ဩဝါဒနှင့် ပဋိညာဉ်များ ၃၉

အပိုဒ်ငယ် ၃၉

၁၈၃၁ ခု၊ ဇန္နဝါရီလ ၅ ရက်၊ ဖရေးတီး၊ နယူးယောက်၌ ပရောဖက်ဂျိုးဇက်စမစ်အားဖြင့် ဂျိမ်းစ်ကိုဗယ်သို့ ပေးတော်မူခဲ့သည့် ဗျာဒိတ်တော်။ နှစ်ပေါင်းလေးဆယ်ခန့် မက်သဒစ်အမှုတော်ဆောင်တစ်ဦးဖြစ်ခဲ့ဖူးသူ ဂျိမ်းစ်ကိုဗယ်သည် ပရောဖက်ဂျိုးဇက်စမစ်အားဖြင့် သူ့ထံသို့ ကိုယ်တော်ရှင်ပေးတော်မူမည့် ပညတ်တော်မှန်သမျှကို နာခံမည့်အကြောင်း ကိုယ်တော်ရှင်နှင့် ပဋိညာဉ်ပြုခဲ့၏။

၁–၄၊ သန့်ရှင်းသူတို့သည် ဘုရားသခင်၏သားများဖြစ်လာစေဖို့ တန်ခိုးရှိကြ၏။ ၅–၆၊ ဧဝံဂေလိတရားတော်ကို လက်ခံခြင်းသည် ခရစ်တော်ကို လက်ခံခြင်းဖြစ်၏။ ၇–၁၄၊ ဂျိမ်းစ်ကိုဗယ်သည် ဗတ္တိဇံခံရန်နှင့် ကိုယ်တော်ရှင်၏စပျစ်ဥယျာဉ်၌ အလုပ်လုပ်ရန် မိန့်တော်မူခြင်းခံရ၏။ ၁၅–၂၁၊ ကိုယ်တော်ရှင်၏ကျွန်တို့သည် ဒုတိယအကြိမ်ကြွလာတော်မူခြင်းမတိုင်မီ ဧဝံဂေလိတရားတော်ကို ဟောပြောရမည်။ ၂၂–၂၄၊ ဧဝံဂေလိတရားတော်ကို လက်ခံသောသူတို့ကို ယခုကာလနှင့်ထာဝရကာလ၌ စုဝေးစေလိမ့်မည်။

၁ ထာဝရကာလတစ်ခုလုံးမှ ထာဝရကာလတစ်ခုလုံးသို့တိုင်အောင် ရှိတော်မူသည့် ငါဖြစ်သည် ဟူသည့် ကြီးစွာသောသူ၏၊ အကယ်စင်စစ်၊ ယေရှုခရစ်တော်၏ အသံကို စေ့စေ့နားထောင်၍ နာယူကြလော့—

၂ လောက၏အလင်းနှင့် အသက်ဖြစ်၏။ မှောင်မိုက်၌ တောက်ပသောအလင်းဖြစ်၍ မှောင်မိုက်သည် နားလည်ခြင်းမရှိ။

၃ အထွတ်အထိပ်ကာလ၌ ငါ၏အရပ်ဒေသသို့ ကြွလာတော်မူသောသူပင် ဖြစ်သော်လည်း ငါ၏လူမျိုးတို့သည် ငါ့ကိုလက်ခံခြင်းမရှိကြ။

၄ သို့ရာတွင်၊ ငါ့ကို လက်ခံသူမှန်သမျှအား ငါ၏သားများဖြစ်လာကြစေခြင်းငှာ၊ တန်ခိုးကို ငါပေးတော်မူ၏။ ထိုကဲ့သို့ပင်၊ ငါ့ကို လက်ခံမည့်သူမှန်သမျှအား ငါ၏သားများဖြစ်လာကြစေခြင်းငှာ၊ ငါတန်ခိုးပေးတော်မူမည်။

၅ သင့်ကို ငါအမှန်၊ အမှန်ဆိုသည်ကား၊ ငါ၏ဧဝံဂေလိတရားတော်ကို လက်ခံသောသူသည် ငါ့ကို လက်ခံ၏။ ငါ၏ဧဝံဂေလိတရားတော်ကို လက်ခံခြင်းမရှိသောသူသည် ငါ့ကို လက်ခံခြင်းမရှိ။

