ဩဝါဒနှင့် ပဋိညာဉ်များ ၁၀

အပိုဒ်ငယ် ၁၀

၁၈၂၈ ခု နွေရာသီ အစောပိုင်းက အချို့ကို ရရှိလေပြီးဖြစ်ကောင်းဖြစ်နိုင်သော်လည်း၊ ၁၈၂၉ ခု၊ ဧပြီလဝန်းကျင်ခန့်၊ ဟာမိုနီ၊ ပန်ဆယ်လ်ဗေးနီးယား၌ ပရောဖက်ဂျိုးဇက်စမစ်သို့ ပေးတော်မူခဲ့သည့် ဗျာဒိတ်တော်။ ဤအရာတွင်၊ ကိုယ်တော်ရှင်သည် ဂျိုးဇက်အား မော်မုန်ကျမ်းရှိ၊ လေဟိကျမ်းဘာသာပြန်ခြင်းမှ ပုံနှိပ်စာမူ ၁၁၆ မျက်နှာ၌ ဆိုးညစ်သောသူတို့ပြုထားသည့် ပြုပြင်ပြောင်းလဲခြင်းများအကြောင်းကို ပြောပြ၏။ စာရွက်များယာယီ ယုံကြည်လွှဲအပ်ခံထားရသူ မာတင်ဟဲရစ်၏ထိန်းသိမ်းခြင်းအောက်မှ ဤပုံနှိပ်စာမူ စာမျက်နှာများ ပျောက်ဆုံးခဲ့လေ၏။ (အပိုဒ်ငယ် ၃ ၏ခေါင်းစဉ်တွင် ကြည့်ပါ။) မကောင်းသောအကြံအစည်မှာ၊ ခိုးယူခံရသော စာမျက်နှာများတွင်ပါဝင်သည့် အကြောင်းအရာအား မျှော်လင့်ထားသည့် တစ်ဖန်ထပ်၍ဘာသာပြန်ခြင်းကို စောင့်နေဖို့နှင့်၊ ထို့နောက်တွင်၊ ပြုပြင်ပြောင်းလဲခြင်းအားဖြင့် ဖန်တီးထားသည့် ကွာဟချက်ကို ဖော်ပြလျက်၊ ဘာသာပြန်သူကို အသရေဖျက်ဖို့ဖြစ်၏။ ဤဆိုးညစ်သောရည်ရွယ်ချက်ကို မာရ်နတ်က တွေးဆခဲ့ပြီး၊ မော်မုန်၊ ရှေးနီဖိုင်းအမျိုးသားသမိုင်းပြုစုသူက သူ၏စုဆောင်းထားသောပုရပိုက်ပြားများ၏ အကျဉ်းချုပ်ကိုပြုလုပ်စဉ်မှာပင် ကိုယ်တော်ရှင်သိတော်မူလေကြောင်း မော်မုန်ကျမ်းထဲမှာ ဖော်ပြထားပေ၏။ (မော်မုန်၏စကားများ ၁း၃–၇ တွင် ကြည့်ပါ)။

၁–၂၆၊ စာတန်သည် ဆိုးညစ်သောသူများအား ကိုယ်တော်ရှင်၏အမှုတော်ကို ဆန့်ကျင်ဖို့ နှိုးဆော်၏။ ၂၇–၃၃၊ သူသည် လူသားတို့၏စိတ်ဝိညာဉ်များကို ဖျက်ဆီးဖို့ ကြိုးစား၏။ ၃၄–၅၂၊ ဧဝံဂေလိတရားတော်သည် လာမန်အမျိုးသားများနှင့် လူမျိုးအပေါင်းတို့ထံ မော်မုန်ကျမ်းအားဖြင့် ရောက်ရှိလိမ့်မည်။ ၅၃–၆၃၊ ကိုယ်တော်ရှင်သည် သူ၏အသင်းတော်နှင့် သူ၏ဧဝံဂေလိတရားတော်ကို လူသားတို့၌ တည်ထောင်လိမ့်မည်။ ၆၄–၇၀၊ သူသည် နောင်တရသောသူများကို သူ့အသင်းတော်ထဲသို့ စုဝေးလိမ့်မည်၊ နာခံသောသူများကို ကယ်တင်လိမ့်မည်။

၁ ယခုတွင်၊ ရှုလော့၊ သင့်ကို ငါဆိုသည်ကား၊ သင်သည် ဥရိမ်နှင့် သုမိမ်တို့အားဖြင့် ဘာသာပြန်ဖို့ သင့်အား တန်ခိုးကို ပေးထားသည့် ထိုစာများကို ဆိုးညစ်သောသူ၏လက်ထဲသို့ လွှဲအပ်သဖြင့်၊ ၎င်းတို့ကို သင်ဆုံးရှုံးရလေပြီ။

