ဩဝါဒနှင့် ပဋိညာဉ်များ ၉၁

အပိုဒ်ငယ် ၉၁

၁၈၃၃ ခု၊ မတ်လ ၉ ရက်၊ ကာ့တ်လန်း၊ အိုဟိုင်းရို၌ ပရောဖက်ဂျိုးဇက်စမစ်အားဖြင့် ပေးတော်မူခဲ့သည့် ဗျာဒိတ်တော်။ ပရောဖက်သည် ဤအချိန်၌ ဓမ္မဟောင်းကျမ်းဘာသာပြန်ခြင်းနှင့် အလုပ်များလျက်ရှိ၏။ လျှို့ဝှက်စာဟုခေါ်ကြသည့် ရှေးစာများအပိုင်းသို့ ရောက်သောအခါ၊ သူသည် ကိုယ်တော်ရှင်ထံ မေးလျှောက်၍ ဤသွန်သင်ချက်ကို ရရှိ၏။

၁–၃၊ လျှို့ဝှက်စာကို များသောအားဖြင့် မှန်ကန်စွာဘာသာပြန်ထားသော်လည်း မမှန်သည့်အရာများတည်းဟူသော၊ လူတို့၏လက်ဖြင့် ကြားဖြတ်ဖြည့်စွက်ခြင်းများစွာပါဝင်၏။ ၄–၆၊ ထိုစာသည် ဝိညာဉ်တော်အားဖြင့် အလင်းသို့ရောက်သူများကို အကျိုးရှိစေ၏။

၁ လျှို့ဝှက်စာနှင့်စပ်လျဉ်း၍ သင်တို့ကို ကိုယ်တော်ရှင် အမှန်မိန့်တော်မူသည်ကား—ထိုစာ၌ မှန်ကန်သည့်အရာ များစွာရှိ၏၊ များသောအားဖြင့် မှန်ကန်စွာ ဘာသာပြန်ထား၏။

၂ ထိုစာတွင်၊ လူတို့၏လက်ဖြင့် ကြားဖြတ်ဖြည့်စွက်ခြင်းများဖြစ်သည့် မမှန်သောအရာများစွာ ပါဝင်၏။

၃ သင့်ကို ငါအမှန်ဆိုသည်ကား၊ လျှို့ဝှက်စာကို ဘာသာပြန်ဖို့ မလိုအပ်။

၄ ထို့ကြောင့်၊ ၎င်းကို ဖတ်ရှုသူမှန်သမျှအား နားလည်စေလော့၊ အကြောင်းမူကား၊ ဝိညာဉ်တော်သည် သမ္မာတရားကို ထင်ရှားစွာပြ၏။

၅ ဝိညာဉ်တော်အားဖြင့် အလင်းသို့ရောက်သူမှန်သမျှသည် ၎င်းထံမှ အကျိုးကို ရရှိလိမ့်မည်။

၆ ဝိညာဉ်တော်အားဖြင့် ရရှိခြင်းမရှိသူမှန်သမျှသည် အကျိုးမရှိနိုင်။ ထို့ကြောင့်၊ ၎င်းစာကို ဘာသာပြန်ဖို့ မလိုအပ်။ အာမင်။