Mga Manwal sa Primary at Oras ng Pagbabahagi

Aralin 32: Pag-alaala kay Jesucristo Kapag Tayo ay Tumatanggap ng Sakramento

Aralin 32

Pag-alaala kay Jesucristo Kapag Tayo ay Tumatanggap ng Sakramento

Layunin

Tulungan ang mga bata na palaging alalahanin si Jesucristo at ang kanilang mga tipan ng binyag habang tinatanggap ang sakramento.

Paghahanda

Pag-aralan ang 3 Nefias 18:1–11; 20:1–9; at Mateo 26:17–30.
Maghanda ng supot na may lamang ilang maliliit na bagay.
Pagbalik-aralan ang salaysay ni Jesus at ng mga batang Nefita mula sa aralin 30 sa ilalim ng pamagat na “Mahal ni Jesucristo ang Lahat ng Bata.”
Maghandang tulungan ang mga bata na awitin o bigkasin ang mga titik sa “Aking Nadarama ang Pag-ibig ni Cristo” (Aklat ng mga Awit Pambata), ang mga titik ay kasama sa likod ng manwal na ito.
Mga kailangang kagamitan:
1. Isang Aklat ni Mormon at Doktrina at mga Tipan.
2. Larawan 3-57, Binabasbasan ni Jesus ang mga Batang Nefita; larawan 3-22, Ang Huling Hapunan (62174, Pakete ng Larawan ng Sining ng Ebanghelyo 225); larawan 3-1, Binibinyagan ni Juan Bautista si Jesus (62133, Pakete ng Larawan ng Sining ng Ebanghelyo 208); larawan 3-51, Sermon sa Bundok (62166, Pakete ng Larawan ng Sining ng Ebanghelyo 212); larawan 3-56, Si Cristo at ang mga Bata (62467, Pakete ng Larawan ng Sining ng Ebanghelyo 216); larawan 3-10, Ang Unang Pangitain (62470, Pakete ng Larawan ng Sining ng Ebanghelyo 403); at larawan 3-59, Ipinapasa ang Sakramento (62021).
3. Kung maaari, kumuha ng isang trey ng sakramento para sa tinapay at tubig.
Gawin ang mga kinakailangang paghahanda para sa anumang gawaing nagpapayaman sa kaalaman na gagamitin mo.

Mungkahing Pagbubuo ng Aralin

Matutulungan Tayo ng Sakramento na Alalahanin si Jesucristo

Anyayahan ang isang bata na magbigay ng pambungad na panalangin.

Kumustahin sa mga bata kung nagawa nila ang anumang bagay na hinimok mong gawin nila sa loob ng linggong ito.

Gawaing pantawag pansin

Isa-isang kunin ang maliliit na bagay mula sa bag na iyong inihanda. Maikling ilarawan ang bawat bagay. Kapag natapos ka na, ipabanggit sa mga bata kung aling bagay ang kinuha mo nang una, ikalawa, ikatlo, at ang mga susunod pa.

Ipaliwanag sa mga bata na ang gawaing ito ay nakatulong sa kanilang malaman kung gaano sila kagaling na makaalala.

Ipakita ang larawan 3-57, Binabasbasan ni Jesus ang mga Batang Nefita. Ipabanggit sa mga bata kung ano ang naaalala nila tungkol sa pangyayaring ito. Purihin sila sa mga bagay na kanilang masasabi.

Larawan at talakayan

Ipaliwanag na noong si Jesucristo ay kasama ng kanyang mga Apostol sa Jerusalem, inutusan niya sina Pedro at Juan na maghanda ng natatanging hapunan para sa kanya at sa Labindalawang Apostol (tingnan sa Mateo 26:17–30).

Ipakita ang larawan 3-22, Ang Huling Hapunan.

