Togiola a Iesu Keriso

O le upu togiola o lona uiga ia fai se faaleleiga, po o le laveai. O le Togiola a Iesu Keriso, e mafai ai ona toe faalelei i tatou ma lo tatou Tama Faalelagi (tagai Roma 5:10–11; 2 Nifae 25:23; Iakopo 4:11). E mafai ona tatou mau faatasi i Lona malo e faavavau, ina ua “faaatoatoaina e ala i a Iesu“ (tagai MFF 76:62, 69).

O Iesu Keriso “na saunia talu le faavaeina o le lalolagi e togiolaina [Lona] nuu“ (Eteru 3:14). I le muai olaga i le lalolagi o agaga, sa faaali mai ai e le Tama Faalelagi le ata e faavavau o le faaolataga, lea e moomia ai se Togiola faavavau e le iu. O Iesu a o lei faitino, sa lauiloa i lena taimi o Ieova, na faaalia ma le faamaualalo o le a Ia faia le finagalo o le Tama i le faataunuuina o le fuafuaga (tagai Mose 4:2). O lea na muai faauuina ai o Ia e tauave le Togiola—ia sau i le lalolagi, e puapuaga i le faasalaga mo a tatou agasala, ia maliu i luga o le satauro, ma toe tu. Na avea o Ia ”o le Tamai mamoe na fasia talu ona faavaeina o le lalolagi“ (Faaaliga 13:8; tagai foi 1 Peteru 1:19–20; Mose 7:47).

O le Togiola o le faaaliga silisili lea o le alofa o le Tama Faalelagi mo i tatou (tagai Ioane 3:16). O le faaaliga silisili foi o le alofa o le Faaola mo le Tama ma i tatou foi (tagai Ioane 14:28–31; 15:9–13; 1 Ioane 3:16; MFF 34:3; 138:1–4).

O Lo Tatou Manaomia o le Togiola

O le avea ai o i tatou ma suli mai ia Atamu ma Eva, o lea ua aofia ai tagata uma i aafiaga o le Pau. E oti faaleagaga tagata uma, e ala i le tuliesea mai i le afioaga o le Atua, ma e tatau ona oti i tatou uma i la le tino, o le oti lea o le tino faaletino (tagai Alema 42:6–9; MFF 29:41–42).

I lo tatou tulaga pagatia, o le a tatou fetaia’i ma mea faafeagai ma faaosoosoga. Pe a tatou gauai atu i faaosoosoga, ua tatou faamamaoeseina i tatou lava mai le Atua ma tatou le maua ai Lona mamalu (tagai Roma 3:23).

E manaomia e le faamasinoga tonu e faavavau le faatumauina o aafiaga o le Pau ma ia faasalaina i tatou mo a tatou lava mea sese. A leai le Togiola, o le a faataatia e le oti faaletino ma le oti faaleagaga se papupuni e lē masopo’iaina i lo tatou va ma le Atua. Ona e le mafai ona tatou laveaiina i tatou lava mai le Pau pe mai a tatou lava agasala, o le a faavavau pea ona tuueseeseina i tatou mai lo tatou Tama Faalelagi, aua “e leai se mea eleelea e mafai ona sao atu … i lona afioaga“ (Mose 6:57).

Na pau lava le ala e faaolaina ai i tatou, o le i ai lea o se tasi na te laveaiina i tatou. Tatou te manaomia se tasi e mafai ona ia faamalieina tuutuuga o le faamasinoga tonu—e tu i o tatou tulaga e tauavea le avega o le Pau ma totogiina le tau mo a tatou agasala. Ua na o Iesu Keriso lava e agavaa mo le faia o lea taulaga.

O Iesu Keriso, Na o Le Pau Lea o Lo Tatou Faamoemoega

Mai lava i le amataga ao lei Faavaeina le lalolagi, ua na o le Faaola lava lo tatou faamoemoe mo le “filemu i lenei lalolagi, ma le ola e faavavau i le olaga a sau“ (MFF 59:23).

Ua na o Ia lava na i ai le mana e tuuina atu ai Lona soifua ma toe aumaia ai. Mai i Lona tina motale o Maria, na Ia maua mai ai le mana e oti ai. Mai Lona tama imotale, na ia maua mai ai le mana e faatoilaloina ai le oti. Sa ia fetalai, “Aua faapei o le Tama e i totonu ia te ia lava le ola, e faapea foi ona foai mai e ia i le Atalii ia i totonu ia te ia lava le ola“ (Ioane 5:26).