၆ ငါ၏ဤဧဝံဂေလိတရားတော်သည်ကား—နောင်တရခြင်းနှင့်ရေဖြင့်ဗတ္တိဇံ၊ ထို့နောက်တွင်၊ မီးဖြင့်လည်းကောင်း၊ အရာခပ်သိမ်းတို့ကိုပြပြီး၊ နိုင်ငံတော်၏ငြိမ်းချမ်းသောအရာများကို သွန်သင်သည့် သန့်ရှင်းသောဝိညာဉ်တော်တည်းဟူသော နှစ်သိမ့်စေသောသူဖြင့်လည်းကောင်းဗတ္တိဇံ ဖြစ်လာ၏။

၇ ယခုမူကား၊ ရှုလော့၊ သင့်ကို ငါဆိုသည်ကား၊ ငါ့ကျွန်ဂျိမ်းစ်၊ ငါသည် သင်၏အမှုများကို ကြည့်ရှုတော်မူ၍ ငါသည် သင့်ကို သိ၏။

၈ သင့်ကို ငါအမှန်ဆိုသည်ကား၊ သင်၏စိတ်နှလုံးသည် ဤအချိန်တွင် ငါ့ရှေ့၌ ယခုဖြောင့်မတ်၏။ ထို့အတူ၊ ရှုလော့၊ ငါသည် ကြီးစွာသောကောင်းချီးမင်္ဂလာများကို သင့်ဦးခေါင်းပေါ် ပေးတော်မူလေပြီ။

၉ သို့သော်လည်း၊ သင်သည် ကြီးစွာသောဝမ်းနည်းခြင်းကို ခံစားရလေပြီ။ အကြောင်းမူကား၊ သင်သည် မာနနှင့် လောကီစိုးရိမ်မှုများကြောင့် ငါ့ကို အကြိမ်များစွာ ငြင်းပယ်လေပြီ။

၁၀ သို့ရာတွင်၊ ရှုလော့၊ သင့်ကို မိန့်တော်မူလေသည့် ထ၍ ဗတ္တိဇံခံလော့၊ ထို့အတူ သင်၏အပြစ်များကို ဆေးကြောလော့၊ ငါ၏နာမတော်ကို ပတ္ထနာပြုလျက်နေလော့၊ ငါ၏ဝိညာဉ်တော်ကို၊ ထို့အတူ၊ သင်အဘယ်သောအခါကမျှမသိလေသည့် အလွန်ကြီးစွာသော ကောင်းချီးမင်္ဂလာကို လက်ခံရရှိလိမ့်မည် ဟုဆိုသည့် ငါ၏အသံကို စေ့စေ့နားထောင်လျှင်၊ သင်၏ လွတ်မြောက်ရာကာလ ကျရောက်လာ၏။

၁၁ သင်သည် ဤအမှုကို လုပ်ဆောင်လျှင်၊ ငါသည် သင့်ကို သာ၍ကြီးစွာသောအမှုအတွက် ပြင်ဆင်တော်မူလေပြီ။ ဤနောက်ဆုံးသောကာလ၌ ငါစေလွှတ်လေသည့် ငါ၏ဧဝံဂေလိတရားတော်အပြည့်အစုံ၊ ဣသရေလအမျိုးသားများဖြစ်သော ငါ၏လူမျိုးတို့ကို ကယ်ယူဖို့ ငါစေလွှတ်သည့် ပဋိညာဉ်ကို သင်ဟောပြောရမည်။

၁၂ ဤသို့အားဖြင့်အချိန်တန်လာလတ္တံ့သောအခါ တန်ခိုးသည် သင့်ပေါ်မှာ ကျိန်းဝပ်လိမ့်မည်။ သင့်မှာ ကြီးစွာသော ယုံကြည်ခြင်းရှိလိမ့်မည်။ ငါသည်လည်း သင်နှင့်အတူရှိတော်မူပြီး၊ သင့်ရှေ့မှ ကြွတော်မူမည်။

၁၃ သင်သည် ငါ၏စပျစ်ဥယျာဉ်ထဲမှာ အလုပ်လုပ်စေဖို့၊ ထို့အတူ ငါ၏အသင်းတော်ကို တည်ဆောက်စေဖို့၊ ထို့အတူ ဇိအုန်ကို တောင်ကုန်းပေါ်မှာ ရွှင်လန်းဝမ်းမြောက်ပြီး ဖွံ့ဖြိုးတိုးတက်စေကြောင်း တည်ဆောက်စေဖို့ ခေါ်သွင်းတော်မူခြင်း ခံရ၏။

၁၄ ရှုလော့၊ သင့်ကို ငါအမှန်၊ အမှန်ဆိုသည်ကား၊ သင်သည် အရှေ့ပိုင်းတိုင်းပြည်များထဲသို့ သွားစေဖို့ ခေါ်သွင်းမခံရ၊ သို့ရာတွင်၊ အိုဟိုင်းရိုသို့ သွားစေဖို့ ခေါ်သွင်းခံရ၏။

