1 Kia akameitakiia toou ingoa, e te Atu te Atua o Iseraela, ko tei akono i te koreromotu e kua akaari mai i te aroa ua ki toou nei au tavini, tei aere tiratiratū na mua i toou aroaro, ma to ratou au ngakau katoa—

2 Tei akaue mai i toou na au tavini kia akatu i tetai are no toou na ingoa, ki teia ngai [Kirtland].

3 E teianei, te kite ra koe, e te Atu e, kua rave to au tavini kia tau ki taau akaueanga.

4 E teianei, te pati atu nei matou kia koe, e te Metua Tapu, na roto i te ingoa o Iesu Mesia, te tamaiti a toou umauma, nona anake te ingoa e raukaʼi te akaoraanga o te tamariki a te tangata nei, te pati nei matou kia koe, e te Atu, kia ariki mai i teia are, ko te angaanga oki teia a te au rima o toou au tavini, taau i akaue mai ia matou kia akatu.

5 Kua kite oki koe e, kua rave matou i teia angaanga na roto i te manamanata maata; noatu oki to matou putaua, kua oronga matou i ta matou apinga ei akatu i tetai are no toou ra ingoa, kia raukaʼi i te Tamaiti a te Tangata tetai ngai ei akakiteanga mai iaia ki tona au tangata.

6 Mei taau oki i tuatua mai i roto i te eeuanga, tei orongaia mai kia matou, i te kapikianga mai ia matou ei au oa noou, i te na ko anga e—E kapiki i to kotou putuputuanga tapu, mei taku i akaue atu kia kotou;

7 I te mea oki e, kare i rauka i te katoatoa te akarongo, e kimi pu tikai ma te apii tetai ki tetai i te au tuatua o te pakari; ae e kimi ki roto i te au puka memeitaki i te tuatua o te pakari, e kimi i te kite na roto i te apiianga e te akarongo katoa;

8 E akatumu ia kotou uaorai; e akateateamamao i te au mea pouroa tei inangaroia, e ma te akatumu i tetai are, ei are pureanga, ei are akakoreanga kai, ei are akarongo, ei are apiianga, ei are kakā, ei are akanooanga, ei are no te Atua;

9 Kia riro to kotou au tomoanga mai na roto i te ingoa o te Atu, e ko to kotou au tomoanga atu ki vao, kia na roto katoa i te ingoa o te Atu, e kia riro ta kotou au aroaanga ei roto i te ingoa o te Atu, ma te te rima takiia ki runga ki Tei Teitei Roa ra—

10 E teianei, e te Metua Tapu, te pati atu nei matou kia tauturu mai koe ia matou, toou iti tangata, ki toou na aroa ua, i te kapikianga i to matou putuputuanga tapu, kia raveia te reira, kia tau ki toou na kakā, e taau arikianga tapu;

11 Kia tau ei oki matou ki mua ia koe, e akatupu i te au taputou taau i papau no matou, to iti tangata, i roto i te eeuanga i orongaia mai kia matou;

12 Kia noo mai ei to kakā ki rungaʼo i to iti tangata, e ki rungaʼo i to are nei, ta matou e akatapu atu nei, e kia tamāia e kia akatakaia ei mea tapu tikai, kia noo tamou mai ei toou tu tapu tikai ki roto i teia are;

13 E ko te au tangata katoatoa e tomo ki roto i te ngutupa o to are kia kite ratou i toou mana, e kia aaki mai oki ratou e kua akatapu koe i te reira, e noou tikai teia are, e ngai tapu noou.