Ua na o Ia lava e mafai ona faaolaina i tatou mai a tatou agasala. Na tuuina atu e le Tama ia te Ia lenei mana (tagai Helamana 5:11). Na mafai e le Faaola ona ia mauaina lenei mana ma faataunuu le Togiola aua sa Ia le gauai atu i le agasala: “Na oo foi ia te ia tofotofoga a e peitai na te le i gauai ai” (MFF 20:22). Ona o lona soifua ai i se olaga atoatoa ma le leai o se agasala, na faasaolotoina ai o Ia mai tuutuuga o le faamasinoga tonu. Talu ai ona sa ia te Ia le mana e faaolaina ai ma ona sa leai Sana aitalafu i le faamasinoga tonu, o lea e mafai ai ona ia totogiina aitalafu mo i latou o e ua salamo. E mafai ona Ia faapea atu:

“Tama e, faauta i le puapuaga ma le oti o lē na le faia se agasala, o le na e fiafia lava i ai, faauta i le toto o lou atalii na faamaligiina, o le toto o le na e tuuina atu ina ia faamamaluina oe lava;

“O le mea lea, Tama e, ia faasaoina ai ou uso nei o e talitonu i lou igoa ina ia latou o mai ia te au ma maua le ola faavavau” (MFF 45:4–5).

E moni, “e leai se tasi igoa e foaiina mai, po o se tasi ala e oo mai ai le olataga i le fanauga a tagata, ua na o le suafa lava o Keriso le Alii e pule aoao” (Mosaea 3:17).

O Le Taulaga Togiola

Na faia le taulaga togiola a Iesu i le Faatoaga o Ketesemane ma luga o le satauro i Kalevaria. O Ketesemane sa gauai atu ai o Ia i le finagalo o le Tama ma amata ai ona Ia tauave i Ona Lava luga agasala a tagata uma. Sa Ia faaalia mai nisi o mea sa oo ia te Ia a o Ia totogiina le tau mo a tatou agasala:

“Aua faauta, o au le Atua na puapuagatia i nei mea mo tagata uma ina ia latou le puapuagatia pe afai latou te salamo;

“Ae peitai, afai latou te le salamo, e ao ina latou tiga e pei o au;

“O le tiga lea na faagateteina ai au lava, o le Atua, le silisili ese i mea uma, ona o le tiga ma na maligi ai le toto mai pu laiti uma lava o le tino, ma na tiga le tino atoa ma le agaga ma sa ou loto ou te le inu i le ipu oona ae teena —

“Ae ui i lea, ia i le Tama le viiga, ma na ou inu ma faaumaina ai au sauniuniga i le fanau a tagata” (MFF 19:16–19; tagai foi Luka 22:44; Mosaea 3:7).

Na faaauau pea ona puapuaga le Faaola mo a tatou agasala ina ua Ia faatagaina Ia lava ina ia faasatauroina—“na siitia o ia i luga i le satauro ma ua fasiotia mo agasala a le lalolagi“ (1 Nifae 11:33).

I luga o le satauro, sa Ia faatagaina Ia lava e maliu. Ona tuuina lea o Lona tino i totonu o se tuugamau seia Ia toetu ma avea “ma faapolopolo o e ua momoe“ (1 Korinito 15:20). O Lona maliu ma le Toetu, na Ia faatoilaloina ai le oti faaletino mo i tatou uma. Mulimuli ane, na Ia fetalai:

“Na ou sau i le lalolagi e fai le finagalo o lo’u Tama, aua na auina mai au e le Tama.

“Na auina mai au e le Tama ina ia siitia au i luga o le satauro ina ua uma ona siitia au i luga o le satauro, ia tosina mai ai tagata uma ia te au e pei ona siitia au e tagata e faapea ona siitia tagata e le Tama ina ia laulaututu i ou luma ia faamasinoina ai i a latou galuega, pe lelei, pe leaga.

“Ona o lenei lava mea ua siitia ai au, o lea foi, e tusa ma le mana o le Tama ou te tosina mai ai tagata uma ia te au ina ia faamasinoina i latou e tusa ma a latou lava galuega.

