Tuanga 108
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 26 o Titema, 1835 (History of the Church, 2:345). Kua rauka mai teia tuanga i te patianga a Lyman Sherman, ko tei oti i mua ana i te akataongaia ei taunga teitei e te itu ngauru, e ko tei tukuia atu i roto ia Noema 1835 mei roto i te nga taonga peresideni o te Itu Ngauru.
1–3, Kua akakoreia te au ara a Lyman Sherman; 4–5, Kia tareia aia ki roto i te au ereta akaaere o te Akonoanga; 6–8, Kua kapikiia aia kia tutu i te evangelia e kia akamatutu i tona au taeake.
1 Tika tikai te tuatua maira te Atu kia koe, e taku tavini e Lyman: Kua akakoreia taau au ara, no te mea kua kauraro koe i taku tuatua i te aerenga mai i teia popongi kia ariki i te tuatua mei iaia tei ikiia e au.
2 No reira, kia akangaroi ana to vaerua i teianei no runga i toou oraanga vaerua, e auraka e patoi akaou i taku nei tuatua.
3 Ka tu, e kia matakite i te akonoanga i taau au taputou, taau i rave e te rave nei, e ka akameitakiia koe ki te au akameitakianga maata e manganui.
4 E tapapa marie e tae uatu ki te kapikiangaia tetai putuputuanga tapu e toku au tavini, ei reira koe e akamaaraiaʼi ma taku au ereta mua, e raukaʼi oki te tikaanga na roto i te akataongaanga, mei te katoaanga o taku au ereta tei ikiia e au.
5 I na, teia te taputou a te Metua ki runga ia koe me ka tu akarongo uatu rai koe.
6 E ka akatupuia ïa a taua rā e orongaiaʼi toou tikaanga e kia tutu i taku evangelia i te ngai uatu taku ka tono ia koe, mei reira atu mei te reira taime.
7 No reira, e akamatutu i toou au taeake i roto i ta kotou pukapukaanga, e ta kotou au pureanga, ta kotou au akamaroiroianga, e ta kotou e rave ra.
8 I na, e i na ra, ei vaitata ua rai au ia kotou kia akameitaki ia kotou, e kia akaora ia kotou e tuatau ua atu. Amene.