang isang bata na magbigay ng pambungad na panalangin.

Kumustahin sa mga bata kung nagawa nila ang anumang bagay na hinimok mong gawin nila sa loob ng linggong ito.

Gawaing pantawag pansin

Ipakita ang larawan 3-8, Si Joseph Smith ay Naghahanap ng Karunungan sa Biblia.

Gawaing pantawag pansin

• Sino ito? (Si Joseph Smith.)

• Ano ang ginagawa niya?

• Bakit kaya niya binabasa ang Biblia?

Ipaliwanag sa mga bata na noong labing apat na taong gulang si Joseph Smith, siya ay nanirahan kasama ng kanyang pamilya sa isang bukid. Noong panahong iyon, ang mga taong nakatira sa malapit sa kanila ay interesado sa relihiyon. Nagdaraos ng mga pulong ang bawat ministro ng iba’t ibang simbahan upang ipaliwanag ang kanilang mga paniniwala. Ang bawat ministro ay nagsabing ang kanyang simbahan ay ang tama at sinikap na hikayating sumapi ang mga tao. Dahil nais malaman ni Joseph Smith kung aling simbahan ang talagang totoo, siya ay dumalo sa ilang pulong ng iba’t ibang relihiyon. Natuklasan niya na ang bawat ministro ay may kakaibang ideya tungkol sa Diyos at sa mga banal na kasulatan.

Gawaing pantawag pansin

• Ano sa palagay ninyo ang nadama ni Joseph Smith tungkol sa lahat ng magkakaibang paniniwalang ito? (Nalito.)

Talakayan sa banal na kasulatan

Kung may isang bata sa klase na nakakabasa, tulungan siyang basahin ang Joseph Smith—Kasaysayan 1:10 o basahin mo ito nang malakas. Magsimula sa pamamagitan ng pagsasabing “Madalas kong sinasabi sa aking sarili …”

Bigyang-diin na nakapagpalito kay Joseph ang maraming ideya at opinyon. Nag-isip siya kung alin sa mga simbahang ito ang tama o kung ang lahat ng mga ito ay mali. Ang ina ni Joseph, dalawang kapatid na lalaki, at kapatid na babae ay sumapi sa Simbahang Presbitero, ngunit si Joseph ay hindi sumapi sa alinman sa mga simbahan.

Ipakita sa mga bata ang isang Biblia at ipaliwanag na madalas na magbasa ng Biblia si Joseph. Isang araw ay may nabasa siyang talata na lubos na nakintal sa kanyang isipan.

Ipabasa nang malakas sa nakatatandang bata ang Santiago 1:5 o ikaw mismo ang magbasa nito nang malakas.

Talakayan sa banal na kasulatan

• Ano kaya ang ibig sabihin ng kakulangan ng karunungan? (Tiyaking alam ng mga bata na ang ibig sabihin ng kakulangan ng karunungan ay hindi sapat ang kaalaman at pang-unawa sa isang bagay.)

• Ano ang ibig sabihin ng humiling sa Diyos? (Manalangin sa Ama sa Langit.)

Basahing muli ang banal na kasulatan. Ipaliwanag na ang ibig sabihin ng banal na kasulatang ito ay maaari tayong manalangin sa Ama sa Langit at humiling sa kanya na tulungan tayong maunawaan at malaman ang tungkol sa isang bagay.

Alam ni Joseph na kulang siya sa karunungan. Siya ay nalito. Hindi niya alam kung aling simbahan ang totoo, kaya nagpasiya siyang gawin ang isinasaad ng Biblia—manalangin sa Ama sa Langit.

Videocassette o kuwento sa banal na kasulatan

Ipalabas ang Ang Unang Pangitain, o isalaysay ang sumusunod:

Isang umaga ng tagsibol, si Joseph ay naglakad patungo sa isang kakahuyan na malapit sa kanyang tahanan. Pagkatapos tumingin sa paligid upang tiyakin na siya ay nag-iisa, si Joseph ay lumuhod upang manalangin.

Habang siya ay nananalangin, nakakita siya ng nagniningning na liwanag na nakalutang sa may uluhan niya. Ganito ang paglalarawan ni Joseph sa nakita niya: “Nang tumuon sa akin ang liwanag, nakakita ako ng dalawang Katauhan, na ang liwanag at kaluwalhatian ay hindi kayang maisalarawan, nakatayo sa hangin sa ulunan ko” (Joseph Smith—Kasaysayan 1:17).

Larawan at talakayan

Ipakita ang larawan 3-10, Ang Unang Pangitain.

Tinawag ng isa sa mga persona ang pangalan ni Joseph at, habang nakaturo sa isa ay nagsabing, “Ito ang Aking Pinakamamahal na Anak, Pakinggan Siya!” (Joseph Smith—Kasaysayan 1:17).

Larawan at talakayan

• Sinu-sino ang dalawang personang ito? (Ang Ama sa Langit at si Jesus.)

Tinanong ni Joseph ang Ama sa Langit at si Jesus kung aling simbahan ang tama at alin ang kanyang sasapian. Sinabihan siyang hindi siya dapat sumapi sa aiin sa mga simbahan dahil silang lahat ay mali. Nalaman ni Joseph na ang totoong simbahan ni Jesus ay wala na sa lupa.

Ang lugar kung saan nakita ni Joseph Smith ang Ama sa Langit at si Jesus ay tinatawag ngayong Sagradong Kakahuyan.

Larawan at talakayan

• Ano kaya ang nadama ni Joseph Smith pagkatapos niyang makita ang Ama sa Langit at si Jesus?