၁၅ ငါ၏လူမျိုးတို့သည် အိုဟိုင်းရို၌ သူတို့ကိုယ်သူတို့ စည်းဝေးကြသမျှ၊ လူသားတို့၌ မသိဖူးသေးသော ကောင်းချီးမင်္ဂလာကို ငါသိမ်းထားလေပြီး၊ သူတို့ဦးခေါင်းပေါ်မှာ သွန်းလောင်းတော်မူမည်။ ထိုအရပ်မှနေ၍၊ လူတို့သည် ခပ်သိမ်းသောပြည်များထဲသို့ ထွက်သွားကြရလိမ့်မည်။

၁၆ ရှုလော့၊ သင်တို့ကို ငါအမှန်၊ အမှန်ဆိုသည်ကား၊ ပြည်သားတို့အပေါ် တရားစီရင်တော်မူရာတွင် ငါ၏လက်တော်ကို ငါရုပ်သိမ်းလိမ့်မည်ဟု အိုဟိုင်းရို၌ရှိသောလူတို့စဉ်းစားလျက် များစွာသောယုံကြည်ခြင်းနှင့် ငါ့ကို ပတ္ထနာပြုကြသော်လည်း ငါ၏နှုတ်ကပတ်တော်ကို ငါမငြင်းဆိုနိုင်။

၁၇ သို့ဖြစ်၍ သင်၏အစွမ်းသတ္တိရှိသမျှနှင့် ကြိုးစားလော့၊ သစ္စာရှိသောအလုပ်လုပ်သူများကို ငါ၏စပျစ်ဥယျာဉ်ထဲသို့ ခေါ်သွင်းလော့။ နောက်ဆုံးအကြိမ်အဖြစ် သုတ်သင်နိုင်ခြင်းငှာပေတည်း။

၁၈ သူတို့သည် နောင်တရကြပြီး ငါ၏ဧဝံဂေလိတရားတော်အပြည့်အစုံကို လက်ခံရရှိကြလျက်၊ သန့်ရှင်းစင်ကြယ်လာစေကြသမျှ၊ တရားစီရင်တော်မူရာတွင် ငါ၏လက်တော်ကို ငါရုပ်သိမ်းလိမ့်မည်။

၁၉ သို့ဖြစ်၍၊ ထွက်သွားလော့၊ ကျယ်သောအသံနှင့်ဆို၍၊ ကောင်းကင်နိုင်ငံတော်တည်လုနီးပြီဟု ဟစ်ကြွေးလော့။ ဟောရှဏ္ဏဖြစ်စေသတည်း။ အမြင့်ဆုံးသောဘုရားသခင်၏နာမတော်သည် မင်္ဂလာရှိပါစေသတည်းဟု ဟစ်ကြွေးလော့။

၂၀ ထွက်သွားပြီး ရေနှင့်ဗတ္တိဇံပေးလော့၊ ငါကြွလာတော်မူသည့်အချိန်အတွက် ငါ့ရှေ့မှာ လမ်းကို ပြင်ဆင်လော့။

၂၁ အကြောင်းမူကား၊ အချိန်သည် နီးကပ်လာပေပြီ။ နေ့ကိုဖြစ်စေ၊ အချိန်နာရီကိုဖြစ်စေ အဘယ်သူမျှမသိ။ သို့ရာတွင်၊ ဧကန်အမှန်ကျရောက်လာလိမ့်မည်။

၂၂ ဤအရာတို့ကို လက်ခံသောသူသည် ငါ့ကို လက်ခံ၏။ ထိုသူတို့ကိုလည်း ယခုကာလနှင့် ထာဝရကာလ၌ ငါ့ထံသို့ စုဝေးစေလိမ့်မည်။

၂၃ ထိုမှတစ်ဖန်၊ အချိန်တန်လာလတ္တံ့သောအခါ၊ ရေဖြင့် သင်တို့ဗတ္တိဇံပေးမည့်သူမှန်သမျှအပေါ်၊ သင်တို့၏လက်ကို တင်ရမည်။ သူတို့သည်လည်း သန့်ရှင်းသောဝိညာဉ်တော်၏ဆုကျေးဇူးကို လက်ခံရရှိလျက်၊ ငါကြွလာတော်မူခြင်း၏နိမိတ်လက္ခဏာတို့ကို မျှော်လင့်နေကြလိမ့်မည်။ ငါ့ကို သိကြလိမ့်မည်။

၂၄ ရှုလော့၊ ငါသည် အလျင်အမြန်လာမည်။ ထိုကဲ့သို့ပင်တည်း။ အာမင်။