၂ သင်သည် တစ်ချိန်တည်းတွင် သင်၏ဆုကျေးဇူးကိုလည်း ဆုံးရှုံးပြီး၊ သင်၏စိတ်သည် မှောင်မိုက်၍လာခဲ့၏။

၃ သို့သော်လည်း၊ ထိုအရာကို သင့်ထံသို့ တစ်ဖန်ပြန်ပေးထား၏။ ထို့ကြောင့်၊ သင်သတိပြုရမည်မှာ၊ သင်သည် သစ္စာရှိလျက်၊ အစပြုလေသည့်အတိုင်း၊ ကျန်ကြွင်းသော ဘာသာပြန်ခြင်းအမှုကို ပြီးဆုံးခြင်းသို့တိုင်အောင် ဆက်၍ပြုရမည့်အကြောင်းပေတည်း။

၄ သင်ဘာသာပြန်နိုင်စေဖို့ ပေးသနားထားတော်မူသည့် ခွန်အားနှင့် တန်ဆာများ သင့်မှာရှိလေသည်ထက်၊ ပို၍လျင်မြန်စွာမပြေးနှင့် သို့မဟုတ် အလုပ်မလုပ်နှင့်။ သို့ရာတွင်၊ အဆုံးတိုင်အောင် လုံ့လဝီရိယရှိလော့။

၅ အစဉ်အမြဲဆုတောင်းလော့၊ သင်အောင်နိုင်သူဖြစ်လာနိုင်စေကြောင်း။ ထိုမှတစ်ပါး၊ စာတန်ကို သင်အောင်နိုင်စေကြောင်းနှင့်၊ စာတန်၏အမှုကို ထောက်ခံသည့် သူ့ကျွန်တို့၏လက်မှ သင်လွတ်မြောက်နိုင်စေကြောင်းပင်တည်း။

၆ ရှုလော့၊ သူတို့သည် သင့်ကို ဖျက်ဆီးဖို့ ကြိုးစားကြလေပြီ။ အထူးသဖြင့်၊ သင်ယုံကြည်စိတ်ချလေသည့်သူကပင် သင့်ကို ဖျက်ဆီးဖို့ ကြိုးစားလေပြီ။

၇ ဤအကြောင်းရင်းကြောင့် ငါဆိုသည်ကား၊ ထိုသူသည် ဆိုးညစ်သောသူဖြစ်၏။ အကြောင်းမူကား၊ သင့်ကို ယုံကြည်လွှဲအပ်ထားလေသည့် အရာများကို ယူသွားဖို့ သူကြိုးစားလေပြီ။ သင်၏ဆုကျေးဇူးကိုလည်း ဖျက်ဆီးဖို့ သူကြိုးစား၏။

၈ သင်သည် စာများကို ထိုသူ၏လက်ထဲသို့ လွှဲအပ်သောကြောင့်၊ ရှုလော့၊ ဆိုးညစ်သောသူများသည် ထိုအရာတို့ကို သင့်ထံမှ ယူသွားလေပြီ။

၉ ထို့ကြောင့်၊ သင်သည် ထိုအရာတို့ကို၊ အထူးသဖြင့်၊ သန့်ရှင်းမွန်မြတ်သောအရာကို ဆိုးညစ်ခြင်းသို့ လွှဲအပ်လေပြီ။

၁၀ ထို့အတူ၊ ရှုလော့၊ သင့်လက်မှ ထွက်သွားလေသော၊ သင်ရေးစေလေသည့် သို့မဟုတ် သင်ဘာသာပြန်လေသည့် စာလုံးများကို ပြောင်းလဲစေခြင်းငှာ စာတန်သည် သူတို့၏စိတ်နှလုံးထဲသို့ သွင်းပေးလေပြီ။

၁၁ ရှုဦးလော့၊ သင့်ကို ငါဆိုသည်ကား၊ စာလုံးများကို သူတို့ပြောင်းလဲလေသောကြောင့်၊ သင်ဘာသာပြန်ပြီးရေးထားစေခဲ့သည့်အရာနှင့် ကွဲပြား၏။

၁၂ ထို့အတူ၊ ဤနည်းအားဖြင့်၊ နတ်ဆိုးသည် ဤအမှုတော်ကို ဖျက်ဆီးနိုင်ခြင်းငှာ သူ၏စဉ်းလဲသောအစီအစဉ်ကို ချမှတ်ဖို့ ကြိုးစားလေ၏။

