Foafoaga

I lalo o le taitaiga a le Tama Faalelagi, na foafoa ai e Iesu Keriso le lagi ma le lalolagi (tagai Mosaea 3:8; Mose 2:1). Mai tusitusiga paia na faaalia mai ai e ala i le Perofeta o Iosefa Samita, ua tatou iloa ai i le galuega o le Foafoaga, na faatulagaina e le Alii elemene ua uma ona i ai (tagai Aperaamo 3:24). Na te le i foafoaina le lalolagi “mai le leai o se mea” e pei ona talitonu ai nisi tagata.

Ua aoao mai foi tusitusiga paia o Atamu o le “uluai tagata o tagata uma“ (Mose 1:34). Na fausia e le Atua Atamu ma Eva i Lona faatusa ma le faatusa o Lona Atalii e Toatasi na Fanaua (tagai Mose 2:26–27).

O le foafoaga o se vaega autu o le ata o le faaolataga a le Tama Faalelagi. Ua tuuina mai ai ia i tatou uma taitoatasi le avanoa e o mai ai i le lalolagi, e maua ai o tatou tino faaletino ma faaaogaina ai lo tatou saolotoga. I le Fono a Atua i le muai olaga, sa faia ai le faasilasilaga lenei: “Ina tatou o ifo ia i lalo, aua o loo avanoa lava, ma tatou ave nei mea ma tatou faia ai se lalolagi e nonofo ai i latou nei; ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua” (Aperaamo 3:24–25).

O oe o se atalii agaga o le Atua, ma o lou tino na fausia i Lona faatusa. Ina ia faaali atu lou agaga faafetai mo nei faamanuiaga, e mafai ona e tausia lou tino e ala i le usiusitai i le Upu o le Poto ma isi poloaiga e faatatau i lou soifua maloloina faaleagaga ma le faaletino (tagai MFF 89; tagai foi MFF 88:124). E mafai foi ona e faaaloalo i isi tagata o ni fanau a le Atua.

I le avea ai ma tagata faamanuiaina i matagofie uma o le foafoaga, e mafai ona e tausia lelei le lalolagi ma fesoasoani e puipuia mo tupulaga o le lumanai.