ဩဝါဒနှင့် ပဋိညာဉ်များ ၂၃

အပိုဒ်ငယ် ၂၃

၁၈၃၀ ခု၊ ဧပြီလ၊ မန်ချက်စတာ၊ နယူးယောက်၌ ပရောဖက်ဂျိုးဇက်စမစ်အားဖြင့်၊ အော်လီဗာကောင်ဒရီ၊ ဟီရမ်စမစ်၊ ဆင်မြူရယ်လ်အိပ်ခ်ျစမစ်၊ ဂျိုးဇက်စမစ်အကြီးနှင့် ဂျိုးဇက်နိုက်အကြီးသို့ ပေးတော်မူခဲ့သည့် ဗျာဒိတ်တော်ငါးတွဲ။ ဖော်ပြပါလူငါးဦး၏အလွန်စိတ်ထက်သန်သော အလိုဆန္ဒ၏ရလဒ်အဖြစ်၊ သူတို့၏သက်ဆိုင်ရာတာဝန်များကိုသိခြင်းငှာ၊ ပရောဖက်သည် ကိုယ်တော်ရှင်ထံမေးလျှောက်၍ လူတစ်ယောက်ချင်းစီအတွက် ဗျာဒိတ်တော်ကို လက်ခံရရှိ၏။

၁–၇၊ ဤရှေ့ပိုင်းတပည့်တော်တို့သည် အသင်းတော်ကို ဟောပြောဖို့၊ တိုက်တွန်းဖို့နှင့် ခွန်အားဖြည့်ပေးဖို့ ခေါ်သွင်းခံကြရ၏။

၁ ရှုလော့၊ အော်လီဗာကောင်ဒရီ၊ ငါသည် သင့်ကို စကားအနည်းငယ်ဆို၏။ ရှုလော့၊ သင်သည် ကောင်းချီးမင်္ဂလာကို ခံရ၏။ ပြစ်ဒဏ်ချမှတ်ခြင်းအောက်၌လည်းမရှိ။ သို့ရာတွင်၊ သင်သည် သွေးဆောင်ဖြားယောင်းခြင်းထဲသို့ မဝင်ရစေခြင်းငှာ မာနကို သတိပြုလော့။

၂ သင်၏အမှုတော်ဆောင်တာဝန်ကို အသင်းတော်သို့၊ ထို့အတူ လောကရှေ့မှာလည်း ဖော်ပြလော့။ သမ္မာတရားကို ယခုမှစ၍၊ ကာလအစဉ်အဆက်ဟောပြောဖို့ သင်၏စိတ်နှလုံးသည်လည်း ပွင့်လိမ့်မည်။ အာမင်။

၃ ရှုလော့၊ ဟီရမ်၊ ငါသည် သင့်ကို စကားအနည်းငယ်ဆို၏။ အကြောင်းမူကား၊ သင်သည်လည်း ပြစ်ဒဏ်ချမှတ်ခြင်းအောက်၌မရှိ။ သင်၏စိတ်နှလုံးသည်လည်း ပွင့်၍၊ သင်၏လျှာသည်လည်း လွတ်၏။ သင်၏အမှုတော်ဆောင်တာဝန်မှာ၊ အသင်းတော်ကို အစဉ်မပြတ်တိုက်တွန်းဖို့၊ ထို့အတူ ခွန်အားဖြည့်ပေးဖို့ ဖြစ်၏။ သို့ဖြစ်၍၊ သင်၏တာဝန်မှာ အသင်းတော်အတွက် ကာလအစဉ်အဆက်ဖြစ်လျက်၊ ဤအရာမှာ သင်၏မိသားစုကြောင့်ဖြစ်၏။ အာမင်။

၄ ရှုလော့၊ ဆင်မြူရယ်လ်၊ ငါသည် သင့်ကို စကားအနည်းငယ်ဆို၏။ အကြောင်းမူကား၊ သင်သည်လည်း ပြစ်ဒဏ်ချမှတ်ခြင်းအောက်၌မရှိ။ သင်၏အမှုတော်ဆောင်တာဝန်မှာ အသင်းတော်ကို တိုက်တွန်းဖို့နှင့် ခွန်အားဖြည့်ပေးဖို့ဖြစ်၏။ သင်သည် လောကရှေ့မှာ ဟောပြောစေဖို့ ခေါ်သွင်းမခံရသေး။ အာမင်။

၅ ရှုလော့၊ ဂျိုးဇက်၊ ငါသည် သင့်ကို စကားအနည်းငယ်ဆို၏။ အကြောင်းမူကား၊ သင်သည်လည်း ပြစ်ဒဏ်ချမှတ်ခြင်းအောက်၌မရှိ။ သင်၏အမှုတော်ဆောင်တာဝန်မှာလည်း အသင်းတော်ကို တိုက်တွန်းဖို့နှင့် ခွန်အားဖြည့်ပေးဖို့ဖြစ်၏။ ဤအရာမှာ ယခုမှစ၍၊ ကာလအစဉ်အဆက် သင်၏တာဝန်ဖြစ်၏။ အာမင်။

၆ ရှုလော့၊ ဂျိုးဇက်နိုက်၊ ငါသည် ဤစကားများဖြင့်၊ သင့်ကို ထင်ရှားစွာပြသည်ကား၊ သင်သည် သင်၏လက်ဝါးကပ်တိုင်ကို ထမ်းရမည်။ ထိုအမှုတွင်၊ သင်သည် မထင်ရှားသောအရပ်မှာ ကဲ့သို့၊ လောကရှေ့၌၊ ထို့အတူ သင်၏မိသားစု၌၊ ထို့အတူ သင်၏အဆွေခင်ပွန်းတို့၌၊ ထို့အတူ ခပ်သိမ်းသောအရပ်တို့၌ အသံထွက်၍ ဆုတောင်းရမည်။

၇ ထို့အတူ၊ ရှုလော့၊ မှန်သောအသင်းတော်နှင့် ပေါင်းစည်းဖို့မှာ သင်၏တာဝန်ဖြစ်၏။ တိုက်တွန်းခြင်းဖြင့် အစဉ်မပြတ်ဟောပြောလော့၊ အလုပ်လုပ်သောသူ၏ အကျိုးကျေးဇူးကို သင်လက်ခံရရှိနိုင်စေကြောင်းပေတည်း။ အာမင်။