ဩဝါဒနှင့် ပဋိညာဉ်များ ၈၇

အပိုဒ်ငယ် ၈၇

၁၈၃၂ ခု၊ ဒီဇင်ဘာ ၂၅ ရက်၊ ကာ့တ်လန်း၊ အိုဟိုင်းရို အနီးအနားတွင် ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် စစ်တိုက်ခြင်းအကြောင်း ဗျာဒိတ်တော်နှင့် ပရောဖက်ပြုဟောချက်။ ဤအချိန်တွင်၊ အမေရိကန်ပြည်ထောင်စု၌ ကျွန်စနစ်နှင့် တောင်ကယ်ရိုလိုင်းနားပြည်၏ ဗဟိုအစိုးရ ကုန်သွယ်ခွန် ဖျက်သိမ်းခြင်းတို့အပေါ် ငြင်းခုံခြင်းပျံ့နှံ့၏။ “လူမျိုးတို့၌ ဒုက္ခရောက်လာခြင်းများ”သည် “အသင်းတော် တောရိုင်းထဲမှ မိမိခရီးကို စတင်ခဲ့စဉ်ကတည်းက ၎င်းတို့ယခင်ရှိလေစဉ်ကထက် ပရောဖက်ထံသို့ သာ၍မြင်သာလာခဲ့”ကြောင်း ဂျိုးဇက်စမစ်၏သမိုင်းက ဖော်ပြ၏။

၁–၄၊ မြောက်ပိုင်းပြည်နယ်နှင့် တောင်ပိုင်းပြည်နယ်နှစ်ခုကြား စစ်တိုက်ခြင်းကို ကြိုတင် ဟောပြောထား၏။ ၅–၈၊ မြေကြီးပေါ်မှာနေထိုင်သူအပေါင်းတို့အပေါ်၊ ကြီးစွာသောဘေးဒုက္ခများ ကျရောက်လာလိမ့်မည်။

၁ တောင်ကယ်ရိုလိုင်းနားပြည်နယ်၏ ပုံကန်ခြင်းမှ စ၍မကြာမြင့်မီဖြစ်လာမည့် စစ်တိုက်ခြင်းအကြောင်း၊ ကိုယ်တော်ရှင်အမှန်မိန့်တော်မူ၏၊ ထိုစစ်တိုက်ခြင်းသည် များစွာသောသူတို့၏ သေခြင်းနှင့် ဝမ်းနည်းပူဆွေးမှုတို့ဖြင့် အဆုံးသတ်လိမ့်မည်။

၂ ဤနေရာမှ စ၍၊ လူမျိုးအပေါင်းတို့အပေါ် စစ်တိုက်ခြင်းကို သွန်းလောင်းမည့် အချိန်သည် ကျရောက်လာလိမ့်မည်။

၃ အကြောင်းမူကား၊ ရှုလော့၊ တောင်ပိုင်းပြည်နယ်ကို မြောက်ပိုင်းပြည်နယ်နှင့် ပိုင်းခြားလိမ့်မည်၊ တောင်ပိုင်းပြည်နယ်သည် အခြားသောလူမျိုး၊ ဗြိတိသျှလူမျိုးကြီးဟု ထင်ရှားသောသူတို့ကိုပင် အကူအညီတောင်းလိမ့်မည်၊ သူတို့သည် အခြားသောလူမျိုးတို့တစ်ဖက်၌ မိမိတို့ကိုယ်ကို ကာကွယ်ခြင်းငှာ၊ အခြားသောလူမျိုးတို့ကိုလည်း အကူအညီတောင်းလိမ့်မည်။ ထို့နောက်တွင်၊ စစ်တိုက်ခြင်းကို အခြားသောလူမျိုးအပေါင်းတို့အပေါ် သွန်းလောင်းလိမ့်မည်။

၄ ဤသို့အားဖြင့်အချိန်တန်လာလတ္တံ့သောအခါ၊ နေ့များစွာကြာပြီးနောက်တွင်၊ ကျွန်တို့သည် မိမိတို့သခင်များကို ဆန့်ကျင်ပုန်ကန်ကြလိမ့်မည်၊ ထိုသူတို့သည် စစ်တိုက်ခြင်းအတွက် စုဆောင်းခံရ၊ လေ့ကျင့်ပေးခံရလိမ့်မည်။

၅ ဤသို့အားဖြင့်အချိန်တန်လာလတ္တံ့သောအခါ၊ ထိုပြည်၌ ကျန်နေခဲ့သည့် ကျန်ကြွင်းသောသူတို့သည် အလွန်အမျက်ထွက်လာကြလိမ့်မည်၊ တပါးအမျိုးသားတို့ကိုလည်း ပြင်းထန်သောဒုက္ခဆင်းရဲခြင်းဖြင့် နှောင့်ယှက်လိမ့်မည်။

၆ ထိုကဲ့သို့အားဖြင့်၊ ဓားနှင့် အသွေးသွန်းလောင်းခြင်းအားဖြင့် မြေကြီးပေါ်မှာနေထိုင်သူတို့ ငိုကြွေးမြည်တမ်းကြလိမ့်မည်။ ထို့အတူ ငတ်မွတ်ခေါင်းပါးခြင်းဘေး၊ ထို့အတူ ကပ်ရောဂါဘေး၊ ထို့အတူ မြေကြီးလှုပ်ခြင်း၊ ထို့အတူ ကောင်းကင်မိုးချုန်းခြင်း၊ ပြင်းထန်ပြီး အရောင်တောက်သည့် လျှပ်စီးလက်ခြင်းတို့နှင့်လည်း မြေကြီးပေါ်မှာနေထိုင်သူတို့ကို အနန္တတန်ခိုးရှင်ဘုရားသခင်၏ အမျက်၊ ထို့အတူ ဒေါသ၊ ထို့အတူ ဆုံးမခြင်းလက်ကို ခံစားစေလိမ့်မည်၊ စီရင်ဆုံးဖြတ်သော သုတ်သင်ပယ်ရှင်းခြင်းက လူမျိုးအပေါင်းတို့ကို အကြွင်းမဲ့အဆုံးသို့ ရောက်စေလေသည့် တိုင်အောင်ပင်တည်း။

၇ မိမိတို့ရန်သူများကို လက်တုံ့ပြန်စေခြင်းငှာ၊ သန့်ရှင်းသူတို့၏၊ ထို့အတူ သန့်ရှင်းသူတို့အသွေး၏၊ တောင်းလျှောက်ခြင်း မြေကြီးမှနေ၍၊ ကိုယ်တော်ရှင်ဆာဘုတ်၏နားသို့ တက်လာခြင်း ရပ်တန့်စေခြင်းငှာပေတည်း။

၈ သို့ဖြစ်၍၊ သင်တို့သည် သန့်ရှင်းရာအရပ်တို့၌ ရပ်ကြလော့၊ ကိုယ်တော်ရှင်၏နေ့ ကျရောက်လာသည့်တိုင်အောင် မရွေ့ကြနှင့်။ အကြောင်းမူကား၊ ရှုလော့၊ လျင်မြန်စွာကျရောက်လာလိမ့်မည်ဟု ကိုယ်တော်ရှင်မိန့်တော်မူလေသတည်း။ အာမင်။