ဩဝါဒနှင့် ပဋိညာဉ်များ ၄၁

အပိုဒ်ငယ် ၄၁

၁၈၃၁ ခု၊ ဖေဖော်ဝါရီလ ၄ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် အသင်းတော်သို့ ပေးတော်မူခဲ့သည့်ဗျာဒိတ်တော်။ ပရောဖက်နှင့် အသင်းတော်အသင်းလူကြီးတို့အား ဘုရားသခင်၏”ပညတ်တရား”ကို လက်ခံရရှိဖို့ ဆုတောင်းရန် ဤဗျာဒိတ်တော်က သွန်သင်၏ (အပိုဒ်ငယ် ၄၂ တွင်ကြည့်ပါ)။ ဂျိုးဇက်စမစ် နယူးယောက်မှ ကာ့တ်လန်းသို့ရောက်ပြီးခဏတွင် သောင်ပ်ဆင်အနီး၊ အိုဟိုင်းရိုရှိ အသင်းတော်အသင်းသားတစ်ဦး၊ လေမန်ကိုပလေးက “ညီအစ်ကိုဂျိုးဇက်နှင့် [ဆစ်ဒနီရစ်ဂဒွန်]အား… သူနှင့်အတူ နေထိုင်ဖို့ တောင်းဆိုခဲ့ပြီး၊ သူတို့ကို အိမ်နှင့် ရိက္ခာများ ထောက်ပံ့လိုခဲ့၏။” အောက်ပါဗျာဒိတ်တော်က ဂျိုးဇက်နှင့် ဆစ်ဒနီ မည်သည့်နေရာတွင် နေရမည့်အကြောင်း ထင်ရှားစေပြီး၊ အက်ဒဝါ့ပါ့ထရစ်ဂ်ျကို အသင်းတော်၏ပထမဦးဆုံးသင်းအုပ်အဖြစ်ခေါ်သွင်း၏။

၁–၃၊ အသင်းလူကြီးများသည် အသင်းတော်ကို ဗျာဒိတ်တော်ဝိညာဉ်ဖြင့် အုပ်ချုပ်ကြ၏။ ၄–၆၊ မှန်သောတပည့်တော်တို့သည် ကိုယ်တော်ရှင်၏ပညတ်တရားများကို လက်ခံရရှိပြီး စောင့်ထိန်းကြလိမ့်မည်။ ၇–၁၂၊ အက်ဒဝါ့ပါ့ထရစ်ဂ်ျကို အသင်းတော်အဖို့ သင်းအုပ်တစ်ဦးအဖြစ် ခန့်ထား၏။

၁ စေ့စေ့နားထောင်၍ နာယူကြလော့၊ အို အသင် ငါ၏လူမျိုးတို့၊ ကိုယ်တော်ရှင်၊ သင်တို့၏ဘုရားသခင် မိန့်တော်မူသည်ကား၊ ငါနှစ်သက်သောသူများ၊ ငါ့ကို ကြားနာသောသူများကို ကောင်းချီးမင်္ဂလာအပေါင်းတို့အထဲမှ အကြီးမြတ်ဆုံးဖြင့် ကောင်းချီးပေးတော်မူမည်။ ငါ့ကို ကြားနာခြင်းမရှိသောသူများ၊ ငါ၏နာမတော်၌ရှိယောင်ဆောင်သောသူများကို ကျိန်ခြင်းအမင်္ဂလာအပေါင်းတို့အထဲမှ အပြင်းထန်ဆုံးဖြင့် ကျိန်တော်မူမည်။

၂ စေ့စေ့နားထောင်ကြလော့၊ အို ငါခေါ်သွင်းတော်မူလေသည့်သူတည်းဟူသော ငါ့အသင်းတော်မှ အသင် အသင်းလူကြီးတို့၊ ရှုလော့၊ ငါသည် သင်တို့ငါ၏နှုတ်ကပတ်တော်၌ သဘောညီညွတ်ကြစေခြင်းငှာ သင်တို့ကိုယ်သင်တို့ အတူတကွ စည်းဝေးကြစေကြောင်း သင်တို့အား ပညတ်တော်ကို ပေး၏။

၃ သင်တို့သည် ငါ၏အသင်းတော်ကို အုပ်ချုပ်တတ်စေဖို့နှင့် ခပ်သိမ်းသောအရာတို့ကို ငါ့ရှေ့၌ သင့်လျော်စွာရှိစေဖို့ သင်တို့ယုံကြည်ခြင်း၏ဆုတောင်းခြင်းအားဖြင့်၊ ငါ၏ဥပဒေကို လက်ခံရရှိကြလိမ့်မည်။