14 E oronga mai oki koe e te Metua Tapu, ki te au tangata katoatoa e akamori i roto i teia are kia apiiia ki te au tuatua o te pakari mei roto mai i te au puka memeitaki, kia kimi ratou i te kite, e kia tamou, e kia rauka te akarongo, mei taau i tuatua mai ra;

15 Kia tupu oki ratou i roto ia koe, kia rauka oki te kīanga o te Vaerua Tapu, e kia akapapaia kia tau ki taau au ture, ma te teateamamao kia rauka te au mea ka inangaroia;

16 E kia riro teia are pureanga, ei are akakoreanga kai, ei are akarongo, ei are kakā e no te Atua, koia toou are;

17 E kia riro te tomoanga mai o toou iti tangata, ki roto i teianei are, ei roto anake i te ingoa o te Atu;

18 E to ratou tomoanga ki vao mei teia are, ei roto anake i te ingoa o te Atu;

19 E kia riro oki to ratou au aroaanga atu ei roto i te ingoa o te Atu, ma te au rima tapu, kia takiia ki runga ki Tei Teitei Roa ra;

20 Auraka oki kia akatikaia tetai au mea viivii kia tomo mai ei akaviivii i toou na ngutuare;

21 Me aati ture to iti tangata, tetai uatu ia ratou, kia viviki ratou i te tataraara, e te ariu mai kia koe, e kia kitea aroa ia mai e koe, e kia akaokiia mai ki te au akameitakianga tei akatakaia e koe, kia riringiia mai ki rungaʼo i te ka akatapu ia koe i roto i toou are.

22 Te pati atu nei matou kia koe, e te Metua Tapu e, kia aere atu to au tavini mei roto i teia are ma te rakeiia ki toou na mana, e kia vai rai toou ingoa ki rungaʼo ia ratou, e to kakā kia takapini ia ratou, e to au angela ei tiaki ia ratou;

23 E kia apai atu ratou mei teia ngai atu i te au karere akangateitei tikai e te manea, na roto i te tuatua-mou, e tae uatu ki te au openga o te ao nei, kia kite oki ratou e naau teia angaanga, e kua akatoro mai koe i toou rima, kia akatupu oki i taau i tuatua na, na roto i te au vaa o to au peroveta, no runga i te au rā openga.

24 Te pati atu nei matou kia koe e te Metua Tapu, kia akamou i te au tangata te ka akamori, e te mou nei i te ingoa e te turanga teitei i roto i toou na are, mei te au uki ravarai e tuatau uatu;

25 Kia kore rava tetai rakei tamaki e autu ki rungaʼo ia ratou; ko te ka ko i te vaarua no ratou, koia uaorai te ka topa ki roto;

26 Kia kore te au ravenga kino e mana ki rungaʼo i to iti tangata, te ka tukunaia toou ingoa ki runga i roto i teia are;

27 Me ka tu mai tetai au tangata e patoi i teia au tangata, kia vai mai to riri ki rungaʼo ia ratou;

28 Me rutu mai ratou i teia au tangata, naau ratou e rutu atu; naau e tamaki i te tamakianga a to iti tangata mei taau i rave i te rā tamakianga, e kia ora mai ratou i te rima o to ratou au enemi.

29 Te pati atu nei matou, e te Metua Tapu, kia akapoiri, e kia akapoiterere atu, e kia apai mai i te akama e te kononinoni, ki te katoatoa tei totoa i te au tuatua pikikaa ki te au ngai, e ki to te ao nei, no toou tavini me kore ra au tavini, me kare ratou e tataraara, me tutuia te evangelia openga kore ki to ratou au taringa;

30 Ka riro ta ratou au angaanga katoatoa ei kare, e ka puia ke ia e te ua toka, e na roto i te akavaanga taau e tono ki rungaʼo ia ratou no toou riri, kia akamotu te au pikikaa e te urutoe i toou ra iti tangata.

31 Kua kite oki koe e te Atu e, e tu apakore tikai to au tavini ki mua ia koe i te aakianga i te tuatua o toou ra ingoa, i akakinoiaʼi ratou no teia au mea.

32 No reira te pati akatenga atu nei matou, kia rauka tetai akaoraanga tikai mei raro i teia zugo nei;

33 E aatiia atu e te Atua, e aatiia atu mei te kaki o to au tavini, na roto i toou na mana, kia tu ei matou ki rotopu i teia uki i te rave i taau angaanga.

