Taitaiga o le Ekalesia
O Iesu Keriso o loo tu i le ulu o le Ekalesia. O le misiona a le Ekalesia a Iesu Keriso o le Au Paia o Aso e Gata Ai o le fesoasoani lea i tagata uma ia o mai ia te Ia (tagai Moronae 10:32). Ina ia faataunuuina lenei misiona, ua faatulagaina ai le Ekalesia e tusa ma le taiala na faaalia mai e le Alii “mo le faaatoatoaina o le au paia, … seia tatou oo atu o i tatou uma lava ma le lotogatasi i le faatuatua ma le iloa lelei o le Alo o le Atua” (Efeso 4:12–13; tagai foi fuaiupu 11). O le auivi lenei e aotele ai le faatulagaga o le Ekalesia.
Fale ma le Aiga
O le aiga o le iunite faavae lea i totonu o le Ekalesia, ma o le fale o le nofoaga sili lea ona taua mo le aoaoina o le talalelei. E leai se isi faatulagaga e mafai ona suitulaga i le aiga. E tusa lava pe faaauau pea ona tuputupu a’e le Ekalesia, o le a tumau pea lona faamoemoega e lagolagoina ma faamalolosia aiga ma tagata taitoatasi i a latou taumafaiga e ola i le talalelei.
Taitaiga Lautele
E taitaiina e le Alii Ona tagata o le feagaiga i nei aso e ala lea i le Peresitene o le Ekalesia, o le ua tatou lagolagoina o se perofeta, tagata vaai, ma tali faaaliga. O le Peresitene o le Ekalesia e pulefaamalumalu i le Ekalesia aoao. O ia ma ona fesoasoani, o ni perofeta foi, tagata vaai, ma tali faaaliga, ua fausia ai le Korama a le Au Peresitene Sili.
O sui o le Korama a Aposetolo e Toasefululua o i latou foi o ni Perofeta, tagata vaai, ma tali faaaliga. O i latou, faatasi ai ma le Au Peresitene Sili, o ni “molimau faapitoa i le igoa o Keriso i le lalolagi atoa” (MFF 107:23). Latou te galulue i lalo o le faatonuga a le Au Peresitene Sili “e atiina ae le ekalesia, ma faatonuina ana galuega e tau i ai i atunuu uma“ (MFF 107:33). Latou te ”tatala ai le faitotoa [i atunuu] o le folafolaga o le tala lelei ia Iesu Keriso“ (MFF 107:35).
O uso o le Korama a le Fitugafulu ua tofia e folafola le talalelei ma atiina ae le Ekalesia. Latou te galulue i lalo o faatonuga a le Au Aposetolo e Toasefululua ma le taitaiga a uso e toafitu, o ē ua tofia e galulue o le Au Peresitene o Fitugafulu. O Korama Muamua ma le Lona Lua a Fitugafulu e ta’ua i latou o Au Pulega Aoao, ma e mafai ona tofia i latou e galulue i soo se mea lava o le lalolagi.
O le Au Epikopo Pulefaamalumalu o le au peresitene o le Perisitua Arona i le Ekalesia aoao. O le Epikopo Pulefaamalumalu ma ona fesoasoani e galulue i lalo o faatonuga a le Au Peresitene Sili e faafoeina tulaga faaletino o le Ekalesia.
O le faatulagaga o Alii Talavou, Aualofa, Tamaitai Talavou, Peraimeri ma le Aoga Sa e tofu ma au peresitene i le tulaga aoao o le Ekalesia e tuuina atu aoaoga ma faatonuga.
Taitaiga Faa-Eria
O le eria, o le vaevaega faalelaueleele pito sili lea ona tele o le Ekalesia. Ua tofia e le Au Peresitene Sili le Au Peresitene o Fitugafulu latou te vaaia eria ua filifilia o le Ekalesia, i lalo o faatonuga a le Korama a Aposetolo e Toasefululua. O isi eria o le Ekalesia, ua tofia e le Au Peresitene Sili ia Au Peresitene o Eria latou te pulefaamalumalu ai. O se Au Peresitene o le Eria e aofia ai se peresitene, lea e masani ona tofia mai le Korama Muamua po o le Korama Lua o le Korama a Fitugafulu, ma o fesoasoani e toalua, e mafai ona tofi mai i soo se Korama a Fitugafulu. O Au Peresitene o Eria, e galulue i lalo o faatonuga a le Au Peresitene Sili, o le Korama a le Toasefululua, ma le Au Peresitene o le Au Fitugafulu.
O nisi uso e faauuina i le tofi o le Fitugafulu ae le galulue o ni Pulega Aoao. E ta’ua i latou o ni Fitugafulu Pule Eria, ma ua tofia i latou i ni korama e ese mai le Korama Muamua po o le Lona Lua a Fitugafulu, e tusa ai ma nofoaga faaitulagi. O eria latou te vaaia, e gata lava i itulagi e nonofo ai i latou. O nisi Fitugafulu Pule Eria e galulue i totonu o Au Peresitene o Eria.
