1 E rua kautaunga i roto i te akonoanga, koia oki ko to Melekizedeka e to Aarona, kapiti katoa mai te Kautunga o te ngati Levi.

2 Ko te tumu i tuatuaiaʼi te mua e ko te Kautaunga o Melekizedeka, no te mea ko Melekizedeka, e taunga teitei maata aia.

3 I mua i tona rā kua tuatuaia e te Kautunga Tapu, i Raro Ake i te Akanooanga a te Tamaiti a te Atua.

4 I na ra, kia akangateitei, me kore ra kia akatapuia te ingoa o Tei Vai Teitei, e kia kore e tuatua putuputu ia tona ingoa, kua kapiki i reira ratou, ko te akonoanga i te tuatau taito ra, i taua kautaunga kia Melekizedeka, me kore ra te Kautaunga o Melekizedeka.

5 Ko tetai au akaaere ke mai me kore ra te au taonga i roto i te akonoanga, e au atava ïa no teia kautaunga.

6 E rua oki tuanga me kore ra upoko maata—ko tetai ko te Kautaunga o Melekizedeka, e ko tetai ko te Kautaunga o Aarona, me kore ra o te ngati Levi.

7 Ko te taonga ereta no roto mai te reira i te kautaunga o Melekizedeka.

8 Tei te Kautaunga o Melekizedeka te mou i te tikaanga o te ruru peresideni, e tei aia te mana e te tikaanga ki rungaʼo i te au taonga katoatoa i roto i te akonoanga i te au uki katoatoa o te ao nei, kia angaanga i te au mea i te pae vaerua.

9 Ko te Ruru Peresideni o te Kautaunga Teitei, o te akanooanga o Melekizedeka, tei a ratou te tikaanga kia akaaere i te au taonga katoatoa i roto i te akonoanga.

10 E tikaanga to te au taunga teitei i raro ake i te akanooanga o te Kautaunga o Melekizedeka, kia angaanga i roto i to ratou uaorai turanga, i raro ake i te akaaereanga a te ruru peresideni, no te raveraveanga i te au mea i te pae vaerua, pera katoa i te taonga ereta, taunga (no te akanooanga o te ngati Levi), puapii, diakono, e te mema.

11 E tikaanga to te ereta kia rave i te angaanga me kore e taunga teitei i reira.

12 Ko te raveanga i te au mea vaerua, na te taunga teitei e te ereta, tei akatikaia e te koreromotu ma te akaueanga a te akonoanga; e tikaanga oki to ratou kia akaaere i teia au taonga o te Akonoanga me kore e aronga mana i reira.

13 Te rua o te kautaunga ko te Kautaunga o Aarona ïa, no te mea kua tukuia teia ki runga ia Aarona e tana uanga, e ope rava ake te au uki.

14 Eaa i tuatuaiaʼi e ko te kautaunga akaaka no te mea e tauturu ïa i te mea maata, koia te Kautaunga o Melekizedeka, e e mana tona kia rave i te au oroa o vao.

15 Ko te ruru episekopo te ruru peresideni o teia kautaunga, e tei mou katoa i te au taviri me kore ra te tikaanga o reira.

16 Kare o te tangata tikaanga tikai ki teia taonga, e kia mou i te au taviri o te kautaunga, mari ua ra e uanga tikai aia no Aarona.

17 No te mea ra e ko te taunga teitei i roto i te Kautaunga o Melekizedeka, e tikaanga tona kia akaaere i te au angaanga o te au taonga akaaka, ka rauka iaia i reira kia rave i te angaanga a te taonga episekopo me kore e uanga tikai mei roto mai ia Aarona, mei te mea e kua kapikiia aia e kua akatakaia ma te akataongaia no teia tikaanga e te au rima o te Ruru Peresideni o te Kautaunga o Melekizedeka.

