Usiusitai
I le muai olaga, sa pulefaamalumalu ai le Tama Faalelagi i se Fono sili i le Lagi. O iina sa tatou iloa ai Lana fuafuaga mo lo tatou faaolataga, lea e aofia ai se taimi o tofotofoga i luga o le fogaeleele: “Ma tatou faia ai se lalolagi e nonofo ai i latou nei; ma o le a tatou faataitai ai i latou, ia iloa ai, pe latou te faia mea uma e poloaiina ai i latou e le Alii lo latou Atua” (Aperaamo 3:24–25). O se tasi o mafuaaga ua e i ai iinei i le lalolagi o le faailoa atu lea o lou naunautaiga e usiusitai i poloaiga a le Tama Faalelagi.
E toatele tagata e lagona e faapea o se avega mamafa ia poloaiga ma ua faatapulaa ai le saolotoga ma le tuputupu ae faaletagata lava ia. Ae peitai na aoao mai le Faaola e faapea o le saolotoga moni e sau mai le mulimuli atu lea ia te Ia: “Afai tou te tumau pea i la’u mataupu, o o’u soo moni outou. E iloa foi e outou le mea moni, e tuu sa’oloto foi outou e le upu moni” (Ioane 8:31–32). Ua tuuina mai e le Atua ia poloaiga mo lou lelei. O faatonuga alofa mo lou fiafia ma lou lelei faaletino ma faaleagaga.
Na aoao mai perofeta Iosefa Samita e faapea o le usiusitai i poloaiga e maua ai faamanuiaga mai le Atua. Na ia saunoa mai: “O loo i ai le tulafono, na faavaeina e le matatalaina i le lagi a o le’i faavaeina lenei lalolagi, e autu ai faamanuiaga uma lavaa tatou maua fo’i so o se faamanuiaga mai le Atua, e maua ai i le usiusita’i i le tulafono lea e autu ai” (MFF 130:20–21). Na aoao mai foi e le Tupu o Peniamina lenei mataupu faavae. “O lo’u manao, ia outou mafaufau i le manuia ma le fiafia o i latou o e tausi i poloaiga a le Atua,” na ia apoapoai mai ai. “Aua, faauta, ua manuia i latou i mea uma, i le faaletino, atoa ma le faaleagaga, afai foi ua latou tutumau e oo i le iuga, e talia i latou i le lagi, ina ia latou mau faatasi ma le Atua i le fiafia e le iu. E! ia manatua, ia manatua lava, ua moni lava nei mea, aua na fetalaia mai e le Alii le Atua” (Mosaea 2:41).
O lo tatou usiusitai i poloaiga o se faailoga lea o lo tatou alolofa mo le Tama Faalelagi ma Iesu Keriso. Na fetalai mai le Faaola, “Afai tou te alofa mai ia te au, ia outou tausi mai i a’u poloaiga” (Ioane 14:15). Na ia toe fetalai mulimuli mai: “Afai tou te tausia a’u poloaiga, ona tumau lea o outou i lo’u alofa, pei ona ou tausia poloaiga a lo’u Tama, ma ou tumau i lona alofa” (Ioane 15:10).