34 E Iehova e, akara aroa mai i teia iti tangata, no te ka ara te au tangata ravarai, e akakore mai i te au aati ture o to iti tangata, e kia tamāia ratou e tuatau uatu.

35 Kia topiriia te akatainuanga o to au orometua ki rungaʼo ia ratou ma te mana mei runga mai.

36 Kia akatupuia te reira ki rungaʼo ia ratou, mei tei tupu kia ratou i te rā o te Penetekose; kia riringiia mai te orongaanga reo ki rungaʼo i te au tangata, koia te arero manga mei te aʼi te tu, e te akaurianga i te reira.

37 E kia kī oki to are, i te matangi ririnui o toou na kakā.

38 E tuku ki rungaʼo i to au tavini i te kite papu o te koreromotu, e me aere ratou ki vao i te tutu i taau tuatua kia topiri atu ratou i te ture, e kia akapapa i te ngakau o taau aronga tapu no taua au akavaanga taau ka tono mai, i toou ra riri otooto ki te aronga e noo i te enua nei, no ta ratou au aatianga ture, kia kore ei toou iti tangata e matapoiriia i te au rā o te tumatetenga.

39 E ko te au oire ta to au tavini e tomo, e kua ariki te reira au tangata i te tuatua, kia vai mai oki toou au e taau akaoraanga ki rungaʼo i te reira oire, kia raukaʼi kia akaputuputu mai i te aronga tuatua-tika ki vao mai i te reira oire; kia aere mai ratou ki Ziona, me kore ra ki tona au titi, ki te au ngai taau i iki ma te au reo imene mataora mutukore;

40 E kia oti rava teia, auraka taau akavaanga kia iri mai ki rungaʼo i taua oire ra.

41 E ko tetai uatu oire ta to au tavini ka tomo, e kare te tangata e ariki mai ia ratou, e kua akamatakite to au tavini ia ratou kia akaora ia ratou uaorai mei teia uki ngakau marokiakia, ei rungaʼo rai i taua oire ra mei taau i tuatua na roto i te vaa o to au tavini koia taau au peroveta.

42 Te pati atu nei matou kia koe, e Iehova, kia akaora mai koe i to au tavini mei to ratou au rima, e kia tamā mai ia ratou mei to ratou toto.

43 E te Atu, e kare matou e mataora na i te akakoreangaia o to matou au tangata tupu; e mea puapinga maata oki to ratou au vaerua i mua ia koe;

44 I na ra kia akatupuia oki taau tuatua e tikaʼi. E tauturu mai i to au tavini i te tuatuaanga, ma to aroa i te tauturuanga ia ratou: Kia tupu toou anoano, e te Atu, auraka to matou.

45 Kua kite matou e kua tuatua koe na roto i te vaa o taau au peroveta i tetai au mea rikarika no runga i te aronga kino i te au rā openga—e ka riringi mai koe i taau akautungaanga, e kare e aite ia;

46 No reira, e te Atu e, e akaora mai i to au tangata i te ereere a te aronga kino; e oronga ki to au tavini kia topiri i te ture, e kia tapeka oki i ta ratou tuatua akakite, kia papa ratou no te rā o te kāanga o te aʼi.

47 Te pati atu nei matou, e te Metua Tapu, kia akamaara atu koe i te aronga tei tuaruia e te aronga e noo i Jackson County, Missouri, mei to ratou enua ipukarea, e kiriti ke atu, e te Atu, i te zugo tamamae tei tukuia ki rungaʼo ia ratou.

48 Kua kite oki koe, e te Atu e, kua takingakinoia ratou, e kua tamamaeia e te au tangata kikino; kua maata te tangi o to matou au ngakau ia ratou no to ratou apainga teiaa tukituki.

49 E te Atu e, eaa te roa o teia au tangata i te apaianga i teia kino, e te aue a te aronga ara kore, tei tae atu ki to taringa, e to ratou toto ara kore tei riro ei kite papu ki mua ia koe, e kare oki e akaari ua mai i taau akapapuanga no ratou?