Taitaiga Faale-Lotoifale
Uarota ma Paranesi. Ua faatulagaina tagata o le Ekalesia i totonu o ni faapotopotoga ia e potopoto soo faatasi mo le faatamaoaigaina faaleagaga ma le vafealoaloai. O faapotopotoga toatele ua ta’ua o uarota. O uarota taitasi e pulefaamalumalu ai se epikopo, e lagolagoina e fesoasoani e toalua.
O aulotu toalaiti e ta’ua o paranesi. O paranesi taitasi e pulefaamalumalu ai se peresitene o le paranesi, e lagolagoina e fesoasoani e toalua. E mafai ona faatuina se paranesi pe afai e lua ni aiga lotu e nonofo i totonu o se eria ma o se tasi o tagata lotu o se uso agavaa e umia le Perisitua Mekisateko po o se ositaulaga agavaa i totonu o le Perisitua Arona. O le au peresitene o se siteki, misiona, po o le itu e faatulagaina ma vaaia le paranesi. O se paranesi e mafai ona faatupulaia ma avea o se uarota pe afai o i ai i totonu o se siteki.
O uarota po o paranesi taitasi e aofia ai se eria ua maioio lelei ona faatuaoi. O faalapotopotoga eseese i totonu o le uarota po o le paranesi, e tofu sao uma i le galuega a le Alii: o vaega a faitaulaga sili; korama a toeaina; o le Aualofa, mo tamaitai e 18 tausaga ma luga atu; korama a le Perisitua Arona, mo alii talavou e 12 i le 17 tausaga; o le polokalama a Tamaitai Talavou mai le 12 i le 17 tausaga; Peraimeri, mo tamaiti e 18 masina e oo i le 11 tausaga; ma le Aoga Sa, mo tagata uma o le Ekalesia mai le 12 tausaga ma luga atu. O nei faalapotopotoga taitasi e faataunuuina ni matafaioi taua i le aoaoina o le talalelei, tuuina atu o auaunaga, ma le lagolagoina o matua i o latou tiute paia e fesoasoani ai i a latou fanau ia liua i le talalelei a Iesu Keriso. O nei foi faalapotopotoga e galulue faatasi e fesoasoani i tagata o le au paia e fetufaai atu le talalelei i isi.
Siteki, Misiona, ma Itu. O le tele o eria ua faatulagaina tuaoi lea e faatu ai le Ekalesia, e vaevaeina i ni siteki. O le upu siteki e sau mai le perofeta o Isaia, o le na valoiaina o le Ekalesia o aso e gata ai o le a faapei o se fale ie, e faamauina e ni siteki (fao) (tagai Isaia 33:20; 54:2). E masani lava e 5 i le 12 uarota ma paranesi i totonu o se siteki. O siteki taitasi e pulefaamalumalu ai se peresitene, e lagolagoina e fesoasoani e toalua. O peresitene o siteki latou te lipoti atu ma maua mai o latou faatonuga mai le Au Peresitene o le Au Fitugafulu po o le Au Peresitene o Eria.
O se misiona o se iunite o le Ekalesia e masani lava ona aofia ai se eria e tele atu nai lo se eria o se siteki. O misiona taitasi e pulefaamalumalu ai se peresitene o le misiona, e lagolagoina e fesoasoani e toalua. O peresitene o Misiona e lipoti sa’o lava i le Au Pulega Aoao.
O se paranesi o se vaega toaitiiti o se uarota, e pei foi o se itu o se vaega itiiti lea o se siteki. O se itu e faatulagaina pe afai e lava le aofai o ni paranesi i totonu o se eria, e faigofie ai fesootaiga ma femalagaiga i fonotaga faaleitu. E tofia se peresitene o le itu e pulefaamalumalu ai, faatasi ai ma le lagolago a fesoasoani e toalua. O le peresitene o le itu e lipoti i le au peresitene o le misiona. E mafai ona faasolo ina avea se itu ma siteki.
Polokalama mo Tagata Nofofua. E toatele tagata o le Ekalesia e lei faaipoipo pe ua tetea foi ma taitoalua, pe nofo toatasi foi ona ua maliu lona toalua. O nei tagata o le au paia, e lua ni vaega e i ai: talavou nofofua matutua (18 tausaga i le 30) ma tagata matutua nofofua (31 tausaga ma luga atu).
E leai se polokalama a le Ekalesia aoao mo talavou matutua nofofua ma tagata matutua nofofua. Ae peitai, a lava le fuainumera o tagata matutua nofofua e nonofo i totonu o se eria, ua faamalosia taitai perisitua o le alalafaga e tofia ni sui o tagata nofofua, e galulue i lalo o la latou taitaiga. O sui o tagata nofofua e fuafuaina gaoioiga e pei o siva, galuega fesoasoani, ma faeasaite. O nei gaoioiga e maua ai e tagata nofofua avanoa e feiloai ma fefaamalosia’i ai le tasi i le isi. O tagata nofofua foi ua fautuaina e fono soo ma o latou taitai perisitua e talanoaina ai o latou manaoga ma o latou avanoa mo le alualu i luma faaleagaga ma auaunaga.