Ipaliwanag na sinabi ni Jesucristo sa kanyang mga Apostol na ito na ang huling pagkakataon nila na makakasalo siya sa pagkain. Alam niya na malapit na siyang mamatay. Pagkatapos kumain ng hapunan, ginawa ni Jesus ang isang bagay na hindi kailanman nagawa pa sa mundong ito. Binasbasan at ipinamahagi niya ang sakramento. Pinira-piraso niya ang tinapay at sinabi sa kanyang mga Apostol na kapag kinain nila ito, dapat nilang isipin ang kanyang nasirang katawan. Sila ay binigyan niya ng alak at sinabi sa kanila na alalahanin ang kanyang dugo na mabubuhos sa lupa para sa kanila. Sinabi niya sa kanila na dapat nilang alalahanin na inalay niya ang kanyang buhay upang mabuhay tayo magpakailanman.

Kuwento sa banal na kasulatan

Ipaliwanag na nang dalawin ni Jesus ang mga Nefita, ibinigay rin niya sa kanila ang sakramento (tingnan sa 3 Nefias 18:1–11). Tulad ng ginawa niya sa Jerusalem, inutusan ni Jesus ang labindalawang disipulo upang kumuha ng tinapay at alak. (Ipaliwanag na gumagamit tayo ngayon ng tubig sa halip na alak para sa sakramento.) Habang wala ang mga disipulo, sinabihan ni Jesus ang mga tao na magtipun-tipon sa paligid niya.

Nang bumalik ang mga disipulo na may tinapay at alak, pinira-piraso ni Jesucristo ang tinapay at binasbasan ito. Binigyan niya ang bawat disipulo ng isang pirasong tinapay upang kainin. Pagkatapos ay nagtagubilin si Jesus sa mga disipulo na ipamahagi ang tinapay sa mga tao. Nang ito ay matapos, binasbasan at ipinamahagi ni Jesus ang alak sa mga disipulo at inutusan silang ipamahagi ito sa mga tao. Ipinaliwanag niya na bibigyan niya sila ng karapatan upang basbasan at ipamahagi ang sakramento sa lahat ng mga kasapi ng kanyang Simbahan.

Muli, pagkatapos na makatanggap ang lahat ng sakramento ipinaliwanag ni Jesucristo ang layunin nito tulad ng ginawa niya sa kanyang mga Apostol sa Jerusalem.

Pagbabasa ng banal na kasulatan at talakayan

Basahin nang malakas sa mga bata ang 3 Nefias 18:7 sa Aklat ni Mormon. Sabihin sa kanila na ito ang sinabi ni Jesucristo nang bigyan niya ng sakramento ang mga Nefita. Bigyang-diin na ang pagtanggap ng sakramento ay pagpapakita sa Ama sa Langit na aalalahanin natin si Jesucristo.

Pagbabasa ng banal na kasulatan at talakayan

Ano sa palagay ninyo ang nadama ng mga Nefita kay Jesucristo nang tanggapin nila ang sakramento?

Talakayan na gumagamit ng mga bagay

Ipakita ang larawan 3-59, Ipinapasa ang Sakramento.

Talakayin sa mga bata kung ano ang nagaganap sa oras ng sakramento. Gumamit ng mga tanong upang mabanggit ang sumusunod na mga ideya:

Talakayan na gumagamit ng mga bagay

Karaniwan tayong umaawit ng himnong pangsakramento.
Pinipiraso ang tinapay ng mga maytaglay ng pagkasaserdote (karaniwan ay mga saserdote). Ipakita sa mga bata ang trey ng sakramento para sa tinapay.
Lumuluhod at binibigkas ng isang maytaglay ng pagkasaserdote (karaniwan ay saserdote) ang panalangin ng sakramento para sa tinapay. (Maaari mong naising basahin ang mga salita ng mga panalangin ng sakramento na matatagpuan sa Moronias 4 at 5 at sa Doktrina at mga Tipan 20:77, 79.)
Ipinapasa ang tinapay ng mga maytaglay ng pagkasaserdote (karaniwan ay mga diyakono).
Lumuluhod at binibigkas ng isang maytaglay ng pagkasaserdote (karaniwan ay saserdote) ang panalangin ng sakramento para sa tubig. (Ipakita ang trey ng sakramento para sa tubig.)
Ipinapasa ang tubig ng mga maytaglay ng pagkasaserdote (karaniwan ay mga diyakono).

Talakayan na gumagamit ng mga bagay

Ano ang dapat nating isaisip kapag ipinapasa ang sakramento? (Si Jesucristo at kung gaano niya tayo kamahal.)