50 E aroa mai e te Atu i te au tangata takinga kino, tei tuaru ke atu i to iti tangata, kia akamotu ratou i te takino, e kia tataraara i ta ratou au ara, me ka rauka te tataraara;

51 I na ra me kare ra ratou e rave i teia, e akaari mai i to rima e te Atu, e akaora i tei ikiia e koe ei Ziona no to iti tangata.

52 Me kore ake, kia kore te akakoroanga o te iti tangata noou e akamutu ki mua ia koe, me ka tika kia akaari mai koe i toou mareka kore, e toou riri otooto, na roto i te takoreanga atu ia ratou, to ratou aka e to ratou rara, i raro ake i te rangi;

53 I na ra kia tataraara ra ratou, kia kī koe i te aroa ua e e ariu ke atu i to riri maata, me akara koe i te mata o Tei Akatainuia e koe.

54 Kia tae te aroa ua noou e te Atu, ki te au pa enua katoatoa o te ao nei; ei runga mai te aroa ua noou ki te au tutara o to matou nei enua; kia riro oki taua au ture tei akangateiteiia, e tei riro ei paruru, koia oki, te Papa Ture o to matou enua tei akamouia e to matou au metua e tuatau uatu.

55 E akamaara atu i te au ariki, te au tama ariki, te aronga nunui, te aronga mana i te enua, e te au tangata katoatoa, e te au akonoanga, te au putaua, te ngere, e te aronga makimaki o te enua nei;

56 Kia akaparuparuia to ratou ngakau me aere atu to au tavini ki vao mei toou ra ngutuare, e Iehova, kia akapapu i te kite i toou ingoa; kia riro to ratou manako tika kore ei tuatua-mou, e kia akara aroa ia mai to iti tangata e te au tangata katoatoa;

57 Kia kite mai te au openga katoatoa o te enua, e ko matou to au tavini, tei rongo i to reo, e naau oki i tono ia matou;

58 E mei roto mai i teia aronga koia toou au tavini, te au tamaroa a Iakoba, kia akaputuputu mai i te aronga tuatua-tika ei patu i tetai oire tapu no toou ingoa, mei taau i akaue ia ratou.

59 Te pati atu nei matou kia koe kia iki akaou mai i tetai au titi no Ziona, ei kapiti mai ki teia tei ikiia e koe, kia tere ki mua te akaputuputuanga mai o toou iti tangata ma te mana maata e te ngateitei, kia tapotoia mai taau angaanga ki te tuatua-tika.

60 Ko teia au tuatua, e te Atu, kua tuatua atu matou ki mua ia koe, no runga i te au eeuanga e te au akaueanga taau i oronga mai kia matou, tei kapitiia atu ma te au Etene.

61 I na ra kua kite oki koe i toou aroa maata i te tamariki a Iakoba, tei pueurikiriki ki te au maunga no tetai tuatau roa, i te rā o te marumaru e te poiri.

62 No reira te pati atu nei matou kia koe, kia aroa mai koe i te tamariki a Iakoba, kia akaoraia mai a Ierusalema mei teianei ora atu;

63 E kia akamata te zugo tuikaa i te ati mei te ngutuare o Davida;

64 Kia akamataʼi te tamariki a Iuda i te oki ki te au enua taau i oronga no Aberahama, to ratou metua.

65 Kia akaariuia mai te au toenga o Iakoba, tei taumaaia e tei takingakinoia no ta ratou au aatianga ture, kia akaariuia mai mei to ratou tu taetaevao e te tu taae ki te kīanga o te evangelia mutukore;

66 Kia akamoe i ta ratou apinga tamaki o te akamaringianga toto, e kia akamotu i te kaitamaki.

67 Kia kite te toenga o Iseraela i akapueurikirikiia e tei tuaruia ki te au ope katoatoa o te enua nei, i te tuatua-mou, e kia irinaki ki te Mesia, e kia akaoraia mai mei te tuikaaanga, e kia rekareka ki mua ia koe.

