ဩဝါဒနှင့် ပဋိညာဉ်များ ၁၂

အပိုဒ်ငယ် ၁၂

၁၈၂၉ ခု၊ မေလ၊ ဟာမိုနီ၊ ပန်ဆယ်လ်ဗေးနီးယား၌ ပရောဖက်ဂျိုးဇက်စမစ်အားဖြင့်၊ ဂျိုးဇက်နိုက်အကြီးသို့ ပေးတော်မူခဲ့သည့် ဗျာဒိတ်တော်။ ဂျိုးဇက်စမစ်၏ မော်မုန်ကျမ်းပုရပိုက်ပြားများပိုင်ဆိုင်ခြင်းနှင့် ထိုအချိန်က ဘာသာပြန်ခြင်းအမှု တိုးတက်ခြင်းအကြောင်း ကြေညာချက်များကို ဂျိုးဇက်နိုက်က ယုံကြည်လျက်၊ ဂျိုးဇက်စမစ်နှင့် သူ၏စာရေးသူကို ပစ္စည်းအကူအညီ အကြိမ်များစွာပေးခဲ့လေ၏။ ထိုသို့ပေးခြင်းက၊ သူတို့အား ဘာသာပြန်ခြင်းကို ဆက်၍ဆောင်ရွက်ဖို့ စွမ်းဆောင်နိုင်စေခဲ့၏။ ဂျိုးဇက်နိုက်၏ တောင်းဆိုခြင်းအားဖြင့်၊ ပရောဖက်သည် ကိုယ်တော်ရှင်ထံသို့ မေးလျှေက်၍၊ ဗျာဒိတ်တော်ကို ရရှိခဲ့၏။

၁–၆၊ စပျစ်ဥယျာဉ်၌ အလုပ်လုပ်ကြသောသူတို့သည် ကယ်တင်ခြင်းကို ရရှိကြလိမ့်မည်။ ၇–၉၊ အလိုရှိပြီး အရည်အချင်းပြည့်မီသောသူအပေါင်းသည် ကိုယ်တော်ရှင်၏အမှုတော်၌ ကူညီနိုင်ကြပေ၏။

၁ ကြီးမြတ်ပြီး အံ့ဩဖွယ်ကောင်းသောအမှုသည် လူသားတို့ ၌ ရောက်လာလုနီးပေပြီ။

၂ ရှုလော့၊ ငါသည် ဘုရားသခင်ဖြစ်၏။ ရှင်သန်၍ တန်ခိုးကြီးသော၊ အရိုးအဆစ်နှင့် ခြင်ဆီနှစ်ခုစလုံးကို အစိတ်စိတ်ကွဲစေသည့် နှစ်ဖက်သွားဓားထက် သာ၍ထက်သော ငါ၏နှုတ်ကပတ်တော်ကို ပမာဏပြုလော့။ ထို့ကြောင့် ငါ၏နှုတ်ကပတ်တော်ကို ပမာဏပြုလော့။

၃ ရှုလော့၊ လယ်ကွင်းသည် ရိတ်သိမ်းဖို့ အဆင်သင့်ဝင်းလျက်ရှိနှင့်လေပြီ။ ထိုကြောင့်၊ ရိတ်သိမ်းလိုသူမှန်သမျှအား၊ မိမိတံစဉ်ကို မိမိအစွမ်းသတ္တိဖြင့်၊ ရမ်းစေပြီး၊ အချိန်ရှိစဉ် ရိတ်စေလော့။ သူ၏စိတ်ဝိညာဉ်အတွက်၊ ဘုရားသခင်၏နိုင်ငံတော်၌ ထာဝရတည်မြဲသောကယ်တင်ခြင်းကို ထိုသူအမြတ်တနိုးသိမ်းဆည်းထားနိုင်စေကြောင်းပင်တည်း။

၄ ထိုမှတစ်ပါး၊ မိမိတံစဉ်ကို ရမ်း၍ ရိတ်မည့်သူမှန်သမျှသည် ဘုရားသခင်၏ ခေါ်သွင်းတော်မူခြင်းကို ခံရ၏။

၅ ထို့ကြောင့်၊ သင်တို့သည် ငါ့ထံမှ တောင်းကြလျှင်၊ ရကြလိမ့်မည်။ သင်တို့ ခေါက်ကြလျှင် သင်တို့အဖို့ ဖွင့်ပေးလိမ့်မည်။

၆ ယခုတွင်၊ သင်တို့တောင်းလေသည့်အတိုင်း၊ ရှုလော့၊ သင်တို့ကို ငါဆိုသည်ကား၊ ငါ၏ပညတ်တော်များကို စောင့်ထိန်းကြလော့။ ဇိအုန်၏အကျိုးကို ထူထောင်ပြီး တည်ဆောက်ဖို့ ကြိုးစားကြလော့။

၇ ရှုလော့၊ သင့်ထံသို့၊ ထို့အတူ ဤအမှုကို ထူထောင်ပြီး တည်ဆောက်ခြင်းငှာ အလိုဆန္ဒရှိကြသောသူအပေါင်းတို့ ထံသို့လည်း ငါမြွက်ဆို၏။

၈ နှိမ့်ချခြင်း၊ ချစ်ခြင်းနှင့်ပြည့်ဝ၍၊ ယုံကြည်ခြင်း၊ မျှော်လင့်ခြင်းနှင့် မေတ္တာရှိလျက်၊ မိမိ၏ဂရုစိုက်ခြင်းသို့ ယုံကြည်လွှဲအပ်မည့် အရာရာ၌ ဣန္ဒြေစောင့်သောသူမှတစ်ပါး အဘယ်သူမျှ ဤအမှု၌ မကူညီနိုင်။

၉ ရှုလော့၊ ငါသည် လောက၏အလင်းနှင့် အသက်ဖြစ်၏၊ ဤနှုတ်ကပတ်တော်များကို မြွက်ဆိုတော်မူသည့်သူဖြစ်၏၊ ထို့ကြောင့်၊ သင်၏အစွမ်းသတ္တိဖြင့် ပမာဏပြုလော့၊ ထို့နောက်တွင်၊ သင်သည် ခေါ်သွင်းခံရ၏။ အာမင်။