“E oo foi ina faatumuina lē salamo ma papatisoina i lo’u igoa, afai foi e tumau o ia seia oo i le gataaga, faauta ou te tauamiotonuina o ia i luma o lo’u Tama i le aso ou te tu ai e faamasino i le lalolagi” (3 Nifae 27:13–16).

Faaolataga Lautele mai le Pau

O le Togiola, ua faaolaina ai e Iesu Keriso tagata uma mai aafiaga o le Pau. O tagata uma sa ola i luga o le fogaeleele ma i latou o e o le a ola i luga o le fogaeleele, o le a toetutu ma toe aumaia i le afioaga o le Atua ina ia faamasinoina (tagai 2 Nifae 2:5–10; Helamana 14:15–17). E ala mai foi i le meaalofa a le Faaola o le alofa mutimutivale ma le alofa tunoa togiola, o le a tatou maua uma ai le meaalofa o le imotale po o le tino ola pea ma le ola e faavavau i ni tino mamalu toetutu.

Faaolataga mai a Tatou Agasala

E ui lava ina ua faaolaina e aunoa ma ni tuutuuga i tatou mai aafiaga lautele o le Pau, ae tatou te tali atu mo a tatou lava agasala. Ae peitai e mafai ona faamagaloina ma faamamaina i tatou mai pisipisia o le agasala pe afai tatou te “faaaoga le toto o Keriso” (Mosaea 4:2). E tatau ona tatou faatinoina le faatuatua i a Iesu Keriso, salamo, ma papatisoina mo le faamagaloina o agasala, ma maua le meaalofa a le Agaga Paia. Na fautua mai Alema:

“E ao ina outou salamo ma ia toe fanauina, aua ua fetalai mai le Agaga: Afai e le toe fanauina outou, e le mafai ona fai mo outou tofi le malo o le lagi. O lenei, ina o mai ia ma ia papatisoina i le salamo, ina ia faamamaina outou ai a outou agasala ina ia outou faatuatua i le Tamai Mamoe a le Atua, o Lē aveese agasala a le lalolagi, o Lē malosi e faaola ma faamama amioletonu uma” (Alema 7:14).

O Le Meaalofa o le Ola Faavavau

Ua faaali mai e le Faaola o le ola e faavavau o le “meaalofa sili lea i lo meaalofa uma a le Atua“ (MFF 14:7). Ina ia maua le ola e faavavau, e tatau ona agavaa e mau ai i le afioaga o le Atua, e maua ai se nofoaga i le tikeri pito i luga o le malo selesitila. E na o le pau le ala e avanoa ai lenei meaalofa, o le Togiola a Iesu Keriso. Na faapea mai Mamona: ”Po o le a le mea tou te faamoemoe i ai? Faauta, ou te fai atu ia te outou, e ia te outou le faamoemoe ona o le togiola a Keriso, ma le mana o lona toe tu mai, ina ia faatuina i le ola faavavau, o lenei foi ona o lo outou faatuatua ia te ia e tusa ma le mea ua folafolaina“ (Moronae 7:41).

Ina ia maua lenei meaalofa, e tatau ona tatou faamalieina ni tuutuuga faapitoa. E tatau ona tatou faaaogaina le faatuatua ia Iesu Keriso, salamo i a tatou agasala, ma tumau i le faatuatua seia oo i le iuga. E tatau ona tatou maua sauniga o le faaolataga: papatisoga, o le meaalofa a le Agaga Paia, faauuga i le Perisitua Mekisateko (mo alii), ma faaeega o le malumalu ma faamauga o le faaipoipoga. O le mauaina o nei sauniga ma tausia feagaiga e o faatasi ma nei sauniga, tatou te o mai ai ia Keriso ma maua le meaalofa sili o le ola e faavavau (tagai Mataupu Faavae o le Faatuatua 1:3).

I Lana faamasinoga tonu e lē iu ma le alofa tunoa, ua tuuina mai ai e le Alii le ola e faavavau “o i latou uma o e ua oti e aunoa ma le malamalama i lenei talalelei, o e semanu latou te talia pe ana faatagaina e ola pea i le lalolagi,” ma “tamaiti uma lava o e oti a o lei taunuu atu i tausaga e malamalama ai” (MFF 137:7, 10).

