Osigataulaga
O le osigataulaga o le ofoina atu lea o se mea e taua ia i tatou mo le lelei o se isi mea e sili atu lona taua. I le avea ai ma Au Paia o Aso e Gata Ai, ua ia i tatou le avanoa o le ositaulagaina lea o mea o le lalolagi mo le Alii ma Lona malo. E tatau ona lotomalilie tagata o le Ekalesia a Iesu Keriso o le Au Paia o Aso e Gata Ai e faia soo se osigataulaga e manaomia e le Alii. Pe ana le manaomia ona tatou faia ni osigataulaga, o le a le mafai lava ona tatou atiina ae le faatuatua lea e manaomia mo lo tatou faaolataga e faavavau.
O le Togiola a Iesu Keriso o le osigataulaga sili ma faavavau lea o loo i le ogatotonugalemu o le talalelei (tagai Alema 34:8–16). Ao le i faataunuuina e le Faaola le Togiola, sa taulagaina e Lona nuu o le feagaiga ia manu, o se faatusa o Lana taulaga. O lea masani na fesoasoani latou te tepa taulai atu ai i luma i le Togiola. (tagai Mose 5:4–8). O le poloaiga i le taulagaina o manu na faaiuina i le maliu o Iesu Keriso. I le Ekalesia i le taimi nei, ua tatou aai ma feinu i le faamanatuga e faamanatu ai le taulaga togiola a le Faaola.
E le gata i le manatuaina o le taulaga togiola a Iesu Keriso, ae tatou te tuuina atu foi la tatou lava osigataulaga: o se loto momomo ma le agaga salamo. Na fetalai le Faaola: “Tou te le toe osia mai ia te au le taulaga o le faamaligiina o le toto, ioe, e mavae atu a outou taulaga … . Ia outou fai ma taulaga ia te au le loto momomo ma le agaga salamo. Ai se sau foi ia te au ma le loto momomo ma le agaga salamo, ou te papatisoina i latou i le afi ma le Agaga Paia” (3 Nifae 9:19–20).
O le mauaina o le loto momomo ma le agaga salamo, o le lotomaualalo lea ma gauai atu i le finagalo o le Atua ma fautuaga a i latou ua Ia valaauina e taitaiina Lana Ekalesia. O le isi foi ona uiga o le mauaina lea o se lagona loloto o le faanoanoa mo agasala ma se manao faamaoni e salamo. Na toe faamanatu mai e le perofeta o Liae le taua o le tuuina atu o lea osigataulaga: “Faauta, e avae e [Keriso] o ia lava e fai ma taulaga ona o agasala, e faaatoatoa ai iuga o le tulafono ia te i latou uma o e o i ai le loto momomo ma le agaga salamo, a e leai se tasi e mafaia ona faaatoatoaina ai iuga o le tulafono” (2 Nifae 2:7). Afai tatou te le avae le osigataulaga o se loto momomo ma se agaga salamo, e le mafai ona tatou maua le atoatoa o faamanuiaga e maua e ala mai i le Togiola.
Pe afai e te lotomalie e ositaulaga e pei ona poloai mai ai le Alii, o le a taliaina oe e Ia. Na ia aoao mai: “O i latou uma … o e iloa ua faamaoni o latou loto ma faamomomoina, ma ua salamo o latou agaga, ma ua loto malilie e tausia a latou feagaiga i le taulaga—ioe, o taulaga, uma lava o le a poloaiina e au, le Alii—e talia i latou e au” (MFF 97:8). O le i ai o se vaaiga mo le faavavau, e mafai ai ona e iloa o le lafoai o mea o le lalolagi, e lē o se osigataulaga . O faamanuiaga e te maua, e sili atu nai lo se isi lava mea e te lafoa’ia.