Maraming Bagay ang Natutuhan ni Joseph Smith mula sa Kanyang Pangitain

Tanungin ang mga bata kung ano ang nalaman ni Joseph Smith mula sa kanyang pangitain. Ituro ang sumusunod na mga punto:

1. Nakita ni Joseph ang Ama sa Langit at si Jesus. Nalaman niya na sila ay may mga katawan na binubuo ng laman at buto.

2. Nalaman niya na ang totoong simbahan ni Jesus ay wala na sa lupa.

3. Nalaman niyang hindi siya dapat sumapi sa alinman sa mga simbahan. Bigyang-diin na wala kahit isa man sa mga simbahan ang totoo. (Maaari mong sabihin sa mga bata na ipapaliwanag sa susunod na aralin kung paano tumulong si Joseph Smith na maibalik ang tunay na simbahan ni Jesus sa lupa.)

4. Nalaman niya na ang ating Ama sa Langit at si Jesus ay nagmamahal sa atin at sinasagot ang ating mga panalangin.

Awit

Awitin o bigkasin ang mga salita sa “Ang Unang Panalangin ni Joseph Smith,” O maaari mong anyayahan ang isang panauhin upang kantahin ang awiting ito sa mga bata.

Saligan ng pananampalataya

Minsan ay sumulat si Joseph Smith sa isang tao at ipinaliwanag kung ano ang itinuturo ng Simbahan. Ang isang bahagi ng liham na iyon ay kinilala bilang ang Mga Saligan ng Pananampalataya.

Tulungan ang mga bata na ulitin ang unang saligan ng pananampalataya, na nagsasaad na naniniwala tayo sa Ama sa Langit, kay Jesucristo, at sa Espiritu Santo.

Buod

Patotoo

Magpatotoo na nakita ni Joseph Smith ang Ama at ang Anak, at ipahayag ang iyong pasasalamat para kay Joseph Smith.

Magpatotoo na napag-alaman ni Joseph na ang pangako sa Santiago 1:5 ay totoo. Kung kulang tayo sa karunungan ay maaari tayong humiling sa Ama sa Langit at tumanggap ng kasagutan.

Magpatotoo na lahat tayo ay mahal ng Ama sa Langit at ni Jesus. Tutulungan nila tayong hanapin ang mga sagot sa ating mga tanong katulad ng pagtulong nila kay Joseph Smith. Maaaring hindi magpakita ang mga anghel sa atin; ngunit kung taimtim tayong hihiling ay sasagutin ng Ama sa Langit ang mga panalangin natin sa paraan na pinakamainam sa atin.

Anyayahan ang isang bata na magbigay ng pangwakas na panalangin. Hilingin sa kanyang pasalamatan ang Ama sa Langit para kay Joseph Smith at sa kanyang pangitain sa Ama sa Langit at kay Jesus.

Mga Gawaing Nagpapayaman sa Kaalaman

Piliin mula sa mga sumusunod na gawain ang mga magiging pinakamabisa para sa mga bata sa iyong klase. Magagamit mo ang mga ito sa aralin mismo o bilang pagbabalik-aral o buod. Para sa karagdagang patnubay, tingnan ang “Oras ng Klase” sa “Mga Tulong Para sa Guro.”

1. Ipapikit sa mga bata ang kanilang mga mata habang binabasa mo ang mga titik sa awit na “Ang Sagradong Kakahuyan” (The Sacred Grove, Children’s Songbook, p. 87). Hilingin sa kanilang isiping mabuti ang karanasan ni Joseph Smith upang makaguhit sila ng larawan nito.

   Ang Sagradong Kakahuyan

   Maliwanag at luntian,

   Habang si Joseph nagdasal,

   Habang si Joseph nagdasal

   Sa sagradong lugar.

   Ang Dios Ama at ang Anak

   Ay nagpakita’t nagwika.

   Pangamba’y napawi nila,

   Pangamba’y napawi nila

   At puso’y nagalak.

   Paguhitin ang bawat bata ng isang larawan ni Joseph Smith sa Ang Sagradong Kakahuyan, at pamagatan itong “Si Joseph Smith sa Sagradong Kakahuyan.”

2. Basahing muli nang malakas ang Santiago 1:5 sa mga bata at ipaliwanag kung paano tayo tinuturuan nito na makahanap ng mga sagot sa ating mga problema. Bigyan ang mga bata ng mga sitwasyon na kung saan maaari silang “magkulang sa karunungan” at kailangang “humiling sa Diyos.” Tulungan silang mag-isip ng mga paraan kung saan ay matutulungan sila ng Ama sa Langit sa mga problema kung sila ay hihiling sa kanya. Maaari kang gumamit ng mga sitwasyon na katulad ng mga sumusunod:

   • Nalulungkot ka dahil ikaw at ang matalik mong kaibigan ay palaging nag-aaway nitong bandang huli. Hindi mo alam kung paano mapabubuti ang mga bagay.

   • Nalulungkot ka at natatakot sa iyong pagtulog sa gabi.

   • May sakit ang nanay mo at tila malungkot siya. Nais mo siyang tulungang maging masaya muli.

   Tiyakin na bigyang-diin na karaniwang sinasagot ng Ama sa Langit at ni Jesus ang mga panalangin sa pamamagitan ng pagbibigay sa atin ng payapang pakiramdam, na matututuhan pa ng mga bata sa ibang aralin. Hindi dapat asahan ng mga bata na magpapakita sa kanila ang Ama sa Langit at si Jesus upang sagutin ang kanilang mga panalangin.