18 Ko te mana e te tikaanga o tei teitei ra, koia te Kautaunga o Melekizedeka, ko te mou i te au taviri o te au akameitakianga vaerua o te akonoanga—

19 Kia rauka te tikaanga kia kite i te au mea muna o te basileia o te ao ra, e kia akatueraia mai te au rangi kia ratou, e kia piri atu ki te uipaanga maata a te akonoanga a te Tama Mua, e kia mataora ratou i te pirianga e te aroaro o te Metua Atua, e Iesu te rotopu o te koreromotu ou.

20 Ko te mana e te tikaanga o te mea akaaka, koia te Kautaunga o Aarona, tei aia te au taviri o te matuapuruanga o te au angela, e te rave i te au angaanga oroa o vao, te reta o te evangelia, te bapetizoanga no te tataraara no te akakoreanga o te au ara, tei tau i te au koreromotu e te au akaueanga.

21 No tei inangaroia, te vai nei te au peresideni, me kore ra te au tangata akaaere no roto mai, ko tei ikiia mai no roto me kore ra mei roto mai i te aronga i akataongaia ki te au taonga tukeke o teia nga kautaunga.

22 Mei roto mai i te Kautaunga o Melekizedeka; e toru au Taunga Teitei Akaaere, tei ikiia mai e te aronga katoa, e kua akatakaia ma te akataongaia no te reira taonga, e kua mouriaia mai na roto i te irinakianga, te akarongo, e te pure a te akonoanga, kua riro ei akapupu i te Ruru Peresideni o te Akonoanga.

23 Kua kapikiia te tino ngauru ma rua konitara tutaka e ko ratou te Tino Ngauru Ma Rua Aposetolo, me kore ra e au kite takake no te ingoa o te Mesia ki to te ao katoatoa—e tuke oki teia i to te au aronga taonga i roto i te akonoanga i ta ratou au angaanga e to ratou au kapikianga.

24 Kua akapupu ratou i tetai pupu, kia aiteite te au tikaanga e te mana ki to te au peresideni e toru i taikuia atu.

25 Kua kapiki katoa ia te Itu Ngauru ei tutu i te evangelia, kia riro oki ei kite ki te au Etene e ki to te ao katoa—e tuke oki teia i to te au aronga taonga i roto i te akonoanga i ta ratou au angaanga e to ratou au kapikianga.

26 Kua akapupu ratou tetai pupu, kia aiteite te au tikaanga ki to te au kite Tino Ngauru Ma Rua, me kore ra te au Aposetolo i tuatuaia ake nei.

27 E ko te au tukuanga tika te ka raveia e tetai o teia nga pupu nei, kia tukuia e te katoatoa rava e tikaʼi; koia oki, kia akatika te au mema o te pupu tatakitai i te reira, kia aiteite ta ratou au tukuanga tika i taua au mana ra, me kore ra kia ariki tetai i tetai—

28 Ka rauka i te maataanga kia akapupu i tetai pupu me kare e ravenga ke—

29 Me kare e ko teia te tumu, kare i reira ta ratou au tukuanga tika e tau ki te au akameitakianga i ta te au tukuanga tika a te pupu o te peresideni tokotoru i taito, tei akataongaia i raro ake i te akanooanga o Melekizedeka, e au tangata tapu oki e te tiratiratū.

30 Ko te au tukuanga tika a teia au pupu, me kore ra ko tetai o ratou, kia raveia ma te tika tikai, te tu tapu, te ngakau akaaka, te maru e te akakoromakianga roa, ma te akarongo, te tiamā, e te kite, te akono meitaki, te akakoromaki, te tu atua, te aroa takinga meitaki, e te aroa ua;

31 No te mea teia te taputou, me maata teia au mea i roto ia ratou, kare ratou e ngere i roto i te kite o te Atu.

32 E me ka tuatua-tika kore ake tetai o te tukuanga tika a teia au pupu, ka apaiia mai te reira ki te uipaanga maata a te au pupu katoatoa, koia tikai te au akaaere o te pae vaerua no te akonoanga; me kare a ratou oro akaou anga e rauka mei ta ratou tukuanga tika.

