Faatuatua
Sa aoao mai le Aposetolo o Paulo “A o le faatuatua o le faalagolago lea i mea ua faamoemoe i ai, o le mautinoa lea o mea e le o vaaia“ (Eperu 11:1; tagai Faaliliuga a Iosefa Samita, Eperu 11:1). Na tauina mai foi e Alema se faamatalaga faapea: “afai ua ia te outou le faatuatua, tou te faamoemoe i mea e le o vaaia, a ua moni ia” (Alema 32:21).
O le faatuatua o se mataupu faavae o galuega ma le mana. Soo se taimi e te galue agai ai i se sini taua, e te faaaogaina le faatuatua. E te faaalia lou faamoemoe mo se mea e le mafai ona e vaai i ai.
Faatuatua i le Alii o Iesu Keriso
Ina ia mafai e lou faatuatua ona taitai atu oe i le faaolataga, e tatau ona taulai atu i le Alii o Iesu Keriso (tagai Galuega 4:10–12; Mosaea 3:17; Moronae 7:24–26; Mataupu Faavae o le Faatuatua 1:4). E mafai ona e faaaogaina le faatuatua ia Keriso pe a maua le faamautinoaga o loo i ai o Ia, o se manatu sa’o o Lona uiga, ma se malamalamaaga o loo e taumafai e ola e tusa ai ma Lona finagalo.
O le i ai o le faatuatua i a Iesu Keriso o lona uiga o le faalagolago atoa lea ia te Ia—faatuatua i Lona mana e lē i’u, atamai, ma le alofa. E aofia ai le talitonu i Ana aoaoga. O lona uiga o le talitonu e ui lava e te le malamalama i mea uma, Na te silafia. Ia manatua ona sa Ia tauaveina ou tiga uma, puapuaga, ma vaivaiga, Na te silafia le ala e fesoasoani ai ia te oe ina ia e manumalo mai ou faafitauli i aso taitasi (tagai Alema 7:11–12; MFF 122:8). Ua Ia “manumalo i le lalolagi“ (Ioane 16:33) ma saunia le ala mo oe e maua ai le ola faavavau. E saunia o Ia i soo se taimi e fesoasoani mai ia te oe e pei ona e manatuaina lana olega: “Ia faalagolago ia te au i manatunatuga uma; aua le masalosalo, aua le fefe” (MFF 6:36).
Ola i le Faatuatua
O le faatuatua e sili atu nai lo na o se talitonuga e aunoa ma galuega. E te faaalia lou faatuatua e ala i au taga—i le ala e te soifua ai.
Na folafola mai e le Faaola, “Afai tou te faatuatua ia te au, e ia te outou le mana e fai mea uma e tatau ia te au” (Moronae 7:33). O le faatuatua ia Iesu Keriso e mafai ona faaosofiaina ai oe e te mulimuli atu i Ana faataitaiga atoatoa (tagai Ioane 14:12). O lou faatuatua e mafai ona taitaiina atu ai oe i le faia o galuega lelei, usiusitai i poloaiga, ma salamo mai au agasala (tagai Iakopo 2:18; 1 Nifae 3:7; Alema 34:17). O lou faatuatua e mafai ona fesoasoani ia te oe e faatoilaloina tofotofoga. Na apoapoai atu Alema i lona atalii o Helamana, “Ia aoao atu ia te i latou e tetee atu i tofotofoga uma a le tiapolo, i le faatuatua i le Alii o Iesu Keriso” (Alema 37:33).
O le a galueaiina e le Alii ni vavega tetele i lou olaga e tusa ai ma lou faatuatua (tagai 2 Nifae 26:13). O le faatuatua ia Iesu Keriso e fesoasoani ia te oe ia maua faamalologa faaleagaga ma le faaletino e ala i Lana Togiola (tagai 3 Nifae 9:13–14). Pe a oo mai taimi o tofotofoga, e mafai e le faatuatua ona tuuina atu ia te oe le malosi e fetaomi ai i luma ma faafetaiaia ma le lototoa ou faigata. E tusa lava pe foliga nenefu mai le lumanai, o lou faatuatua i le Faaola e mafai ona tuuina atu ia te oe le filemu (tagai Roma 5:1; Helamana 5:47).
Faateleina Lou Faatuatua
O le faatuatua o se meaalofa mai le Atua, ae e tatau ona faafaileleina lou faatuatua ina ia faamalosia ai pea. O le faatuatua e faatusaina i le musele o lou lima. Afai e faaaoga pe faia foi faamalositino, o le a tupu le malosi. Afai e asoa pe sisi lou lima, o le a vaivai.
E mafai ona e faafaileleina le meaalofa o le faatuatua e ala i le tatalo i le Tama Faalelagi i le suafa o Iesu Keriso. Ao e faaali atu lou agaga faafetai i lou Tama, ma a o e aioi atu ia te Ia mo faamanuiaga o loo e manaomia ma manaomia foi e isi, o le a e latalata atu ia te Ia. O le a e latalata atu i le Faaola, o lana Togiola ua mafai ai ona e aioi atu mo le alofa tunoa (tagai Alema 33:11). O le a e talisapaia foi le taitaiga filemu a le Agaga Paia.
E mafai ona e faamalosia lou faatuatua e ala i le tausia o poloaiga. E pei lava o faamanuiaga uma mai le Atua, o le faatuatua e maua mai ma faateleina e ala i le usiusitai patino ma galuega amiotonu. Afai e te manao e faatamaoaigaina lou faatuatua i le tulaga e aupito sili ona maualuga, e tatau ona e tausia feagaiga ua e osia.
E mafai foi ona e atiina ae lou faatuatua e ala i le suesueina o tusitusiga paia ma saunoaga a Perofeta o aso e gata ai. Na aoao mai le perofeta o Alema o le upu a le Atua e fesoasoani e faamalosia le faatuatua. I le faatusatusaina o le faatuatua i le fatu, na ia faapea mai ai o le “manao i le fia faatuatua” e mafai ai ona e “tuu i lenei manao” mo le upu ina ia “galue i totonu ia te [oe].“ Ma o le a e lagona o le upu e lelei, aua o le a amata ona faateleina ai lou loto; ma faamalamalamaina ai lou mafaufau. O lenei mea o le a faamalosia ai lou faatuatua. Ao e faaauau pea ona faafaileleina le upu i lou loto i le “filiga foi, ma lo outou faatuatua, ma lo outou onosai e tausi ai le upu, ina ia mau aa i totonu ia te outou, faauta, e avea ai ma laau e tupu ae i le ola faavavau” (Tagai Alema 32:26–43.)