Dapat Nating Alalahanin si Jesucristo sa Oras ng Sakramento

Talakayan

Ano ang magagawa natin upang maalala si Jesucristo sa oras ng sakramento?
Ano ang ilang kuwento tungkol sa Tagapagligtas na maaari nating isipin sa oras ng sakramento?
Ano ang ilang awit na maaari nating isipin sa oras ng sakramento?

Sa oras ng sakramento, maaari nating isipin ang mga bagay na alam natin tungkol kay Jesucristo upang tulungan tayong maalala at mahalin siya.

Awit

Tulungan ang mga bata na awitin o bigkasin ang mga salita sa “Aking Nadarama ang Pag-ibig ni Cristo.”

Awit

Ano ang inyong nadama nang inaawit o binibigkas ninyo ang mga salita sa awit na ito?
Ano ang mararamdaman ninyo kung inisip ninyo ang mga salita ng awit na ito sa oras ng sakramento?

Talakayan sa larawan

Sabihin sa mga bata na ikaw ay may ilang larawan at gusto mong sabihin nila sa iyo ang tungkol sa bawat isa. Ipakita ang mga larawan at maikling talakayin ang bawat isa na kasama ang mga bata. Sikaping isali ang bawat bata hangga’t maaari. Gamitin ang larawan 3-1, Binibinyagan ni Juan Bautista si Jesus; larawan 3-51, Sermon sa Bundok; larawan 3-56, Si Cristo at ang mga Bata; at larawan 3-10, Ang Unang Pangitain.

Ipaalala sa mga bata na maiisip nila si Jesucristo sa pamamagitan ng pag-alaala sa mga kuwento tungkol sa kanya at pag-iisip kung gaano niya kamahal sila.

Gawaing pagsasadula at talakayan

Ipaalala sa mga bata na sila ay may gagawin upang tulungan silang maalala kung paano sila dapat kumilos sa oras ng sakramento. Pumili ng dala-dalawang bata upang isadula ang mga sumusunod na paraan ng pagkilos. Papuntahin sila sa harap ng silid. Ibulong sa bawat isa kung ano ang gagawin niya. Papanoorin ang ibang mga bata at pagkatapos ay papiliin sila ng paraan na dapat nilang ikilos sa oras ng sakramento. Ipasabi sa dalawang kasali kung ano ang iniisip nila. Talakayin na kasama ng mga bata kung bakit ang magandang pagkilos ay nagpapahintulot sa kanila na isipin si Jesucristo nang may higit na paggalang.

Magkunwaring gumuguhit ng larawan o nagkukulay.	Maupo nang mapitagan at mag-isip ng mga kuwento mula sa mga banal na kasulatan tungkol kay Jesucristo.
Magkunwaring bumubulong sa iyong mga katabi.	Maupo nang may mapitagan at isipin kung gaano ka kamahal ni Jesucristo.
Magkunwaring pinaglalaruan mo ang isang laruan at gumagawa ng ingay mula dito.	Mapitagang tumanggap ng sakramento at pagkatapos ay mapitagang ipasa ito.

Buod

Pagbabasa sa banal na kasulatan

Ipaliwanag sa mga bata na dapat nilang alalahanin si Jesucristo kapag sila ay tumatanggap ng sakramento at ganoon din sa loob ng buong linggo. Basahing muli ang sumusunod na pangungusap mula sa 3 Nefias 18:7: “At kung lagi ninyo akong aalalahanin ang aking Espiritu ay mapapasainyo.”

Patotoo ng guro

Ibigay ang iyong patotoo na ang Ama sa Langit ay nalulugod sa atin kapag sinisikap nating alalahanin si Jesucristo at sinusunod ang kanyang mga turo. Hikayatin ang mga bata na isipin si Jesucristo sa susunod na pagkakataon na sila ay tatanggap ng sakramento.

Anyayahan ang isang bata na magbigay ng pangwakas na panalangin.