33 Ko te Tino Ngauru Ma Rua ko ratou te Pupu Konitara Teitei Akaaere Tutaka, i te rave angaanga i roto i te ingoa o te Atu, i raro ake i te akaaereanga a te Ruru Peresideni Mua o te Akonoanga, kia aiteite ki to te rangi; kia akatu i te akonoanga, e kia akatikatika i te au angaanga katoatoa i roto i te au pa enua, na mua ki te au Etene i reira ki te ngati Iuda.

34 Ko te Itu Ngauru kia rave i te angaanga na roto i te ingoa o te Atu, i raro ake i te akaaereanga a te Tino Ngauru Ma Rua, koia te pupu konitara teitei tutaka, no te akatupuanga i te akonoanga ma te akaaere i te au mea katoatoa kia aiteite i roto i te au pa enua, na mua ki te au Etene i reira ki te ngati Iuda;

35 E tonoia atu te Tino Ngauru Ma Rua, tei mou i te au taviri, ei akatuera i te ngutupa na roto i te tutuanga o te evangelia a Iesu Mesia, na mua ki te au Etene i reira ki te ngati Iuda.

36 Ko te au pupu konitara teitei, i te au titi o Ziona, kua riro ratou i tetai pupu kia aiteite te tikaanga i roto i te au angaanga o te akonoanga, i roto i te au tukuanga tika, ki te pupu o te ruru peresideni, me kore ra ki te pupu konitara teitei tutaka.

37 Ko te pupu konitara teitei i Ziona, kua riro i tetai pupu kia aiteite te au tikaanga i roto i te angaanga a te akonoanga, i roto i ta ratou au tukuanga tika, ki te au pupu konitara o te Tino Ngauru Ma Rua i te au titi o Ziona.

38 E angaanga teia na te pupu konitara teitei tutaka kia tauturu atu i te Itu Ngauru, me ka inangaro ratou, no te akakī i te au kapiki no te tutuanga e te rave angaanga i te evangelia, auraka oki e ko tetai uatu.

39 E angaanga na te Tino Ngauru Ma Rua, i roto i te au manga mamaata o te akonoanga, kia akataonga i te au orometua apii evangelia, mei tei orongaia mai kia ratou na roto i te eeuanga—

40 Kua akatinamouia te akanooanga o teia kautaunga kia orongaia ïa mei te metua ki te tamaiti, e ko te tikaanga oki no te au kopu ïa o te uanga ikiia, e kia ratou oki i raveiaʼi teia au taputouanga.

41 Kua akatumuia teia akanooanga i te tuatau o Adamu, e kua tae rava mai ki raro nei na roto i te pa metua mei teia te tu:

42 Mei ia Adamu kia Seta, tei akataongaia e Adamu i te ono ngauru ma iva anga o tona mataiti, e kua akameitaki atu iaia e toru mataiti i mua ake i tona (Adamu) mateanga, e kua rauka mai te taputou a te Atua na roto mai i tona metua, e ko tana uanga te ka ikiia no te Atu, e kia akonoia ratou e tae uatu ki te openga o te enua nei;

43 E no te mea oki e e tangata apakore aia (Seta), e tona tu, ko te tutu tikai o tona metua, i te mea oki e kua aiteite tikai aia ki tona metua i te au mea katoatoa, mari ua ko tona mataiti na te reira e kite ei iaia mei tona metua.

44 Kua akataongaia a Enosa i te okotai anere e toru ngauru ma ā anga o tona mataiti e ā marama e te rima o Adamu.

45 Kua kapiki te Atua ia Kainana i roto i te medebara i te ā ngauru anga o tona mataiti; e kua aravei aia ia Adamu i tona aereanga ki Sedolamaka. E varu ngauru ma itu ona mataiti i akataongaiaʼi aia.

46 E ā anere e iva ngauru ma ono mataiti e itu rā o Maalaleela, i akataongaiaʼi aia e i akameitakiiaʼi oki e te rima o Adamu.

