ဩဝါဒနှင့် ပဋိညာဉ်များ ၃၀

အပိုဒ်ငယ် ၃၀

၁၈၃၀ ခု၊ စက်တင်ဘာလ၊ ဖရေးတီး၌ သုံးရက်ကြာအထွေထွေညီလာခံပြီးသော်လည်း အသင်းတော်၏အသင်းလူကြီးများ မခွဲခွာကြမီ၊ ဖရေးတီး၊ နယူးယောက်၌ ပရောဖက်ဂျိုးဇက်စမစ်အားဖြင့်၊ ဒေးဗစ်ဝှစ်တမာ၊ ပီတာဝှစ်တမာအငယ်နှင့် ဂျွန်ဝှစ်တမာသို့ ပေးတော်မူခဲ့သည့်ဗျာဒိတ်တော်။ မူလအားဖြင့်၊ ဤအကြောင်းအရာကို ဗျာဒိတ်တော်သုံးခုအဖြစ် ပုံနှိပ်ထုတ်ဝေခဲ့၏။ ဩဝါဒနှင့်ပဋိညာဉ်များ ၁၈၃၅ ခုနှစ်မူအတွက် ပရောဖက်ဂျိုးဇက်စမစ်က ၎င်းကို အပိုဒ်ငယ်တစ်ခုအဖြစ် ပေါင်းစပ်ခဲ့၏။

၁–၄၊ ဒေးဗစ်ဝှစ်တမာသည် လုံ့လဝီရိယထက်သန်စွာအစေခံဖို့ ပျက်ကွက်ခြင်းအတွက် ဆုံးမခံရ၏။ ၅–၈၊ ပီတာဝှစ်တမာအငယ်သည် လာမန်အမျိုးသားများသို့ သာသနာပြုခြင်းတွင် အော်လီဗာကောင်ဒရီနှင့် အတူလိုက်ပါရမည်။ ၉–၁၁၊ ဂျွန်ဝှစ်တမာသည် ဧဝံဂေလိတရားတော်ကို ဟောပြောဖို့ ခေါ်သွင်းခံရ၏။

၁ ရှုလော့၊ သင့်ကို ငါဆိုသည်ကား၊ ဒေးဗစ်၊ သင်သည်လူသားကို ကြောက်လေပြီ၊ ခွန်အားအတွက် ငါ့ကို အားကိုးသင့်ပါလျက် အားမကိုးလေပြီ။

၂ သင့်စိတ်သည် သင်၏ဖန်ဆင်းရှင်ငါ၏အရာများ၊ ထို့အတူ၊ သင်ခေါ်သွင်းခံရလေသည့် အမှုတော်ဆောင်ခြင်းအပေါ်မှာထက်၊ မြေကြီးအရာတို့အပေါ်မှာရှိလေပြီ။ သင်သည် ငါ၏ဝိညာဉ်တော်ကိုလည်းကောင်း၊ သင့်အထက်မှာခန့်ထားသောသူတို့ကိုလည်းကောင်း ပမာဏမပြုကြ။ သို့ရာတွင်၊ ငါမိန့်တော်မမူလေသောသူတို့အားဖြင့် ဖျောင်းဖျခံလေပြီ။

၃ သို့ဖြစ်၍၊ သင်သည် ငါ့ထံမှ သင်ကိုယ်တိုင်မေးလျှောက်စေဖို့၊ ထို့အတူ သင်လက်ခံရရှိလေသည့် အရာတို့ကို မှတ်ကျုံး၍၊ စဉ်းစားဆင်ခြင်စေဖို့ ချန်ထားခံရ၏။

၄ သင့်အား နောက်ထပ်ပညတ်တော်များ ငါပေးသည့်အချိန်အထိ၊ သင်၏နေအိမ်သည် သင့်အဘ၏အိမ်မှာ ဖြစ်လိမ့်မည်။ သင်သည် အသင်းတော်၌၊ ထို့အတူ၊ လောကရှေ့၌၊ ထို့အတူ၊ ပတ်ဝန်းကျင်ဒေသတို့၌ အမှုတော်ဆောင်ခြင်းကို ဆောင်ရွက်ရမည်။ အာမင်။