၁၃ အကြောင်းမူကား၊ ဤသို့ပြုစေဖို့ သူတို့စိတ်နှလုံးထဲသို့ သူသွင်းလေသည်မှာ ဘာသာပြန်ဖို့ ဟန်ဆောင်လေသောစာလုံးများ၌ သင့်ကို သူတို့ဖမ်းမိလေကြောင်း မုသားပြောခြင်းအားဖြင့် သူတို့ဆိုနိုင်ကြစေကြောင်းပင်တည်း။

၁၄ သင့်ကို ငါအမှန်ဆိုသည်ကား၊ ဤအမှု၌ စာတန်၏မကောင်းသောအကြံအစည် ပြီးမြောက်စေဖို့ ငါအခွင့်ပေးလိမ့်မည်မဟုတ်။

၁၅ အကြောင်းမူကား၊ ရှုလော့၊ ထိုအရာကို တစ်ဖန်ဘာသာပြန်ဖို့ တောင်းခြင်းဖြင့် သင်၏ဘုရားသခင်ကိုယ်တော်ရှင်ကို သင်စုံစမ်းစေဖို့ သူတို့စိတ်နှလုံးထဲသို့ သူသွင်းလေပြီ။

၁၆ ထို့နောက်တွင်၊ ရှုလော့၊ သူတို့ဆို၍ စိတ်နှလုံးမှာ တွေးကြသည်ကား—ဘုရားသခင်သည် သူ့ကို ဘာသာပြန်ဖို့ တန်ခိုးကို ပေးမပေး ငါတို့ကြည့်ကြမည်။ ဤသို့ဖြစ်လျှင်၊ သူ့အား တန်ခိုးကို တစ်ဖန်ပေးလိမ့်ဦးမည်။

၁၇ ဘုရားသခင်က သူ့အား တန်ခိုးကို တစ်ဖန်ပေးလျှင်၊ သို့မဟုတ်၊ သူတစ်ဖန်ဘာသာပြန်လျှင်၊ သို့မဟုတ်၊ တစ်နည်းအားဖြင့်၊ သူသည် တူသောစာလုံးများကို ဖြစ်စေလျှင်၊ ရှုလော့၊ ငါတို့မှာ တူသောစာလုံးများရှိ၏။ ၎င်းတို့ကို ငါတို့ပြောင်းလဲထားလေပြီ။

၁၈ ထို့ကြောင့်၊ ၎င်းတို့ကိုက်ညီကြလိမ့်မည်မဟုတ်။ ငါတို့သည်လည်း သူ့စာလုံးများ၌ သူမုသားပြောကြောင်း၊ သူ့မှာ ဆုကျေးဇူးမရှိကြောင်း၊ တန်ခိုးလည်းမရှိကြောင်း ဆိုကြမည်။

၁၉ ထို့ကြောင့်၊ ငါတို့သည် သူနှင့် ထိုအမှုကိုလည်း ဖျက်ဆီးကြမည်။ အဆုံး၌ ရှက်ကြောက်ခြင်းသို့ မရောက်နိုင်ကြစေခြင်းငှာ၊ လောက၏ချီးမွမ်းခြင်းကိုလည်း ရနိုင်ကြစေခြင်းငှာ ဤသို့ပြုကြမည်။

၂၀ သင့်ကို ငါအမှန်၊ အမှန်ဆိုသည်ကား၊ စာတန်သည် သူတို့စိတ်နှလုံးကို ကြီးစွာလွှမ်းမိုးလေပြီ။ ကောင်းမြတ်သောအရာကို ဆန့်ကျင်၍ သူတို့ကို ဒုစရိုက်သို့ နှိုးဆော်၏။

၂၁ သူတို့စိတ်နှလုံးသည် ဖောက်ပြန်၏။ ဆိုးညစ်ခြင်းနှင့် စက်ဆုပ်ရွံရှာဖွယ်အမှုများနှင့်ပြည့်၏။ သူတို့၏အကျင့်များ မကောင်းသောကြောင့်၊ သူတို့သည် အလင်းထက် မှောင်မိုက်ကို ချစ်ကြ၏။ ထို့ကြောင့်၊ သူတို့သည် ငါ့ထံမှ မတောင်းလိုကြ။

၂၂ စာတန်သည် သူတို့၏စိတ်ဝိညာဉ်ကို ပျက်စီးခြင်းသို့ ပို့ဆောင်နိုင်ခြင်းငှာ သူတို့ကို နှိုးဆော်၏။