47 E rua anere mataiti o Iareda i akataongaiaʼi e i akameitakiiaʼi aia e Adamu.

48 E rua ngauru ma rima mataiti o Enoka i akataongaiaʼi aia e Adamu, e kia tae aia ki te ono ngauru ma rima kua akameitaki a Adamu iaia.

49 E kua kite aia i te Atu, e kua aaere kapiti raua, e noo tamou aia ki mua i tona aroaro; e kua aaere raua ko te Atua e toru anere e ono ngauru ma rima mataiti, e ā anere e toru ngauru akera ona mataiti i rave ke ia atu ei aia.

50 E tai anere o Metusela mataiti i akataongaiaʼi aia e Adamu.

51 E toru ngauru ma rua o Lameka mataiti i akataongaiaʼi aia e Seta.

52 E tai ngauru o Noa mataiti i akataongaiaʼi aia e Metusela.

53 E toru mataiti i muake ka mate ei a Adamu, kua kapiki atu aia ia Seta, Enosa, Kainana, Maalaleela, Iareda, Enoka, e Metusela, e au taunga teitei anake ratou, e te toenga o te aronga tuatua-tika o tona uanga, ki roto i te ō ko Adamu-Onidi-Amana, i reira tona orongaanga i tana akameitakianga openga kia ratou.

54 E kua mama mai te Atu kia ratou, kua tu akera ratou pouroa ki runga e kua akameitaki atura ia Adamu, e kua tau topa iora iaia, kia Mikaela, te tama ariki, te angela maata.

55 E kua akapumaana maira te Atu ia Adamu; e kua na ko maira kiaia: Kua tuku oki au ia koe i te upoko; e manganui oki te au iti tangata te ka rauka mai mei ia koe, e e tama ariki oki koe i rungaʼo ia ratou e tuatau uatu.

56 Kua tu iora a Adamu i rotopu i taua uipaanga ra; noatu e kua tupou tikai aia no tona pakarianga, kua kī tikai oki aia i te Vaerua Tapu, e totou akera i te au mea te ka tae ki tona uanga e tae uatu ki te uki a muri atu.

57 Kua tata pouroa ia teia au mea ki roto i te puka a Enoka e ka akapapuia mai te reira i tona ra tuatau.

58 E angaanga katoa teia a te Tino Ngauru Ma Rua, ko te akataonga e ma te akanoo meitaki i te au tangata taonga ke atu o te akonoanga, kia tau ki te au eeuanga tei na ko mai e:

59 Ki te akonoanga a te Mesia i te enua ko Ziona, ma te au ture o te akonoanga no runga i te au angaanga a te akonoanga—

60 Tika tikai, taku e karanga atu kia kotou, te tuatua maira te Atu Sabaota, ka inangaroia tetai au ereta akaaere, ei akaaere i rungaʼo ia ratou tei mou i te taonga ereta;

61 Pera katoa te au taunga kia riro tetai ei akaaere i rungaʼo i te aronga tei mou i te taonga taunga;

62 Pera katoa te au puapii kia riro tetai ei akaaere i rungaʼo i te aronga tei mou i te taonga puapii, mei te reira katoa te au diakono—

63 No reira, mei te diakono ki te puapii, e mei te puapii ki te taunga, e mei te taunga ki te ereta, manganui uatu rai me ikiia ra ratou, kia tau ki te au koreromotu e te au akaueanga a te akonoanga.

64 Kua tae i reira ki te Kautaunga Teitei, koia oki tei maata rava atu.

65 No reira, e mea tau kia ikiia tetai o te Kautaunga Teitei ei akaaere i rungaʼo i te kautaunga, ka tuatuaia aia e ko te Peresideni no te Kautaunga Teitei o te Akonoanga;

66 Me kore ra, i tetai tuatua, ko te Taunga Teitei Akaaere no te Kautaunga Teitei o te Akonoanga.

67 Mei roto mai i teia te raveanga i te au angaanga oroa e te au akameitakianga ki rungaʼo i te akonoanga, na roto i te tukuanga rima.