Ua valaaulia e le Faaola i tatou uma ia maua le ola e faavavau: “Faauta, ua valaau o ia i tagata uma, aua ua faaloaloaina mai ia te i latou aao o le alofa ma ua fetalai mai o ia: Ina salamo ia, ona ou talia lea outou. Ioe, o loo faapea ona fetalai mai o ia: O mai ia ia te au ma ia outou aai i le fua o le laau o le ola; ioe, tou te aai ma feinu fua i le areto ma le vai o le ola“ (Alema 5:33–34).

Mauaina o le Filemu ma le Faamalologa e ala i le Togiola

O faamanuiaga o le Togiola a le Faaola e oo atu i le faavavau, ae e oo mai foi i le olaga nei. A e sau ia Keriso, o le a e iloa ai le olioli i le mama i luma o le Alii. O le a mafai ona e lagonaina upu a Alema, o lē, ina ua mavae le tele o le agasala ma le tetee, sa lagonaina e ia le tiga ae o se faagasologa o le faamalologa o le salamo. Ina ua uma ona faamagaloina o ia, sa ia molimau mai:

“Ua le toe mafai ona ou manatua ou tiga; ioe, ua ou le toe atuatuvale i le manatu i au agasala.

“Ioe, ua maeu lava, le olioli, ma le malamalama ofoofogia na au vaaia, ioe, sa faatumuina lo’u agaga i le olioli matua tele e tusa ma le tele o lo’u tiga!

“… sa le mafai se tasi mea ona silisili ma oona tusa ma ou tiga… . O le tasi mea, e le mafai ona silisili ma malie se tasi mea e tusa ma lou olioli” (Alema 36:19–21).

E faaopoopo atu i le ofoina o le faaolataga mai le tiga o le agasala, ua ofoina mai foi e le Faaola le filemu i taimi o tofotofoga. O se vaega o Lana Togiola, sa tauaveina e Iesu i Ona Lava luga tiga, ma’i, ma puapuaga o tagata uma (tagai Alema 7:11–12). Na te malamalama i ou puapuaga aua sa oo foi ia te Ia. Faatasi ai ma lenei malamalamaaga atoatoa, Na te silafia le ala e fesoasoani mai ai ia te oe. E mafai ona e lafoina “mea uma tou te popole ai; aua o loo manatu mai o ia ia te outou“ (1 Peteru 5:7).

O lou faatuatua ma le amiotonu ma Lana taulaga togiola, e mafai ai ona toe faaleleia atoa ma faasa’oina mea uma e le paleni, o manu’a, ma tiga o lenei olaga. O faamanuiaga e le i tuuina atu i lenei olaga, o le a toe tuuina atu i le faavavau. Ma e ui lava Na te le aveesea uma ou tiga i le taimi nei, ae o le a Ia faamanuia ia te oe i le faamafanafanaga ma le malamalama ma le malosiaga e “tauavae ai [au] avega“ (Mosaea 24:15).

“Ia outou o mai ia te au, o outou uma o e tigaina ma mafatia i avega,” le fetalaiga a le Faaola, “o au foi e malolo ai outou” (Mataio 11:28). I se tasi mea na tupu na Ia toe folafola mai ai foi Lona filemu, ina ua faapea mai, “e maua foi outou e le puapuaga i le lalolagi, a ia outou loto tetele, ua ou manumalo i le lalolagi” (Ioane 16:33). O folafolaga nei o le Togiola, i le olaga nei ma le faavavau atoa.

Mau Faaopoopo: Isaia 49:13–16; 53; Mataio 26–28; Mareko 14–16; Luka 22–24; Ioane 10:14–15; 11:25–26; 14:6; 15:13; 19–20; 1 Korinito 15:20–22; Eperu 4:14–16; 1 Ioane 1:7; 1 Nifae 10:6; 2 Nifae 2:1–10; 9; 25:23–26; Iakopo 4:12; Mosaea 3:1–19; Alema 22:14; 34:5–18; 42; Helamana 5:9–12; 14:13–19; 3 Nifae 9:14–22; 27:13–22; Mamona 9:10–14; Eteru 12:27, 41; Moronae 8:5–26; 10:32–33; MFF 18:10–12; 19:15–24; 20:17–34; 45:3–5; 76:40–43; Mose 1:39

Tagai foi Alofa tunoa; Ata o le Faaolataga; Faamagaloga; Faamasinoga tonu; Faaolataga; Faatuatua; Le Atua le Tama; Malo o le Mamalu; Ola faavavau; Oti, Faaleagaga; Papatisoga; Pau; Salamo; Sauniga; Talalelei; Toetu