ဩဝါဒနှင့် ပဋိညာဉ်များ ၅၄

အပိုဒ်ငယ် ၅၄

၁၈၃၁ ခု၊ ဇွန်လ ၁၀ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့်၊ နီဝယ်လ်နိုက်သို့ ပေးတော်မူခဲ့သည့် ဗျာဒိတ်တော်။ သောင်ပဆင်၊ အိုဟိုင်းရို၌ နေထိုင်ကြသည့် အသင်းတော်အသင်းသားများသည် ဥစ္စာပစ္စည်းများဆက်ကပ်ခြင်းနှင့် စပ်လျဉ်းသည့် အကြောင်းကိစ္စများကြောင့် သဘောထားကွဲပြားကြလေ၏။ တစ်ကိုယ်ကောင်းဆန်ခြင်းနှင့် လောဘကြီးခြင်းတို့ကို ထင်ရှားစွာပြ၏။ လေမန်ကိုပလေးသည် ရှိတ်ကာများဆီသို့ သူ၏သာသနာပြုခြင်းနောက်တွင် (အပိုဒ်ငယ် ၄၉ ခေါင်းစဉ်တွင် ကြည့်ပါ)၊ ကိုးလ်စဗီလ်၊ နယူးယောက်မှ ရောက်ရှိလာသော သန့်ရှင်းသူများအတွက် နေထိုင်ရာနေရာအဖြစ် သူ၏ကြီးမားသောလယ်ကွင်းကို ဆက်ကပ်ခြင်းပဋိညာဉ်ကို ချိုးဖောက်ခဲ့လေ၏။ အကျိုးဆက်အဖြစ်၊ နီဝယ်လ်နိုက် (သောင်ပဆင်၌ နေထိုင်ကြသည့်အသင်းသားတို့၏ ခေါင်းဆောင်) နှင့် အခြားသော အသင်းလူကြီးတို့သည် မည်သို့ဆက်၍ဆောင်ရွက်ရမည့်အကြောင်း မေးလျက် ပရောဖက်ထံလာခဲ့ကြ၏။ ပရောဖက်သည် ကိုယ်တော်ရှင်ထံသို့ မေးလျှောက်၍၊ သောင်ပဆင်ရှိအသင်းသားတို့ လေမန်ကိုပလေး၏လယ်ကွင်းကို စွန့်ခွာပြီး၊ မစ်ဆိုရီသို့ ခရီးသွားရမည့်အကြောင်း ဤဗျာဒိတ်တော်ကို ရရှိခဲ့၏။

၁–၆၊ သန့်ရှင်းသူတို့သည် ကရုဏာကို ရရှိရန် ဧဝံဂေလိတရားတော်ပဋိညာဉ်များကို စောင့်ထိန်းကြရမည်။ ၇–၁၀၊ သူတို့သည် အတိဒုက္ခ၌ သည်းခံတတ်ရမည်။

၁ ရှုလော့၊ အာလဖနှင့် ဩမေဃပင်ဖြစ်သည့်၊ အစနှင့်အဆုံးဖြစ်သည့်၊ လောကီသားတို့၏ အပြစ်များအတွက် လက်ဝါးကပ်တိုင်မှာ ကွပ်မျက်ခံရလေသူပင်ဖြစ်သည့် ကိုယ်တော်ရှင်မိန့်တော်မူသည်ကား—

၂ ရှုလော့၊ သင့်ကို ငါအမှန်၊ အမှန်ဆိုသည်ကား၊ ငါ့ကျွန်နီဝယ်လ်နိုက်၊ သင်သည် ငါခန့်အပ်လေသည့် အမှုအရာ၌ မြဲမြံစွာတည်ရမည်။

၃ သင်၏ညီအစ်ကိုတို့သည် သူတို့ရန်သူများထံမှ လွတ်မြောက်လိုကြလျှင်၊ သူတို့၏ခပ်သိမ်းသောအပြစ်များမှ နောင်တရစေပြီး၊ ငါ့ရှေ့၌ အမှန်ပင်နှိမ့်ချ၍၊ ကြေကွဲလာကြစေလော့။

၄ ငါနှင့် သူတို့ပြုလေသည့် ပဋိညာဉ်သည် ကျိုးပေါက်လေသဖြင့်၊ ထိုကဲ့သို့ပင်၊ အချည်းနှီးဖြစ်လာပြီး၊ အကျိုးမရှိဖြစ်လာ၏။

၅ ဤမှားယွင်းစရာအကြောင်းကို ဖြစ်စေသောသူသည် အမင်္ဂလာရှိ၏။ အကြောင်းမူကား၊ ထိုသူသည် ပင်လယ်ရေနက်၌ နစ်မြုပ်ခဲ့လေလျှင် သာ၍ကောင်းပေ၏။

၆ သို့ရာတွင်၊ ပဋိညာဉ်ကို စောင့်ထိန်းပြီး၊ ပညတ်တော်ကို ကျင့်စောင့်သောသူတို့သည် မင်္ဂလာရှိ၏၊ အကြောင်းမူကား၊ သူတို့သည် သနားခြင်းကို ခံကြရလိမ့်မည်။

၇ သို့ဖြစ်၍၊ သင်တို့အပေါ် သင်တို့ရန်သူများကျရောက်မလာစေခြင်းငှာ၊ ယခုသွားကြ၍၊ ထိုပြည်သို့ ထွက်ပြေးကြလော့၊ ခရီးသွားကြလော့၊ သင်တို့၏ခေါင်းဆောင်အဖြစ်၊ သင်တို့အတွက် ငွေကိုပေးရန် သင်တို့ခန့်အပ်လိုသူကို ခန့်အပ်ကြလော့။

၈ ထိုကဲ့သို့အားဖြင့်၊ သင်တို့သည် အနောက်ဘက်လားရာ ဒေသများထဲသို့ မစ်ဆိုရီပြည်သို့၊ လာမန်အမျိုးသားတို့၏နယ်နိမိတ်သို့ ခရီးသွားကြရမည်။

၉ သင်တို့ခရီးသွားလေပြီးနောက်တွင်၊ ရှုလော့၊ သင်တို့ကို ငါဆိုသည်ကား၊ သင်တို့အတွက် နေစရာအရပ်ကို ငါပြင်ဆင်သည့်အချိန်အထိ၊ လူသားသဘာဝအတိုင်း သင်တို့ အသက်မွေးဖို့ ကြိုးစားအားထုတ်ကြလော့။

၁၀ ထိုမှတစ်ဖန်၊ ငါကြွရောက်လာတော်မူသည့် အချိန်အထိ၊ အတိဒုက္ခ၌ သည်းခံ ကြလော့။ ထို့အတူ၊ ရှုလော့၊ ငါသည် လျင်မြန်စွာကြွရောက်လာတော်မူမည်၊ ငါ၏အကျိုးကျေးဇူးသည်လည်း ငါနှင့်အတူ ရှိ၏။ ငါ့ကို ရှေးဦးစွာရှာလေသောသူတို့သည် မိမိတို့စိတ်ဝိညာဉ်၏ချမ်းသာခြင်းကိုတွေ့ရှိလိမ့်မည်။ ထိုကဲ့သို့ပင်တည်း။ အာမင်။