Lotofuatiaifo
O tagata uma ua fananau mai ma le mana e iloa ai le eseesega i le va o le lelei ma le leaga. O lenei malosiaga, ua ta’ua o le lotofuatiaifo, o se faaaliga o le Malamalama o Keriso (tagai Moronae 7:15–19).
O lou lotofuatiaifo o se puipuiga e fesoasoani ia te oe e aloese ai mai tulaga matautia faaleagaga. Pe a e usiusitai i poloaiga ma faia filifiliga amiotonu, o le a e maua lagona filemu.
Pe a e agasala, e te lagona le faanoanoa ma le ta’usalaina, e pei lava ona e lagona le tiga faaletino pe a e manua. O se tali atu faanatura lea o lou lotofuatiaifo i le agasala, ma e mafai ona taitaiina atu ai oe i le salamo.
O le salamo ma le faamagaloga e faafouina ai ou lagona filemu. I se isi itu, afai e te le amanaiaina ou faalogona ma e lē salamo, o le a faaleagaina lou loto fuatiaifo e pei lava ua “faamuina i se uamea aasa ” (1 Timoteo 4:2).
Aoao e mulimuli i lou lotofuatiaifo. O se vaega taua tele lenei o le faaaogaina o lou saolotoga. O le tele ona e mulimuli i lou lotofuatiaifo, o le faateleina foi lea o lona malosi. O se lotofuatiaifo ola o se faailoga lea o se agaga maloloina.