၂၃ ထို့ကြောင့်၊ သူသည် ဘုရားသခင်၏အမှုတော်ကို ဖျက်ဆီးဖို့စဉ်းစားလျက်၊ စဉ်းလဲသောအစီအစဉ်ကို ချမှတ်၏။ သို့ရာတွင်၊ ဤအမှုကို သူတို့လက်၌ ငါတောင်းမည်။ တရားစီရင်တော်မူရာနေ့တွင်၊ ထိုအမှုသည် သူတို့၏အရှက်နှင့် ပြစ်ဒဏ်ချမှတ်ခြင်းသို့ ရောက်လိမ့်မည်။

၂၄ ထိုမှတစ်ပါး၊ ဤအမှုကိုဆန့်ကျင်ပြီး အမျက်ထွက်စေဖို့ သူတို့၏စိတ်နှလုံးကို သူနှိုးဆော်၏။

၂၅ ထိုမှတစ်ပါး၊ သင်တို့ဖျက်ဆီးနိုင်စေကြောင်း၊ လှည့်စားကြလော့၊ ဖမ်းခြင်းငှာ၊ ချောင်းမြောင်း၍စောင့်ကြလော့။ ရှုလော့၊ ဤအမှုသည် ထိခိုက်ခြင်းမရှိဟု သူတို့ကို ဆို၏။ ထိုကဲ့သို့အားဖြင့်၊ သူတို့ကို မြှောက်ပင့်၍ပြောဆို၏၊ သူတို့သည် လူတစ်ယောက်ကို မုသားပြောသည်ဟု ဖမ်းနိုင်ခြင်းငှာနှင့် ထိုသူကို ဖျက်ဆီးနိုင်ခြင်းငှာ မုသားပြောခြင်းမှာ အပြစ်မရှိကြောင်း သူတို့ကို ပြောပြ၏။

၂၆ ထိုကဲ့သို့အားဖြင့်၊ သူတို့ကို မြှောက်ပင့်၍ပြောဆိုပြီး၊ သူတို့၏စိတ်ဝိညာဉ်များကို ငရဲသို့ ဆွဲချသည့်တိုင်အောင် သူတို့ကို ခေါ်ဆောင်၏။ ထိုကဲ့သို့အားဖြင့်၊ သူတို့ကိုယ်တိုင်၏ထောင်ချောက်၌ သူတို့ကိုယ်သူတို့ ဖမ်းမိစေ၏။

၂၇ ထိုကဲ့သို့အားဖြင့်၊ သူသည် မြေကြီး၌ အရပ်ရပ်သို့ လှည့်လည်၍ လူသားတို့၏စိတ်ဝိညာဉ်များကို ဖျက်ဆီးဖို့ ကြိုးစားလျက်ရှိ၏။

၂၈ သင့်ကို ငါအမှန်၊ အမှန်ဆိုသည်ကား၊ တခြားသူက လှည့်စားဖို့ မုသားပြောသည်ဟု ထင်မှတ်သောကြောင့် မုသားကိုပြောသောသူသည် အမင်္ဂလာရှိ၏။ အကြောင်းမူကား၊ ထိုကဲ့သို့သောသူသည် ဘုရားသခင်၏တရားမှုမှ လွတ်ငြိမ်းခွင့်မရ။

၂၉ ယခုတွင်၊ ရှုလော့၊ သင်တို့ကို သူလှည့်စားလေပြီဟု စာတန်က သူတို့ကို ဆိုသောကြောင့် သူတို့သည် စာလုံးများကို ပြောင်းလဲလေပြီ—ထိုကဲ့သို့အားဖြင့်၊ သင်၏ဘုရားသခင်ကိုယ်တော်ရှင်ကို သင်စုံစမ်းစေကြောင်း၊ ဒုစရိုက်ကို ပြုစေဖို့၊ သူတို့ကို မြှောက်ပင့်၍ လှည့်ဖြားခေါ်ဆောင်သွား၏။

၃၀ ရှုလော့၊ သင့်ကို ငါဆိုသည်ကား၊ သင့်လက်မှ ထွက်သွားလေသောစာလုံးများကို သင်တစ်ဖန်ဘာသာမပြန်ရ။

၃၁ အကြောင်းမူကား၊ ရှုလော့၊ သူတို့သည် ထိုစာလုံးများကို ဆန့်ကျင်၍ မုသားပြောခြင်းဖြင့် သူတို့၏မကောင်းသောအကြံအစည်ကို ပြီးမြောက်လိမ့်မည်မဟုတ်။ အကြောင်းမူကား၊ ရှုလော့၊ သင်သည် တူသောစာလုံးများကို ဖြစ်စေလျှင်၊ သူတို့က သင်မုသားပြောကြောင်းနှင့် သင်ဘာသာပြန်ဖို့ ဟန်ဆောင်လေကြောင်း၊ သို့ရာတွင်၊ သင့်ကိုယ်သင် ရှေ့နောက်မညီဖြစ်စေလေကြောင်း ဆိုကြလိမ့်မည်။

