1 Kua raveia i teia rā te uipaanga a te au konitara a te rua ngauru ma ā taunga teitei ki roto i te ngutuare o Iosepha Timeti, Tamaiti, na roto i te eeuanga, e kua akatumu i te akamou i te pupu konitara teitei o te akonoanga a te Mesia, koia oki, e tai ngauru ma rua taunga teitei, e e tai me kore ra e toru peresideni, ko te ka inangaroia.

2 Kua akatakaia te pupu konitara teitei na roto i te eeuanga no te akakoroanga o te akatikatikaanga i te au manamanata puapinga te ka tupu mai i roto i te akonoanga, te ka kore e rauka i te akaauia e te akonoanga, me kore ra e te pupu konitara a te au episekopo, ei marekaanga no tei patoi mai.

3 Ko Iosepha Timeti, Tamaiti, Sidney Rigdon e Frederick G. Williams tei arikiia ei au peresideni e te reo o te pupu konitara; e ko Iosepha Timeti, Metua, ko John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, e Luke Johnson te au taunga teitei, tei ikiia ei pupu konitara tiaki i te akonoanga, e te reo taokotai o te pupu konitara.

4 Kua uiia atu ki te au konitara i taikuia i runga ake e me kua ariki ratou i to ratou au ikiangaia, e me ka rave ratou i teia taonga kia tau ki te ture o te rangi, e kua pau pouroa mai ratou e kua ariki ratou i to ratou au akatakaanga, e ka akatupu ratou i te angaanga a to ratou au taonga kia tau ki te aroa ua o te Atua tei orongaia mai kia ratou.

5 Ko te numero o te katoatoaanga o te konitara, tei vouti mai na roto i te ingoa e no te akonoanga i te orongaanga mai i te ingoa o te au konitara tei taikuia ake nei i runga e ā ngauru ma toru, teia i reira: e iva taunga teitei, e tai ngauru ma itu ereta, e ā taunga, e tai ngauru ma toru mema.

6 Kua voutiia: kare e mana o te pupu konitara teitei kia rave me kare e toko itu konitara mei tei taikuia i runga ake, me kore ra kua tae mai ta ratou aronga ou ei mono mai ia ratou.

7 E mana to teia toko itu kia iki i tetai au taunga teitei, ta ratou ka manako e kua tau kia mono i te ngai o te au konitara i akatau.

8 Kua voutiia: me e ngai vā tetai tei tupu na roto i te mate, te akaatea ke ia anga mei tona taonga no te aati ture, me kore ra kua akaatea mei roto mai i teia kavamani a te akonoanga, i tetai uatu o te au konitara mei tei taikuia i runga ake, ka monoia te reira na roto i te ikianga a te peresideni, me kore ra te au peresideni, e ka turuia ratou e te reo o te pupu katoatoa o te konitara o te au taunga teitei, tei kapikiia no te reira angaanga, kia rave na roto i te ingoa o te akonoanga.

9 Ko te peresideni o te akonoanga, koia katoa oki te peresideni o te pupu konitara, e kua ikiia aia na roto i te eeuanga, e kua arikiia aia i roto i tana akatereanga e te reo o te akonoanga.

10 E kia tau oki ki te turanga o tona taonga kia akaaere aia ki rungaʼo i te pupu konitara o te akonoanga; e tikaanga oki tona kia tauturuia e tetai nga peresideni tokorua, tei ikiia mai mei te tu rai i ikiiaʼi aia.

11 Me kua akatau e tai me kore ra nga rua tei ikiia mai ei tauturu iaia, e mana tona kia akaaere ki rungaʼo i te pupu konitara ma te kore e tauturu; e mei te mea oki e akatau aia, e mana to nga peresideni i te akaaere nona, me ko raua ravarai me kore ra ko tetai ia raua.

12 Me akamouia ake tetai pupu konitara teitei o te akonoanga a te Mesia, kia tau ki te akaraanga i runga ake, e angaanga tau i reira na te konitara tai ngauru ma rua kia tuku kelero i te numero, kia kiteaʼi e koai i te tai ngauru ma rua te ka tuatua mua, ka akamata mai i te numero tai e tae uatu ki te ngauru ma rua.

13 Me kapiti ake teia pupu konitara no te rave i tetai uatu akavaanga, ka akarakara te tino ngauru ma rua konitara me e mea ngata me kare; me kare rai, e tokorua ua nga konitara te ka tuatua, kia tau ki tei tataia i runga.

14 I na ra mei te mea oki e ka ngata, ka ikiia i reira e ā; me ka maata atu te ngata, e ono; auraka ra kia maata atu i te ono kia ikiia ei tuatua.

15 E tikaanga to tei akaapaia ki tetai apa o te au konitara, ei akara i te taukore e te tika kore o te akavaanga.

16 E ko te au konitara tei ikiia ei tuatua ki mua i te pupu konitara, na ratou e akaari mai i te manamanata, i muri ake i te akarakaraangaia te tika, ma te māramarama tikai ki mua i te pupu konitara; e kia tuatua te au tangata ma te tau e te tika.