68 No reira, ko te taonga o te episekopo, kare te reira e aiteite ki to runga ake; ko te taonga episekopo, e akaaere aia i te au mea ravarai i te pae kopapa;

69 Kareka ra, ka ikiia mai te episekopo mei roto anake i te Kautaunga Teitei, mari ua ra ei uanga tikai aia no Aarona;

70 Me kore aia i te uanga tikai no Aarona, kare aia e tikaia kia mou i te au taviri o te reira kautaunga.

71 Kareka ra, ko te taunga teitei, koia oki, no roto i te akanooanga o Melekizedeka, ka akatakaia ei raverave i te au mea i te pae kopapa, tei rauka te mārama no te reira na roto i te Vaerua o te tuatua-mou;

72 Ka akatakaia katoa ei akava no Iseraela, ei akatere i te au angaanga a te akonoanga, e kia akava i te aronga aati ture na roto i te au kite akapapu te ka apaiia mai ki mua iaia kia tau ki te au ture, ma te tauturu a tona nga konitara, tana i iki me kore ra tana ka iki mai mei roto i te au ereta o te akonoanga.

73 Ko te angaanga teia a te episekopo me kare aia i te uanga tikai no Aarona, i na ra kua akataongaia ki te Kautaunga Teitei no roto i te akanooanga o Melekizedeka.

74 Ka riro i reira aia ei akava, ei akava akaaka oki no te aronga ravarai e noo i Ziona, me kore ra i roto i te titi o Ziona, me kore ra i tetai manga o te akonoanga te ka akatakaia aia no teia angaanga, e tae uatu ki te akamaataangaia o te au kotinga o Ziona, e inangaro akaou iaʼi i reira tetai atu au episekopo me kore ra tetai au akava i Ziona, me kore ra i tetai atu ngai.

75 E mei te mea e e au episekopo ke atu tetai tei akatakaia ka rave rai ratou i te angaanga a te reira taonga.

76 I na ra, ko te uanga tikai o Aarona e tikaanga to ratou, kia tau ki te ture, ki te ruru peresideni o teia kautaunga, e ki te au taviri o teia angaanga, kia rave i te angaanga a te taonga episekopo koia anake ua, ma te kore e nga konitara, mari ua e ko te Peresideni o te Kautaunga Teitei, no roto i te akanooanga o Melekizedeka, te ka akavaia, kia noo ei akava no Iseraela.

77 E ko te tukuanga tika a tetai o teia nga pupu konitara, aiteite ki te akaueanga tei na ko mai e:

78 Pera katoa, tika tikai, taku e karanga atu kia kotou, e ko te angaanga puapinga rava atu a te akonoanga, e te manamanata ngata rava atu a te akonoanga, me kare e mataoraanga no te tukuanga tika a te episekopo, me kore ra a te au akava, ka apaiia te reira ki te pupu konitara o te akonoanga, ki mua i te Ruru Peresideni o te Kautaunga Teitei.

79 E mana to te Ruru Peresideni o te pupu konitara o te Kautaunga Teitei kia kapiki atu i tetai au taunga teitei, mei te tai ngauru ma rua, kia tauturu ei au konitara rai; e mana i reira to te Ruru Peresideni o te Kautaunga Teitei e tona au konitara kia akarakara ki te au tuatua akakite, kia tau oki ki te au ture a te akonoanga.

80 Me oti teia tukuanga tika kare te reira e akamaara akaou ia i mua i te aroaro o te Atu; ko teia oki te pupu konitara teitei rava atu o te akonoanga a te Atua, e ko te tukuanga tika openga teia no te au taumaroanga o te pae vaerua.

81 Kare tetai tangata no roto tikai i teia akonoanga te kore e kauraro ki teia pupu konitara o te akonoanga.

82 E me aati ture te Peresideni o te Kautaunga Teitei, ka akamaaraia aia ki mua i te pupu konitara akaaka o te akonoanga, te ka tauturuia e te au konitara tai ngauru ma rua o te Kautaunga Teitei;

83 E ko ta ratou tukuanga tika ki runga i tona upoko, ko te openga ïa o te taumaroanga no runga iaia.

84 Kare rava tetai i reira e akaateaia mei te akavaanga e te au ture a te Atua, e kia raveia te au mea katoa ma te mako e te meitaki ki mua iaia, kia tau ki te tuatua-mou e te tuatua-tika.