68 E te Atu, e akamaara mai i to tavini, ia Iosepha Timeti, Tamaiti, e tona au mamae e te au takingakino—e mei tana i koreromotu kia Iehova, e kua taputou kia koe e te Atua Maata o Iakoba—e te au akaueanga taau i oronga atu kiaia, e kua uapou tikai aia i te rave i toou anoano.

69 E aroa mai e te Atu i tana vaine e te tamariki, kia akangateiteiia ratou ki mua i toou ra aroaro, e kia akonoia e toou ra rima aroa.

70 E aroa mai i te katoatoaanga o to ratou au taeake piri, kia takoreia to ratou inangaro kore, e kia pakoko ke ia atu te reira mei te tu o te vai puke; kia akaariuia mai ratou e kia akaoraia ma Iseraela, e kia kite e ko koe te Atua.

71 E akamaara e te Atu i te au peresideni, koia te katoatoaanga o te au peresideni o taau akonoanga, kia riro to rima katau ei akateitei ia ratou, ma to ratou au kopu tangata, e to ratou au taeake piri, kia akonoia to ratou ingoa, e kia vai ei akamaaraanga openga kore, mei tetai uki ki tetai.

72 E akamaara i taau au akonoanga e te Atu, e to ratou au kopu tangata to ratou au taeake piri, ma to ratou aronga maki e tei taitaia, ma te katoatoa o te putaua, e te aronga maru o te enua; kia riro te basileia, taau i anga ma te kore e rima, ei maunga maata e kī uatu te ao katoa nei;

73 Kia aere mai ei to akonoanga ki vao mei roto mai i te medebara o te poiri tangotango kia kakā manea mai mei te marama, areare mei te rā, e te rikarika mei te au vaeau e to ratou au reva;

74 E kia akamaneaia mai mei te vaine akaipoipo ou no taua rā e eeu ei koe i te au rangi, e kia akatae i te au maunga ki raro i mua i toou aroaro, e kua akateitei i te au ō, e kua akamania i te au ngai pukupuku; kia kī to te enua nei i toou ra kakā;

75 E me tangi te pu no te aronga mate, ka apaiia atu matou ki runga i roto i te tiao kia aravei atu ia koe, kia noo tamou matou e te Atu;

76 Kia mā to matou kakau, kia akakakauia matou ki te au kakau pu o te tuatua-tika, ma te rara tamara i roto i to matou au kapu rima, e te au korona kakā i runga i to matou upoko, e kia rauka te rekareka mutukore no to matou au tumatetenga katoatoa.

77 E te Atu e te Atua Mana katoatoa, e akarongo mai i ta matou e pati atu nei, e pau mai i ta matou patianga kia koe mei te rangi mai, i toou ngai tapu ra, mei runga i toou terono, ma te kakā, te ngateitei, te mana, te rongonui, te ririnui, te tutara, te tuatua-mou, te tuatua-tika, te akavaanga, te aroa ua, e te kīanga mutukore, mei te openga kore ki te openga kore.

78 E akarongo mai, e akarongo mai, e akarongo mai ia matou, e te Atu! E pau mai i teia au patianga, e ariki mai i te akatapuanga i teia are noou, i te angaanga a to matou au rima, ta matou i akatu no toou ingoa;

79 E pera katoa teia akonoanga, kia tuku mai i te ingoa noou ki rungaʼo i te reira. E tauturu mai ia matou na roto i te mana o toou Vaerua, kia kapiti ei to matou au reo ki to te au seraphi kakā e takapuni i to terono, i te akapaapaaanga ia koe, i te imene e, Hosana ki te Atua e te Punua Mamoe!

80 E kia akakakauia teia, to aronga tei akatainuia, ki te akaoraanga, e kia kapiki maata mai to aronga tapu ma te rekareka. Amene, e Amene.