Faamanuiaga Faapeteriaka

O faamanuiaga faapeteriaka e tuuina atu i tagata agavaa o le Ekalesia e peteriaka ua faauuina. O lou faamanuiaga faapeteriaka e faailoa atu ai lou tupuaga i le aiga o Isaraelu ma o loo i ai foi fautuaga patino mai le Alii ia te oe.

Ao e suesue i lou faamanuiaga faapeteriaka ma mulimuli i fautuaga o loo i ai, o le a tuuina mai ai le taitaiga, faamafanafanaga, ma le puipuiga. Ina ia e iloa pe faapefea ona maua se faamanuiaga faapeteriaka, talanoa i lou epikopo po o lou peresitene o le paranesi.

Faailoaina mai o le Tupuaga

O lou faamanuiaga faapeteriaka e aofia ai le faailoaina mai o lou tupuaga, e ta’u mai ai o oe o se tasi o le aiga o Isaraelu—o se suli o Aperaamo, e te sau mai se ituaiga o Iakopo. O le toatele o le Au Paia o Aso e Gata Ai, o le ituaiga o Efaraima, le ituaiga na tuuina atu i ai le uluai tiutetauave e taitaiina le galuega a le Alii i aso e gata ai.

E talu ai ona o i tatou taitoatasi e tele ituaiga alatoto o loo i totonu o i tatou, o le mafuaaga lena e ono mafai ai ona i ai ni tagata se toalua mai le aiga e tasi e eseese ituaiga o Isaraelu e tupuga mai ai.

E le afaina pe o lou tupuaga i le aiga o Isaraelu e ala mai i le toto pe o se tamafai. I le avea ai ma se tagata o le Ekalesia, ua faitauina oe o se tasi e tupuga mai ia Aperaamo ma o se suli foi mo folafolaga ma faamanuiaga uma o loo i ai i le feagaiga FaaAperaamo (tagai “Feagaiga FaaAperaamo,” itulau 68–69).

Aoao mai i Lou Faamanuiaga Faapeteriaka

A maua lou faamanuiaga faapeteriaka, e tatau ona e faitauina e le aunoa ma le agaga maulalo, ma le agaga tatalo. O se faaaliga patino mai lou Tama Faalelagi, o lē ua silafia ou malosiaga, vaivaiga, ma agavaa e faavavau. O lou faamanuiaga faapeteriaka, o le a Ia fesoasoani ai ia te oe e aoaoina mea o loo Ia faamoemoeina mai ia te oe. O lou faamanuiaga e mafai ona aofia ai folafolaga, fautuaga, ma lapataiga. Ao faagasolo pea taimi, o le a e iloaina ai le mana o faaaliga o loo i ai.

Ao e mulimuli i fautuaga o loo i lou faamanuiaga, o le a itiiti lava se avanoa e faaono pau ma taitaiseseina ai. Afai e te le mulimuli i fautuaga, o le a le mafai ona e mauaina faamanuiaga ua folafolaina.

E ui o lou faamanuiaga faapeteriaka o loo i ai fautuaga ma folafolaga musuia, e le tatau ona e manatu o le a taliina ai au fesili uma, pe auiliiliina mai ai foi mea uma o le a tutupu i lou olaga. Afai e le o ta’uina mai e lou faamanuiaga se vaega taua, e pei o se misiona po o le faaipoipoga, aua nei e manatu ai o le a e le maua lena avanoa.

Aua foi nei e manatu o mea uma o loo ta’uina mai i lou faamanuiaga faapeteriaka o le a faataunuuina uma i lenei olaga. O se faamanuiaga faapeteriaka e faavavau, ma o ona folafolaga e mafai ona oo atu i le faavavau. Ia mautinoa pe a e agavaa, o le a faataunuuina folafolaga uma i le taimi ua tatau ai i le Alii. O folafolaga o le a le taunuu i lenei olaga, o le a faataunuuina i le isi olaga.

O lou faamanuiaga faapeteriaka e paia ma e mo oe lava ia. E mafai ona e fetufaai atu i tagata o lou lava aiga, peitai e le tatau ona e faitauina atu leotele i luma o se faalapotopotoga pe faatagaina foi isi latou te faitauina ma faamatala lona uiga. E oo lava i lou peteriaka po o lou epikopo po o le peresitene o le paranesi, e lē tatau ona faamatalaina lona uiga.

Ia teu i lou loto upu taua o loo i totonu o lou faamanuiaga faapeteriaka. Manatunatu loloto e uiga i ai ma ola ai ina ia e agavaa mo le mauaina o faamanuiaga folafolaina i lenei olaga ma le olaga a sau.