၅ ရှုလော့၊ သင့်ကို ငါဆိုသည်ကား၊ ပီတာ၊ သင်သည် သင်၏ညီအစ်ကို အော်လီဗာနှင့်အတူ ခရီးသွားရမည်။ အကြောင်းမူကား၊ သင်သည် ငါ၏ဧဝံဂေလိတရားတော်ကို ဟောကြားခြင်းငှာ သင်၏နှုတ်ကိုဖွင့်ရန် ငါ့အဖို့ သင့်လျော်သည့်အချိန် ကျရောက်လာ၏။ ထို့ကြောင့်၊ ကြောက်ခြင်းမရှိနှင့်။ သို့ရာတွင်၊ သင့်အား သင်၏ညီအစ်ကို ဖော်ပြမည့် စကားများနှင့် အကြံကို ပမာဏပြုလော့။

၆ သူ၏ခပ်သိမ်းသောဆင်းရဲဒုက္ခများ၌ သင်ဒုက္ခခံစားလော့၊ သူနှင့် သင်၏လွတ်မြောက်ခြင်းအတွက်၊ ဆုတောင်းခြင်းနှင့် ယုံကြည်ခြင်းဖြင့်၊ သင်၏စိတ်နှလုံးကို ငါ့ထံသို့ အစဉ်အမြဲချီကြွလော့။ အကြောင်းမူကား၊ လာမန်အမျိုးသားတို့၌ ငါ၏အသင်းတော်ကို တည်ဆောက်စေဖို့တန်ခိုးကို သူ့အား ငါပေးတော်မူလေပြီ။

၇ အသင်းတော်အမှုများနှင့်စပ်လျဉ်း၍၊ သူ၏ညီအစ်ကို ဂျိုးဇက်စမစ်အငယ်မှတစ်ပါး၊ အသင်းတော်တွင်၊ သူ့အထက်၌ အဘယ်သူ့ကိုမျှ သူ၏တိုင်ပင်ဖက်အဖြစ် ငါမခန့်အပ်။

၈ သို့ဖြစ်၍၊ ဤအရာတို့ကို ပမာဏပြုကြလော့၊ ငါ၏ပညတ်တော်များကို စောင့်ထိန်းရာ၌ လုံ့လဝီရိယရှိလော့။ သင်သည် ထာဝရအသက်အထိ ကောင်းချီးခံစားရလိမ့်မည်။ အာမင်။

၉ ရှုလော့၊ သင့်ကို ငါဆိုသည်ကား၊ ငါ့ကျွန်ဂျွန်၊ သင်သည် ယခုအချိန်မှစ၍ ငါ၏ဧဝံဂေလိတရားတော်ကို တံပိုးသံကဲ့သို့ ကြေညာဖို့ စတင်ရမည်။

၁၀ သင်၏အလုပ်သည် သင်၏ညီအစ်ကို ဖိလစ်ဘာရော့ဖ်၏အရပ်၌ရှိရမည်။ ထိုပတ်ဝန်းကျင်ဒေသ၌၊ အထူးသဖြင့်၊ သင့်ကိုကြားနာနိုင်ရာ အရပ်မှန်သမျှ၌၊ ဤအရပ်မှသွားစေဖို့ သင့်ကို ငါမိန့်တော်မူသည့်တိုင်အောင် ရှိရမည်။

၁၁ သင်၏အလုပ်တစ်ခုလုံးသည် ယခုမှစ၍ သင်၏အလုံးစုံသောစိတ်ဝိညာဉ်နှင့်အတူ ဇိအုန်၌ ရှိရမည်။ ထိုမှတစ်ပါး၊ သင်သည် လူပြုနိုင်သည့်အရာကို ကြောက်ခြင်းမရှိဘဲ၊ ငါ၏အမှုတော်၌ သင်၏နှုတ်ကို အစဉ်အမြဲဖွင့်ရမည်။ အကြောင်းမူကား၊ ငါသည် သင်နှင့်အတူရှိတော်မူ၏။ အာမင်။