၃၂ ထို့အတူ၊ ရှုလော့၊ သူတို့သည် ဤအရာကို ပြောကြားကြလိမ့်မည်။ စာတန်သည်လည်း လူတို့အား သင့်ကို ဆန့်ကျင်ပြီး အမျက်ထွက်စေဖို့ နှိုးဆော်ခြင်းငှာ သူတို့၏စိတ်နှလုံးကို မာကျောစေလိမ့်မည်ဖြစ်၍ သူတို့သည် ငါ၏စကားများကို ယုံကြည်ကြလိမ့်မည်မဟုတ်။

၃၃ ထိုကဲ့သို့အားဖြင့်၊ စာတန်သည် ဤမျိုးဆက်၌ အမှုတော်ထွက်မလာနိုင်စေခြင်းငှာ၊ ဤမျိုးဆက်၌ သင်၏သက်သေခံချက်ကို အနိုင်ရဖို့ စဉ်းစား၏။

၃၄ သို့ရာတွင် ရှုလော့၊ ဤအရာ၌ ဉာဏ်ပညာရှိ၏။ ငါသည် သင့်အား ဉာဏ်ပညာကို ပြတော်မူပြီး၊ ဤအရာများ၊ သင်ပြုရမည့်အရာများနှင့်စပ်လျဉ်း၍ ပညတ်တော်များကို ပေးတော်မူသောကြောင့်၊ ဘာသာပြန်ခြင်းအမှုကို သင်မပြီးမြောက်မီ၊ ၎င်းကို လောကသို့ပြခြင်းမပြုနှင့်။

၃၅ ဤအရာ၌ ဉာဏ်ပညာရှိ၏၊ ၎င်းကို လောကသို့ပြခြင်းမပြုနှင့်ဟု ငါမိန့်တော်မူသည်ကို အံ့ဩခြင်းမရှိနှင့်—အကြောင်းမူကား၊ သင်ထိန်းသိမ်းစောင့်ရှောက်ခံရနိုင်စေကြောင်း၊ ငါမိန့်တော်မူသည်မှာ၊ ၎င်းကို လောကသို့ပြခြင်းမပြုနှင့်။

၃၆ ရှုလော့၊ ၎င်းကို ဖြောင့်မတ်သောသူများအား မပြရဟု ငါမဆို။

၃၇ သင်သည် အဘယ်သူဖြောင့်မတ်သည်ဟု အစဉ်အမြဲမဆုံးဖြတ်နိုင်သဖြင့်၊ သို့မဟုတ်၊ ဆိုးညစ်သူနှင့် ဖြောင့်မတ်သူကို အစဉ်အမြဲမခွဲခြားနိုင်သဖြင့်၊ ထို့ကြောင့်၊ သင့်ကို ငါဆိုသည်မှာ၊ ထိုအမှုနှင့်စပ်လျဉ်း၍၊ ခပ်သိမ်းသောအရာတို့ကို လောကသို့ဖော်ပြစေဖို့ သင့်လျော်မည်ဟု ငါဆင်ခြင်မိသည့်အချိန်တိုင်အောင် တိတ်ဆိတ်စွာနေလော့။

၃၈ ယခုမူကား၊ သင့်ကို ငါအမှန်ဆိုသည်မှာ၊ သင့်လက်မှထွက်သွားလေသည့်အရာတည်းဟူသော၊ သင်ရေးလေသည့် ထိုအရာတို့၏မှတ်တမ်းကို နီဖိုင်း၏ပုရပိုက်ပြားများပေါ်မှာ ရေးထွင်းထား၏။

၃၉ ထိုမှတစ်ပါး၊ ထိုစာများ၌ ဤအရာတို့အကြောင်း ပို၍အသေးစိတ်သောမှတ်တမ်းကို နီဖိုင်း၏ပုရပိုက်ပြားများပေါ်မှာ ရေးထားကြောင်းဆိုခဲ့သည်ကိုလည်း သင်သတိရ၏။

၄၀ ယခုမူကား၊ နီဖိုင်း၏ပုရပိုက်ပြားများပေါ်မှာ ရေးထွင်းထားသည့် မှတ်တမ်းသည် ငါ၏ဉာဏ်ပညာတော်အတိုင်းဖြစ်သည့်အရာများနှင့်စပ်လျဉ်းပြီး၊ ပို၍အသေးစိတ်သောကြောင့်၊ ဤမှတ်တမ်း၌ လူတို့၏သိခြင်းသို့ ငါဆောင်ယူတော်မူမည်—