Mga Gawaing Nagpapayaman sa Kaalaman

Piliin mula sa mga sumusunod na gawain ang mga magiging pinakamainam para sa mga bata. Magagamit mo ang mga ito sa aralin mismo o bilang pagbabalik-aral o buod. Para sa karagdagang patnubay, tingnan ang “Oras ng Klase” sa “Mga Tulong Para sa Guro.”

Kung maaari, kumuha ng maliit na larawan ni Jesucristo para sa bawat bata at sulatan ng maikling sulat sa likod. Sabihin sa mga bata na maaari nilang ilagay ang mga larawan sa lugar na maaalala nila si Jesus at ang kanyang pagmamahal sa kanila.
Basahin o awitin ang “Mga Kuwentong Tungkol kay Jesus” (Aklat ng mga Awit Pambata).

Mga k’wentong tungkol kay Jesus, ibig ko,

Ako’y magtatanong pa kung S’ya’y narito.

Tungkol sa dagat at paligid.

K’wento kay Jesus, sabihin mo.

Mga bata sa kanya nakapalibot;

Biyaya ni Jesus sa ‘ki’y umaabot.

Wika’t gawa N’ya ay kay bait,

Mukha N’ya’y puspos ng pag-ibig.

Kwentong tungkol sa dagat na nagngangalit

Bangka sa Galilea bagyo’y sinapit.

Ang Gurong handa at mabait

Pinapaya, hangi’t tubig.
Anyayahan ang bawat bata na ibulong sa iyo habang siya ay lumalabas ng silid ang isang bagay na iisipin niya tungkol kay Jesucristo sa susunod na pagkakataong ipapasa ang sakramento. Sa pamamagitan ng pagbulong ay maiiwasan ng mga batang ulitin na lang ang sinabi ng iba, at makatutulong sa pagpipitagan habang sila ay palabas ng silid-aralan.
Iparinig sa mga bata ang sumusunod na kuwento tungkol sa isang batang lalaki na natulungan sa pamamagitan ng pag-alaala kay Jesus.

“Si Scott at ang kanyang pamilya ay kalilipat lang sa isang bagong lungsod. Ang unang araw sa kanyang bagong bahay ay ang kanyang ikawalong kaarawan, pero wala siyang mga kaibigan na makalaro, at walang mga lolo at lola o mga pinsan na dumadalaw tulad ng dati.

“Sinabi ng kanyang ina, ‘Huwag kang mag-alala Scott, mag-uumpisa na ang pag-aaral sa susunod na linggo at magkakaroon ka na ng maraming bagong kaibigan.’

“Nagpasukan na, pero kung anuman iyon si Scott ay lalong nalungkot. Ang lahat ng mga batang lalaki ay tila may mga sariling kaibigan. Sila ay nagtatawanan at masayang-masayang magkakasama, pero hindi nila inanyayahan si Scott na makisali sa kanila. Siya ay nanood na lang sa tabi. Kapag tapos na ang eskuwela sa bawat araw, siya ay mag-isang naglalakad pauwi… .

“Nang makalipas ang ilang panahon, naalala ni Scott ang nakalulungkot na sandaling ito at sinabi niya, ‘Bago ako lumipat, binigyan ako ng aking guro [sa Primarya] ng isang maliit na nakakuwadrong larawan ni Jesus. Inilagay ko ito sa tabi ng aking kama. Sa tuwing titingnan ko ang larawang ito, gumaganda ang aking pakiramdam. Naalala ko na mahal ni Jesus ang mga bata. Naramdaman kong mahal niya ako at alam niya kung ano ang aking nararamdaman” (Family Home Evenings, manwal big. 1 [1972], p. 140).
- Paano natulungan si Scott ng pag-alaala kay Jesus?
- Paano tayo matutulungan ng pag-alaala kay Jesus?
Hamunin ang mga bata na manatiling tahimik sa loob ng isang minuto at isipin si Jesucristo.
Basahin o awitin ang “Si Jesus ay Isipin” (Primarya 2).

‘Di dapat mahirap maupo at

Tahimik na si Jesus isapuso.

Lahat ng ginawa niya para sa ‘kin;

‘Di dapat mahirap na ‘to’y isipin.

Koro:

‘Di dapat mahirap ako ma’y munti,

Si Jesus isipin, o kaydali.