17 Ko te au konitara te ka uuti mai i te au numero 2, 4, 6, 8, 10, 12, ko ratou te ka tu no tei akaapaia, ei kopae i te au tuatua akakino e te tau kore.

18 I roto i tetai uatu kimianga pekapeka, e tikaanga to te tangata nana te akaapaanga e te tangata tei akaapaia kia tuatua no raua uaorai ki mua i te pupu konitara, i muri ake i te rongoangaia o te au manako e i te otianga te au konitara tei ikiia kia tuatua no teia pekapeka.

19 Kia oti te au tuatua i te akarongoia, kia oti te au konitara, te tangata nana i akaapa atu e tei akaapaia i te tuatua, ka tuku i reira te peresideni i tana tika kia tau ki tana i mārama no runga i teia pekapeka, e ka kapiki katoa aia ki te tino ngauru ma rua konitara kia turu mai i te reira na roto i to ratou voutianga.

20 I na ra mei te mea oki te au konitara toe, ko tei kore i tuatua, me kore ra tetai uatu ia ratou, i muri ake i to ratou akarongoanga ki te au tika e te au patianga, e kua kitea e ratou tetai tarevakē i te tukuanga tika a te peresideni, e tikaanga to ratou kia patoi, e kia kimi akaou ia te reira pekapeka.

21 E mei te mea e, i muri ake i te akarongo akaou angaia o te manamanata, e e akamāramaanga ou tetai tei kitea mai, ka taui i reira te tukuanga tika.

22 I na ra mei te mea ra e kare e manako ke e orongaia mai, ka vai rai te tukuanga tika mua, ka mana i reira te maataanga o te au konitara kia iki i te reira.

23 Mei te mea e ka ngata no runga i te apiianga me kore ra te turanga, me kare i rava te tataanga kia mārama teia pekapeka ki te au manako o te pupu konitara, ka pati i reira te peresideni kia rauka mai ta te Atu tuatua kia ratou na roto i te eeuanga.

24 Me aere atu te au taunga teitei ki tetai enua, e mana to ratou i te kapiki e te akatumu i tetai pupu konitara mei tei raveia i mua ake, ei akatika i te au pekapeka, me ka inangaro nga tua e rua, me kore ra kia pati tetai ia raua.

25 E mana to taua pupu konitara ra o te au taunga teitei kia iki i tetai o ratou ei akaaere i rungaʼo i taua pupu ou no te reira tuatau.

26 E angaanga teia na taua pupu konitara kia tuku viviki atu i tetai kapi o ta ratou au angaanga, ma te katoaanga o ta ratou tika tei tukua, ki te pupu konitara teitei o te nooanga o te Ruru Peresideni Mua o te Akonoanga.

27 Me kare nga tua ravarai, me kore ra kare tetai ia raua e mareka i te tukuanga tika a taua pupu konitara ra, ka rauka ia raua i te pati akaou atu ki te pupu konitara teitei o te nooanga o te Ruru Peresideni Mua o te Akonoanga, e kia akarongo akaou ia te pekapeka, e kia akaaereia kia tau ki te akaraanga mua tei tataia, mei te mea e kare e tukuanga tika i raveia na.

28 Kia kapiki ua ia teia pupu konitara o te au taunga teitei i vao mai, me e au pekapeka rave ngata tetai no te akonoanga; auraka teia pupu konitara kia kapikiia no tetai manamanata rikiriki e te noanoa.

29 E mana to teia au taunga teitei e teretere nei kia tuatua, me e puapinga tetai kia kapikiia teia pupu konitara me kare.

30 E tuke maata tei rotopu i te pupu konitara teitei me kore ra te au taunga teitei i vao mai, ki to te konitara teitei e teretere ra o te tino ngauru ma rua aposetolo, i roto i to ratou au tukuanga tika.

31 Mei roto mai i te tukuanga tika a te mea mua ka rauka kia kimi akaou ia; i na ra ko te tukuanga tika a te rua kare e rauka.

32 Ka rauka ra te rua kia ui akaou ia atu e te au akaaere maata anake o te akonoanga, me e aatianga ture tetai i raveia.

33 Kua ikiia: ko te peresideni, me kore ra te au peresideni o te nooanga o te Ruru Peresideni Mua o te Akonoanga kia akara ki te pekapeka te ka apai akaou ia mai, me ka tau ainei kia kimi akaou ia, i muri ake i te akara matatio angaia o te patianga e te au tika e te au tuatua te ka aru mai.

34 Ei reira te tino ngauru ma rua konitara i tuku kelero ei, kia kiteaia e koai ia ratou te ka tuatua mua, e teia tei rauka mai, ko Oliver Cowdery te mua, ko Joseph Coe te rua, ko Samuel H. Smith te toru, ko Luke Johnson te ā, ko John S. Carter te rima, ko Sylvester Smith te ono, ko John Johnson te itu, ko Orson Hyde te varu, ko Jared Carter te iva, ko Iosepha Timeti, Metua, te ngauru, ko John Smith te ngauru ma tai, e te ngauru ma rua ko Martin Harris.Kia oti te pure kua akamutu te uipaanga.