ဩဝါဒနှင့် ပဋိညာဉ်များ ၈၆

အပိုဒ်ငယ် ၈၆

၁၈၃၂ ခု၊ ဒီဇင်ဘာ ၆ ရက်၊ ကာ့တ်လန်း အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ပရောဖက်သည် သမ္မာကျမ်းဘာသာပြန်ပုံနှိပ်စာမူကို ပြန်လည်ဆန်းစစ်၍တည်းဖြတ်နေစဉ်တွင် ဤဗျာဒိတ်တော်ကို လက်ခံရရှိခဲ့၏။

၁–၇၊ ကိုယ်တော်ရှင်သည် ဂျုံစပါးနှင့် ပေါင်းပင်တို့အကြောင်း ပုံဆောင်စကား၏ အဓိပ္ပာယ်ကို ဖော်ပြ၏။ ၈–၁၁၊ သူသည် ယဇ်ပုရောဟိတ်အခွင့် ကောင်းချီးမင်္ဂလာများကို လူဇာတိအတိုင်း တရားသော အမွေခံသူများသို့ ရှင်းပြ၏။

၁ ငါ၏ကျွန် သင်တို့အား ဂျုံစပါးနှင့် ပေါင်းပင်တို့အကြောင်း ပုံဆောင်စကားနှင့်စပ်လျဉ်း၍ ကိုယ်တော်ရှင် အမှန်မိန့်တော်မူသည်ကား၊

၂ ရှုလော့၊ ငါအမှန်ဆိုသည်ကား၊ လယ်ကွင်းသည် လောကဖြစ်၏၊ တမန်တော်တို့သည်ကား မျိုးစေ့ကြဲသောသူများဖြစ်ကြ၏။

၃ သူတို့အိပ်ပျော်ကြလေပြီးနောက်၊ အသင်းတော်ကို ကြီးစွာသော ညှဉ်းဆဲသူတည်းဟူသော၊ ဖောက်ပြန်သင်းကွဲသူ၊ ပြည့်တန်ဆာ၊ အမှန်စင်စစ်၊ ဗာဗုလုန်သည် မိမိဖလားကို စိတ်နှလုံးတို့၌ ရန်သူ၊ စာတန်အုပ်စိုးရန်ထိုင်သည့် လူမျိုးအပေါင်းတို့အား သောက်စေ၏—ရှုလော့၊ သူသည် ပေါင်းပင်တို့ကို ကြဲ၏။ သို့ဖြစ်၍၊ ပေါင်းပင်တို့သည် ဂျုံစပါးကို ပိတ်ပင်ပြီး၊ အသင်းတော်ကို တောရိုင်းထဲသို့ နှင်ထုတ်၏။

၄ သို့ရာတွင် ရှုလော့၊ နောက်ဆုံးသောကာလတည်းဟူသော၊ ယခုမှာပင် ကိုယ်တော်ရှင်သည် နှုတ်ကပတ်တော်ကို ဖော်ပြရန်အစပြုလျက်ရှိစဉ်မှာ၊ အရွက်ပေါက်၍၊ နုနယ်နေကြသေး၏—

၅ ရှုလော့၊ သင်တို့ကို ငါအမှန်ဆိုသည်ကား၊ အဆင်သင့်ဖြစ်၍၊ လယ်ကွင်းကိုရိတ်ရန် စေလွှတ်ခံရဖို့ စောင့်နေကြသည့် ကောင်းကင်တမန်တို့သည် ကိုယ်တော်ရှင်ထံသို့ နေ့ရောညပါ တောင်းလျှောက်နေကြ၏။

၆ သို့ရာတွင်၊ ကိုယ်တော်ရှင်က သူတို့ကို မိန့်တော်မူသည်ကား၊ အရွက်နုနယ်နေသေးစဉ်မှာ ပေါင်းပင်တို့ကို နုတ်ခြင်းမပြုနှင့် (အကြောင်းမူကား၊ သင်တို့၏ယုံကြည်ခြင်းသည် အမှန်အားနည်း၏)၊ ဂျုံစပါးကို သင်တို့မဖျက်ဆီးမိကြစေခြင်းငှာပေတည်း။

၇ ထို့ကြောင့်၊ ရိတ်သိမ်းချိန် လုံးလုံးရောက်သည်တိုင်အောင် ဂျုံစပါးနှင့် ပေါင်းပင်တို့ကို အတူတကွကြီးထွားစေလော့။ ထို့နောက်မှ၊ သင်တို့သည် ဂျုံစပါးကို ပေါင်းပင်များကြားထဲမှ ရှေးဦးစွာ ရွေး၍ ကောက်ရကြမည်၊ ဂျုံစပါးကို စုသိမ်းပြီးနောက်တွင်၊ ရှုလော့၊ ကြည့်ဦးလော့၊ ပေါင်းပင်တို့ကို အထုံးလိုက် စည်းနှောင်ထား၏၊ လယ်ကွင်းသည်လည်း လောင်မြိုက်ခံရဖို့ ရှိနေလိမ့်မည်။

၈ ထို့ကြောင့်၊ သင်တို့ဘိုးဘေးတို့၏ မျိုးရိုးမှတစ်ဆင့် ယဇ်ပုရောဟိတ်အခွင့် အတူဆက်၍ တည်ရှိရာ သင်တို့ကို ကိုယ်တော်ရှင်မိန့်တော်မူသည်မှာ—

၉ အကြောင်းမူကား၊ သင်တို့သည် လူဇာတိအတိုင်း တရားသောအမွေခံသူများဖြစ်ကြ၏၊ သင်တို့ကို ခရစ်တော်နှင့်အတူ ဘုရားသခင်၌ လောကထံမှ ဝှက်ထားလေပြီ—

၁၀ ထို့ကြောင့်၊ သင်တို့၏ အသက်နှင့် ယဇ်ပုရောဟိတ်အခွင့် ဆက်၍တည်ရှိ၏၊ ကမ္ဘာဦးကတည်းက သန့်ရှင်းသောပရောဖက်အပေါင်းတို့၏ နှုတ်အားဖြင့် ဟောပြောထားလေသည့် အရာခပ်သိမ်းတို့ကို ပြန်လည်ဆောင်ယူခြင်းသို့တိုင်အောင် သင်တို့နှင့် သင်တို့၏မျိုးရိုးမှတစ်ဆင့် ဆက်၍ တည်ရှိရပေမည်။

၁၁ ထို့ကြောင့်၊ သင်တို့သည် ဤယဇ်ပုရောဟိတ်အခွင့်အားဖြင့်၊ တပါးအမျိုးသားတို့အဖို့ အလင်းအဖြစ်၊ ငါ၏လူမျိုးဣသရေလအမျိုးအဖို့ ကယ်တင်ရှင်အဖြစ်၊ ငါ၏ကောင်းမြတ်ခြင်း၌ ဆက်၍ရှိကြလျှင် မင်္ဂလာရှိကြ၏။ ထိုသို့ကိုယ်တော်ရှင်မိန့်တော်မူလေ၏။ အာမင်။