၄ ငါကြွလာတော်မူသောအခါ ငါသည် သင်တို့၏အုပ်စိုးသူဖြစ်လိမ့်မည်။ ရှုဦးလော့၊ ငါသည် လျင်မြန်စွာကြွလာတော်မူ၏။ ငါ၏ပညတ်တရားကို ထိန်းသိမ်းထားကြောင်း သင်တို့မြင်ကြရလိမ့်မည်။

၅ အကြင်သူသည် ငါ၏ပညတ်တရားကို လက်ခံရရှိပြီး စောင့်ထိန်း၏၊ ထိုသူသည် ငါ၏တပည့်တော်ဖြစ်၏။ အကြင်သူသည် လက်ခံရရှိသည်ဟုဆိုပြီး စောင့်ထိန်းခြင်းမရှိ၊ ထိုသူသည် ငါ၏တပည့်တော်မဟုတ်။ သင်တို့အထဲမှ နှင်ထုတ်ခံရလိမ့်မည်။

၆ အကြောင်းမူကား၊ နိုင်ငံတော်သားများ ပိုင်သောအရာတို့ကို မထိုက်တန်သောသူတို့အား၊ သို့မဟုတ် ခွေးတို့အား မပေးအပ်။ ပုလဲကို ဝက်တို့ရှေ့မှာ ချမထားအပ်။

၇ ထိုမှတစ်ဖန်၊ ငါ့ကျွန်ဂျိုးဇက်စမစ်အငယ်အတွက် နေထိုင်ဖို့နှင့် ဘာသာပြန်ဖို့ အိမ်တစ်လုံးကို ဆောက်ပေးအပ်၏။

၈ ထိုမှတစ်ဖန်၊ ငါ့ကျွန်ဆစ်ဒနီရစ်ဂဒွန်သည် ငါ၏ပညတ်တော်များကို စောင့်ထိန်းသမျှ၊ ကောင်းမြတ်သည်ဟု မှတ်ယူသည့်အတိုင်း နေထိုင်ရမည်။

၉ ထိုမှတစ်ဖန်၊ ငါ့ကျွန်အက်ဒဝါ့ပါ့ထရစ်ဂ်ျကို ငါခေါ်သွင်းတော်မူလေပြီ။ သူသည် အသင်းတော်၏ မဲဆန္ဒအားဖြင့် ခန့်အပ်ခံရ၊ အသင်းတော်အဖို့ သင်းအုပ်အဖြစ် ခန့်ထားခံရမည့်အကြောင်း၊ သူ၏အချိန်အားလုံးကို အသင်းတော်၏အလုပ်လုပ်ခြင်း၌ သုံးစေဖို့ သူ၏ကုန်သွယ်ခြင်းကို ချန်ထားစေဖို့ ပညတ်တော်ကို ငါပေး၏။

၁၀ ငါ၏ပညတ်တရားများကို ပေးတော်မူရာကာလ၌ သူခန့်အပ်ထားခံရမည့်အတိုင်း ခပ်သိမ်းသောအရာတို့ကို ကြည့်ရှုစေခြင်းငှာလည်းဖြစ်၏။

၁၁ ဤသို့ဖြစ်ရသည်မှာ သူ၏စိတ်နှလုံးသည် ငါ့ရှေ့၌ စင်ကြယ်သောကြောင့်ဖြစ်၏။ အကြောင်းမူကား၊ သူသည် လှည့်စားခြင်းအပြစ်ကင်းလွတ်သော ရှေးက နာသနေလကဲ့သို့ပင်ဖြစ်၏။

၁၂ ဤနှုတ်ကပတ်တော်တို့ကို သင်တို့အား ပေးထား၏။ ထိုအရာတို့သည် ငါ့ရှေ့၌ စင်ကြယ်၏။ သို့ဖြစ်၍၊ သင်တို့သည် ထိုအရာတို့ကို အဘယ်သို့ မှတ်ယူသည်ကို သတိပြုကြလော့။ အကြောင်းမူကား၊ တရားစီရင်တော်မူရာနေ့၌ ထိုအရာတို့သည် သင်တို့၏စိတ်ဝိညာဉ်များအပေါ် ကျရောက်လိမ့်မည်။ ထိုကဲ့သို့ပင်တည်း။ အာမင်။