Lotomaualalo

O le lotomaualalo o le iloa lea ma le agaga faafetai lou faalagolago i le Alii—o le malamalama lea o loo i ai ia te oe se tulaga manaomia faifai pea o Lana fesoasoani. O le lotomaualalo o le iloa lea o au taleni ma tomai o ni meaalofa mai le Atua. E le o se faailoga o le vaivai, palaai, po o le fefe; o se faailoga o lou iloa o le mea e taoto ai lou malosiaga atoa. E mafai ona e lotomaualalo ma lē fefe. E mafai ona e lotomaualalo ma lototele.

O Iesu Keriso lo tatou faataitaiga sili o le lotomaualalo. I le taimi o Lana misiona i le olaga nei, e masani lava ona Ia faailoa o Lona malosi e maua mai ona o Lona faalagolago i Lona Tama. Na ia fetalai: “Ou te le mafaia ona fai o se mea e tasi, na o au… . aua ou te le usiusitai i lo’u lava loto, a o le finagalo o le Tama, o lē na auina mai au” (Ioane 5:30).

O le a faamalosia oe e le Alii pe a e faamaualaloina oe lava i ona Luma. Na aoao mai Iakopo: “E tetee atu le Atua i e faamaualuga, ae foai mai le alofa tunoa i e faamaulalo… ina faamaulalo ia i luma o le Alii, ona faamaualugaina lea o outou e Ia“ (Iakopo 4:6, 10).

Mau Faaopoopo: Mataio 18:4; 23:12; 26:39; Luka 22:42; 1 Peteru 5:5–6; Mosaea 4:11–12; 15:6–7; Alema 5:27–28; Helamana 3:33–35; Eteru 12:27; MFF 12:8; 67:10; 112:10; 136:32—33