ဩဝါဒနှင့် ပဋိညာဉ်များ ၉၆

အပိုဒ်ငယ် ၉၆

၁၈၃၃ ခု၊ ဇွန်လ ၄ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်သို့ မြို့ သို့မဟုတ် ဇိအုန်ပန္နက်၏ အသင်းကို ဖော်ပြလျက်၊ ကာ့တ်လန်းရှိ သန့်ရှင်းသူတို့အဖို့ ပုံသက်သေအဖြစ် ပေးတော်မူ ခဲ့သည့် ဗျာဒိတ်တော်။ ထိုအချိန်မှာ ယဇ်ပုရောဟိတ်မင်းတို့၏ ညီလာခံ ဖြစ်ပြီး၊ စဉ်းစားဆင်ခြင်ရာ အဓိက အကြောင်းအရာမှာ ကာ့တ်လန်းအနီး၊ အသင်းတော်ပိုင်သည့် ဖရန့်ခ်ျခြံဟု ထင်ရှားသည့် မြေအချို့ကို ပေးဝေခြင်းဖြစ်၏။ ခြံကို မည်သူတာဝန်ယူသင့်ကြောင်း ညီလာခံ၌ သဘောမတူနိုင်ခဲ့သဖြင့် ထိုအမှုနှင့်စပ်လျဉ်း၍ ကိုယ်တော်ရှင်ထံ မေးလျှောက်ရန် အားလုံး သဘောတူခဲ့ကြ၏။

၁၊ ကာ့တ်လန်းဇိအုန်ပန္နက်ကို အားကြီးစေရမည်။ ၂–၅၊ သင်းအုပ်သည် သန့်ရှင်းသူတို့အတွက် အမွေခံရာများကို ပိုင်းခြားပေးရမည်။ ၆–၉၊ ဂျွန်ဂျွန်ဆင်သည် စည်းလုံးညီညာအသင်း၏ အသင်းသားတစ်ဦး ဖြစ်ရမည်။

၁ ရှုလော့၊ သင်တို့ကို ငါ အမှန်ဆိုသည်ကား၊ ဤအရာသည် ဉာဏ်ပညာဖြစ်၏၊ ထိုဉာဏ်ပညာဖြင့် သင်တို့သည် ဤအမှုနှင့် စပ်လျဉ်း၍ အဘယ်သို့ ပြုရမည်ကို သိနိုင်ကြပေ၏။ အကြောင်းမူကား၊ ဇိအုန်၏ ခွန်အား အတွက် ငါတည်ထောင်သည့် ဤပန္နက်ကို အားကြီးစေရမည်မှာ ငါ့အဖို့ သင့်လျော်၏။

၂ ထို့ကြောင့်၊ ငါ့ကျွန်နီဝယ်လ်ကေဝှစ်တနီကို သင်တို့၌ ဖော်ပြထားသည့် နေရာကို တာဝန်ယူစေလော့၊ ထိုနေရာပေါ်တွင် ငါ၏ သန့်ရှင်းသော အိမ်တော်ကို တည်ဆောက်ရန် ငါစီစဉ်၏။

၃ ထိုမှတစ်ဖန်၊ အမွေခံရာကို ရှာသူများ၏ အကျိုးအတွက်၊ ဉာဏ်ပညာနှင့် အညီ သင်တို့၌ တိုင်ပင်၍ ဆုံးဖြတ်မည့်အတိုင်း ထိုနေရာကို အကွက်များအဖြစ် ပိုင်းခြားစေလော့။

၄ ထို့ကြောင့်၊ သင်တို့သည် ဤအမှုကို၊ ထို့အတူ ငါ၏ နှုတ်ကပတ်တော်ကို လူသားတို့ထံ ဖော်ပြခြင်း အကြံအစည်အတွက် ငါ၏အသင်းကို အကျိုးရှိစေရန် လိုအပ်သည့် ထိုအပိုင်းကို ဂရုပြုကြရမည့်အကြောင်း သတိပြုကြလော့။

၅ အကြောင်းမူကား၊ ရှုလော့၊ သင်တို့ကို ငါအမှန်ဆိုသည်ကား၊ သင်တို့ကောင်းကျိုးအတွက် လူသားတို့၏ စိတ်နှလုံးကို ပျော့ပျောင်းစေခြင်း အကြံအစည်အတွက် ငါ၏နှုတ်ကပတ်တော်သည် လူသားတို့ထံ ထွက်သွားရမည့်အကြောင်း ဤအရာသည် ငါ့၌ အသင့်လျော်ဆုံးဖြစ်၏။

၆ ထိုမှတစ်ဖန်၊ သင်တို့ကို ငါအမှန်ဆိုသည်ကား။ ငါ့ကျွန်ဂျွန်ဂျွန်ဆင်သည် ယခုမှစ၍ငါ၏ ပညတ်တော်များကို စောင့်ထိန်းသမျှ၊ သူ၏ ပူဇော်သက္ကာကို ငါလက်ခံလေပြီး၊ သူ၏ ဆုတောင်းခြင်းများကို ငါကြားတော်မူလေပြီ၊ သူ့အား ထာဝရအသက်၏ ကတိကို ငါပေးတော်မူ သည်မှာ ငါ့အထဲ၌ ရှိသည့် ဉာဏ်ပညာဖြစ်ပြီး သင့်လျော်၏—

၇ အကြောင်းမူကား၊ သူသည် ယောသပ်၏အမျိုးအနွယ်ဖြစ်ပြီး၊ သူ့ဘိုးဘေးတို့ထံပြုခဲ့သည့် ကတိတော်ကောင်းချီးမင်္ဂလာများကို ခံယူသူဖြစ်၏။

၈ သင်တို့ကို ငါအမှန်ဆိုသည်ကား၊ သူသည် ငါ၏နှုတ်ကပတ်တော်ကို လူသားတို့ထံ ဖော်ပြရာ၌ ကူညီနိုင်စေခြင်းငှာ၊ ထိုအသင်း၏ အသင်းသားတစ်ဦးဖြစ်လာရမည်မှာ ငါ့အဖို့သင့်လျော်၏။

၉ ထို့ကြောင့်၊ သင်တို့သည် သူ့ကို ဤကောင်းချီးမင်္ဂလာသို့ ခန့်ထားရမည်၊ သူသည်လည်း သင်တို့၌ ဖော်ပြထားသည့် အိမ်၌ နေထိုင်နိုင်ခြင်းငှာ၊ ထိုအိမ်အတွက် ပေးစရာရှိသည့် အရာတို့ကို ပယ်ရှားရန် လုံ့လဝီရိယထက်သန်စွာ ကြိုးစားရမည်။ ထိုကဲ့သို့ပင်တည်း။ အာမင်။