၄၁ ထို့ကြောင့်၊ သင်သည် နီဖိုင်း၏ပုရပိုက်ပြားများပေါ်မှာရှိသည့် ရေးထွင်းထားခြင်းများကို ဗင်္ယာမိန်မင်းကြီးနန်းစံခြင်းအပိုင်းရောက်သည်အထိပင်၊ သို့မဟုတ် သင်ဘာသာပြန်ပြီး၍၊ ထိန်းသိမ်းထားလေသောနေရာသို့ ရောက်သည့်တိုင်အောင် ဘာသာပြန်လော့။

၄၂ ရှုဦးလော့၊ သင်သည် ထိုအရာကို နီဖိုင်း၏မှတ်တမ်းအဖြစ် ပုံနှိပ်ထုတ်ဝေရမည်။ ထိုကဲ့သို့အားဖြင့်၊ ငါ၏စကားများကို ပြောင်းလဲလေသောသူတို့အား အရှက်ရစေမည်။

၄၃ ငါ၏အမှုအား သူတို့ဖျက်ဆီးမည်ကို ငါအခွင့်ပေးမည်မဟုတ်။ ထိုမှတစ်ပါး၊ ငါ၏ဉာဏ်ပညာတော်သည် နတ်ဆိုး၏စဉ်းလဲခြင်းထက် ကြီးမြတ်တော်မူကြောင်း သူ့တို့အား ငါပြမည်။

၄၄ ရှုလော့၊ သူတို့မှာ နီဖိုင်း၏မှတ်တမ်းမှ တစ်စိတ်တစ်ပိုင်း၊ သို့မဟုတ် အကျဉ်းချုပ်တစ်ခုမျှသာ ရှိကြ၏။

၄၅ ရှုလော့၊ နီဖိုင်း၏ပုရပိုက်ပြားများပေါ်မှာ ရေးထွင်းထားသောအရာများစွာရှိ၏။ ငါ၏ဧဝံဂေလိတရားတော်နှင့်စပ်လျဉ်း၍ ပို၍အရေးပါသည့်အမြင်ကို ထိုအရာတို့က ပေး၏။ ထို့ကြောင့်၊ နီဖိုင်း၏ရေးထွင်းခြင်းများမှ ဤပထမပိုင်းကို သင်ဘာသာပြန်ပြီး၊ ဤအမှု၌ ထုတ်ဝေရမည်မှာ ငါ၏ဉာဏ်ပညာတော်အတိုင်းဖြစ်၏။

၄၆ ထို့အတူ၊ ရှုလော့၊ ဤအမှု၏ကျန်ကြွင်းသောအရာအားလုံးတွင်၊ ဤလူမျိုးဆီသို့ ရောက်လာစေဖို့ ငါ၏သန့်ရှင်းသောပရောဖက်များ၊ ထိုမှတစ်ပါး၊ ငါ၏တပည့်တော်များက သူတို့၏ဆုတောင်းခြင်းများ၌ တောင်းဆိုသည့် ငါ့ဧဝံဂေလိတရားတော်၏အစိတ်အပိုင်းအားလုံးပါဝင်၏။

၄၇ ငါကလည်း သူတို့ကို ဆိုသည်ကား၊ သူတို့၏ဆုတောင်းခြင်းများကို သူတို့၏ယုံကြည်ခြင်းအတိုင်း သူတို့ကို ပေးတော်မူလိမ့်မည်။

၄၈ ထိုမှတစ်ပါး၊ သူတို့၏ဤယုံကြည်ခြင်းသည်ကား—သူတို့ကာလ၌ ဟောပြောနိုင်စေကြောင်း သူတို့ကို ငါပေးတော်မူခဲ့သည့် ငါ့ဧဝံဂေလိတရားတော်ကို သူတို့၏ညီအစ်ကိုလာမန်အမျိုးသားများထံ၊ ထို့အတူ၊ ကူးပြောင်းခြင်းကြောင့် လာမန်အမျိုးသားများဖြစ်လာသူအပေါင်းတို့ထံ ရောက်လာစေကြောင်းပင်တည်း။

၄၉ ယခုတွင်၊ ဤအရာသည် အလုံးစုံမဟုတ်—သူတို့၏ဆုတောင်းခြင်းများကို သူတို့၏ယုံကြည်ခြင်းသည်ကား၊ ဤဧဝံဂေလိတရားတော်ကိုလည်း ဖော်ပြရမည့်အကြောင်း၊ ဖြစ်နိုင်လျှင်၊ ဤပြည်ကို အခြားသောလူမျိုးများ ပိုင်ဆိုင်မည့်အကြောင်းဖြစ်လေ၏။

