Alofa Tunoa
O le upu alofa tunoa, e pei ona faaaogaina i totonu o tusitusiga paia e faasino tonu lava i le fesoasoaniga faalelagi ma le malosi tatou te maua e ala i le Togiola a le Alii o Iesu Keriso. Na aoao mai le Aposetolo o Paulo e ao ona tatou “tuputupu i le alofa tunoa ma le poto i lo tatou Alii o lo tatou Faaola lea o Iesu Keriso“ (2 Peteru 3:18).
Faaolataga e ala i le Alofa Tunoa
Ona o le Pau, o tagata uma lava o le a oo i ai le oti faaletino. O le alofa tunoa, e ala i le taulaga togiola a le Faaola, o le a toetutu ai tagata uma ma maua le tino ola pea (tagai 2 Nifae 9:6–13). Ae peitai a na o le toetu lava ia, e le mafai ona faaagavaa ai i tatou mo le ola faavavau i le afioaga o le Atua. O a tatou agasala ua lē mama ai i tatou ma lē mafai ai ona tatou mau i le afioaga o le Atua, ma e tatou te manaomia Lona alofa tunoa e faamama ma faaatoatoa ai i tatou “pe a uma ona faia mea uma tatou te mafaia“ (2 Nifae 25:23).
O le fasi fuaitau o “mea uma tatou te mafaia” o loo aoao mai ai, e manaomia i la tatou vaega le taumafai, ina ia maua ai le atoatoaga o le alofa tunoa o le Alii ma maua ai le agavaa e mau faatasi ma Ia. Na poloai mai le Alii ia i tatou e usiusitai i Lana talalelei, e aofia ai le faatuatua ia te Ia, salamo i a tatou agasala, papatiso, mauaina o le meaalofa a le Agaga Paia, ma tumau e oo i le iuga (tagai Ioane 3:3–5; 3 Nifae 27:16–20; Mataupu Faavae o le Faatuatua 1:3–4). Na tusia e le perofeta o Moronae e uiga i le alofa tunoa tatou te mauaina pe a tatou o mai i le Faaola ma usitai i Ana aoaoga:
“Ioe, o mai ia ia Keriso, ina ia faaatoatoaina outou e ia, ma ia teena e outou le amioletonu uma, ma alolofa atu i le Atua ma o outou loto atoa, ma o outou manatu ma lo outou malosi uma, ona lava ai lea o lona alofa tunoa mo outou, ina ia atoatoa ai outou ia Keriso i lona alofa tunoa; afai foi ua atoatoa outou ia Keriso i le alofa tunoa o le Atua, tou te le mafai lava ona faafitia le mana o le Atua
“Ma le tasi, afai ua atoatoa outou ia Keriso i le alofa o le Atua, ae le faafitia lona mana, ona faapaiaina ai lea outou ia Keriso i le alofa tunoa o le Atua ona o le faamaligiina o le toto o Keriso, o lo le feagaiga lea a le Tama, e iu i le faamagaloina o a outou agasala, ina ia liua outou ina ia paia ma le lē pona” (Moronae 10:32–33).
Mauaina o le Alofa Tunoa i Lou Olaga Atoa
E faaopoopo atu i le manaomia o le alofa tunoa mo lou faaolataga tupito, e te manaomia foi lenei mana faaola i aso uma o lou olaga. A e faalatalata atili atu i lou Tama Faalelagi i le maelega, faamaualalo, ma le agamalu, o le a Ia faagaeetia ma faamalosia oe e ala i Lona alofa tunoa (tagai Faataoto 3:34; 1 Peteru 5:5; MFF 88:78; 106:7–8). O le faalagolago i Lona alofa tunoa e faatagaina ai oe e te alualu i luma ma tuputupu ae i le amiotonu. O Iesu Lava Ia “na le maua i le atoatoaga muamua, a e na faia pea lea amioga mama i lea amioga mama, seia maua e ia le atoatoaga“ (MFF 93:13). O le alofa tunoa e mafai ai e oe ona e fesoasoani i le atiinaeina o le malo o le Atua, o se auaunaga e le mafai ona e tuuina atu e ala i lou malosi po o isi gaoioiga e aunoa ma le alofa tunoa (tagai Ioane 15:5; Filipi 4:13; Eperu 12:28; Iakopo 4:6–7).
Pe afai ae oo ia te oe le faavaivai pe lagona le matuai vaivai e faaauau ona ola i le talalelei, ia manatua le malosi e mafai ona e mauaina e ala i le mana faaola o le alofa tunoa. E mafai ona e maua le faamafanafanaga ma le faamautinoaga i afioga nei a le Alii: “Ma ua lava lo’u alofa tunoa i tagata uma o e faamaualaloina i latou lava i o’u luma; aua afai latou te faamaualaloina i latou lava i o’u luma ma faatuatua ia te au, ona ou faia lea o mea vaivai ma mea malolosi ia te i latou” (Eteru 12:27).