85 E pera katoa, tika tikai taku e karanga atu kia koe, e ko te angaanga a te peresideni i rungaʼo i te taonga diakono koia te akaaere i rungaʼo i te tino ngauru ma rua diakono, kia noo ki rotopu ia ratou, ma te apii ia ratou ki ta ratou angaanga, i te tauturuanga tetai ki tetai, kia tau oki ki te au koreromotu tei orongaia mai.

86 E pera katoa ko te angaanga rai ïa a te peresideni i rungaʼo i te au taonga o te au puapii, kia akaaere i rungaʼo i te rua ngauru ma ā puapii, ma te noo ki rotopu ia ratou, ma te apii ia ratou ki te angaanga a to ratou taonga, mei tei orongaia i roto i te au koreromotu.

87 Pera katoa ko te angaanga a te peresideni i rungaʼo i te Kautaunga o Aarona, kia akaaere i rungaʼo i te ā ngauru ma varu taunga, ma te noo ki rotopu ia ratou, i te apiianga ia ratou ki te angaanga a to ratou taonga, mei tei orongaia mai i roto i te au koreromotu—

88 Ko teia peresideni e episekopo ïa; ko tetai angaanga teia a teia kautaunga.

89 Pera katoa, ko te angaanga a te peresideni i rungaʼo i te taonga ereta kia akaaere i rungaʼo e iva ngauru ma ono ereta, ma te noo ki rotopu ia ratou, ma te apii ia ratou kia tau ki te au koreromotu.

90 E ruru peresideni ke rai teia mei to te itu ngauru, e kua akonoia te reira no te aronga kare e aere ki to te ao katoa nei.

91 E pera katoa, ko te angaanga a te Peresideni o te taonga Kautaunga Teitei ko te akaaere ïa i rungaʼo i te akonoanga katoa, e kia aite mei ia Mose—

92 I na, teia te pakari; ae, kia riro ei akara, ei tangata eeu, ei uri tuatua, e te peroveta, tei aia te au orongaanga katoatoa o te Atua tana i tuku ki rungaʼo i te akonoanga.

93 Kia tau oki ki te orama tei akakite no runga i te akanooanga o te Itu Ngauru, e kia ikiia e itu o ratou ei peresideni, ei akaaere ia ratou, kia ikiia mei roto mai i te itu ngauru;

94 E ko te itu o te peresideni o teia au peresideni, kia akaaere aia ki rungaʼo i te toko ono;

95 E ka iki oki teia itu peresideni i tetai itu ngauru akaou i vao ake i te itu ngauru mua no reira mai ratou, e na ratou e akaaere ia ratou;

96 E pera katoa tetai atu itu ngauru, e tae uatu ki te itu taime o te itu ngauru, me ka inangaroia kia maata te aronga angaanga i roto i te kainga vine.

97 Ko teia itu ngauru e au orometua tutaka ratou na mua ki te au Etene e pera katoa ki te ngati Iuda.

98 Ko tetai au tangata taonga ra o te akonoanga, kare oki i te Tino Ngauru Ma Rua, kare katoa i te Itu Ngauru, kare ratou i raro ake i teia tuanga angaanga kia aere ki te au pa enua, i na ra, ka aere ratou me rauka mai tetai tikaanga no ratou, noatu ra ka mou ratou i te au taonga teitei e te puapinga i roto i te akonoanga.

99 No reira, kia mārama te au tangata katoatoa ma te tamou i tana uaorai angaanga, e kia angaanga i roto i te taonga i akatakaiaʼi aia, ma te tu meitaki tikai.

100 Ko tei kope, kare aia e akaraia ma te tau, e ko tei kore e tamou i tana angaanga e kare i akaari mai i te tu meitaki, kare aia e akaraia ma te tau. Koia ïa. Amene.