၅၀ ထိုကဲ့သို့အားဖြင့်၊ သူတို့သည် မိမိတို့၏ဆုတောင်းခြင်းများ၌ ဤပြည်အပေါ် ကောင်းချီးမင်္ဂလာကို ပေးခဲ့ကြသည်မှာ၊ ဤပြည်၌ ဤဧဝံဂေလိတရားတော်ကို ယုံကြည်မည့်သူမှန်သမျှ ထာဝရအသက်ကို ရနိုင်စေမည့်အကြောင်း၊

၅၁ ထိုမှတစ်ပါး၊ ပြည်သား၊ အမျိုးစု၊ အသီးသီးဘာသာစကားကိုပြောသူ၊ သို့မဟုတ် လူမျိုးမှန်သမျှ၊ အဘယ်သူပင်ဖြစ်စေ အားလုံးအတွက် လွတ်လပ်ရာဖြစ်နိုင်စေမည့်အကြောင်းပေတည်း။

၅၂ ယခုမူကား၊ ရှုလော့၊ သူတို့၏ဆုတောင်းခြင်းများကို သူတို့၏ယုံကြည်ခြင်းအတိုင်း၊ ငါသည် ငါ့ဧဝံဂေလိတရားတော်၏ ဤအစိတ်အပိုင်းကို ငါ့လူမျိုးတို့၏သိခြင်းသို့ ဆောင်ယူတော်မူမည်။ ရှုလော့၊ ငါသည် သူတို့လက်ခံရရှိပြီးလေသည့်အရာကို ဖျက်ဆီးဖို့ ထိုအရာကို မဆောင်ယူ၊ သို့ရာတွင် တည်ထောင်ခြင်းငှာသာဖြစ်၏။

၅၃ ဤအကြောင်းရင်းကြောင့်၊ ငါမိန့်တော်မူလေသည်ကား၊ ဤမျိုးဆက်သည် စိတ်နှလုံးကို မာကျောစေခြင်းမရှိကြလျှင်၊ ငါသည် သူတို့၌ ငါ၏အသင်းတော်ကို တည်ထောင်မည်။

၅၄ ယခုတွင်၊ ငါသည် ငါ၏အသင်းတော်ကို ဖျက်ဆီးခြင်းငှာ ဤသို့မဆို၊ သို့ရာတွင် ငါ၏အသင်းတော်ကို တည်ထောင်ခြင်းငှာ ဤသို့ဆို၏။

၅၅ ထို့ကြောင့်၊ ငါ့အသင်းတော်၏အသင်းဝင်သူမှန်သမျှသည် ကြောက်ဖို့မလို၊ အကြောင်းမူကား၊ ထိုကဲ့သို့သောသူသည် ကောင်းကင်နိုင်ငံတော်ကို အမွေခံရလိမ့်မည်။

၅၆ သို့ရာတွင်၊ ငါ့ကို မကြောက်သောသူများ၊ ငါ၏ပညတ်တော်များကိုလည်း မစောင့်ထိန်းဘဲ သူတို့ကိုယ်တိုင်အဖို့ အကျိုးအမြတ်ရခြင်းငှာ အသင်းတော်များကို တည်ထောင်သောသူများ၊ ထိုမှတစ်ပါး၊ ဆိုးညစ်စွာပြု၍၊ နတ်ဆိုး၏နိုင်ငံကို တည်ထောင်သောသူများသည်ကား—သင့်ကို ငါအမှန်၊ အမှန်ဆိုသည်မှာ၊ ထိုသူတို့သည်ကား၊ ငါနှောင့်ယှက်မည့်သူများ၊ ကိုယ်အလယ်ဗဟိုထိ တုန်ပြီး၊ တုန်လှုပ်စေမည့်သူများပေတည်း။

၅၇ ရှုလော့၊ ငါသည် ယေရှုခရစ်တော်၊ ဘုရားသခင်၏သားတော် ဖြစ်၏။ ငါသည် ငါ၏အရပ်ဒေသသို့ ကြွလာသော်လည်း ငါ၏လူမျိုးတို့သည် ငါ့ကို လက်ခံခြင်းမရှိကြ။

၅၈ ငါသည် မှောင်မိုက်၌ တောက်ပသောအလင်းဖြစ်၍ မှောင်မိုက်သည် နားလည်ခြင်းမရှိ။

၅၉ ငါသည်ကား—ဤသိုးခြံမှမဟုတ်သော အခြားသိုးများ ငါ့မှာရှိခဲ့၏—ဟု ငါ၏တပည့်တော်တို့ကို ဆိုသောသူဖြစ်၏။ ငါ့ကို နားလည်ခြင်းမရှိသောသူများစွာလည်း ရှိလေ၏။

၆၀ ငါ့မှာ အခြားသောသိုးများရှိကြောင်း၊ သူတို့သည်လည်း ယာကုပ်အမျိုးသားတို့၏အနွယ်ဖြစ်ကြောင်း ဤလူမျိုးတို့ကို ငါပြတော်မူမည်။

၆၁ ငါ၏နာမတော်၌ သူတို့ပြုကြသည့် သူတို့၏ အံ့ဩဖွယ်ကောင်းသောအမှုများကိုလည်း အလင်းသို့ ငါဆောင်ယူတော်မူမည်။

၆၂ ထိုမှတစ်ပါး၊ သူတို့ကို အမှုတော်ဆောင်လေသည့် ငါ၏ဧဝံဂေလိတရားတော်ကိုလည်း အလင်းသို့ ငါဆောင်ယူတော်မူမည်၊ ထို့အတူ၊ ရှုလော့၊ သူတို့သည် သင်ရရှိလေပြီးဖြစ်သည့်အရာကို ငြင်းဆိုလိမ့်မည်မဟုတ်ဘဲ၊ တည်ထောင်လိမ့်မည်ဖြစ်ပြီး၊ ငါ၏မှန်သောဩဝါဒအချက်များကို၊ ထိုမှတစ်ပါး၊ ငါ့အထဲ၌ရှိသည့် တစ်ခုတည်းသောဩဝါဒကို အလင်းသို့ဆောင်ယူလိမ့်မည်။

၆၃ ဤသို့ငါပြုသည်မှာလည်း၊ ငါ၏ဧဝံဂေလိတရားတော်ကို ငါတည်ဆောက်နိုင်ပြီး၊ အလွန်များစွာသော အငြင်းပွားခြင်းမရှိနိုင်စေခြင်းငှာပေတည်း။ ထိုမှတစ်ပါး၊ စာတန်သည် ငါ၏ဩဝါဒအချက်များနှင့်စပ်လျဉ်း၍၊ လူတို့၏စိတ်နှလုံးကို အငြင်းပွားခြင်းသို့ နှိုးဆော်၏။ ဤအရာတို့၌ သူတို့တိမ်းမှားကြ၏။ အကြောင်းမူကား၊ သူတို့သည် ကျမ်းစာများကို မှောက်လှန်ကြပြီး၊ နားမလည်ကြ။

၆၄ ထို့ကြောင့်၊ ငါသည် ဤကြီးစွာသောနက်နဲခြင်းကို သူတို့အား ဖွင့်ပြတော်မူမည်။

၆၅ အကြောင်းမူကား၊ ရှုလော့၊ သူတို့၏စိတ်နှလုံးကို သူတို့မမာကျောစေကြလျှင်၊ ကြက်မသည် မိမိသားငယ်တို့ကို မိမိအတောင်အောက်၌ စုရုံးသကဲ့သို့ ငါသည် သူတို့ကို စုရုံးတော်မူမည်။

၆၆ ထိုမှတစ်ပါး၊ သူတို့လာလိုကြလျှင်၊ လာနိုင်ကြပြီး၊ အသက်ရေကို လွတ်လပ်စွာ သောက်သုံးနိုင်ကြပေ၏။

၆၇ ရှုလော့၊ ဤအရာသည် ငါ၏ဩဝါဒဖြစ်၏—နောင်တရလျက်၊ ငါ့ထံသို့ လာသောသူမှန်သမျှသည် ငါ့အသင်းတော်မှဖြစ်၏။

၆၈ ဤအရာထက် ပို၍ သို့မဟုတ် လျော့၍ဟောကြားသောသူသည် ငါထံမှမဟုတ်၊ သို့ရာတွင် ငါ့ကို ဆန့်ကျင်သောသူဖြစ်၏။ ထို့ကြောင့်၊ သူသည် ငါ့အသင်းတော်မှမဟုတ်။

၆၉ ယခုမူကား၊ ရှုလော့၊ ငါ့အသင်းတော်မှဖြစ်ပြီး၊ ငါ့အသင်းတော်၌ အဆုံးတိုင်အောင်တည်ကြည်သူမှန်သမျှကို ငါ၏ကျောက်ပေါ်မှာ တည်ဆောက်တော်မူမည်။ ငရဲ၏တံခါးတို့သည်လည်း သူတို့ကိုမနိုင်ရာ။

၇၀ ယခုမူကား၊ လောက၏အသက်နှင့် အလင်းဖြစ်သူ၊ သင်၏ရွေးနုတ်ရှင်၊ သင်၏ကိုယ်တော်ရှင်နှင့် သင့်ဘုရားသခင်၏ နှုတ်ကပတ်တော်များကို အောက်မေ့လော့။ အာမင်။